Asan’ny Apostoly
25 Telo andro tafaran’ny niavian’i Festosy tamy faritany iny eo noho nandrambesany fahefà, le niala ta Kaisaria any ie ka niakatsy ta Jerosalema any. 2 Le nivola ty raha nasaran-drozy an’i Paoly ty sefon’ny mpisoro noho ty manam-pahefà tamy Jiosy eo. Le nangataky an’i Festosy rozy 3 mba haneky ty fangatahan-drozy ka handefa an’i Paoly a Jerosalema any. Fa nanao tetiky rozy amin’io hoe hivony mba hanafiky an’i Paoly, ka hamono azy an-dala eny. 4 Fe namaly Festosy fa tokony hotanjahy amy prizon a Kaisaria any avao Paoly, sady tsy ho ela koa ie le fa himpoly any avao. 5 Hoy koa ty asany: “Afaky miaraky mijotso amiko sefonareo rey le hivola ty raha asaranareo an’ny lahilahy zao, laha nanao raha tsy mety vatany ie.”
6 Le nijano tamin-drozy any tanatin’ny valo na folo andro teo ho eo ie, bakeo nijotso ta Kaisaria any. Nipetraky tamy pilasy fitsarà eo ie hamarain’iny, le nanome baiko mba handesy eo Paoly. 7 Lafa nilitsy Paoly, le nitsanga nanodidy azy ty Jiosy nijotso baka a Jerosalema any. Maro ty raha tena raty nasaran-drozy azy, kanefa tsy nihain-drozy ty nanaporofo an’ny raha rey.
8 Fe hoy Paoly lafa niaro ty vatany: “Tsy nandika ty Lalànan’ny Jiosy aho, na nanota tamy tempoly na tamy Kaisara.” 9 Le nila hatò tamy Jiosy rey Festosy ka namaly an’i Paoly hoe: “Teanao va ty hiakatsy a Jerosalema any le hotsarà alohako eo mikasiky an’ny raha zay?” 10 Fe nivola Paoly hoe: “Mitsanga alohan’ny pilasy fitsaràn’i Kaisara eto aho, le eto ro tokony hitsarà ahy. Tsy nanao raha raty tamy Jiosy aho, sady hainao soa koa raha zay. 11 Laha tena olo raty vatany aho ka nahavita raha tokony hamonoa ahy, le tsy mandà ty ho maty aho. Fe laha tsy marina ty raha asaran’ny lahilahy reto ahy, le tsy misy mana zo hanome ahy an-drozy mba hampifalifalea an-drozy avao. Ampiakariko amy Kaisara any raha toy!” 12 Lafa baka nifampiresaky tamy mpanoro hevitsy rey Festosy, le hoy ty asany: “Nampiakarinao amy Kaisara any raha toy, ka le ho amy Kaisara any vatany iha.”
13 Andro vitsivitsy tafarani-zay, niavy ta Kaisaria any Agripa Mpanjaka noho Berenika. Nitsidiky an’i Festosy rozy mba hiarahaba azy. 14 Nijano andro maromaro tao rozy, ka niresahin’i Festosy tamy mpanjaka ty mikasiky an’i Paoly. Hoy ty asany:
“Misy lahilahy gadra zay nengan’i Feliksa ato. 15 Le niresahin’ny sefon’ny mpisoro noho anti-panahin’ny Jiosy rey tamiko ty mikasiky azy tamy zaho ta Jerosalema any, ka nangataky rozy mba hosazỳ lahilahy io. 16 Fe namaly an-drozy aho hoe tsy mifanaraky amy lalànan’ny Romanina ty hoe manome olo ho an-tanan’olo manasara raha azy mba hampifalifalea an-drozy avao. Mila ampifanatrehy amy olo manasara raha azy rey tse olo iny, amy zay ho afaky hiaro ty vatany. 17 Ka lafa niavy eto rozy le tsy niamby ela aho, fa hamarain’iny avao le nipetraky tamy pilasy fitsarà eo. Nanome baiko koa aho mba handesy eo lahilahy iny. 18 Nitsanga amy zay olo nanasara raha azy rey, fe tsy ty raha raty nieritseretiko ro nasaran-drozy azy. 19 Hondy kay nisy alihevitsy avao tamin-drozy eo mikasiky ty fivavahan-drozy amy ndranahary* noho mikasiky an’ny lahilahy mana anara Jesosy zao. Fa nimaty lahilahy io fe tsy vitavita Paoly fa nao velo zao ie. 20 Tsy nihitako amy zay ty hatao mba handamina an’ny alihevitsy zay, ka nanontaneako ie laha ta ho a Jerosalema any, le any ie ro hotsarà mikasiky an’ny raha zay. 21 Fe nangataky hotanjahy amy prizon ao Paoly, amy zay Kaisara* ro hanapa-kevitsy mikasiky azy. Nanome baiko amy zay aho mba hitanjaha azy amy prizon ao zisiky handefasako azy amy Kaisara any.”
22 Le hoy ty asan’i Agripa tamy Festosy: “Mba ta hijanjy an’ny lahilahy zao koa aho.” Le hoy Festosy: “Haharè azy iha hamaray.” 23 Le niavy Agripa noho Berenika hamarain’iny, sady tena naresaky ty fiavian-drozy. Le nilitsy tamy efitsy fitsarà ao rozy, niaraky tamy sefon’ny maramila noho olo ambony tan-tanà ao rey. Le nanome baiko Festosy ka nampiliry Paoly. 24 Le hoy ty asan’i Festosy: “Agripa Mpanjaka noho nareo iaby miaraky aminay manatriky eto, hitanareo eo io lahilahy nangatahin’ny vahoaky Jiosy tamiko iny, ndre ta Jerosalema any zay ndre tetoa. Nikorakoraky rozy fa nao zao tsy maeva ho velo sasy lahilahy io. 25 Fe hitako hoe tsy nanao raha tokony hamonoa azy ie. Ka lafa nampiakatsy an’ny raha toy amy Kaisara any ie, le nanapa-kevitsy aho fa handefa azy ho any. 26 Fe tsy haiko hoe ino marina ty hosoratiko mikasiky azy amy tompoko any. Farany nandesiko aminareo iaby eto ie, sirtò fa aminao eto Agripa Mpanjaka, mba hisy raha hosoratiko lafa vita ty ankety. 27 Tsy zay fa laha ty fahaizako azy, le tsy mety ty mandefa gadra a Roma any kanefa tsy mivola ty raha raty nataony.”