Ty taratasy voalohany ho ahi-ty Korintianina
12 Rahalahy, teako ho hainareo soa ty mikasiky an’ny fanomeza baka amy fanahy rey. 2 Hainareo fa tamy nareo mbo nioloni-zao tontolo zao,* le nivoatariky hanompo an’ny sampy moa rey nareo, ka nandeha tamy ze nandaisan-drozy anareo. 3 Ambarako anareo fa tsy misy olo tarihin’ny fanahi-Ndranahary ka hivola hoe: “Voaozo Jesosy!” Sady tsy misy afaky mivola hoe: “Jesosy ro Tompo!”, laha tsy ty fanahy masy ro mitariky azy.
4 Misy fanomeza maro sankarazany, fe raiky avao ty fanahy. 5 Misy fanompoa maro sankarazany, fe raiky avao ty Tompo. 6 Misy asa maro sankarazany, fe raiky avao ty Ndranahary manatanteraky an-drozy iaby amy alalan’ny olo iabiaby. 7 Hita soa amin’olo kiraidraiky ty fomba fiasan’ny fanahy mba hahasoa raha. 8 Tsy zay fa ty raiky namea safàm-pahendrea* tamy alalan’ny fanahy, le ty hafa namea safàm-pahaiza tamy alalan’ny fanahy io avao. 9 Ty sisany nahazo finoa tamy alalan’ny fanahy io, le ty sisany nampean’ny fanahy io hahay hitaha olo, 10 ty sisany hanao fahagagà, ty sisany hahay haminany, ty sisany hahay ty dikan’ny fanambarà baka amy fanahy, ty sisany hivola amy safà samby hafa, le ty sisany handika teny. 11 Fe fanahy raiky avao ro manao an’ny asa iabiaby rezay, bakeo mizara an’ny raha zay amin’olo kiraidraiky, mifanaraky amy ze teany.
12 Tsy zay fa raiky avao ty vata fe misy rantsany maro, sady ndre maro aza rantsambata iaby rezay, le vata raiky avao. Manahaky ani-zay koa Kristy. 13 Fanahy raiky avao ro nanaova batisa antsika iaby mba ho vata raiky avao tsika, ndre Jiosy zay ndre Grika, ndre mpanompo ndre olo afaky. Le nampinomy fanahy raiky avao tsika iaby.
14 Tsy zay fa tsy rantsambata raiky avao ty vata, fa rantsambata maro. 15 Laha mivola ty tomboky hoe: “Tsy anisan’ny vata aho satria tsy tana”, le tsy zay ro hahavy azy tsy ho anisan’ny vata. 16 Laha mivola koa ty sofy hoe: “Tsy anisan’ny vata aho satria tsy maso”, le tsy zay ro hahavy azy tsy ho anisan’ny vata. 17 Laha nimaso ty vata iabiaby, le akory ty haharezany? Laha nisofy ty vata iabiaby, le akory ty haharezany fofo? 18 Fe natao-Ndranahary amy pilasiny iaby ty rantsambata kiraidraiky amy vata eo, mifanaraky amy ze nitiavany azy.
19 Laha rantsambata raiky avao rozy iaby, le aia ty vata? 20 Fe rantsambata maro rozy, kanefa vata raiky avao. 21 Ty maso tsy afaky mivola amy tana hoe: “Tsy mila anao aho.” Le ty loha tsy afaky mivola amy tomboky hoe: “Tsy mila anareo aho.” 22 Mifanohitsy amy zay aza fa tena ilà ty rantsambata eritserety hoe malemy mandilatsy ty hafa. 23 Fa ze faritsy amy vata eritseretintsika hoe tsy maeva hajà loatsy, le ameantsika voninahitsy marerè. Vomaiky hajàntsika zany ty faritsy eritserety hoe tsy soa amy vatantsika eo. 24 Fa faritsy maeva hajà amy vatantsika rey le tsy mila ndre ino ndre ino. Fe lafa naharo-Ndranahary ty vata, le nameany voninahitsy marerè ty faritsy tsy nana voninahitsy, 25 amy zay tsy hisy fisaratsaraha amy vata eo, fa mba hifanampy soa rantsambata rey. 26 Laha mijaly ty rantsambata raiky, le miaraky mijaly aminy ty rantsambata iaby, na laha misy rantsambata amea voninahitsy, le miaraky falifaly aminy ty rantsambata iaby.
27 Vatan’i Kristy nareo, sady samby rantsambata nareo kiraidraiky. 28 Le ho zao ty nanendrea-Ndranahary ty olo kiraidraiky amy fiangona eo: Voalohany, apostoly; faharoe, mpaminany; fahatelo, mpampianatsy; bakeo azy manao fahagagà rey, azy mahay mitaha olo rey, azy manampy olo rey, azy mahay mitariky rey, noho azy mahay safà samby hafa rey. 29 Rozy iaby va ro apostoly? Rozy iaby va ro mpaminany? Rozy iaby va ro mpampianatsy? Rozy iaby va ro mpanao fahagagà? 30 Rozy iaby va ro mahay mitaha olo? Rozy iaby va ro mivola amy safà samby hafa? Rozy iaby va ro mpandika teny? 31 Fe miezaha marè avao hahazo* an’ny fanomeza tena bevata rey. Mbo hatoroko lala soa mandilatsy ani-reo nareo.