Nisoratin’i Matio
10 Farany nampiaviany taminy teo mpianatsiny 12 rey, le nameany fahefà handroaky fanahy maloto noho hanafaky ty karazan’arety iaby noho ty handra iaby.
2 Retoa iaby ty anaran’ny apostoly 12 reo: Voalohany, Simona, kaihy hoe Petera, noho Andrea rahalahiny; Jakoba anan’i Zebedio noho Jaona rahalahiny; 3 Filipo noho Bartolomeo; Tomasy noho Matio mpitaky hetra; Jakoba anan’i Alfeo; noho Tadeo; 4 Simona Kananeanina;* noho Jodasy Iskariota, azy namadiky an’i Jesosy tafara atoy iny.
5 Nirahin’i Jesosy rozy 12 lahy, le nameany toromariky hoe: “Ka mandeha amy firenena hafa any sady ka militsy amy tanàn’ny Samaritanina mihintsy, 6 fa mandehana amy aondry trobo amy Israely eo avao. 7 Lafa mandeha nareo le mitoria ho zao: ‘Fa marìny ty Fanjakàn’ny lanitsy.’ 8 Afaho ty aretini-ze marary, velomo ty maty, diovo ty boka, roaso ty demonia. Nahazo maimaim-poana nareo, le manomeza maimaim-poana. 9 Ka manday volamena na volafoty na saba amy sentira fasianareo drala, 10 le ka manday saky fandaisa vatia, na siky roe,* na kapa, na fitono satria maeva hahazo ty haniny ty mpiasa.
11 “Ze tanà iliranareo ndre tanàmbe ndre tanà kelikely, le ilao ao ze maeva an’ny hafatsinareo iny, le mijanona ao zisiky ialanareo. 12 Lafa militsy amy trano raiky nareo, le arahabao ze olo ao. 13 Laha mandramby soa anareo ty olo ao, le ho azon-drozy fiadana irinareo ho an-drozy iny! Fa laha tsy mandramby soa anareo rozy, le himpoly aminareo avao fiadana nirinareo ho an-drozy iny. 14 Laha misy trano na tanà iliranareo ka tsy mandramby anareo na tsy mijanjy anareo, le apopoho ty lemboky amy tombonareo lafa miala ao nareo. 15 Ambarako anareo mazava fa mbo ho moramora ty raha hahazo an’i Sodoma noho Gomora amy Andro Fitsarà, tany ty raha hahazo an’ny tanà zay.
16 “Henteo moa, maniraky anareo aho manahaky maniraky aondry handeha anivon’amboanala eny. Dikani-zay atorò hoe mahihitsy manahaky bibilava nareo, fe tsy manan-tsiny manahaky pizon. 17 Miambena soa fa hampiakarin’olo tribinaly nareo, le hofilapilarin-drozy amy synagoga any. 18 Le handesy amy governera noho amy mpanjaka nareo satria mpanori-dia ahy, mba ho vavolombelo amin-drozy noho amy firenena reo. 19 Fe lafa andesin-drozy any nareo, le ka miasa loha hoe ino ty hovolaninareo na manao akory ty hivolananareo azy, fa hatoro anareo amy fotoa* zay hoe ino ty tokony hovolaninareo. 20 Satria tsy hoe nareo avao ro mivola, fa ty fanahin’ny Babanareo ro mivola amy alalanareo. 21 Ankoatsini-zay, hanome ty rahalahiny hovonoa ty olo, le ty baba hanome ty anany, le ty anaky hanohitsy ty ray aman-dreniny ka hampamono an-drozy. 22 Le halay anareo ty olo iaby satria manday ty anarako nareo. Fe ze miaritsy zisiky farany ro ho avotsy. 23 Lafa enjehy amy tanà raiky nareo, le milaisa amy tanà hafa. Ambarako anareo mazava fa tsy ho vitanareo toro iaby ty tanàn’Israely zisiky iavian’ny Anak’olo.
24 “Tsy anabon’ny mpampianatsy azy ty mpianatsy, le ty mpanompo tsy anabon’ny tompony. 25 Fa ampy laha lasa manahaky ty mpampianatsy azy mpianatsy iny, le mpanompo iny lasa manahaky ty tompony. Laha ty tompon-trano aza kaihin’olo hoe Belzeboba,* vo handraky ty olo trano raiky aminy? 26 Ka mavaka an-drozy zany, satria tsy misy raha avony ka hoe tsy haseho, sady tsy misy sekirè tsy ho hay. 27 Ze volaniko aminareo amy maìky ao, le volano amy mazava eny, le ze bisibisihy aminareo, torio baka anabo trano eny. 28 Le ka mavaka ani-ze mahavita mamono anareo kanefa tsy mahasaka anareo tsy hahazo fiaina. Fa matahora ani-azy mahavita mandripaky anareo amy Gehena* ao iny. 29 Drala vy kelikely* raiky avao ro amarota foly roe, sa tsy zay? Fe ndre raiky amy raha rey avao latsaky amy tany, le fa hain’ny Babanareo. 30 Fa nareo, ndre ty volon-dohanareo aza voaisaky iaby. 31 Dikani-zay, ka matahotsy fa mbo sarotsy mandilatsy foly maro biby nareo.
32 “Ka ze maneky amason’olo hoe mpianatsiko, le hekeko koa anatrehan’ny Babako an-danitsy any. 33 Fa ze tsy maneky amason’olo hoe mpianatsiko, le tsy hekeko koa anatrehan’ny Babako an-danitsy any. 34 Ka mieritseritsy hoe niavy handay filongoa an-tany etoy aho. Tsy niavy handay filongoa aho, fa handay sabatsy. 35 Satria niavy aho hampisaraky ty anakilahy noho ty babany, ty anakampela noho ty reniny, le ty vinantovavy noho ty rafozambaviny. 36 Ka ty trano raiky aminy* avao ro ho fahavalo ty olo. 37 Ze tea ty babany na ty reniny mandilatsy ty fitiavany ahy, le tsy maeva ho mpianatsiko, le ze tea ty anakilahiny na ty anakampelany mandilatsy ty fitiavany ahy, le tsy maeva ho mpianatsiko. 38 Le ze tsy maneky handay ty hazo fijaleany* ka tsy manaraky ahy, le tsy maeva ho mpianatsiko. 39 Ze manavotsy ty ainy ro hamoy ty ainy, fa ze mamoy ty ainy satria mpanori-dia ahy ro hanavotsy ty ainy.
40 “Ze mandramby anareo le mandramby ahy, le ze mandramby ahy, le mandramby ani-Azy naniraky ahy iny koa. 41 Ze mandramby mpaminany satria hoe mpaminany olo iny, le hahazo fitahia manahaky ty azon’ny mpaminany. Ze mandramby olo marina satria hoe olo marina olo iny, le hahazo fitahia manahaky ty azon’olo marina. 42 Ka ze manome rano manintsy hinomin’ny raiky amy maliniky retoa, ndre boly raiky avao aza satria hoe mpianatsiko olo io, le ambarako anareo mazava fa tena hahazo fitahia ie.”