Nisoratin’i Jaona
15 Zaho ro voaloboky tena ie, le Babako ro mpamboly. 2 Alany iaby ze sampany iaby tsy mamoa amiko eo. Fa ze mamoa rantsanany mba halio, amy zay misy voany maro kokoa. 3 Fa malio nareo satria nijanjy ty safà nivolaniko taminareo. 4 Miezaha hiaraky amiko avao, le hiaraky aminareo avao koa aho. Tsy afaky mamoa amy zao avao ty sampan’ny voaloboky laha tsy mipitiky amy voaloboky iny. Tsy afaky mamoa koa nareo laha tsy miaraky amiko avao. 5 Zaho ro voaloboky le nareo ty sampany. Ze miaraky amiko avao sady zaho miaraky aminy, ro tena mamoa, satria tsy afaky manao raha mihintsy nareo laha misaraky amiko. 6 Laha misy olo tsy miaraky amiko, le hanahaky sampany aria ivelany any rey ie, ka malazo. Le avorin’olo raha rey, bakeo atorakiny anaty afo ao le may. 7 Angataho ze raha teanareo fa hamea anareo, laha miaraky amiko avao nareo sady am-ponareo ao avao ty safàko. 8 Mahazo voninahitsy Babako lafa mamoa maro avao nareo sady asehonareo hoe mpianatsiko nareo. 9 Mitovy amy itiavan’ny Baba ahy ro itiavako anareo. Ka anovo avao ze hitiavako anareo. 10 Laha manoriky ty didiko nareo, le hataonareo avao ze hitiavako anareo, satria zaho koa manoriky ty didin’ny Baba sady ataoko avao ze hitiavany ahy.
11 “Volaniko aminareo raha zay soa ho falifaly manahaky ahy nareo, sady mba ho feno hafaleanareo zay. 12 Zao ty didiko: “Mifankatiava nareo, manahaky ty nitiavako anareo. 13 Tsy misy mana fitiava bevata mandilatsy ani-zao, le ty mahafoy ty ainy ho ahi-ty namany. 14 Namako nareo laha manoriky ty didy ameako anareo. 15 Tsy kaihiko hoe mpanompo sasy nareo, satria ty mpanompo tsy mahay ze raha ataon’ny tompony. Fa kaihiko hoe nama nareo, satria ambarako anareo iaby ze raha nireko baka amy Babako. 16 Tsy nareo ro nifily ahy, fa zaho ro nifily anareo. Nanendry anareo hamokatsy avao aho, sady hamokatsy voa maharitsy. Amy zay hamean’ny Baba anareo ze raha iaby angatahinareo aminy amy anarako.
17 “Reo ty didy ameako anareo, amy zay nareo mifankatea. 18 Laha halani-zao tontolo zao nareo, le tiarovo fa zaho fa nihalany talohanareo. 19 Laha anisani-zao tontolo zao nareo, le ho teani-zao tontolo zao satria azy. Fe satria nareo tsy anisani-zao tontolo zao, fa fa nifiliko baka amy zao tontolo zao eo, le halani-zao tontolo zao nareo. 20 Tiarovo raha nivolaniko taminareo iny hoe: Ty mpanompo tsy anabo mandilatsy ty tompony. Laha nanenjiky ahy rozy, le hanenjiky anareo koa. Le laha nanoriky ty safàko rozy, le hanoriky ty safànareo koa. 21 Fe ty anarako ro mahavy an-drozy hanao an’ny raha iaby rezay aminareo, satria tsy hain-drozy Azy naniraky ahy iny. 22 Laha hoe tsy niavy aho sady tsy nivola tamin-drozy, le tsy ho nanan-tsiny rozy. Fe tsy mana fialan-tsiny amy ty fahotan-drozy rozy henanizao. 23 Ze malay ahy le malay an’ny Babako. 24 Tsy ho nanan-tsiny rozy laha tsy nataoko tamin-drozy teo fahagagà mbo tsy nisy nanao rey. Fe henanizao rozy tsy vitan’ny hoe nahita ahy, fa mbo malay anay amy Babako koa. 25 Fe miseho raha zay, mba ho tanteraky raha voasoratsy amy Lalàna ao iny hoe: ‘Malay ahy fahatany avao rozy.’ 26 Ho avy mpanampy hirahiko aminareo any iny, azy baka amy Baba any iny, zany hoe ty fanahin’ny fahamarina. Lafa avy mpanampy baka amy Baba zay, le hanome porofo mikasiky ahy. 27 Bakeo nareo amy zay koa ro hanome porofo mikasiky ahy, satria nareo fa niaraky tamiko liany tamy voalohany.