Ty taratasy voalohany ho ahi-ty Korintianina
14 Miezaha marè avao mba hifankatea, kanefa miezaha marè koa mba hahazo ty fanomeza baka amy fanahy, sirtò mba ho afaky haminany nareo. 2 Fa ze mivola amy safà samby hafa le tsy mivola amin’olo fa amy Ndranahary, satria tsy misy mahazo ze raha volaniny, ndre ty fanahy aza ro mahavy azy hivola sekirè masy. 3 Fa ze maminany le manao safà mampahery noho manatanjaky noho mampionona olo. 4 Ze mivola amy safà samby hafa le mampahery ty vatany, fa ze maminany mampahery ty fiangona. 5 Teako hivola amy safà samby hafa nareo iaby, fe aleoko avao nareo maminany. Tsy zay fa tena soa ty maminany tozay ty mivola amy safà samby hafa, laha tsy hoe adikany ze raha volaniny, mba hampahery ty fiangona. 6 Rahalahy, laha henanizao aho ro avy aminareo any ka mivola amy safà samby hafa, hahasoa anareo va raha zay? Hahasoa anareo raha zay laha manambara raha mbo tsy nihainareo aho, na mampita fahaiza na faminania na fampianara aminareo.
7 Mitovy amy zay koa ty raha maneno manahaky ty sody na harpa. Laha tsy mampiboaky feo samby hafa raha reo, akory ty anavaha ty feon-kira baka amy sody iny na baka amy harpa iny? 8 Laha tsy mazava soa ty feo aboakin’ny antsiva, ia ty hioma hialy? 9 Mitovy amy zay koa fa laha tsy mora azo ty safà volaninareo, akory ty hahaizan’olo ze raha volaninareo? Hivola amy tsioky avao nareo laha ty marina. 10 Mety hisy safà maro samby hafa amy zao tontolo zao eo, le samby mana ty dikany iaby raha rey. 11 Fa laha tsy azoko safà iny, le ho vahiny ahy olo mivola iny, sady olo mivola iny koa ho vahiny amiko. 12 Le manahaky ani-zay koa nareo: Satria tena ta hahazo ty fanomezan’ny fanahy nareo, le miezaha hana maro amy raha zay mba hampahereza ty fiangona.
13 Ze mivola amy safà samby hafa zany, le tokony hivavaky mba hahay handika teny. 14 Tsy zay fa laha mivavaky aho fe mampiasa safà hafa, le ty fanomezan’ny fanahy niazoko ro mivavaky, fa ty saiko tsy mahazo ze raha volaniko. 15 Ka ino zany ty tokony hatao? Hampiasa ty fanomezan’ny fanahy aho lafa mivavaky, kanefa hampiasa ty saiko koa mba ho azo ze raha volaniko. Hampiasa ty fanomezan’ny fanahy aho lafa mihira fiderà, kanefa hampiasa ty saiko koa mba ho azo ze raha volaniko. 16 Fa laha mampiasa ty fanomezan’ny fanahy iha lafa midera a-Ndranahary, akory ty hivolanan’olo tsotra aminareo eo hoe “Amena” lafa manao fisaora iha, kanefa tsy azony iaby raha volaninao iny? 17 Marina fa soa fisaora ataonao iny, fe tsy mahazo fampahereza ty olo hafa. 18 Misaotsy a-Ndranahary aho fa mivola amy safà maro mandilatsy anareo iabiaby. 19 Fe aleoko mivola safà limy azon’ny saiko mba hampianarako* olo hafa amy fiangona eo, tozay hivola safà 10 000 amy fivolana samby hafa.
20 Rahalahy, tsy tokony ho ajà nareo amy resaky fahatakaran-draha, fa tokony ho ajà amy raha raty. Tokony ho olobe nareo amy resaky fahatakaran-draha. 21 Voasoratsy amy Lalàna ao hoe: “‘Hiresaky amy vahoaky toy amy safàn’olo* firenena hafa noho amy safàn’olo* vahiny aho. Fe mbo tsy hahefa hijanjy ahy avao rozy’, hoy Jehovah.” 22 Famantara ho ahin’olo tsy mpino zany ty fivolana amy safà samby hafa, fa tsy ho ahin’olo mpino, le ho ahin’olo mpino ty faminania, fa tsy ho ahin’olo tsy mpino. 23 Ka laha mivory amy pilasy raiky ty olo iaby amy fiangona eo sady samby mivola amy safà samby hafa, bakeo militsy ty olo tsotra na ty olo tsy mpino, tsy hovolanin-drozy hoe gegy va nareo? 24 Fa laha samby maminany nareo iaby bakeo misy olo tsy mpino na olo tsotra militsy, le hananatsy azy noho handrisiky azy handiniky soa ty vatany ze raha iaby reny. 25 Le hiseho mazava ze sekirè am-pony ao, ka hiankohoky ie le hivavaky amy Ndranahary sady hivola hoe: “Aminareo eo vatany Ndranahary!”
26 Ka ino zany ty tokony hatao rahalahy? Lafa mivory nareo, le misy mihira fiderà,* misy mampianatsy, misy mivola ty raha nambara taminy, misy mivola amy safà samby hafa, le misy mandika teny. Tokony atao mba hampahereza ty raha iaby. 27 Laha misy koa mivola amy safà samby hafa, le tokony hajano ho roe na telo raha zay, laha farany maro. Le hifandimby rozy, ka tsy maintsy hadika ze raha volanin-drozy. 28 Fe laha tsy misy mpandika teny, le tokony hitsỳ ie amy fiangona eo ka hivola amy ty vatany avao noho amy Ndranahary. 29 Tokony ho mpaminany roe na telo ro hivola, fa ty olo sisany miezaky hahay ty dikan’ny raha volanin-drozy. 30 Fe laha misy amin’olo mipetraky eo rey nanambarà-Ndranahary raha, le tokony hitsỳ tse azy nivola iny. 31 Tsy zay fa samby afaky maminany iaby nareo, fe mandeha kiraidraiky, mba ho afaky hiana-draha ty olo iaby sady hahazo fampahereza. 32 Tokony hahay hifehy ty fanomezan’ny fanahy koa ty mpaminany. 33 Fa Ndranahary tsy Ndranaharin’ny fikorontana, fa Ndranaharin’ny filamina.*
Manahaky ty amy fiangonan’ny olo masy iabiaby, 34 le tokony hitsỳ ty ampela lafa amy fiangona eo, fa tsy mahazo mivola. Tokony haneky rozy, satria zay koa ty volanin’ny Lalàna. 35 Laha misy raha tean-drozy ho hay, le hanontany ty valin-drozy rozy lafa an-trano any, satria mahamenatsy laha mivola amy fiangona eo ty ampela.
36 Baka aminareo va ty niavian’ny safà-Ndranahary? Sa nareo avao ro namea an’ny raha io?*
37 Laha misy aminareo mieritseritsy hoe mpaminany ie na hoe mana ty fanomezan’ny fanahy, le tokony haneky ie hoe didin’ny Tompo ze raha soratiko aminareo. 38 Fa laha misy olo tsy midary an’ny raha zay, le tsy hodarea koa ie.* 39 Dikani-zay zany rahalahiko, miezaha marè avao haminany, kanefa ka rarà tsy hivola amy safà samby hafa koa ty olo. 40 Fe anovo amim-panajà noho milamy soa ty raha iaby.