Ty Taratasy Nisoratin’i Jakoba
3 Nareo rahalahiko, tsy tokony ho maro aminareo ro ho lasa mpampianatsy, satria hainareo fa harerè ty hitsarà antsika mpampianatsy. 2 Fa tsika iaby le manao hadisoa* imaro. Laha misy olo tsy manao hadisoa amy ty raha volaniny, le lavorary olo zay, sady mahafehy ty vatany iabiaby. 3 Laha asiantsika taly ty vavan’ny sôvaly mba hahavy azy haneky antsika, le ho azontsika komandỳ koa ty vatany iabiaby. 4 Mba henteo moa ty sambo! Ndre bevata aza raha rey sady atosikin’ny tsioky be, le raha kelikely fanodaha azy iny avao ro anandesan’ny mpanday azy ho amy ze teany handaisa azy.
5 Manahaky ani-zay koa ty lela: Raha kelikely amy vatantsika ao lela io, kanefa mirengirengy biby. Mba henteo moa ty afo! Kelikely avao le fa mampirehitsy ala be. 6 Afo koa ty lela. Amy ty raha iaby amy vatantsika ao, le ty lela ro iavian’ny raha raty iaby, satria mampaloto ty vata iabiaby ty lela, noho mandrehitsy* ty fiaina iabiaby* koa sady arehitsin’ny Gehena.* 7 Azo folahy iaby ty karaza bibinala noho voro noho biby milaly noho biby iaby an-driaky any, sady fa voafolakin’olombelo raha rey. 8 Fe tsy misy olombelo mahavita mamolaky ty lela. Tsy voafehy noho manimba raha io sady feno poizy mahafaty. 9 Raha io ro iderantsika an’i Jehovah Babantsika. Fe raha io koa ro anozonantsika olo, tsy ia zay fa ty olo niforony mba hifanahaky amy Ndranahary. 10 Vava raiky avao ro iderà noho anozona.
Tsy mety laha zay ty raha miseho, rahalahiko. 11 Loharano raiky avao va le hampiboaky rano mamy noho rano mafaitsy baka amy vavany raiky eo avao? 12 Rahalahiko, ty aviavy va hamoa oliva, le ty voaloboky va hamoa aviavy? Ty loharano masira koa tsy afaky hampiboaky rano mamy.
13 Ia aminareo ro hendry noho mahihitsy? Tokony ho soa fandaisam-bata ie, ka ho hita amy ty raha ataony hoe soa fanahy satria mana fahendrea. 14 Fe laha be fialona noho tea aly* nareo am-ponareo ao, le ka mirengirengy na mivola raha mifanohitsy amy fahamarina. 15 Tsy fahendrea baka anabo any raha zay, fa fahendrea baka an-tany etoy, sady baka amy nofotsy noho baka amy demonia. 16 Fa lafa misy olo mialona noho tea aly,* le hisy koa ty koronta noho ty raha raty sankarazany.
17 Fa ty fahendrea baka anabo any le malio tse, bakeo tea filongoa, mahay mandanjalanja, parè hanoriky safà, tena miferinay noho manao raha soa,* tsy mitingy volon’olo,* sady tsy soavolamanatriky. 18 Ankoatsini-zay, le asindraky anatin’ny filongoa ao ty voan’ny fahamarina mba hahasoa ani-ze olo mpampilongo.*