Ty Taratasy Faharoe ho ahi-ty Tesalonianina
3 Farany, rahalahy, mivavaha avao ho anay, mba hiparitaky malaky avao ty safàn’i Jehovah sady hamea voninahitsy, manahaky ty aminareo eo henanizao io. 2 Mivavaha avao koa mba harova amy ty olo raty noho ty raty fanahy zahay, satria tsy hoe manam-pinoa iaby ty olo iaby. 3 Fe tsy mivaliky amy ty safàny Tompo, ka hanatanjaky anareo ie, le hiaro anareo tsy ho azoni-azy raty iny. 4 Le matoky anareo zahay amy maha mpanori-dia an’ny Tompo anay. Matoky zahay hoe fa manao ani-ze raha nampanovinay anareo nareo, sady mbo hanao ani-zay avao. 5 Enganè Tompo hitariky ty fonareo avao, mba ho tea a-Ndranahary nareo sady hiaritsy ho an’i Kristy!
6 Mandidy anareo amy anaran’i Jesosy Kristy Tompontsika zahay, rahalahy, hoe ialao ty rahalahy iaby tsy mety anary, zany hoe azy tsy manoriky ty fampianara* nirambesinareo* taminay rey. 7 Hainareo soa moa hoe ino ty tokony hataonareo laha ta hanahaky anay nareo, satria tsy hoe olo tsy mety anary zahay taminareo eo. 8 Tsy nihina hanin’olo amy zao avao koa zahay, fa niasa mafy noho niezaky marè ndre andro ndre haly, mba tsy ho lasa enta mavesatsy ho an’olo aminareo eo mihintsy tamy resaky drala. 9 Tsy hoe tsy mana fahefà hanao ani-zay zahay, fa ta hanome modely ho anareo mba hotahafinareo. 10 Laha ty marina aza, tamy zahay taminareo eo, le matetiky zahay nivola anareo hoe: “Ze olo tsy mahefa miasa le tsy tokony hihina.” 11 Renay moa hoe misy olo tsy mety anary aminareo eo, ka tsy miasa mihintsy fa militsilitsy amy raha tsy mikasiky an-drozy. 12 Ty olo manahaky ani-rey ro afepetsinay noho anarinay amy anaran’i Jesosy Kristy Tompo hoe tokony hiasa milamy rozy, le hihina ty raha niasan-drozy mafy.
13 Fa nareo, rahalahy, ka vozaky manao raha soa mihintsy. 14 Fe laha misy olo tsy manoriky ani-ze raha volaninay amy taratasy toy ato, le miambena soa amy olo zay. Le ka mifandramby aminy sasy soa ho menatsy ie. 15 Fe ka rambesy ho fahavalo ie, fa anaro avao manahaky rahalahy io.
16 Enganè Tompon’ny fiadana iny hanome fiadana anareo avao amy raha iaby! Le enganè Tompo hanoha anareo iaby!
17 Toy ty veloma nisoratin’ny tanako, zaho Paoly, sady ahaiza ty taratasiko iaby. Io ty sora-tanako.
18 Enganè nareo iaby hampisehoan’i Jesosy Kristy Tompontsika hasoam-panahy miavaky!