Asan’ny Apostoly
16 Le niavy ta Derbe any Paoly, bakeo nandeha a Lystra any. Nisy mpianatsy mana anara Timoty zay ty tao. Ampela jiosy mpino ty reniny, fa ty babany Grika. 2 Nana laza soa tamy rahalahy ta Lystra noho ta Ikonioma any rey ie. 3 Ta handay an’i Timoty hiaraky aminy Paoly, ka nalany ie le nisavariny satria hain’ny Jiosy iaby tamy tanà rey ao hoe Grika ty babany. 4 Le nandeha nitety tanà rozy, ka nanambara an’ny didy naboakin’ny apostoly noho anti-panahy ta Jerosalema any rey mba horihin’ny rahalahy rey. 5 Le nihanatanjaky ty finoan’ny fiangona rey ka nihamaro sanandro rozy.
6 Nandeha nitety an’i Frijia noho ty faritsin’i Galatia koa rozy, satria tsy nengan’ny fanahy masy hitory ty safà mikasiky vaovao soa tamy faritanin’i Azia any. 7 Lafa nijotso ta Mysia any rozy, le niezaky handeha a Bitynia any, fe tsy nengan’ny fanahin’i Jesosy. 8 Le nandalovan-drozy avao Mysia,* ka nijotso nana a Troasy any rozy. 9 Le ndraiky haly zay, nahita fahità Paoly. Nahita lahilahy makedonianina nitsanga talohany eo ie, le nangataky azy lahilahy io ka nivola hoe: “Miampità mana a Makedonia atoy le ampeo zahay.” 10 Laha vo baka nahita an’ny fahità iny Paoly, le niezaky nandeha ta Makedonia any zahay, satria nino zahay hoe Ndranahary ro nikaiky anay hitory ty vaovao soa tamin-drozy.
11 Le niondra sambo baka Troasy ao zahay ka namanta ta Samotrakia any, fe nandeha ta Neapolia any hamarain’iny. 12 Lafa baka ao zahay le nandeha ta Filipy any. Zanatany sady tanà bevata tamy faritsin’i Makedonia any Filipy io. Nijano andro vitsivitsy tamy tanà io ao zahay. 13 Niboaky ivelan’ny vavahady any zahay tamy andro sabata, le nandeha tamy sisin’ny vavarano zay teo. Nieritseritsy zahay tamy zay hoe nisy pilasy fivavaha ty teo. Le nipetraky zahay ka nitory tamy ampela nivorivory teo rezay. 14 Le nijanjy anay ampela mpamarotsy lamba* volomparasy mana anara Lydia zay. Baka amy tanàn’i Tyatira ao ie, sady mpivavaky amy Ndranahary. Le nivohan’i Jehovah bevata ty fony mba hahavy azy haneky ty safà nivolanin’i Paoly. 15 Lafa nivita Batisa ie noho ty olo trano raiky aminy, le nangataky ie hoe: “Laha hitanareo hoe maeva atokisa anatrehan’i Jehovah eo aho, le ndao mba ho vahiny an-tranoko any nareo.” Le tsy nivitavita ie laha tsy niavy any zahay.
16 Nandeha tamy pilasy fivavaha iny any zahay ndraiky zay, le nitojiky mpanompovavy nisy fanahy raty zay, zany hoe nisy demonia mpivola ty hoavy. Nahapanarivo an’ny tompony rey mpanompovavy io satria nahay nivola ty hoavy.* 17 Nanaraky anay amy Paoly avao ajà ampela io, sady nikorakoraky hoe: “Mpanompon’ny Ndranahary farany anabo iny lahilahy reo, sady manambara aminareo ze tokony hatao mba hahaavotsy anareo.”* 18 Nanao ho zay avao ie tanatin’ny andro maromaro. Farany nientsaky Paoly, ka nitoliky taminy any sady nivola tamy fanahy iny hoe: “Mandidy anao amy anaran’i Jesosy Kristy aho mba hiboaky aminy.” Avy le niboaky tamy lera zay mihintsy fanahy iny.
