Nisoratin’i Jaona

5 Nisy fetin’ny Jiosy tafarani-zay, ka niakatsy ta Jerosalema any Jesosy. 2 Nisy dobo* raiky zay amy zay ta Jerosalema ao, tanilan’ny Vavahadin’aondry eo. Betizata ro ikaiha azy amy safà hebreo. Nisy lala mitafo limy raha io. 3 Nimaro olo marary, jiky, kombo, noho kilemaina* tamy lala mitafo reo teo. 4 —— 5 Fe tao koa nisy lahilahy fa narary tanatin’ny 38 tao zay. 6 Nihitan’i Jesosy nandry teo ie, sady nihainy hoe fa ela ty namparary azy, ka nivolaniny hoe: “Teanao ho afaky va aretinao io?” 7 Le nivola lahilahy marary iny hoe: “Tsy misy olo manampy ahy hijobo amy dobo ao lahy nahoda lafa mihetsiky rano io. Fa laha vo hilitsy ao aho, le fa misy olo hafa mijobo ao alohako.” 8 Le hoy Jesosy taminy: “Mitsangàna! Alao fandreanao io le mandehana.” 9 Avy le niafaky ty aretin’ny lahilahy iny, ka nalàny fandreany iny, le nanomboky nandeha ie.

Sabata ty andro tamy zay. 10 Nivola tamy lahilahy iny* amy zay Jiosy rey hoe: “Sabata androany, ka tsy mahazo manday fandrea iha.” 11 Fe hoy ty navaliny an-drozy: “Ka azy nanafaky ty aretiko iny mihintsy anè ro nivola tamiko hoe: ‘Alao fandreanao io, le mandehana’!” 12 Le nanontanean-drozy ie hoe: “Ia olo nivola anao zao hoe: ‘Alao fandreanao io le mandehana’?” 13 Fe tsy nahay an’i Jesosy lahilahy iny, satria fa tafilitsy anaty vahoaky rey any Jesosy.

14 Nihitan’i Jesosy tamy tempoly ao ie tafarani-zay, le nivolaniny hoe: “Fa afaky aretinao iny henanizay, le ka manota sasy tsy no hisy raha raty mandilatsy an’iny hahazo anao.” 15 Le nandeha lahilahy iny ka nivola tamy Jiosy rey hoe Jesosy ro nanafaky an’ny aretiny iny. 16 Zay ty antony nahavy an’ny Jiosy rey hanenjiky an’i Jesosy, satria tamy Sabata ie ro nanao an’ny raha reo. 17 Fe hoy ty navaliny an-drozy: “Miasa avao Babako zisiky henanizao, le zaho koa miasa avao.” 18 Lafa naharè ani-zay Jiosy rey, le vomaiky nita hamono azy, satria nieritseritsy rozy hoe tsy nanaja Sabata ie sady nikaiky a-Ndranahary hoe Babany, ka nihaboky ho mitovy amy Ndranahary.

19 Le hoy ty asan’i Jesosy tamin-drozy: “Ambarako anareo mazava soa fa tsy manao ze teateany* avao Anaky iny, fa ze raha hitany ataon’ny Baba avao ro ataony, satria ze raha iaby ataon’ny Baba, le zay koa ro ataon’ny Anaky iny, sady ataony mitovy amy ze anaovan’ny Baba azy. 20 Tea an’ny Anaky iny Baba iny, ka atorony an’ny Anany io iaby ze raha ataony. Mbo hisy asa be mandilatsy ani-reo aza hatorony azy, soa ho tseriky nareo. 21 Satria velomin’ny Baba ndraiky ty maty, le manahaky ani-zay koa fa velomin’ny Anaky iny ze olo teany hovelomy. 22 Tsy mitsara olo mihintsy Baba iny, fa nankininy tamy Anaky iny ty fitsarà iaby, 23 amy zay hanome voninahitsy an’ny Anaky iny ty olo iaby, manahaky ty anomezan-drozy voninahitsy an’ny Baba iny. Ze tsy manome voninahitsy an’ny Anaky iny, le tsy manome voninahitsy an’ny Baba naniraky azy iny. 24 Ambarako anareo mazava soa fa hahazo fiaina mandrakizay ze olo mijanjy ty safàko ka mino ani-Azy naniraky ahy iny. Le tsy hotsarà* olo zay satria sahala hoe fa nimaty fe nivelo ndraiky.

