Asan’ny Apostoly

20 Lafa nijano koronta iny, le nampangalaky an’ny mpianatsy rey Paoly. Nampahery an-drozy ie sady nanao veloma an-drozy, bakeo nandeha a Makedonia any. 2 Nitety faritsy maro tany ie, ka nivola raha maro mba hampahereza an’ny mpianatsy rey. Bakeo niavy ta Gresy any ie, 3 le nijano telo vola tany. Fe nisy Jiosy nila fomba hamonoa azy lafa nangalaky sambo ho a Syria any ie. Farany nanapa-kevitsy ie hoe himpoly mba Makedonia any. 4 Niaraky taminy Sopatera anan’i Pyro baka a Beria any, Aristarko noho Sekondo azy baka Tesalonika any rey, Gaio baka a Derbe any, Timoty, le Tykiko noho Trofimo azy baka amy faritanin’i Azia any rey. 5 Nandeha talohanay rozy, ka niamby anay ta Troasy any, 6 fa zahay nandeha sambo baka a Filipy any, tafaran’ny andro fihinana Mofo Tsy Misy Levira. Niavy tamin-drozy ta Troasy any amy zay zahay lafa niafaky limy andro, le nijano fito andro tany.

7 Nivory zahay mba hiaraky hihina tamy andro voalohany tamy herinandro* iny. Le nanao lahateny tamin-drozy teo Paoly, satria handeha ie hamarain’iny. Naharitsy zisiky vakimirahaly ty lahateny nataony. 8 Le nisy jiro maro nanazava an’ny efitsy anabo etazy nivorianay iny. 9 Nisy pamaraky mana anara Eotyka zay nipetraky tan-dafonety eo. Niazon-droro ie tamy Paoly mbo nanao lahateny iny. Tena niroro ie, ka niravoky baka amy etazy faharoe eny. Lafa nihentea amy zay ie, le hita hoe fa nimaty. 10 Fe nijotso Paoly ka niambotraky aminy eo sady nandrakoky azy, le nivola hoe: “Ka mikorapaky sasy nareo satria fa velo ie.” 11 Bakeo niakatsy anabo etazy any Paoly, le natombokiny amy zay ty sakafo* le nihina ie. Le niresaky elaela ie zisiky maraindray vaky andro, bakeo nandeha. 12 Le nandesin’olo rey pamaraky nivelomy iny, sady nifalifaly biby* rozy.

13 Le nandeha aloha zahay ka nangalaky sambo handeha a Aso any, satria tany zahay ro nieritseritsy hangalaky an’i Paoly. Nampanoviny anay raha zay satria ta handeha tomboky ho any ie. 14 Lafa nahatratsy anay ta Aso tao amy zay ie, le naondranay tanaty sambo ao le lasa zahay nandeha a Mitylena any. 15 Niala baka ao ndraiky zahay hamarain’iny, ka niavy tampitan’i Kio eny. Nijano tsielatsiela ta Samo tao zahay hamarain’iny, bakeo niavy ta Mileto ao tamy andro manaraky ani-zay. 16 Fa nanapa-kevitsy Paoly hoe handalova avao Efesosy, amy zay ie mba tsy ho lany fotoa amy faritanin’i Azia any. Tsy zay fa malisa ho avy a Jerosalema any amy Fetin’ny Pentekosta ie, laha tratsiny.

17 Fe ndre zay, le nampanday hafatsy ho an’ny anti-panahin’ny fiangona ta Efesosy tany rey ie tamy ie ta Mileto ao, ka nivola tamin-drozy mba ho avy aminy any. 18 Lafa niavy taminy any rozy, le hoy ty asany: “Hainareo soa ty raha nataoko tamy zaho taminareo teo, nanomboky tamy andro voalohany nanitsahako ty faritsin’i Azia. 19 Nanompo an’ny Tompo aho sady niambany lafa nanao an’ny raha zay, ka nilatsa-dranomaso noho niatriky raha sarotsy maro vokatsin’ny tetiky raty nataon’ny Jiosy rey. 20 Tsy nisalasala koa aho nivola taminareo ty raha iaby nahasoa, noho nampianatsy anareo an-kavoria noho santrano. 21 Le nanome fanazavà feno* tamy ty Jiosy noho ty Grika aho hoe ilà ty mibebaky noho mimpoly amy Ndranahary noho mino an’i Jesosy Tompontsika. 22 Le fa an-dala ho a Jerosalema any aho henanizao, satria tsy maintsy manaraky ty fitarihan’ny* fanahy masy, ndre mbo tsy haiko aza ty raha hahazo ahy any, 23 laha tsy azy fa nambaran’ny fanahy masy ahy saky tanà iny avao hoe hagadrà noho fijalea ro miamby ahy any. 24 Fe tsy vatan-draha amiko* ty aiko, fa ty vatan-draha amiko le ty hamita an’ny korsako iny noho ty fanompoa nankinin’i Jesosy Tompo tamiko, tsy ino zay fa ty hitory* amy fomba feno ty vaovao soa mikasiky ty hasoam-panahy miavaky naseho-Ndranahary.

25 Le haiko henanizao fa tsy hisy hahita ahy sasy nareo iaby nitoriako mikasiky an’ny Fanjakà iny. 26 Le nareo ro vavolombeloko androany fa afaky amy ty lion’olo iabiaby* aho, 27 satria tsy nisalasala aho nivola taminareo ty sitrapo-Ndranahary* iaby. 28 Tandremo soa ty vatanareo sady karakarao soa ty aondry iaby, satria nitendren’ny fanahy masy ho mpiandraikitsy an-drozy nareo. Laha manao ani-zay nareo le ho mpiarakandro ty fiangona-Ndranahary, azy nivilìny tamy lion’ny Anany iny. 29 Haiko fa lafa lasa aho, le hisy amboanala masiaky hilitsy aminareo eo, sady tsy hiferinay ty aondry rozy. 30 Le ho baka aminareo eo avao ty hiboahan’olo mampianatsy raha diso rey mba hitaoma ty mpianatsy hanaraky an-drozy.

31 “Miambena avao zany, le tiarovo fa tsy nieny nananatsy ty kiraidraiky taminareo aho tanatin’ny telo tao, ndre andro ndre haly. Nitany mihintsy aza aho lafa niresaky taminareo. 32 Le ankiniko an-tana-Ndranahary eo nareo henanizao, ka loniky lahy hiaro anareo ty safà, azy manome toky iny hoe mampiseho hasoam-panahy miavaky Ie! Afaky mampahery anareo safà zay sady manampy anareo hahazo lova miaraky amin’olo iaby nihamasìny rey. 33 Tsy naniry hahazo volafoty na volamena na akanjon’olo mihintsy aho. 34 Hainareo soa fa nampiasa an’ny tanako reto aho mba hahazoako ze raha nilàko noho ze raha nilàni-azy niaraky amiko rey. 35 Nasehoko anareo tamy ty raha iaby fa tsy maintsy miasa mafy manahaky ani-zay nareo mba hanampeanareo ani-ze olo mila ampea. Le tiarovo avao safàn’i Jesosy Tompo iny hoe: ‘Mahasambatsy kokoa ty manome tany ty mandramby.’”

36 Lafa baka nivola an’ny raha rezay ie, le nandohaliky niaraky tamin-drozy iabiaby sady nivavaky. 37 Nirohaky ty tany rozy iaby, le nandrakoky an’i Paoly,* ka nanoroky azy tamim-pitiava, 38 satria nalahelo biby rozy tamy safàny iny hoe tsy hahita azy sasy rozy. Le naterin-drozy zisiky amy sambo eny ie.