Nisoratin’i Jaona
8 12 Bakeo nivola tamin-drozy ndraiky Jesosy hoe: “Zaho ro fahazavani-zao tontolo zao. Ze manaraky ahy le tsy handeha amy maìky mihintsy, fa hana hazavà manome fiaina.” 13 Le nivola taminy Fariseo rey hoe: “Iha avao ro mitsanga ho vavolombelonao, ka tsy marina ty raha volaninao.” 14 Hoy ty navalin’i Jesosy an-drozy: “Ndre zaho avao aza ro mitsanga ho vavolombeloko, le marina ty raha volaniko, satria haiko ty niaviako noho ze handehanako. Fa nareo tsy mahay ty niaviako noho ze handehanako. 15 Nareo mitsara arakaraky ze hitanareo avao,* fa zaho tsy mitsara olo mihintsy. 16 Fa ndre mitsara koa aho, le marina ty fitsarako, satria tsy zaho raiky avao ro mitsara fa miaraky amiko Baba naniraky ahy iny. 17 Voasoratsy amy Lalànanareo ao koa hoe: ‘Marina ty safàn’ny vavolombelo roe.’ 18 Mitsanga ho vavolombelo ho ahi-ty vatako aho, le mitsanga ho vavolombeloko koa Baba naniraky ahy iny.” 19 Le nivola taminy rozy hoe: “Ka aia Babanao zao?” Le hoy ty navalin’i Jesosy: “Samby tsy hainareo ndre zaho ndre Babako, satria laha nahay ahy nareo, le ho nihainareo koa Babako.” 20 Tamy pilasy fanajaria raha lafovily ao ie ro nivola an’ny raha zay, amy ie nampianatsy tamy tempoly ao iny. Fe tsy nisy nanambotsy ie satria mbo tsy niavy ty fotoa voatondro ho azy.
21 Le nivola tamin-drozy ndraiky ie hoe: “Handeha aho, le hila ahy nareo. Fe mbo hanota avao nareo zisiky hahafaty anareo, sady tsy afaky ho amy pilasy handehanako zay any nareo.” 22 Bakeo nivola Jiosy rey hoe: “Hamono fo va ie mahavy azy mivola io hoe: ‘Tsy afaky ho amy pilasy handehanako zay any nareo’?” 23 Le nitohizany avao resakiny iny hoe: “Nareo baka ambany atoy, fa zaho baka anabo any. Nareo baka amy zao tontolo zao, fa zaho tsy baka amy zao tontolo zao. 24 Zay nahavy ahy nivola taminareo hoe: Mbo hanota avao nareo zisiky hahafaty anareo. Satria laha tsy mino nareo hoe zaho ro ie, le mbo hanota avao nareo zisiky hahafaty anareo.” 25 Farany nivola rozy hoe: “Ka ia zany iha io?” Le nivola Jesosy hoe: “Tsy hitako ty antony mbo hiresahako aminareo eto. 26 Maro ty raha tsy maintsy horesahiko mikasiky anareo noho ty raha hotsarako. Sady mivola ty marina azy naniraky ahy iny, le ze raha tena nireko taminy ro resahiko amy zao tontolo zao.” 27 Fe tsy niazon-drozy hoe Babany an-danitsy any iny niresahiny io. 28 Le hoy ty asan’i Jesosy: “Lafa ampiakarinareo* ty Anak’olo, vo ho hainareo hoe zaho ro ie. Ho hainareo koa fa tsy manao ze teateako* avao aho ndre ino zay ndre ino, fa ze raha nampianarin’ny Baba ahy ro volaniko. 29 Miaraky amiko azy naniraky ahy iny. Tsy nengany handeha raiky aho, satria manao raha mahafalifaly azy avao.” 30 Le nimaro biby ty olo nino azy lafa ie nivola an’ny raha rezay.
