Asan’ny Apostoly
18 Niala ta Atena any Paoly tafarani-zay, le niavy ta Korinto any. 2 Nisy Jiosy mana anara Akoila zay nihitany tao. Nateraky ta Ponto ao Akoila io, le vo niavy baka a Italia any rozy amy Prisila valiny. Tsy zay fa nampiboaky didy Klaodio hoe tsy maintsy miala a Roma any ty Jiosy iaby. Nandeha amin-drozy any amy zay Paoly. 3 Nipetraky tamin-drozy morovaly ao ie sady niaraky niasa tamin-drozy satria nitovy ty asan-drozy. Samby mpamboatsy tranolay ty asa fiveloman-drozy. 4 Le nandaha-teny* tamy synagoga ao Paoly saky sabata sady nandresy lahatsy ty Jiosy noho ty Grika.
5 Lafa nijotso baka a Makedonia any Silasy noho Timoty, le nifantoky tanteraky tamy fitoria ty safà-Ndranahary Paoly, ka nitory tamy Jiosy mba hanaporofoa fa Jesosy ro Kristy. 6 Fe nanohitsy azy avao Jiosy rey sady nanao resaky raty taminy, ka nahimpany ty sikiny, le hoy ty asany: “Nareo avao ro ho tompon’antoky amy fahafatesanareo.* Afaky ty amiko.* Handeha ho amin’olo firenena hafa rey any aho manomboky henanizao.” 7 Niala tao* amy zay ie, le nandeha tan-tranon’ny lahilahy mana anara Titosy Josto zay ao. Mpivavaky amy Ndranahary lahilahy io, sady tanilan’ny synagoga iny eo ty tranony. 8 Fe lasa nino an’ny Tompo, Krispo mpiandraikitsy an’ny synagoga iny, noho ty olo iaby trano raiky aminy. Le nilasa mpino ty ankamaroan’ny Korintianina naharè ty vaovao soa, ka natao batisa. 9 Ndraiky haly zay, nivola tamy Paoly tamy fahità ao koa Tompo hoe: “Ka matahotsy, fa mitoria avao le ka mitsỳ, 10 satria miaraky aminao aho ka tsy hisy hanafiky anao mba hanao raha raty aminao. Tsy zay fa mana olo maro amy tanà toy ato aho.” 11 Le nijano tao raiky noho tampany tao amy zay ie, ka nampianatsy an-drozy ty safà-Ndranahary.
12 Tamy fotoa naha governeram-paritsin’i* Akaia an’i Galio, le niaraky nila hevitsy hanohera an’i Paoly ty Jiosy. Nandesin-drozy tamy pilasy fitsarà teo ie, 13 le hoy ty asan-drozy: “Taonin’ny lahilahy tia hivavaky amy Ndranahary amy fomba tsy mifanaraky amy lalàna ty vahoaky.” 14 Fe laha vo ho nivola Paoly, le hoy ty asan’i Galio tamy Jiosy rey: “Laha nanao raha raty na raha mifanohitsy amy lalàna lahilahy io, le mba ho nijanjy anareo teto avao aho. 15 Fa laha kibambola mikasiky safà noho mikasiky anara noho ty lalànanareo, le alamino any avao ty ahinareo. Tsy ta hitsara ani-zao aho.” 16 Le niroasin’i Galio niala tamy pilasy fitsarà teo rozy. 17 Le nisamborin-drozy Sostena mpiandraikitsy synagoga, le nivangoan-drozy talohan’ny pilasy fitsarà eo. Fe tsy nilitsy tamy raha zay mihintsy Galio.
18 Mbo nijano tao andro vitsivitsy Paoly, bakeo nanao veloma an’ny rahalahy rey, le nandeha sambo nana a Syria any niaraky tamy Prisila noho Akoila. Nampanampahin’i Paoly boribory ty volony ta Kenkrea any, satria nisy voady nataony. 19 Lafa niavy ta Efesosy ao rozy, le nengan’i Paoly tamy tanà io ao rozy morovaly, fa ie nilitsy tamy synagoga ao, le niezaky nandresy lahatsy an’ny Jiosy rey. 20 Nangataky azy mba hijano elaela tao Jiosy rey fe tsy nimety ie, 21 fa nanao veloma an-drozy, sady nivola hoe: “Mbo himpoly aminareo atoy ndraiky aho laha sitrapon’i Jehovah.” Le nandeha sambo baka a Efesosy ao ie, 22 le nijotso nana a Kaisaria any. Le niakatsy* noho niarahaba ty fiangona ie, bakeo nijotso nana a Antiokia any.
23 Nijano kelikely tao ie bakeo nandeha nitety ty faritsin’i Galatia noho Frijia. Le nampahery ty mpianatsy iabiaby ie.
24 Nisy Jiosy mana anara Apolosy zay niavy ta Efesosy ao. Nateraky ta Aleksandria any ie. Lahilahy nahay nandaha-teny ie sady tena nahay Soratsy Masy. 25 Nampianary* ty lalan’i Jehovah ie, le narehitsin’ny fanahy ka marina ty raha nitoriny noho nampianariny mikasiky an’i Jesosy. Fe ty batisan’i Jaona avao ro hainy. 26 Nanomboky nahasaky nitory tamy synagoga ao ie, ka lafa naharè azy Prisila noho Akoila, le nanday azy niaraky tamin-drozy. Le nihazavanin-drozy marina kokoa taminy ty lala-Ndranahary. 27 Nita handeha a Akaia any Apolosy, ka nanoratsy ho an’ny mpianatsy any rey rahalahy teo rey mba hampirisiky an-drozy handramby soa azy. Ka lafa niavy tany ie, le tena nanampy ani-ze olo lasa mpino satria nampisehoa-Ndranahary hasoam-panahy miavaky. 28 Tsy zay fa tena nafana fo ie nanaporofo mazava soa tamason’olo eny hoe diso Jiosy rey, ka natorony baka amy Soratsy Masy ao fa Jesosy ro Kristy.