Asan’ny Apostoly
21 Tsy nifankafoy mihintsy zahay, fe tsy maintsy nandeha. Le nangalaky sambo zahay bakeo namanta a Kosy any, le hamarain’iny amy zay nandeha a Rodo any. Niala tao ndraiky zahay le nandeha a Patara any. 2 Nahita sambo ho a Fenisia any zahay le niondra ka nandeha. 3 Lafa nahajilo an’ny nosy Sipra ta ankavianay eo zahay, le nandalo avao ka nanohy ty lianay nana a Syria any. Le nijano ta Tyro ao zahay, satria nampijotso enta tao sambo iny. 4 Nilànay mpianatsy rey ka nihitanay, le nijano tao fito andro zahay. Fe nitarihin’ny fanahy masy mpianatsy rey ka nivola matetiky tamy Paoly mba tsy handeha a Jerosalema any. 5 Lafa tampitsy ty fotoa nijanonanay tao, le nanohy ty lianay zahay. Fe nanatitsy anay zisiky ambalikin’ny tanà iny any rozy iaby, ndre ajà zay ndre ampela. Le nandohaliky tamy fasy amoron-driaky eo zahay ka nivavaky, 6 le nifanao veloma. Bakeo nilitsy anaty sambo ao zahay, fa rozy nandeha noly.
7 Le niondra sambo baka a Tyro ao zahay, ka niavy ta Ptolemaisy any. Le niarahaba an’ny rahalahy rey zahay, bakeo nijano andro raiky tamin-drozy eo. 8 Niala tao ndraiky zahay hamarain’iny ka niavy ta Kaisaria any, le nandeha an-tranon’i Filipo mpitory ty vaovao soa ao. Anisan’ny fito lahy rey Filipo io. Le nipetraky taminy ao zahay. 9 Nana anakampela efatsy tsy manambaly* ie sady naminany anakampelany reo. 10 Fe lafa nijano andro maromaro tao zahay, le nisy mpaminany mana anara Agabo zay nijotso baka a Jodia any. 11 Niavy taminay teo ie, le nalany sentiran’i Paoly iny ka nandrohizany ty tombony noho ty tanany. Le hoy ty asany: “Ho zao ty nivolanin’ny fanahy masy: ‘Hanahaky ani-zao ty handrohizan’ny Jiosy a Jerosalema any an’ny lahilahy tompon’ny sentira toy, le hamean-drozy ho an-tanan’olo firenena hafa ie.’” 12 Lafa naharè ani-zay zahay noho ty olo teo, le nangataky an’i Paoly mba tsy hiakatsy ho a Jerosalema any. 13 Fe namaly Paoly hoe: “Manino nareo tomany sady manao ze hahakivy ahy io?* Zaho fa parè ndre horohiza zay, ndre ho maty a Jerosalema any ho an’ny anaran’i Jesosy Tompo!” 14 Tsy nety niova hevitsy mihintsy ie, ka tsy nanohitsy ty safàny sasy* zahay fa nivola hoe: “Enganè hatao ty sitrapon’i Jehovah.”
15 Tafarani-zay, le nanoma ty lianay zahay, bakeo nandeha nana a Jerosalema any. 16 Niaraky taminay koa ty mpianatsy sisany baka a Kaisaria any, le nanday anay ho amy Menasona baka a Sipra any. Mpianatsy fa ela Menasona io, le nandesy aminy any zahay mba ho vahininy. 17 Lafa niavy ta Jerosalema any zahay, le nifalifaly biby rahalahy rey nandramby anay. 18 Fe nandeha amy Jakoba any niaraky taminay Paoly hamarain’iny, le tao iaby anti-panahy rey. 19 Niarahaba an-drozy Paoly, bakeo nitantaraniny tamy an-tsipiriany ty raha natao-Ndranahary tamin’olo firenena hafa, lafa nitory tamin-drozy ie.
