Ho an’i Titosy
3 Ampitiarovo avao rozy mba haneky noho hanoriky ty raha volanin’ny fanjakà noho ty manam-pahefà, ho parè hanao ty asa soa iaby, 2 tsy hanaraty olo, tsy ho tea aly, fa hahay handanjalanja noho tena ho soa fanahy amin’olo iaby. 3 Fa tsika koa aza taloha mba tsy nandiniky, tsy nanoriky safà, nivoafitaky, nandevozin’ny faniria noho fahafinareta maro samby hafa, nanao raha raty avao noho nialona, nampangaroharo, sady nifankalay.
4 Fe lafa naseho ty hasoam-panahi-Ndranahary Mpanavotsy antsika noho ty fitiavany ty olombelo, 5 le nanavotsy antsika ie, fe tsy hoe ty raha soa nataontsika ro nanaovany ani-zay, fa ty fiferinesany antsika. Nanavotsy antsika ie lafa nanadio* antsika ka nahavy antsika ho velo, noho lafa nampiasa ty fanahy masy, azy nahavy antsika ho olo vaovao iny. 6 Nandatsahany maro biby tamy fanahy io tsika, tamy alalan’i Jesosy Kristy Mpanavotsy antsika, 7 mba hahavy antsika ho mpandova ka hitamà fiaina mandrakizay, lafa baka nambara hoe olo marina tsika vokatsin’ny hasoam-panahiny miavaky.
8 Azo atokisa safà rezay. Le teako hohamafisinao avao raha reo, amy zay hampifantoky ty sain-drozy amy fanaova asa soa avao ze olo mino a-Ndranahary. Soa raha reo sady mahasoa ty olo.
9 Fe ka militsilitsy amy alihevitsy tsy misy dikany, na resaky tetiraza,* na fifamalea, na aly mikasiky Lalàna, fa tsy mahasoa raha rezay sady tsy misy ilà azy. 10 Ialao lavitsy ty olo mananga antokom-pinoa,* lafa baka nanarinao* indraiky sady mbo nanarinao fanindroeny, 11 satria hainao fa niala tamy lalan’ny fahamarina ty olo manahaky ani-zay sady manota noho manambara ty vatany hoe diso.
12 Lafa irahiko aminao any Artema na Tykiko, le anovo ze raha iaby azonao atao mba hiavia amiko a Nikopolia any, fa nanapa-kevitsy hijano any aho amy fotoan’ny asotry. 13 Anovo ampy soa ty vatian’i Zena, azy mahay Lalàna iny, noho Apolosy, mba tsy hisy raha hijalean-drozy mihintsy amy ty lian-drozy. 14 Fe tokony hianatsy hanao asa soa avao ty rahalahintsika, amy zay ho afaky hanampy rozy lafa misy raha ilà malisa, tsy no tsy hamokatsy* rozy.
15 Mampamangy anao zao ty olo iaby amiko eto. Mampamangy amy azy tsy mahafoy anay rey any, zany hoe rahalahy amy finoa ao rey.
Loniky lahy hampisehoa hasoam-panahy miavaky nareo iaby!