Ty taratasy voalohany ho ahi-ty Korintianina

13 Laha mivola amy safàn’olo noho safàn’anjely aho kanefa tsy manam-pitiava, le sahala amy saba pisaky maneno na kipantsona* mikantsỳ. 2 Le laha mahay maminany aho sady mahazo soa ty dikan’ny sekirè masy iaby, noho mana ty fahaiza iabiaby, noho mana ty finoa iaby ka afaky mamindra vohitsy, kanefa tsy manam-pitiava, le tsy misy dikany* aho. 3 Le laha manome ty hananako iabiaby aho mba hahazoan’olo hafa hany, noho manao soro ty vatako mba hampirengirengy ahy, kanefa tsy manam-pitiava, le tsy mahasoa ahy mihintsy raha zay.

4 Ty fitiava manam-pahareta* noho soa fanahy. Ty fitiava tsy mialona, tsy mirengirengy, tsy mievotsevotsy, 5 tsy manao raha mahamenatsy,* tsy mila ze hahasoa ty vatany, tsy malaky meloky, tsy mitanjaky lolompo,* 6 tsy falifaly amy raha tsy marina fa falifaly amy raha marina, 7 mandefitsy ty raha iaby, mino ty raha iaby, mitamà ty raha iaby, noho miaritsy ty raha iaby.

8 Tsy ho rava mihintsy ty fitiava. Fa ndre misy aza ty fahaiza maminany, le horavà raha zay, le ndre misy aza ty fivolana amy safà samby hafa,* le hijano raha zay, le ndre misy aza ty fahaiza, le horavà raha zay. 9 Tsy zay fa pakilany avao ty fahaizantsika, sady pakilany avao ty faminania ambarantsika. 10 Fe lafa feno raha zay, le horavà pakilany iny. 11 Tamy zaho mbo niajà le niresaky manahaky ajà, nieritseritsy manahaky ajà, sady nandiniky manahaky ajà. Fe fa olobe aho henanizao, le nariako ty toetsin’ajà. 12 Manjavozavo henanizao ty raha hitantsika, sahala hoe manenty amy fitaratsy metaly,* fa amy fotoa zay le hazava soa, sahala hoe mifanatriky. Pakilany avao ty fahaizako henanizao, fa amy fotoa zay hana fahaiza marina soa* aho manahaky ty ahaiza ahy soa. 13 Fa raha telo retoa mbo ho eo avao: Finoa noho fitamana noho fitiava. Fe ty fitiava ro tena bevata amy raha reo.