Ty Taratasy Faharoe ho ahi-ty Tesalonianina
1 Baka amy Paoly noho Silvano* noho Timoty.
Ho ahi-ty fiangona a Tesalonika any, azy miharo raiky amy Ndranahary Babantsika noho Jesosy Kristy Tompo iny.
2 Enganè Ndranahary Babantsika iny noho Jesosy Kristy Tompo mba hampiseho hasoam-panahy miavaky* aminareo sady hanome fiadana anareo!
3 Tsy maintsy misaotsy a-Ndranahary ho anareo avao zahay, rahalahy. Mety soa raha zay satria tena mihamatanjaky ty finoanareo, sady vomaiky mifankatea biby nareo iabiaby. 4 Ka le mampirengirengy anay amy fiangona-Ndranahary rey eo nareo, satria miaritsy sady manam-pinoa ndre tratsin’ny* fanenjeha noho raha sarotsy* aza. 5 Manaporofo raha zay fa manao ty rariny Ndranahary lafa mitsara, ka ho azony ekè hoe maeva ty Fanjakà-Ndranahary nareo. Fanjakà io ro mahavy anareo miaritsy fijalea marè.
6 Tena rariny ty ahi-Ndranahary laha hanasazy ani-ze mampijaly anareo ie. 7 Fa nareo ze miaritsy fijalea le hafahy miaraky aminay, lafa aseho mazava baka an-danitsy any Jesosy Tompo miaraky amy ty anjeliny mahery, 8 amy afo miroaroa ao. Hamaly ani-ze olo tsy mahay a-Ndranahary ie amy fotoa zay, sady hamaly ani-ze olo tsy manoriky ty vaovao soa mikasiky an’i Jesosy Tompontsika. 9 Hotsarà olo rey ka hosazỳ, zany hoe haripaky mandrakizay, le tsy ho amy Tompo eo sasy sady tsy hahita ty heriny be voninahitsy sasy. 10 Lafa avy ie amy fotoa zay, le hamea voninahitsy miaraky amy ty olony masy, ka ho tseriky biby ze olo mampiseho finoa lafa mahita azy. Ho anatin’ny olo rey koa nareo satria nino ani-ze raha nitorinay.
11 Zay mihintsy mahavy anay tsy mieny mivavaky ho anareo io, mba ho hitan’ny Ndranaharintsika iny fa maeva an’ny raha nikaihany anareo iny nareo. Mivavaky koa zahay mba hampiasa ty heriny ie ka hotanterahiny iaby ze raha teany, sady hataony ze hahavano ty raha ataonareo vokatsin’ny finoanareo. 12 Amy zay hamea voninahitsy amy alalanareo ty anaran’i Jesosy Tompontsika, le hiharo raiky aminy nareo, mifanaraky amy ty hasoam-panahy miavaky nasehon’ny Ndranaharintsika iny noho Jesosy Kristy Tompo.