Asan’ny Apostoly
23 Nanenty soa ani-azy anisan’ny Fitsarà Anabo Jiosy rey Paoly, ka hoy ty asany: “Rahalahy, nanao raha mahity tanatreha-Ndranahary eo aho, le malio tanteraky ty eritseritsiko zisiky androany.” 2 Le nampamangoan’i Ananiasy mpisorobe ty vavan’i Paoly olo nitsanga tanilany teo rey. 3 Bakeo nivola Paoly hoe: “Hamango anao koa Ndranahary, iha soavolamanatriky* io! Sady mipetraky hitsara ahy araky ty Lalàna va iha ro mandika ty Lalàna ka manome baiko hamangoa ahy?” 4 Le hoy ty asan’olo nitsanga teo rey: “Le sakinao ty manivativa an’ny mpisorobe-Ndranahary io?” 5 Le hoy Paoly: “Rahalahy, tsy haiko hoe mpisorobe ie, satria zao vatany ty voasoratsy: ‘Ka mivola raha tsy mampiseho fanajà ty mpitariky amy firenenanao eo.’”
6 Lafa nihain’i Paoly fa Sadoseo ty olo sisany tamy Fitsarà Anabo Jiosy eo fa ty ilany Fariseo, le nivola marè tamin-drozy teo ie hoe: “Rahalahy, Fariseo aho sady anan’ny Fariseo. Mino ty fameloma ty maty aho ka zay ty antony itsarà ahy.” 7 Le nifamaly ty Fariseo noho ty Sadoseo lafa naharè azy nivola an’ny raha zay, ka nizara roe olo maro biby tao rey. 8 Tsy zay fa mivola ty Sadoseo hoe tsy misy ty fameloma ty maty sady tsy misy anjely na fanahy zao. Fa ty Fariseo maneky* hoe misy raha iaby rezay. 9 Farany nisabadida ty tao, le nitsanga ty sisany tamy mpanora-dalàna mpanoha ty Fariseo rey, ka tsy nivitavita fa nivola hoe: “Tsy hitanay ty hadisoan’ny lahilahy io, fa laha nisy fanahy na anjely niresaky taminy ...” 10 Lafa nihananjeky amy zay fifamalea iny, le natahotsy sefon’ny maramila iny tsy no hifandritaritan-drozy Paoly. Farany nanome baiko an’ny maramila rey ie mba hijotso noho haninto azy malaky baka anivon’olo eo, le handay azy amy pilasy nisy an’ny maramila rey any.
11 Fe nitsanga tanilan’i Paoly teo Tompo tamy halin’iny, le nivola hoe: “Manàna herim-po! Fa manahaky ty nitorianao noho nanazavanao soa ty mikasiky ahy ta Jerosalema eto ro tsy maintsy hitorianao a Roma any koa.”
12 Lafa niavy ty maray, le nifaneky Jiosy rey ka nifanta* fa tsy hihina na hino raha laha tsy fa matin-drozy Paoly. 13 Lahilahy 40 mahery ro nifaneky noho nifanta ho zay. 14 Le nandeha amy sefon’ny mpisoro noho anti-panahy rey any rozy, ka nivola hoe: “Fa nifanta* zahay fa tsy hihina raha mihintsy laha tsy fa matinay Paoly. 15 Le tokony hivola amy sefon’ny maramila iny noho amy Fitsarà Anabo Jiosy nareo hoe mila andesy mijotso aminareo atoy Paoly, le somary volaninareo hoe ta hahay soa mikasiky an’ny raha itsarà azy iny nareo. Fe alohan’ny hiaviany atoy le fa ho parè hamono azy zahay.”
