Asan’ny Apostoly

10 Nisy lahilahy mana anara Kornelio zay ta Kaisaria any. Sefon’ny maramila* tamy azy nikaihy hoe toropy maramila italianina* iny ao ie. 2 Mpivavaky be sady natahotsy a-Ndranahary ie noho ty olo iaby trano raiky aminy. Le nanome raha maro mba hanampea ty mahantra ie sady nivavaky tsy tampaky tamy Ndranahary. 3 Tamy lera fahasivy* teo ho eo, le nahita fahità mazava soa ie. Nahita anjeli-Ndranahary namonjy azy ie sady nivola taminy hoe: “Kornelio!” 4 Le nanenty azy soa Kornelio sady natahotsy marè, ka nanontany hoe: “Ino va lahy zay?” Le hoy anjely iny: “Fa nijanjini-Ndranahary ty vavaky nataonao, le hitany koa ty fiferinesanao ty mahantra, ka tsy halinony raha zay. 5 Ka ndany maniraky olo ho a Jopa any mba hangalaky an’ny lahilahy mana anara Simona zay, azy kaihy hoe Petera iny. 6 Vahiny mipetraky amy Simona mpanao angozy ao ie, le amoron-driaky eo tranon’i Simona io.” 7 Laha vo nandeha anjely niresaky taminy iny, le nikaihiny ty roe tamy mpiasany rey noho maramila raiky mpivavaky be zay. Samby anisan’ny mpikarakara azy olo reo. 8 Le nitantaraniny tamin-drozy ty raha iaby, bakeo nirahiny ho a Jopa any rozy.

9 Hamarain’iny, niakatsy tanabo trano ao Petera tamy lera fahaeny* teo ho eo mba hivavaky. Mbo tan-dala eny olo rey tamy zay sady fa narìny an’ny tanà iny. 10 Fe nimosarè biby Petera ka nita hihinan-kany. Mbo nikarakara sakafo ty olo tamy zay, le tamy fotoa zay Petera nahita fahità. 11 Nihitany nivoha lanitsy iny, le nisy raha manahaky lamba rongony bevata nijotso bakany. Najotso an-tany etoy tamy zorony efatsy rey raha io. 12 Nisy biby sankarazany ty tanatiny ao, zany hoe biby mana tomboky efatsy noho biby milaly noho voro mitily. 13 Bakeo nisy feo nivola taminy hoe: “Petera, mitsangàna! Vonò le hano!” 14 Fe hoy Petera: “Sanatria Tompo! Satria mbo tsy nihina raha maloto noho tsy malio mihintsy aho.” 15 Le nivola taminy fanindroeny feo iny hoe: “Ka volaninao hoe maloto ze raha fa nidiovi-Ndranahary.” 16 Niseho fanintelony raha zay, le avy le nampiakary an-danitsy any raha iny.

17 Mbo niasa loha Petera hoe ino ty mety ho dikan’ny fahità iny. Fe tamy fotoa zay mihintsy, nitsanga tam-bavahady eo lahilahy nirahin’i Kornelio rey. Fa baka nanontany rozy amin’io hoe aia ty tranon’i Simona. 18 Le nikaiky rozy ka nanontany hoe nipetraky* tao va Simona, azy kaihy hoe Petera iny. 19 Amy Petera mbo mieritseritsy an’ny fahità iny, nivola taminy ty fanahy masy hoe: “Misy lahilahy telo mila anao reo! 20 Mitsangàna le mijotsoa, sady ka misalasala mihintsy fa mandehana miaraky amin-drozy, satria zaho ro naniraky an-drozy.” 21 Le nijotso nana amin-drozy any Petera, ka nivola hoe: “Zaho olo ilànareo zao. Manao akory kay?” 22 Le hoy ty asan-drozy: “Misy sefon’ny maramila mana anara Kornelio zay naniraky anay. Lahilahy marina noho matahotsy a-Ndranahary ie, sady mana laza soa amy firenena jiosy iabiaby eo. Nisy anjely masy nirahi-Ndranahary hivola aminy mba hampiavy anao an-tranony any noho hijanjy ze raha hovolaninao.” 23 Le nampandrosoan’i Petera rozy, ka nipetraky taminy ao.