20 Nanome voninahitsy a-Ndranahary rozy lafa naharè an’ny raha zay. Fe hoy ty asan-drozy tamy Paoly: “Hitanao rahalahy, fa an’arivony ty Jiosy lasa mpino, le tena mafana fo manaraky ty Lalàna rozy iaby. 21 Fe naharè resadresaky mikasiky anao rozy hoe nao zao iha mampianatsy ty Jiosy iaby amy firenena hafa any mba tsy hanoriky ty Lalànan’i* Mosesy, le mivola amin-drozy mba tsy hanavatsy ty anan-drozy na hanaraky ty fomba fatao bakany bakany zay. 22 Ka ino ty hatao amy raha zay? Tsy zay fa tsy maintsy ho ren-drozy hoe avy eto iha. 23 Le anovo raha volaninay aminao toy: Misy lahilahy efatsy fa nanao voady ty eto. 24 Andeso miaraky aminao lahilahy reo, le anovo malio mifanaraky amy ty takin’ny Lalàna ty vatanareo, le aloavo ze drala tokony haloan-drozy mba hanarata* ty lohan-drozy. Amy zay le ho hain’olo iaby fa tsy marina resadresaky miparitaky mikasiky anao rey, fa manao raha mahity iha sady manaraky ty Lalàna koa. 25 Fa laha ty amin’olo firenena hafa nanjary mpino rey, le fa nandefasanay taratasy misy ty fanapaha-kevitsinay rozy hoe tokony hifaly ty raha natao soro ho an’ny sampy, noho ty lio, noho ty biby nifeozy* noho ty fijangajangà.”*
26 Le nandesin’i Paoly lahilahy rey hamarain’iny, ka nanao malio mifanaraky amy ty takin’ny Lalàna niaraky tamin-drozy ie. Le nilitsy tamy tempoly ao ie mba hanambara hoe ombia ty hitamperan’ny andro fidiova iny, le ombia ty hanomeza fanatitsy ho an-drozy kiraidraiky.
27 Lafa ho tampitsy amy zay fito andro iny, le nahita an’i Paoly tamy tempoly ao Jiosy baka a Azia any rey. Le nasabadidan-drozy ty vahoaky iabiaby, bakeo nisamborin-drozy Paoly, 28 sady nikorakoraky rozy hoe: “Nareo Israelita, ampeo zahay, fa tia lahilahy mampianatsy ty olo iaby mbaombao mba hanohitsy ty firenenantsika noho ty Lalànantsika noho hanohitsy an’ny pilasy toy iny. Ndre ty Grika aza nampiliriny tamy tempoly toy ato, le nandoto an’ny pilasy masy toy ie.” 29 Tsy zay fa nihitan-drozy niaraky tamy Paoly tan-tanà ao Trofimo Efesianina, ka nieritseritsy rozy fa nampilirin’i Paoly tamy tempoly ao ie. 30 Le nisabadida ty olo iaby tan-tanà ao, ka niaraky nirodorodo nanambotsy an’i Paoly. Le nitaritaritin-drozy ho ambalikin’ny tempoly any ie, bakeo avy le nihilian-drozy vavahady rey. 31 Lafa ta ho namono azy rozy, le nisy nivola tamy sefon’ny maramila any hoe misabadida ty olo iaby a Jerosalema eto. 32 Avy le nangalaky maramila noho manamboninahitsy sefon’ny maramila iny, le nilay nijotso tamin-drozy any. Tsy namango an’i Paoly sasy rozy laha vo nahita an’ny sefon’ny maramila iny noho maramila rey.
33 Le namonjy eny sefon’ny maramila iny ka nanambotsy an’i Paoly sady nanome baiko mba handrohiza an’i Paoly amy seny roe. Bakeo nanontany an’i Paoly ie hoe ia ie, le ino ty raha nataony. 34 Fe nikorakoraky marè ty vahoaky, ka ty sisany nivola raha hafa, le ty ilany nivola raha hafa. Nitabataba marè rozy, ka tsy nihain’ny sefon’ny maramila iny sasy ty tena marina. Farany nanome baiko ie mba handaisa an’i Paoly amy pilasy nisy an’ny maramila* rey any. 35 Fe tsy maintsy nionjonin’ny maramila rey Paoly lafa niavy tamy eskalè* eo, satria nisatà vahoaky rey. 36 Tsy zay fa mbo nisy olo maro nanaraky an-drozy sady nikorakoraky hoe: “Vonò any io!”
37 Lafa handay an’i Paoly amy pilasy nisy an-drozy iny any maramila rey, le hoy Paoly tamy sefon’ny maramila iny: “Mba afaky miresaky raha kelikely aminao va aho?” Le namaly sefon’ny maramila iny hoe: “Mahay mivola amy safà Grika va iha? 38 Tsy iha va Ejipsianina nitariky ty vahoaky hizizo amy fanjakà vo tsiela iny, sady nanday lahilahy 4 000 mpamono olo ho amy dezera* any iny?” 39 Le nivola Paoly hoe: “Zaho aza Jiosy ka! Baka a Tarsosy, a Kilikia any aho sady olom-pirenena baka amy tanà malaza ao. Ka mba mangataky anao aho, engao aho hiresaky amin’olo reo.” 40 Lafa nahazo alala tamy sefon’ny maramila iny amy zay ie, le nitsanga tamy eskalè* eo sady nanao fihetsiky tamy tanany mba hampitsìna an’ny vahoaky rey. Lafa nitsỳ iaby olo rey, le nivola tamy safà hebreo ie hoe: