Asan’ny Apostoly
1 Azy fitantarà voalohany nisoratiko iny, Teofilo, le mikasiky ty raha iaby nataon’i Jesosy noho nampianariny baka am-boalohany any, 2 zisiky amy andro nampiakara azy ho an-danitsy any. Nampiakary ie lafa baka nanome toromariky tamy alalan’ny fanahy masy ho an’ny apostoly nifiliny rey. 3 Lafa baka nijaly ie, le nasehony tamin-drozy hoe velo ie sady porofo mampieky ro nampisehoany ani-zay. Le nihitan-drozy tanatin’ny 40 andro ie, sady niresaky mikasiky ty Fanjakà-Ndranahary. 4 Lafa nifankahita tamin-drozy ie, le namepetsy an-drozy hoe: “Ka miala a Jerosalema eto, fa liniso avao raha nampitamanin’ny Baba iny, azy fa niresahiko taminareo iny, 5 satria Jaona nanao batisa tamy rano, fa nareo hatao batisa amy fanahy masy lafa afaky andro vitsivitsy.”
6 Lafa nivory raiky amy zay rozy, le nanontany azy hoe: “Tompo, henanizao va ty fotoa hampimpolianao ty fanjakà amy Israely?” 7 Le hoy ty asany tamin-drozy: “Tsy anjaranareo ty mahay an’ny lera na fotoa zay, fa Baba iny avao ro mana fahefà amy raha zay. 8 Fe hahazo hery nareo lafa avy aminareo ty fanahy masy, le ho vavolombeloko a Jerosalema noho a Jodia* noho a Samaria noho amy faritsy farany lavitsy an-tany etoy* nareo.” 9 Lafa baka nivola an’ny raha rezay ie, le nampiakary an-danitsy any tamason-drozy eo. Le nisy rahona nandimboky azy, ka tsy nihitan-drozy sasy ie. 10 Amy rozy mbo manenty mana an-danitsy any iny, tamy Jesosy nandeha iny, le nisy lahilahy roe nanao siky foty nitsanga tampoky tanilan-drozy eo, 11 sady nivola hoe: “Nao lahilahy galilianina retia, manino nareo mitsanga eto sady manenty mana an-danitsy any io? Azy Jesosy taminareo teo iny, azy nampiakary an-danitsy any iny, le ho avy ndraiky, ka hanahaky ty nahitanareo azy niakatsy tan-danitsy any iny avao ty himpoliany.”
12 Le nimpoly ta Jerosalema any rozy, lafa baka amy vohitsy kaihy hoe Vohitsy Oliva iny eo. Tsy lavitsy an’i Jerosalema vohitsy io, satria lala sabata raiky* avao ty elanelany. 13 Lafa niavy rozy, le niakatsy tamy trano anabo etazy nipetrahan-drozy iny ao. Retoa iaby rozy: Petera noho Jaona noho Jakoba noho Andrea, Filipo noho Tomasy, Bartolomeo noho Matio, Jakoba anan’i Alfeo, Simona azy mafana fo iny, le Jodasy anan’i Jakoba. 14 Le nitovy hevitsy rozy iaby, ka tsy nieny nivavaky. Nisy ampela vitsivitsy niaraky tamin-drozy, le teo koa Maria renin’i Jesosy noho rahalahiny rey.
15 Tamy fotoa zay le nitsanga tanivon’ny rahalahy rey teo Petera—nisy 120 teo ho eo ty isakin’olo nivory tao tamy zay—ka hoy ty asany: 16 “Rahalahy, tsy maintsy tanteraky ty Soratsy Masy, zany hoe ty faminania nivolanin’ny fanahy masy tamy alalan’i Davida mikasiky an’i Jodasy, azy nitariky olo hanambotsy an’i Jesosy iny. 17 Tsy zay fa niaraky taminay ie taloha, le nivoafily handramby anjara amy fanompoa toy koa. 18 —Lahilahy zay azy nivily tany tamy karama niazony tamy raha tsy marina iny. Niravoky ie ka ty lohany ro nandia. Le nipoaky* ty vatany, ka nivoraky iaby ty tan’ainy ao. 19 Hain’olo iaby a Jerosalema eto raha zay, ka natao hoe Akeldama, zany hoe “Sahan-dra” ty anaran’ny tany io amy fivolanan-drozy.— 20 Voasoratsy amy bokin’ny Salamo ao moa hoe: ‘Enganè ho rava ty tanàny ka tsy hisy hipetraky sasy’, le ‘enganè ho azon’olo hafa ty andraikitsy nananany.’ 21 Dikani-zay, mila atao solony ty lahilahy raiky anisan’ny olo niaraky taminay, tamy fotoa iaby nanaovan’i Jesosy Tompo ty asany* taminay eo, 22 nanomboky tamy nanaovan’i Jaona batisa azy, zisiky tamy andro nampiakara azy tan-danitsy any. Tokony ho lasa vavolombelo miaraky aminay lahilahy zay mba hivola hoe nivelomy Jesosy.”
23 Lahilahy roe amy zay ty natolotsin-drozy. Tsy ia zay fa Josefa, azy kaihy hoe Barsabasy na koa hoe Josto iny, noho Matia. 24 Bakeo nivavaky rozy hoe: “Jehovah, iha ro mahay ty fon’olo iaby, ka atorò anay ze nifilinao amin-drozy roe lahy reto, 25 mba hanao an’ny fanompoa toy noho ho lasa apostoly hisolo an’i Jodasy, azy niala mba hanao ze teateany avao* iny.” 26 Farany nila famantara baka amy Ndranahary rozy, mba hahaiza hoe ia amin-drozy roe ty hofilỳ, le Matia ro nivoafily hanampy isaky* an’ny apostoly 11 rey.