Ho an’i Titosy
1 Baka amy Paoly, mpanompo-Ndranahary sady apostolin’i Jesosy Kristy. Mpanompo noho apostoly mana finoa manahaky ty finoan’olo nifilì-Ndranahary aho, sady mahay soa ty fahamarina. Mifanaraky amy fahafoizam-bata ho a-Ndranahary, fahamarina zay. 2 Raha iaby rezay le mifototsy amy fitamana fiaina mandrakizay. Fa liany fa ela Ndranahary tsy mahay mavandy iny ro nampitamà an’ny fiaina zay. 3 Fe tamy fotoa voatondrony, le nambarany ty safàny tamy alalan’ny fitoria nampanaovy ahy, mifanaraky amy didy namea-Ndranahary Mpanavotsy antsika.
4 Ho an’i Titosy, tena anako amy finoa iharoantsika ao,
Enganè Ndranahary Babantsika iny noho Kristy Jesosy Mpanavotsy antsika mba hampiseho hasoam-panahy miavaky* aminao sady hanome fiadana anao!
5 Nivolaniko iha hijano ta Kreta any, mba hanity ze raha tsy nimety* noho hanendry anti-panahy* saky tanà, mifanaraky amy toromariky nameako anao retoa: 6 Ty anti-panahy le tokony ho* lahilahy tsy misy hokinokinoa, manambaly raiky avao, mana anaky mpino, sady tsy asaran’olo hoe midada amy raha raty* na maheriloha* ty anany. 7 Tsy zay fa mpanompo-Ndranahary* ty mpiandraikitsy, ka tsy maintsy ho tsy misy hokinokinoa, tsy mpizizo amy ty hevitsiny,* tsy malaky meloky, tsy mamolava, tsy satà,* tsy tea raha niazo baka amy raha tsy marina, 8 fa tea mandramby vahiny, tea raha soa, mandiniky soa,* manao ty marina,* tsy mivaliky, mahatanjaky ty ainy, 9 le manaraky soa an’ny safà azo antoky* iny lafa mampianatsy.* Amy zay ie hahay hampahery* ty olo hafa amy fampianara mahasoa* sady hahavita hananatsy ani-ze olo manohitsy an’ny raha zay.
10 Tsy zay fa maro ty olo mizizo, manao resaky tsy misy dikany sady mamitaky, sirtò azy tsy mety miala amy savatsy* rey. 11 Mila sakana tsy hivola olo rey, satria rozy ro tena manimba ty finoan’ny fianakavia iabiaby, ka mampianatsy raha tsy tokony hampianary, mba hahazoa raha baka amy raha tsy marina. 12 Nisy mpaminany firenena raiky amin-drozy nivola hoe: “Mpavandy avao ty Kretanina, bibinala masiaky sady kamo kanefa tea hany.”
13 Marina safà reo. Anaro marè avao zany rozy mba hananan-drozy finoa matanjaky, 14 ka tsy hijanjy tapasiry Jiosy noho didy baka amin’olo miala amy fahamarina. 15 Malio ty raha iaby amin’olo malio. Fa amin’olo voaloto noho tsy manam-pinoa le tsy misy raha malio mihintsy, fa samby voaloto ndre ty sain-drozy ndre ty eritseritsin-drozy. 16 Mivola hoe mahay a-Ndranahary rozy lafa amin’olo maro eny, kanefa hita amy ty raha ataon-drozy hoe tsy maneky azy rozy, satria mampangaroharo noho tsy manoriky safà rozy sady tsy maeva hanao asa soa, ndre ino zay ndre ino.