Ho an’i Titosy
2 Fa iha, miresaha raha mifanaraky amy fampianara mahasoa* avao. 2 Ampirisiho ty nahoda* mba hahay handanjalanja amy ze raha fataon-drozy, ho matotsy, handiniky soa, hana finoa matanjaky, ho be fitiava noho hiaritsy. 3 Ampirisiho koa ty njarahy* mba hana fandaisam-bata maeva ty olo masy, tsy ho mpanasarasara raha olo, tsy handevozin’ny divay, fa ho mpampianatsy raha soa. 4 Amy zay rozy ho afaky hanoro hevitsy* ty somonjara* mba ho tea valy noho ho tea anaky, 5 handiniky soa, halio fandaisam-bata, hazoto hikarakara tokantrano, hanao raha soa, haneky ty valin-drozy, mba tsy hanaratian’olo ty safà-Ndranahary.
6 Ampirisiho avao koa ty pamaraky mba handiniky soa, 7 le atorò hoe modely amy asa soa iha amy raha iaby. Raha malio ro ampianaro,* ka miezaha ho matotsy lafa manao an’ny raha zay, 8 le mampiasà safà mahasoa* tsy hay kinokinoa. Amy zay ho afa-baraka ty mpanohitsy, ka tsy hahita raha hanaratia antsika. 9 Ampirisiho ty mpanompo haneky ty tompon-drozy amy raha iaby, ka hiezaky hanao ze raha mahafalifaly ty tompon-drozy, tsy hamalivaly, 10 tsy hangalatsy, fa tena ho azo atokisa. Amy zay le sahala hoe mampipozipozy ty fampianara-Ndranahary Mpanavotsy antsika rozy, amy raha iaby.
11 Fa fa natoro-Ndranahary ty hasoam-panahiny miavaky, ka afaky ho avotsy ty karazan’olo iaby. 12 Mampiofana antsika hasoam-panahy zay mba tsy haneky ze raha mifanohitsy amy ty sitrapo-Ndranahary noho ty faniriani-zao tontolo zao. Mampiofana antsika koa raha zay mba hampiseho amy ty fiainantsika hoe mandiniky soa noho manao raha mahity tsika sady mahafoy ty vatantsika ho a-Ndranahary, amy zao tontolo zao eto.* 13 Mandiny an’ny raha mahafalifaly tamanintsika iny koa tsika, sady mandiny ty fisehoa be voninahitsin’ny Ndranahary tena miavaky iny noho ty ahin’i Jesosy Kristy Mpanavotsy antsika. 14 Nanome ty vatany ho antsika ie mba hanafaha* antsika amy ze karaza fandikan-dalàna iaby noho mba hanadiova firenena raiky ho fananany manoka, zany hoe firenena mazoto manao asa soa.
15 Miresaha avao mikasiky an’ny raha rezay, le ka mieny mandrisiky* noho mananatsy, satria fa namea fahefà feno hanao ani-zay iha. Ka engà hisy olo hanambanimbany anao.