Asan’ny Apostoly

2 Nivory tamy pilasy raiky teo rozy iaby, tamy Fetin’ny Pentekosta. 2 Tampotampoky eo, nisy feo marè manahaky tsioky marè biby io baka an-danitsy any, le nahareza azy iaby ty tan-trano ao. Mbo nipetrapetraky rozy tamy zay. 3 Le nahita raha manahaky lelan’afo* maro io rozy. Nizarazara raha rey, ka samby nisy kiraidraiky ty tanabon-drozy eny. 4 Le nifeno fanahy masy rozy iaby, ka nivola tamy fivolana samby hafa, arakaraky ze nampivolanan’ny fanahy an-drozy.

5 Tamy fotoa zay, le nisy Jiosy baka amy firenena iaby an-tany etoy nipetraky ta Jerosalema ao. Olo natahotsy a-Ndranahary rozy. 6 Lafa naharè an’ny feo iny vahoaky rey, le nivorivory sady nitseri-draha, satria samby naharè an’ny mpianatsy rey nivola tamy fivolanan-drozy. 7 Le nitseriky biby rozy ka nivola hoe: “Mba henteo tse! Tsy Galilianina iaby va mivola eo reo? 8 Ka manino tsika maharè an-drozy mivola amy safàn-drazantsika io? 9 Kanefa tsika Partianina, Medianina, Elamita, olo baka a Mezopotamia noho Jodia noho Kapadokia, noho baka a Ponto noho faritanin’i Azia any, 10 Frijia noho Pamfilia, Ejipta noho ty faritsin’i Libya anilan’i Kyrena, noho vahiny baka a Roma any, ndre Jiosy zay ndre olo lasa nanaraky ty fivavaha jiosy,* 11 noho Kretanina noho Arabo. Fe rentsika rozy mivola amy fivolanantsika mikasiky ty asa bevata natao-Ndranahary.” 12 Nitseri-draha rozy iaby ka nifampiresaky hoe: “Ino ty dikani-zao?” 13 Fe nisy koa ty nikizakizaky ka nivola hoe: “Mamon’ny divay mamy* rozy.”

14 Fe nitsanga Petera noho Apostoly 11 rey, le nivola marè soa Petera hoe: “Nareo mipetraky a Jodia noho nareo iaby mipetraky a Jerosalema eto, tiarovo toy le janjino soa ty safàko: 15 Tsy mamo araky ty ieritseretanareo azy olo reo, satria vo lera fahatelo amy andro* henanizao. 16 Fa mifanohitsy amy zay ty nampivolany an’i Joela mpaminany hoe: 17 ‘“Sady amy andro farany”, hoy Ndranahary, “le handatsahako pakilany amy fanahiko ty karazan’olo iaby, ka ty anakilahinareo noho ty anakampelanareo haminany, ty pamaraky aminareo eo hahita fahità, le ty nahoda aminareo eo hanonofy. 18 Sady ndre ty mpanompolahiko noho ty mpanompovaviko, le handatsahako pakilany amy fanahiko amy fotoa zay, ka haminany. 19 Le hanao fahagagà* amy lanitsy anabo eny aho, sady hanao famantara amy tany ambany eny—tsy ino zay fa lio noho afo noho setroky matevy. 20 Haìky ty masoandro le ho mena manahaky lio io ty vola, alohan’ny hiavian’ny andron’i Jehovah, zany hoe andro bevata noho miavaky iny. 21 Le ze olo iaby mikaiky ty anaran’i Jehovah ro ho avotsy.”’

22 “Nareo lahilahy israelita, janjino safà toy: Naseho-Ndranahary mazava soa taminareo hoe nirahiny lahilahy kaihy hoe Jesosy baka a Nazareta any iny, satria tamy alalany ro nanaova-Ndranahary raha miavaky noho fahagagà* noho famantara, araky ty fa hainareo. 23 Namea anareo lahilahy iny, satria fa sitrapo-Ndranahary* raha zay, sady fa nihainy mialoha. Nifantsihinareo tamy tsato-kazo eo ie, le olo mpandika lalàna ro nampanovinareo an’ny raha zay. Nivonoanareo ie, 24 fe nivelomi-Ndranahary. Nanafaky azy tamy fahararin’ny* fahafatesa Ie, satria tsy nahavita namehy azy ty fahafatesa. 25 Tsy zay fa niresaky mikasiky azy Davida hoe: ‘Ataoko alohako eo* avao Jehovah. Tsy hihozonkozo mihintsy aho satria ie ankavanako eo. 26 Lasa falifaly amy zay ty foko sady manitranitra ty lelako. Le hana raha tamany avao aho,* 27 satria tsy henganao An-dolo* ao, sady tsy henganao ho lo mpanomponao tsy mivaliky iny. 28 Nambaranao ahy ty lala mandeha amy fiaina any, le hataonao falifaly biby aminao eo* aho.’