25 “Ambarako anareo mazava soa fa ho avy ty fotoa, le fa manomboky ie henanizao, ka haharè ty feon’ny Anaki-Ndranahary iny ty olo maty, le ho velo ze mijanjy, 26 satria mana fahefà hanome fiaina* Baba iny, le nameany fahefà hanome fiaina koa Anaky iny. 27 Nameany fahefà hitsara koa ie, satria ie ro Anak’olo. 28 Ka atao mahatseriky raha zay, fa ho avy ty fotoa ka haharè ty feony ze an-dolo* any, 29 le hiboaky rozy. Ka ze nanao raha soa le hovelomy mba hahazo fiaina, fa ze zatsy nanao raha raty le hovelomy mba hotsarà. 30 Tsy afaky manao ze teateako* avao aho, ndre ino zay ndre ino. Arakaraky ze raha reko avao ro itsarako sady rariny ty fitsarako, satria tsy ty sitrapoko ro teako hatao fa ty sitraponi-Azy naniraky ahy iny.

31 “Laha zaho raiky avao ro mitsanga ho vavolombelo manamarina ty vatako, le tsy marina ty raha volaniko. 32 Fe misy olo hafa koa manamarina ahy, sady haiko fa marina ty raha volaniny mikasiky ahy. 33 Naniraky olo tamy Jaona any nareo, le nivola ty marina ie. 34 Fe zaho tsy miantehitsy amy safàn’olo, fa mivola an’ny raha iaby rezao aho, mba ho avotsy nareo. 35 Jiro nirehitsy noho namirapiratsy lahilahy zay, le fotoa kelikely avao ty nanirianareo ho falifaly tamy ty hazavàny. 36 Fe mana porofo bevata mandilatsy ty amean’i Jaona aho, satria ty asa nampanovin’ny Babako ahy mihintsy henanizao ro ataoko. Le asa reo ro manaporofo fa nirahin’ny Baba aho. 37 Baba naniraky ahy iny mihintsy koa ro nanome porofo mikasiky ahy. Mbo tsy naharè ty feony mihintsy nareo, sady mbo tsy nahita ty tarehiny. 38 Le tsy tanjahanareo am-ponareo ao ty safàny, satria nareo tsy mino ani-azy nirahiny iny.

39 “Mikaroky amy Soratsy Masy ao nareo satria mieritseritsy hoe baka ao ro hahazoanareo fiaina mandrakizay, le raha io* mihintsy ro manome porofo mikasiky ahy. 40 Fe nareo tsy mahefa mamonjy ahy, kanefa zay ro hahazoa* fiaina. 41 Tsy mandramby voninahitsy baka amin’olo aho. 42 Fe haiko soa fa tsy tea a-Ndranahary nareo anainareo any. 43 Niavy tamy anaran’ny Babako aho, fe tsy nirambesinareo. Kanefa laha misy olo avy bakany manday ty anarany manoka, le horambesinareo. 44 Akory moa ty hahavy anareo hino, kanefa nareo mandramby voninahitsy baka aminareo samby nareo avao, fa tsy mila voninahitsy baka amy Ndranahary toka* iny? 45 Ka mieritseritsy hoe hanasisỳ* anareo amy Baba any aho. Olo hafa ro mivola hoe nanao raha raty nareo. Tsy ia olo io fa Mosesy, azy nitamaninareo iny. 46 Laha nino an’i Mosesy nareo, le ho nino ahy, satria nanoratsy mikasiky ahy Mosesy. 47 Fe laha tsy mino ty raha nisoratiny nareo, akory ty hinoanareo ty raha volaniko?”