Nioma Petera hamarain’iny, le nandeha niaraky amin-drozy. Nisy rahalahy baka a Jopa ao koa niaraky taminy. 24 Le niavy ta Kaisaria any ie hamarain’iny. Mazava ho azy fa fa nandiny an-drozy Kornelio, sady fa navoriny ty longony noho ty namany marìny azy. 25 Lafa nilitsy Petera, le nitsena azy Kornelio, ka niankohoky tamim-panajà tan-tombony eo. 26 Fe natsangan’i Petera ie, le nivolaniny hoe: “Mitsangàna fa olombelo avao koa aho!” 27 Sady niresaky taminy Petera ro nilitsy tan-trano ao, le nahita olo maro fa vory tao. 28 Le hoy ty asany tamin-drozy: “Hainareo soa fa tsy azon’ny Jiosy atao ty mifandramby na miharìny amin’olo firenena hafa. Fe naseho-Ndranahary ahy fa tsy tokony hivola olo hoe maloto na tsy malio aho. 29 Ka toy aho niavy, sady tsy nandà mihintsy lafa nampiavỳ. Ino amy zay ty antony nanirahanareo olo hangalaky ahy?”

30 Le nivola Kornelio hoe: “Efatsy andro lasa zay, tamy lera manahaky ani-zao mihintsy, zany hoe tamy lera fahasivy,* le nivavaky tan-tranoko ato aho. Nisy lahilahy nanao akanjo namirapiratsy zay amy zay nitsanga talohako eo, 31 ka nivola hoe: ‘Kornelio! Fa nijanjini-Ndranahary ty vavaky nataonao, sady hitany ty fiferinesanao ty mahantra ka tsy halinony raha zay. 32 Ka ndany maniraky olo ho a Jopa any, le kaiho bakao Simona, azy kaihy hoe Petera iny. Vahiny mipetraky an-tranon’i Simona mpanao angozy ao ie, le amoron-driaky eo tranon’i Simona io.’ 33 Avy le naniraky olo taminao any amy zay aho, le manao mahavelo bevata anao niavy atoy. Ka retoa iaby zahay anatreha-Ndranahary eto mba hijanjy ze raha nampivolanin’i Jehovah anao.”

34 Le nanomboky nivola Petera, ka hoy ty asany: “Haiko soa amy zay henanizao, fa tsy mitingy volon’olo* Ndranahary, 35 fa ze olo matahotsy azy noho manao raha soa ro mahazo hatò aminy, ndre ino ndre ino ty firenena misy azy. 36 Nandefa hafatsy tamy anan’Israely any ie, mba hotorỳ amin-drozy vaovao soa iny hoe afaky milongo amy Ndranahary amy alalan’i Jesosy Kristy rozy. Jesosy io ro Tompo ho ahin’olo iaby. 37 Hainareo fa tafaran’ny batisa nitorin’i Jaona iny, le nataon’olo resaky ta Jodia* any, nanomboky ta Galilia any, 38 ty mikasiky an’i Jesosy baka a Nazareta any iny. Nihosora-Ndranahary fanahy masy ie, sady nameany hery ka nandeha tamy faritsy iny iabiaby. Le nanao raha soa noho nanafaky ty aretini-ze olo nampijalin’ny Devoly ie, satria nanampy azy Ndranahary. 39 Le vavolombelon’ny raha iaby nataony tamy tanin’ny Jiosy any noho ta Jerosalema any zahay. Fe nivonoan-drozy ie, ka nahanton-drozy tamy tsato-kazo* eo. 40 Kanefa nivelomi-Ndranahary ie tamy andro fahatelo, le nengany hiseho tamin’olo.* 41 Fe tsy tamin’olo iaby ty nisehoany, fa tamy vavolombelo nitendre-Ndranahary mialoha rey, zany hoe taminay niaraky nihina noho niaraky nino taminy tafaran’ny nameloma azy. 42 Nandidy anay hitory amin’olo koa ie, ka hanazava soa* hoe ie ro nitendre-Ndranahary hitsara ty velo noho ty maty. 43 Ie azy nambaran’ny mpaminany iaby iny hoe ze mino azy le hahazo fanengà hadisoa amy anarany.

44 Tamy fotoa niresahan’i Petera an’ny raha rezay, le nilatsaky tamy ze olo iaby nijanjy ty safà-Ndranahary ty fanahy masy. 45 Le nitseriky Jiosy mpianatsy* rey, azy lia raiky tamy Petera rey, satria nilatsaky tamin’olo firenena hafa koa ty fanahy masy, azy fanomeza maimaim-poana iny. 46 Tsy zay fa naharè an-drozy nivola tamy fivolana samby hafa noho nankalaza a-Ndranahary rozy. Bakeo hoy Petera: 47 “Nahazo fanahy masy manahaky antsika koa olo reto. Ka misy afaky misaka an-drozy tsy hatao batisa amy rano va?” 48 Le nampanoviny batisa tamy anaran’i Jesosy rozy. Bakeo nangataky an’i Petera rozy mba hijano andro vitsivitsy tany.