29 “Rahalahy, ameonareo fivolana aho mba hiresaky aminareo mazava soa mikasiky an’i Davida loham-pianakaviantsika, azy fa nimaty noho fa nalevy iny, sady amintsika eto ty lolony zisiky henanizao. 30 Mpaminany ie, le hainy fa fa nifanta taminy Ndranahary hoe ty raiky amy taranakiny ro hapetraki-Ndranahary amy sezim-panjakàny eo. Midika zay fa 31 fa nihain’i Davida mialoha hoe hovelomy Kristy, le fa niresaky mikasiky ani-zay ie. Niresahiny hoe tsy nengà Tan-dolo* ao Jesosy sady tsy lo ty nofotsiny. 32 Nivelomi-Ndranahary ndraiky Jesosy iny, le vavolombelon’ny raha zay zahay iaby. 33 Le satria ie nasondrotsy ankavana-Ndranahary eo sady nahazo ty fanahy masy nampitamanin’ny Baba iny, le ie ro nampilatsaky an’ny raha hitanareo noho renareo reo. 34 Fa Davida tsy niakatsy tan-danitsy any, fa ie aza nivola hoe: ‘Hoy Jehovah tamy Tompoko: “Mipetraha ankavanako etoa 35 zisiky hanaovako ty fahavalonao ho fasianao tomboky.”’ 36 Soa ho hain’ny taranakin’Israely iaby mazava soa zany fa natao-Ndranahary ho Tompo noho Kristy azy Jesosy nivonoanareo tamy tsato-kazo eo iny.”

37 Le nivoatsiboky ty fon-drozy lafa naharè an’ny raha zay, ka hoy ty asan-drozy tamy Petera noho apostoly sisany rey: “Rahalahy, ka ino zany ty tokony hataonay?” 38 Le hoy ty asan’i Petera tamin-drozy: “Mibebaha, le tokony samby hatao batisa amy anaran’i Jesosy Kristy nareo kiraidraiky, mba hahazoanareo fanengà hadisoa. Le hahazo an’ny fanomeza maimaim-poana iny nareo, zany hoe ty fanahy masy. 39 Satria fa nampitamany an’ny raha zay nareo noho ty ananareo noho ty olo iaby a lavitsy any, zany hoe ze olo iaby kaihin’i Jehovah Ndranaharintsika hamonjy azy.” 40 Le mbo niresaky raha maro Petera ka nanome fanazavà feno,* sady nampimpolimpoly nampirisiky an-drozy hoe: “Misaraha amy taranaky maheriloha toy amy zay ho avotsy nareo.” 41 Farany natao batisa ze olo naneky soa ty safàn’i Petera, ka niampy 3 000 teo ho eo ty isakin-drozy tamy andro iny. 42 Nijanjy soa ty fampianaran’ny apostoly rey avao rozy, le nifampizara ze raha nananan-drozy noho niaraky nisakafo avao, sady tsy nieny nivavaky.

43 Le natahotsy iaby ty olo, sady nimaro ty fahagagà* noho famantara nataon’ny apostoly rey. 44 Le nivory raiky iaby ze olo lasa mpino, ka niharoan-drozy ty raha iaby. 45 Navilin-drozy koa ty tanin-drozy noho ty hananan-drozy, ka ze drala niazo baka amy raha zay, le nizaràn-drozy tamin-drozy iaby, mifanaraky amy ty raha nilàn-drozy kiraidraiky. 46 Tamy tempoly ao avao rozy sanandro sady nitovy hevitsy. Nisakafo tamy trano samby hafa koa rozy, ka nifalifaly nizara ty sakafon-drozy sady nanao an’ny raha zay tamy fo malio, 47 le nidera a-Ndranahary sady nahazo hatò tamin’olo iaby. Tanatin’ny fotoa rezay, le nitao olo maro Jehovah sanandro mba hanampy isaky an-drozy. Tsy ia olo reo fa azy navota-Ndranahary rey.