Ty taratasy voalohany ho ahi-ty Korintianina
16 Mikasiky an’ny famoria drala ho ahi-ty olo masy iny, le azonareo orihy ty toromariky nameako ho an’ny fiangona a Galatia any rey. 2 Tokony hanoka drala arakaraky ze anananareo nareo kiraidraiky, saky andro voalohany amy herinandro. Amy zay tsy hisy famoria drala sasy lafa avy aho. 3 Fa lafa avy any aho, le hirahiko handay fanomezanareo rey ho a Jerosalema any ze olo nivolaninareo tamy taratasinareo tao hoe ekenareo handay an’ny fanomeza iny. 4 Fe laha ilà koa ty handehanako any, le hiaraky amiko any rozy.
5 Fe ho aminareo any aho lafa baka mandalo a Makedonia any, satria fa handalo an’i Makedonia aho henanizao. 6 Le vasa hijano kelikely aminareo any aho na hijano any amy fotoan’ny asotry mihintsy aza, amy zay hasesinareo lavidavitsy amy ze pilasy handehanako any. 7 Tsy zay fa tsy teako laha mandalo avao aho aminareo any, satria mitamà hijano elaela any aho laha engàn’i Jehovah. 8 Fe hijano a Efesosy eto aho zisiky hiavian’ny fetin’ny Pentekosta, 9 satria misy varavara bevata nisokafi-Ndranahary mba hahafahako manao fanompoa, kanefa maro ty mpanohitsy.
10 Laha avy aminareo any Timoty, le anovo ze hahavy azy tsy hatahotahotsy, satria manao ty asan’i Jehovah manahaky ahy koa ie. 11 Dikani-zay, tsy tokony hisy hanambanimbany azy. Aseseo lavidavitsy ie, le alefaso mba ho avy soa amiko atoy, fa mandiny azy zahay amy rahalahy rey.
12 Laha ty mikasiky an’i Apolosy rahalahintsika, le nisoloho marè taminy aho mba hiaraky amy rahalahy rey ho aminareo any. Fe tsy mieritseritsy ho any ie henanizao, fa ho avy any avao ie lafa afaky.
13 Miambena avao, mivahara marè amy finoa, le miezaha ho be herim-po* noho hatanjaky. 14 Anovo amim-pitiava ze raha iaby ataonareo.
15 Hainareo fa ty olo trano raiky amy Stefanasy ro voaloham-bokatsy ta Akaia any sady nahafoy ty vatan-drozy nikarakarà ty olo masy rozy. Ka mampirisiky anareo aho rahalahy, 16 mba haneky avao ty olo manahaky an-drozy noho ze olo iaby miaraky miasa noho miasa mafy! 17 Fe falifaly aho fa amiko eto Stefanasy noho Fortonato noho Akaiko, satria tena manampy ahy rozy amy nareo tsy eto io. 18 Tsy zay fa mamelombelo ahy noho mamelombelo anareo rozy. Ka mba hajao ty olo manahaky an-drozy.
19 Mampamangy anareo zao hoe fiangona a Azia atoy rey. Mampamangy anareo amy Tompo ao zao hoe Akoila noho Priska noho ty fiangona mivory an-tranon-drozy ao. 20 Manao mampamangy anareo ty rahalahy iaby. Mifampiarahabà amy oroky masy.
21 Toy ty veloma nisoratin’ny tanako, zaho Paoly.
22 Laha misy olo tsy tena tea an’ny Tompo, le ho voaozo ie. Mba avia lahy Tomponay! 23 Enganè nareo hampisehoan’i Jesosy Tompo hasoam-panahy miavaky! 24 Teako iaby nareo iabiaby miharo raiky amy Kristy Jesosy!