Asan’ny Apostoly
11 Ren’ny apostoly noho rahalahy ta Jodia any rey fa naneky ty safà-Ndranahary koa ty olo firenena hafa. 2 Ka lafa nandeha niakatsy ta Jerosalema any Petera, le nialy hevitsy* taminy olo mpanoha lalàna mikasiky savatsy rey, 3 ka nivola hoe: “Iha nilitsy tan-tranon’olo tsy misavatsy rey sady niaraky nihina tamin-drozy.” 4 Farany nihazavanin’i Petera tamy an-tsipiriany ty raha niseho, ka hoy ty asany:
5 “Tamy tanàn’i Jopa ao aho tamy zay. Nivavaky aho le bakeo nahita fahità. Nahita raha manahaky lamba rongony bevata nijotso baka an-danitsy any aho. Najotso tamy zorony efatsy raha io, ka niavy tamiko eo. 6 Nanenty soa ty tanatiny ao aho, le nahita biby mana tomboky efatsy noho bibinala, noho biby milaly noho voro mitily. 7 Nireko koa nisy feo nivola tamiko hoe: ‘Petera, mitsangàna! Vonò le hano!’ 8 Fe hoy ty asako: ‘Sanatria Tompo! Satria mbo tsy nilitsy tam-bavako mihintsy ty raha maloto na tsy malio.’ 9 Le namaly fanindroeny feo baka an-danitsy any iny hoe: ‘Ka volaninao hoe maloto ze raha fa nidiovi-Ndranahary.’ 10 Niseho fanintelony raha zay, le nisintony niakatsy ho an-danitsy any ndraiky raha iaby rey. 11 Tamy fotoa zay mihintsy ro nisy lahilahy telo niavy tamy trano nipetrahanay iny tao. Baka a Kaisaria any rozy le nirahy ho amiko any. 12 Le nivola tamiko ty fanahy masy mba hiaraky amin-drozy ka tsy hisalasala mihintsy. Le niaraky amiko koa rahalahy eny reto, le nilitsy tan-tranon’ny lahilahy iny ao zahay.
13 “Nitantara taminay ie hoe nahita anjely nitsanga tan-tranony ao, le nivola taminy anjely io hoe: ‘Maniraha olo ho a Jopa any mba hangalaky an’i Simona, azy kaihy hoe Petera iny, 14 fa hovolaniny aminao hoe akory ty hahaavotsy anao noho ty olo iaby trano raiky aminao.’ 15 Fe laha vo nanomboky nivola aho, le nilatsaky tamin-drozy ty fanahy masy, manahaky ty nilatsahany tamintsika tamy voalohany iny. 16 Tamy zay le nitiaroko safàn’ny Tompo nivolaniny matetiky iny hoe: ‘Jaona nanao batisa tamy rano, fa nareo hatao batisa amy fanahy masy.’ 17 Namea-Ndranahary fanomeza maimaim-poana tsika satria nino an’i Jesosy Kristy Tompo. Ka laha namea-Ndranahary an’ny fanomeza zay koa rozy, le zaho va ty ia ka afaky hisaka a-Ndranahary?”
18 Lafa naharè an’ny raha zay rozy, le tsy nanohitsy sasy.* Bakeo nanome voninahitsy a-Ndranahary rozy ka nivola hoe: “Hondy kay tea-Ndranahary hibebaky koa ty olo firenena hafa amy zay hahazo fiaina!”
19 Niparitaky mpianatsy rey tratsin’ny fanenjeha tafaran’ny namonoa an’i Stefana iny, ka niavy zisiky a Fenisia noho a Sipra noho a Antiokia any. Fe tsy nitory ty vaovao soa rozy laha tsy tamy Jiosy avao. 20 Kanefa nisy amin’olo baka a Sipra noho a Kyrena any niavy ta Antiokia any. Le niresaky tamin’olo manao safà grika rozy, ka nitory ty vaovao soa mikasiky an’i Jesosy Tompo. 21 Nanampy an-drozy koa ty tanan’i Jehovah, ka nimaro biby ty olo lasa mpino le niova noho naneky an’ny Tompo.
22 Niren’ny fiangona ta Jerosalema any ty fitantarà mikasiky an-drozy, ka nirahin’ny fiangona handeha zisiky a Antiokia any Barnabasy. 23 Lafa niavy tany ie, ka nahita hoe nampiseho hasoam-panahy miavaky Ndranahary, le nifalifaly. Le nampahery ty olo iaby ie amy zay olo reo ho tapa-kevitsy avao hiaraky amy Tompo amy ty fon-drozy iaby. 24 Tsy zay fa lahilahy soa fanahy noho feno fanahy masy sady tena nanam-pinoa ie. Le vahoaky maro ro lasa nino an’ny Tompo. 25 Le nandeha a Tarsosy any ie mba hila an’i Saoly. 26 Lafa nahita an’i Saoly ie, le nanday azy ta Antiokia any. Le niaraky nivory tamy fiangona tany rozy roe sady nampianatsy olo maro biby tanatin’ny tao raiky.* Ta Antiokia any ro nikaiha voalohany an’ny mpianatsy rey hoe Kristiana, satria zay ty fitariha-Ndranahary.
27 Tamy fotoa zay, le nisy mpaminany nijotso baka a Jerosalema any nandeha a Antiokia any. 28 Agabo ty anaran’ny raiky amy mpaminany rey. Ie azy nitarihin’ny fanahy hivola mialoha iny hoe tsy ho ela le hanjeky ty kerè amy tany toy iaby.* Le zay vatany ty niseho tamy andron’i Klaodio. 29 Farany nanapa-kevitsy mpianatsy rey fa samby handefa fanampea* araky ze vitan-drozy, ho an’ny rahalahy nipetraky a Jodia any rey. 30 Le nandefa fanampea ho amy anti-panahy rey any vatany rozy, le Barnabasy noho Saoly ty nampandesin-drozy azy.