Asan’ny Apostoly
22 “Nareo rahalahy noho nareo raiamandreny, janjinonareo aho henanizao fa hivola mba hiarovako ty vatako.” 2 Le vomaiky nitsỳ rozy lafa naharè azy nanao safà hebreo tamin-drozy. Le hoy ty asany: 3 “Jiosy aho, le nateraky ta Tarsosy a Kilikia any, fe nampianary tamy tanà toy eto, tambany tombon’i Gamaliela eo. Nampianary mba hanaraky amy an-tsipiriany ty Lalànan’ny razambentsika aho, ka nafana fo tamy fanompoa a-Ndranahary manahaky anareo iaby. 4 Le nanenjiky ani-ze olo anisan’ny Lala* zay aho, le nimaty mihintsy aza ty sisany tamin-drozy. Nirohizako noho nalefako amy prizon any rozy, ndre lahilahy zay ndre ampela. 5 Le afaky manamarina ani-zay ty mpisorobe noho ty anti-panahy iaby. Baka amin-drozy koa ro nahazoako taratasy hanambora an’ny rahalahy ta Damaskosy any rey, sady fa tan-dala ho any aho mba handay an-drozy* mana a Jerosalema atoy mba hosazỳ.
6 “Fe lafa tan-dala eny aho sady fa narìny an’i Damaskosy, le nisy hazavà tampoky baka an-danitsy any namirapiratsy nanodidy ahy. Midỳ teo ho eo tamy zay. 7 Le nilavo tamy tany eo aho, sady naharè feo nivola tamiko hoe: ‘Saoly, Saoly, manino iha manenjiky ahy io?’ 8 Le namaly aho hoe: ‘Ia moa lahy iha io?’ Le hoy ty asany: ‘Zaho Jesosy baka Nazareta, azy enjehinao iny.’ 9 Nahita an’ny hazavà iny koa lahilahy niaraky amiko rey tamy zay, fe tsy naharè ty feoni-azy niresaky amiko iny. 10 Le nivola aho hoe: ‘Ino lahy ty tokony hataoko?’ Le hoy ty asan’ny Tompo tamiko: ‘Mitsangàna le mandehana a Damaskosy any, fa hisy olo hivola aminao ze raha tokony hataonao ty any.’ 11 Fe tsy nisy raha nihitako mihintsy satria namirapiratsy marè hazavà iny, ka nandesini-azy niaraky amiko rey an-tana ho a Damaskosy any aho.
12 “Le niavy amiko any lahilahy mana anara Ananiasy zay. Lahilahy matahotsy a-Ndranahary ie sady manoriky ty Lalàna noho soa laza tamy ty Jiosy iaby nipetraky tany. 13 Lafa niavy ie, le nitsanga tanilako eo sady nivola hoe: ‘Saoly rahalahy, mahità ndraiky!’ Tamy fotoa zay mihintsy aho ro niandra ka nahita azy. 14 Le hoy ty asany: ‘Fa nifily anao azy Ndranaharin’ny razambentsika iny mba hahaizanao ty sitrapony noho hahitanao ani-azy marina iny sady haharezanao ty feony, 15 satria iha ro ho vavolombelony hanambara amin’olo iaby ani-ze raha hitanao noho renao. 16 Ka mbo miamby ino iha? Mitsangàna, le ndany hatao batisa ka hikaiky ty anarany, mba ho voasasa ho afaky amy ty fahotanao.’
17 “Fe lafa nimpoly ta Jerosalema eto aho ka nivavaky tamy tempoly ao, le nahita fahità. 18 Le nahita an’ny Tompo aho nivola tamiko hoe: ‘Malaky iha, mialà malaky a Jerosalema eto fa tsy haneky anao hitsanga ho vavolombelo hanambara mikasiky ahy rozy.’ 19 Le hoy ty asako: ‘Tompo, hain-drozy soa fa nitety synagoga mihintsy aho ka nampigadra noho namango ani-ze olo nino anao! 20 Sady tamy fotoa nandatsaha ty lion’i Stefana vavolombelonao iny, le mba nitsanga teo koa aho. Naneky an’ny raha zay aho le niamby ty sikini-azy* namono azy rey.’ 21 Fe hoy ty asany tamiko: ‘Mandehana fa hirahiko ho amin’olo firenena hafa lavitsy any rey iha.’”
22 Nijanjy ty raha nivolanin’i Paoly rozy zisiky amy safà zay eo. Bakeo nikorakoraky marè rozy hoe: “Vonò tsy ho an-tany etoy sasy lahilahy io fa tsy maeva azy ty ho velo!” 23 Nikorakoraky rozy sady nanoraky ty sikin-drozy* noho nanindraky bon-tany tamy tsioky eny. 24 Le nanome baiko handaisa an’i Paoly ho amy pilasy nisy an’ny maramila rey any sefon’ny maramila iny. Nivola koa ie hoe tokony hofilapilary Paoly lafa atao ankety, mba hahaizany ty antony nahavy an’ny vahoaky rey nikorakoraky tamy Paoly manahaky ani-rey io. 25 Lafa nampiampary mba hofilapilary amy zay Paoly, le hoy ty asany tamy manamboninahitsy nitsanga teo iny: “Azonareo atao* va ty mamango Romanina* mbo tsy nitsarà?” 26 Lafa naharè ani-zay manamboninahitsy iny le nandeha nivola an’ny raha zay tamy sefon’ny maramila iny any, ka nivola hoe: “Ino amy zay ty hataonao, hondy kay Romanina lahilahy io?” 27 Le namonjy an’i Paoly sefon’ny maramila iny ka nivola hoe: “Nao tse, Romanina va iha?” Le hoy ty asany: “Eka!” 28 Le hoy sefon’ny maramila iny: “Nandoa drala be aho vo nahazo zom-pirenena romanina.” Le hoy Paoly: “Fa zaho vo nateraky le fa nana an’ny zo zay.”
29 Avy le niala taminy eo lahilahy ho namilapilatsy azy lafa natao ankety rey. Le natahotsy sefon’ny maramila iny lafa nahay hoe Romanina Paoly kanefa fa nampandrohiziny tamy seny.
30 Farany nabototsiny ie hamarain’iny le navoriny ty sefon’ny mpisoro noho ty Fitsarà Anabo Jiosy iabiaby, satria teany ho hay hoe ino ty tena antony nahavy an’ny Jiosy reo nanasara raha an’i Paoly. Le nandesiny nijotso tamy pilasy nivorian-drozy iny any Paoly, ka nampitsanganiny tanivon-drozy eo.