19 Lafa nihitan’ny tompony rey hoe nirava any fitamanan-drozy hahazo hanana maro iny, le nisamborin-drozy Paoly noho Silasy, bakeo nitaritaritin-drozy tam-bazary eny mba ho amy manam-pahefà any. 20 Le nandesin-drozy tamy tompon’andraikitsy amy fanjakà eo rozy roe lahy, le hoy ty asan-drozy: “Tena manakoronta an’ny tanàntsika toy mihintsy lahilahy reto. Jiosy rozy, 21 le mampianatsy fombafomba tsy azontsika rambesy na orihy, satria tsika Romanina.” 22 Le niaraky nanohitsy an-drozy roe lahy ty vahoaky. Bakeo napotakin’ny tompon’andraikitsy amy fanjakà eo rey ty siky nisikinan-drozy roe lahy, le nanome didy mba hamangoa an-drozy amy hazo rozy. 23 Le nivangovangoan-drozy rozy roe lahy bakeo nigadran-drozy. Le namean-drozy baiko ty mpiamby mba hiamby soa an-drozy. 24 Ka lafa nahazo an’ny baiko zay mpiamby iny, le nataony tamy prizon anatiny any rozy roe lahy, bakeo nahiliny tamy hazo figadrà* ty tombon-drozy.
25 Fe lafa vakimirahaly teo ho eo, le nivavaky noho nihira fiderà ho ahi-Ndranahary Paoly noho Silasy, le nijanjy an-drozy ty gadra hafa. 26 Tampotampoky eo, nihetsiketsiky marè tany iny ka nihozonkozo prizon iny. Avy le nivoha iaby varavara rey, sady nivaha ty raha nameheza an’ny gadra iabiaby rey. 27 Lafa nitaitsy tamy torimasony mpiamby iny, ka nahita fa nivoha iaby ty varavaran’ny prizon iny, le nalany ty sabatsiny ka fa ho namono fo ie, satria nieritseritsy hoe nilay gadra rey. 28 Fe nivola marè Paoly hoe: “Ka mamono fo iha fa ato iaby zahay!” 29 Le nampangalaky jiro lahilahy iny ka niraparapa nilitsy. Le nangitikitiky ie sady niankohoky talohan’i Paoly noho Silasy eo. 30 Le nandesiny niboaky rozy roe lahy, sady nanontaneany hoe: “Ino va lahy ty tsy maintsy ataoko mba ho avotsy aho?” 31 Hoy ty asan-drozy: “Minoa an’i Jesosy Tompo, le ho avotsy iha noho ty olo trano raiky aminao.” 32 Le nitory ty safàn’i Jehovah taminy noho tamy ze olo iaby tan-tranony ao rozy roe lahy. 33 Tamy haly iny avao, le nandesin’ny lahilahy iny rozy, bakeo nisasany ferin-drozy rey. Le tsy nangataky andro ie noho ty olo trano raiky aminy fa avy le natao batisa. 34 Le nandesiny tan-tranony ao rozy roe lahy, ka nirosoany hany tan-databo eo. Le nifalifaly biby ie noho ty olo iaby trano raiky aminy, satria lasa nino a-Ndranahary.
35 Lafa nimaraindray ty andro, le nirahin’ny tompon’andraikitsy amy fanjakà eo rey mpiamby rey mba hivola hoe: “Abotoro rozy roe lahy.” 36 Le nivolanin’ny mpiamby prizon iny tamy Paoly safàn-drozy iny hoe: “Naniraky olo ty tompon’andraikitsy amy fanjakà eo mba hivola hoe abototsy, zao, nareo roe lahy. Mahazo miboaky zany nareo henanizao. Soasoava!” 37 Fe nivola tamin-drozy Paoly hoe: “Romanina zahay, kanefa nivangoan-drozy tamason’olo eny sady nigadran-drozy ndre mbo tsy nitsarà* aza. Ka henanizao zahay ilàn-drozy haboaky amy zao avao? Tsy maneky ani-zay zahay! Aleo rozy mihintsy ro ho avy eto hampiboaky anay.” 38 Le nitantara an’ny raha zay tamy tompon’andraikitsy amy fanjakà eo rey mpiamby rey. Le natahotsy rozy lafa naharè hoe Romanina rozy roe lahy. 39 Farany niavy rozy, ka nisoloho an’i Paoly noho Silasy mba handeha. Lafa baka nampiboaky an-drozy roe lahy baka amy prizon ao amy zay olo rey, le nangataky an-drozy mba hiala tamy tanà iny eo. 40 Fe nandeha tan-tranon’i Lydia any rozy roe lahy lafa niboaky baka amy prizon ao. Le nampahery an’ny rahalahy rey rozy lafa nahita an-drozy, bakeo nandeha.