Asan’ny Apostoly
12 Tamy fotoa zay, nampijalin’i Heroda mpanjaka ty olo sisany tamy fiangona ao. 2 Nivonoany tamy sabatsy Jakoba rahalahin’i Jaona. 3 Lafa nihitany hoe nahafalifaly an’ny Jiosy rey raha zay, le nisamboriny koa Petera.—Andro fihinana Mofo Tsy Misy Levira tamy zay.— 4 Nisamboriny Petera bakeo nigadrany. Le nisy maramila 16 nifandimby niamby azy, ka nizarà kiefatsy efatsy maramila rey. Nataony raha zay satria teany haboaky amy vahoaky eo* Petera afaran’ny Paska. 5 Le nitanjaha amy prizon ao Petera, fa ty fiangona nivavaky mafy tamy Ndranahary ho azy.
6 Tamy haly talohan’ny hampiboahan’i Heroda azy iny amy zay, niroro tanivon’ny maramila roe rezay eo Petera, sady nirohy seny roe. Nisy mpiamby koa talohan’ny varavara teo niamby an’ny prizon iny. 7 Ingy amy zay nisy anjelin’i Jehovah nitsanga teo, sady nisy hazavà namirapiratsy tamy efitsin’ny prizon iny ao. Le nikitihiny tamy sorokiny eo Petera ka nifohaziny, sady hoy ty asany: “Mitsangàna malaky!” Le nilatsaky baka an-tanan’i Petera eny seny rey. 8 Le hoy anjely iny taminy: “Misikìna* le anisio ty kapanao.” Le nataony raha zay. Farany nivola anjely iny hoe: “Anisio sikinao ivelany iny, le oriho aho.” 9 Le niboaky nanaraky an’ny anjely iny Petera. Fe tsy hainy hoe tena ie raha nataon’ny anjely iny, fa nieritseritsy ie hoe nahita fahità. 10 Nandalo mbamy mpiamby voalohany noho faharoe rey mbeo rozy, ka niavy tamy vavahady vy militsy an-tanà ao iny. Le nivoha ho azy vavahady iny mba hiboahan-drozy. Lafa nitafiboaky rozy, le nandeha nijotso tamy lala raiky zay. Avy le niala taminy eo anjely iny bakeon’iny. 11 Lafa nazava soa amy Petera amy zay ty raha niseho, le hoy ty asany: “Henanizao aho vo tena mahazo antoky hoe naniraky ty anjeliny Jehovah, mba hanafaky ahy tamy Heroda noho tamy ty raha raty iaby nieritseretin’ny Jiosy rey fa hahazo ahy.”
12 Lafa baka nieritseritsy mikasiky an’ny raha zay ie, le nandeha tan-tranon’i Maria renin’i Jaona any. Jaona io azy kaihy hoe Marka iny. Le nisy olo maro nivory noho nivavaky tao. 13 Lafa nandondò tam-bavahady eo ie, le namonjy eny mpanompovavy mana anara Roda zay mba hanenty hoe ia ao io. 14 Laha vo nihainy ty feon’i Petera, le nifalifaly biby ie ka tsy nivohany vavahady iny, fa lasa ie nilailay nilitsy le nivola hoe mitsanga am-bavahady ao Petera. 15 Le nivola taminy olo rey hoe: “Iha va gegy?” Fe tsy nivitavita ie fa nivola avao hoe ao Petera. Le nivola olo rey hoe: “Anjeliny zay.” 16 Fe mbo nandondò tao avao Petera, ka lafa namoha an’ny vavahady iny rozy, le nahita azy ka nitseriky. 17 Fe nanao fihetsiky tamy tanany ie mba hampitsìna an-drozy, le nitantaraniny tamy an-tsipiriany ty nampiboahan’i Jehovah azy baka amy prizon ao. Le hoy ty asany: “Tantarao amy Jakoba noho rahalahy rey raha zay.” Le niboaky ie, ka nandeha an-tany hafa any.
18 Lafa niavy ty maraindray, le nisabadida maramila rey sady nifanontany hoe nanaia Petera. 19 Nila azy mbaombao Heroda fe tsy nahita. Le nataony ankety mpiamby rey, bakeo nampanandesiny mba hosazỳ. Le niala ta Jodia any Heroda ka nandeha nijotso ta Kaisaria any, le nijano kelikely tany.
20 Neloky* tamin’olo ta Tyro noho ta Sidona ao Heroda. Nifanaraky amy zay olo rey hoe ho aminy any. Lafa baka nandresy lahatsy an’i Blasto, azy niandraikitsy ty tan-tranon’ny* mpanjaka ao iny rozy, le nanao raha mba hilongoa amy mpanjaka, satria baka amy tanin’ny mpanjaka ro nahazoan’ny firenenan-drozy sakafo. 21 Lafa niavy amy zay ty fotoa voatondro, le nisiky akanjon’ny mpanjaka Heroda, ka nipetraky tamy pilasy fitsarà eo sady nanao kabary tamy vahoaky. 22 Le nikorakoraky vahoaky nivory teo rey hoe: “Feo-Ndranahary zao fa tsy feon’olo!” 23 Teo no ho eo avao, le nasian’ny anjelin’i Jehovah arety Heroda, satria tsy nanome voninahitsy a-Ndranahary. Le nihanin’ny kankana ie ka nimaty.
24 Fe mbo niparitaky avao ty safàn’i Jehovah sady nihamaro ty olo lasa mpino.
25 Lafa nivitan’i Barnabasy noho Saoly ty fizarà fanampea ta Jerosalema any, le nimpoly rozy ka nandesin-drozy niaraky tamin-drozy Jaona, azy kaihy koa hoe Marka iny.