16 Fe niren’ny anak’anabavin’i Paoly zay tetikin-drozy iny hoe hivony mba hanafiky an’i Paoly, ka nilitsy tamy pilasy misy an’ny maramila rey ao ie, le nitantara an’ny raha zay tamy Paoly. 17 Le nikaihin’i Paoly manamboninahitsy raiky zay, ka nivolanany hoe: “Andeso amy sefon’ny maramila any pamaraky toy fa misy raha hovolaniny aminy.” 18 Nalan’ny maramila iny amy zay pamaraky iny, le nandesiny tamy sefon’ny maramila iny any sady hoy ty asany: “Nikaihin’ny gadra mana anara Paoly iny aho, le nangataky ahy ie mba handay an’ny pamaraky toy aminao atoy fa misy raha hovolaniny aminao zao hoe.” 19 Nandesin’ny sefon’ny maramila iny an-tana pamaraky iny sady niala teo rozy, le nanontaneany mitoka ie hoe: “Ino raha hovolaninao amiko zao?” 20 Le hoy ty asan’ny pamaraky iny: “Fa nifanaraky Jiosy rey hoe hangataky aminao mba handay an’i Paoly hijotso amy Fitsarà Anabo any hamaray, le somary ataon-drozy hoe ta hahay soa mikasiky an’ny raha itsarà azy iny rozy. 21 Fe ka maneky horesen-drozy lahatsy satria lahilahy 40 mahery rozy ro fa mivony mba hanafiky azy. Fa nifanta* rozy hoe tsy hihina na hino raha mihintsy laha tsy fa matin-drozy Paoly. Fa parè rozy henanizao fa ty fanomeza alala baka aminao avao sisa ro ambenan-drozy.” 22 Le nampandehanin’ny sefon’ny maramila iny pamaraky iny, lafa baka nafepetsiny hoe: “Ka volambolany amin’olo mihintsy hoe nambaranao ahy raha zay.”
23 Le nampikaiky manamboninahitsy roe ie, ka nivola hoe: “Manomàna maramila 200 lahy noho mpitikitsy sôvaly 70 noho mpitanjaky lefo 200 handeha ho a Kaisaria any androany haly amy lera fahatelo.* 24 Le manomàna koa sôvaly hiondranan’i Paoly mba ho avy soa amy Feliksa Governera any ie.” 25 Le nanoratsy taratasy ie, ka ho zao ty nisoratiny ao:
26 “Manaja anao Feliksa Governera: Miarahaba anao zaho Klaodio Lysia. 27 Nisamborin’ny Jiosy rey lahilahy toy sady fa ho nivonoan-drozy, fe niavy malaky aho niaraky tamy maramilako rey ka nanavotsy azy, satria reko fa Romanina ie. 28 Teako ho hay ty raha nasaran-drozy azy, ka nandesiko nijotso tamy Fitsarà Anabo Jiosy any ie. 29 Hitako fa alihevitsy mikasiky ty Lalànan-drozy raha asaran-drozy azy io, fa tsy misy antony tokony hamonoa azy na handefasa azy amy prizon any. 30 Fe nambara ahy fa misy manao tetiky mba hamonoa azy, ka nalefako aminao atoy malaky ie. Le alefako aminao any koa azy manasara raha azy rey, ka aminao eo rozy ro hivola ty antony anoheran-drozy azy.”
31 Farany nalan’ny maramila rey Paoly, araky ty baiko niazon-drozy, ka tamy haly iny avao le nandesin-drozy ho a Antipatria any. 32 Nengan-drozy hanohy lia miaraky amy Paoly mpitikitsy sôvaly rey hamarain’iny, fa rozy nimpoly amy pilasy misy an’ny maramila rey any. 33 Lafa niavy ta Kaisaria any mpitikitsy sôvaly rey, le nanome an’ny taratasy iny an’ny governera sady nambaran-drozy azy ty mikasiky an’i Paoly. 34 Bakeo nivakin’ny governera iny taratasy iny, le nanontaneany ty faritany niavian’i Paoly, ka nihainy hoe baka a Kilikia any ie. 35 Le hoy ty asany: “Hojanjiniko soa ty raha iaby hovolaninao, lafa avy azy manasara raha anao rey.” Le nanome baiko ie mba hiambena an’i Paoly amy lapan’i Heroda ao.