31 Bakeo nivola tamy Jiosy nino azy rey Jesosy hoe: “Laha manaraky ty safàko avao nareo, le mpianatsiko vatany, 32 le ho hainareo ty marina,* le ty marina hanafaky anareo.” 33 Le hoy ty asan-drozy: “Zahay anè taranakin’i Abrahama sady mbo tsy niandevon’olo mihintsy, ka manino iha ro mivola hoe: ‘Ho afaky nareo’?” 34 Le hoy ty navalin’i Jesosy: “Ambarako anareo mazava soa fa andevon’ny ota ze zatsy manota. 35 Ankoatsini-zay, ty andevo tsy hoe mijano an-trano ao zisiky farany, fa ty anaky ro mijano ao zisiky farany. 36 Ka laha ty Anaky ro manafaky anareo, le tena ho afaky nareo. 37 Haiko fa taranakin’i Abrahama nareo, fe ta hamono ahy nareo satria tsy orihinareo ty safàko. 38 Ze raha nihitako tamy zaho niaraky tamy Babako ro volaniko, fa nareo manao ze raha nirenareo tamy babanareo.” 39 Le hoy ty navalin-drozy: “Abrahama ro babanay.” Le hoy Jesosy: “Laha anan’i Abrahama nareo, le ho nanao ty asan’i Abrahama. 40 Fe nareo ta hamono ahy, kanefa ty marina nireko tamy Ndranahary ro nivolaniko taminareo. Tsy nanao manahaky ani-zay Abrahama. 41 Manao ty asan’ny babanareo nareo.” Le hoy ty asan-drozy: “Tsy nateraky baka amy fijanganjangà* zahay, fa raiky avao ty Babanay, zany hoe Ndranahary.”
42 Hoy Jesosy tamin-drozy: “Laha Ndranahary ro Babanareo le tokony ho tea ahy nareo, satria baka amy Ndranahary any aho ro niavy etoy. Tsy hoe niavy etoy aho satria hoe zay ro teateako,* fa ie ro naniraky ahy. 43 Manino ty raha volaniko ro tsy azonareo? Satria tsy zakanareo ty mijanjy ty safàko. 44 Baka amy Devoly babanareo nareo, le ze raha irin’ny babanareo ro teanareo hatao. Fa mpamono olo baka am-boalohany any ie,* sady tsy nivahatsy tamy ty marina, satria tsy misy marina mihintsy aminy ao. Mavandy ie satria fa zay ty maha ie azy. Mpavandy ie sady baban’ny vandy. 45 Fa zaho mivola ty marina aminareo kanefa tsy inoanareo. 46 Ia aminareo ro afaky manaporofo hoe nanota aho? Ka laha mivola ty marina aho, le manino nareo ro tsy mino ahy? 47 Ty olo baka amy Ndranahary le mijanjy ty safà-Ndranahary. Fe nareo tsy mijanjy ahy satria tsy baka amy Ndranahary nareo.”
48 Le hoy ty navalin’ny Jiosy rey azy: “Tsy marina va raha nivolaninay iny hoe: ‘Samaritanina iha sady misy demonia’?” 49 Le hoy Jesosy hoe: “Tsy misy demonia aho, fa manome voninahitsy an’ny Babako, fa nareo tsy manome voninahitsy ahy. 50 Fe zaho tsy mila voninahitsy ho ahi-ty vatako, fa ao azy ta hanome voninahitsy ahy iny, le ie ro mitsara. 51 Ambarako anareo mazava soa fa laha misy olo manoriky ty safàko, le tsy ho maty mihintsy ie.” 52 Le nivola Jiosy rey hoe: “Hainay amy zay henanizay fa misy demonia iha. Fa nimaty Abrahama, le fa nimaty koa mpaminany rey, kanefa iha mivola hoe: ‘Laha misy olo manoriky ty safàko, le tsy ho maty mihintsy ie.’ 53 Iha va anabo mandilatsy an’i Abrahama babanay fa nimaty iny? Fa nimaty koa mpaminany rey. Ka manao ty vatanao ho ia iha io?” 54 Le hoy ty navalin’i Jesosy: “Laha manome voninahitsy ty vatako aho, le tsy misy dikany ty voninahitsiko. Babako ro manome voninahitsy ahy. Ie azy volaninareo hoe Ndranaharinareo iny. 55 Fe tsy hainareo ie, fa zaho mahay azy. Laha mivola aho hoe tsy haiko ie, le mpavandy manahaky anareo koa aho. Fe haiko ie, le manoriky ty safàny aho. 56 Nifalifaly biby Abrahama babanareo, satria nitamà hahita ty andro hiaviako. Fa nihitany* andro zay ka nifalifaly ie.” 57 Le nivola taminy Jiosy rey hoe: “Iha aza mbo tsy ampy 50 tao iaby, ka akory ty nahitanao an’i Abrahama?” 58 Le nivola tamin-drozy Jesosy hoe: “Ambarako anareo mazava soa fa mbo tsy nisy Abrahama, le fa nisy aho.” 59 Farany nangalaky vato hitoraha azy rozy, fe nivony Jesosy le niala tamy tempoly ao.