Nisoratin’i Matio
20 “Fa ty Fanjakàn’ny lanitsy le manahaky lahilahy raiky nana tanimboaloboky. Nandeha maraindray be ie mba hampikarama olo hiasa an’ny taniny iny. 2 Nifanaraky tamy mpiasa rey ie hoe denaria raiky sanandro ty karama, bakeo nalefany tan-tanimboalobokiny any rozy. 3 Nandeha ndraiky lahilahy iny tamy lera fahatelo* teo ho eo, le nahita olo hafa tsy nanan’asa tam-bazary eny. 4 Le nivola tamin-drozy ie hoe: ‘Mandehana an-tanimboaloboky any koa nareo, le hameako anareo ze tokony ho karamanareo.’ 5 Le nandeha rozy. Nandeha tam-bazary eny ndraiky lahilahy iny tamy lera fahaeny* noho fahasivy* teo ho eo, le mbo ho zay avao ty nataony. 6 Tamy farany ie nandeha tam-bazary eny ndraiky tamy lera faha-11* teo ho eo, le nahita olo hafa tsy nanan’asa. Le hoy ty asany: ‘Manino nareo tsy miasa fa mitsangatsanga eto avao liany nimaray?’ 7 Le hoy ty asan-drozy: ‘Satria tsy nisy olo nampikarama anay.’ Le hoy ty asan’ny lahilahy iny: ‘Mandehana an-tanimboaloboky any koa nareo.’
8 “Lafa nihariva ty andro, le nivola tamy sefon’ny mpiasany ie hoe: ‘Kaiho mpiasa rey le aloavo ty karaman-drozy, le ze niasa tafara tse ro ameo aloha, le ze taloha ameo farany.’ 9 Lafa niavy olo niasa nanomboky tamy lera faha-11 rey, le samby nahazo denaria raiky iaby. 10 Lafa niavy amy zay azy niasa voalohany rey, le nieritseritsy hahazo maro kokoa. Fe denaria raiky sanolo avao ty namea an-drozy. 11 Lafa niazon-drozy raha iny, le nimenimeny tamy tompon’ny tanimboaloboky iny rozy 12 hoe: ‘Lera raiky avao ty niasani-azy farany reo, kanefa nataonao mitovy karama aminay. Kanefa zahay niasa mafy liany nimaray sady nimain’ny hafanambe iny!’ 13 Le hoy ty asany tamy ty raiky amin-drozy: ‘Tsy mamerivery anao aho nama! Tsy denaria raiky va ty nifanarahantsika? 14 Rambeso ty karamanao le mandehana. Teako hamea manahaky ty ahinao koa azy farany reo. 15 Tsy afaky manao ze teako hatao amy ty hananako va zaho? Sa iha mialona* satria zaho soa fanahy?’* 16 Le ho zay koa fa ty farany ho voalohany, le ty voalohany ho farany.”
17 Lafa tan-dala ho a* Jerosalema any Jesosy, le nandesiny nihataky kelikely mpianatsiny 12 rey, le hoy ty asany tamin-drozy: 18 “Hitanareo, ho a* Jerosalema any tsika henanizao. Le hamean’olo an’ny sefon’ny mpisoro noho mpanora-dalàna rey ty Anak’olo. Hotsaran-drozy ie, le hovonoan-drozy. 19 Hamean-drozy an-tanan’olo tsy Jiosy ie mba hatao fiheheza, hofilapilary, noho hovonoa amy tsato-kazo. Bakeo hovelomy ndraiky ie amy andro fahatelo.”
20 Bakeo namonjy azy ty valin’i Zebedio, niaraky tamy ty anakilahiny roe. Niankohoky taminy teo njarahy iny satria ta hangataky raha taminy. 21 Le hoy ty asan’i Jesosy: “Ino va raha ilànao io?” Le hoy njarahy iny: “Lafa amy Fanjakànao ao iha, le mba apetraho anilanao eo anako retoa. Ty raiky ankavananao eo, le ty raiky ankavianao eo.” 22 Le hoy Jesosy: “Tsy hainareo mihintsy raha angatahinareo zao. Vitanareo va ty hino amy kopy inomako?” Le hoy ty asan-drozy: “Ee, vitanay!” 23 Le hoy ty asany tamin-drozy: “Hino amy kopiko vatany nareo. Fe tsy anjarako ty mitingy ani-ze hipetraky ankavanako eo noho ankaviako eo, fa ze nitinginin’ny Babako avao ro hahazo an’ny pilasy zay.”
24 Lafa naharè ani-zay mpianatsy folo lahy rey, le neloky tamin-drozy mirahalahy. 25 Fe nikaihin’i Jesosy ho aminy eo rozy, le nivolaniny hoe: “Hainareo fa manindritindry ty firenena andesiny ty mpitondra, le manerisery koa ze bebè. 26 Fe tsy tokony hisy manahaky ani-zay aminareo eo. Fa ze ta ho be aminareo, le tsy maintsy ho mpanomponareo, 27 le ze ta ho voalohany aminareo le tsy maintsy manompo anareo. 28 Manahaky ani-zay koa ty Anak’olo, tsy niavy mba hotompoa ie fa mba hanompo, ka hanome ty ainy ho vilim-panavota ho takalon’olo maro.”
29 Lafa niboaky baka a Jeriko ao rozy, le nisy olo maro nanaraky azy. 30 Nisy jiky roe lahy nipetraky tan-tsisin-dala teo, ka lafa niren-drozy hoe nandalo Jesosy, le nikaikaiky rozy hoe: “Tompo Anan’i Davida a, mba ferineso lahy zahay!” 31 Nihelofan’olo rey rozy, le nampitsìnin’olo rey, fe vomaiky nikaikaiky marè hoe: “Tompo Anan’i Davida, mba ferineso lahy zahay!” 32 Farany nijano Jesosy, le nikaiky an-drozy ka nivola hoe: “Ino ty teanareo hataoko aminareo?” 33 Le hoy ty asan-drozy taminy: “Mba anovo mahita ty masonay Tompo!” 34 Niferinesan’i Jesosy rozy le nitsapàny ty mason-drozy. Avy le nahita rozy, le nanaraky azy.