Nisoratin’i Matio
24 Lafa niala tamy tempoly tao Jesosy, le namonjy azy ty mpianatsiny, bakeo natoron-drozy azy ty trano tamy tempoly tao. 2 Le hoy Jesosy tamin-drozy: “Hitanareo va raha iaby reo? Ambarako anareo mazava fa tsy hisy vato hengà hifampitikitsy mihintsy ty eo fa haropaky iaby.”
3 Lafa nipetrapetraky tamy Vohitsy Oliva teo ie, le namonjy azy mitoka ty mpianatsiny, ka nivola hoe: “Ambarao anay hoe ombia ty hisehoan’ny raha rezay, le ino ty ho famantara hoe fa manatriky* iha sady fa marìny ty farani-zao tontolo zao?”*
4 Le hoy ty navalin’i Jesosy an-drozy: “Miambena soa tsy no hisy olo hamitaky anareo. 5 Satria maro ty hisandoky ty anarako le hivola hoe: ‘Zaho ro Kristy’, ka tena maro ty ho voafitakin-drozy. 6 Haharè aly nareo sady hisy hivola aminareo koa hoe misy aly amy pilasy hafa any. Fe ka matahotsy fa raha tsy maintsy hiseho avao reo, kanefa mbo tsy ho avy ty farany.
7 “Hisy firenena hialy amy firenena, le hisy fanjakà hialy amy fanjakà, sady hisy kerè noho horohoron-tany amy pilasy samby hafa any. 8 Raha iaby rezay ro fanombohan’ny fijalea.*
9 “Le henjehin’olo* nareo ka hovonoan-drozy. Sady halay anareo ty firenena iaby satria manday ty anarako nareo. 10 Maro koa ty hiala amy finoa noho hamadiky ty namany sady hifankalay. 11 Ho maro ty mpaminany sandoky hiseho ka hamitaky olo maro. 12 Le hihena* ty fitiavan’olo maro satria hihamaro ty mpandika lalàna. 13 Fe ze miaritsy zisiky farany ro ho avotsy. 14 Le hotorỳ amy tany toy iaby* ty vaovao soan’ny Fanjakà iny, ho vavolombelo amy firenena iaby, zay vo ho avy ty farany.
15 “Ka araky ty nivolanin’i Daniela mpaminany, le ho hitanareo amy pilasy masy ao raha mampangaroharo mahavy faharavà iny. (Mila mandiniky soa ze mamaky) 16 Ka lafa hitanareo zay, le mila milay am-bohitsy any ze a Jodia any. 17 Tsy tokony hijotso hangalaky ty hananany an-tranony ao ze anabo trano any, 18 le tsy tokony himpoly hangalaky ty sikiny* ze am-baibò any. 19 Ho sahira ty ampela bevoka noho ty mampinono amy fotoa zay! 20 Mivavaha avao mba tsy ho amy asotry na amy andro Sabata ro hilaisanareo. 21 Satria amy fotoa zay, le hisy fijalea bevata mbo tsy nisy tetoy ndraiky, liany nampisy ani-zao tontolo zao zisiky henanizao, sady fa tsy hisy hanahaky azy sasy. 22 Laha tsy nahena ty halavan’ny fotoa zay, le tsy hisy olo* ho avotsy. Fe ty fisian’olo voafily ro hahavy an’ny fotoa zay hahena.
23 “Le ka inoa laha misy mivola aminareo hoe: ‘Atoy Kristy!’, na hoe: ‘Aroy ie!’ 24 Satria hisy Kristy sandoky noho mpaminany sandoky ho avy, le hanao famantara bevata noho fahagagà rozy mba hamitaha olo maro, ndre ty olo voafily aza laha azon-drozy atao. 25 Fa nampitandrina anareo aho zay e! 26 Ka miboaky an-trano ao zany laha misy mivola aminareo hoe: ‘Amy dezera* any ie.’ Ka inoa koa laha misy mivola hoe: ‘Amy efitsy raiky an-trano ao ie.’ 27 Satria ty fanatrehan’ny* Anak’olo, le hanahaky helatsy baka antinana ka mazava zisiky andrefa any. 28 Amy ze pilasy misy an’ny faty iny ro hivorian’ny voromahery.
29 “Laha vo tampitsy ty fijalea amy fotoa zay, le haìky ty masoandro, tsy hanome hazavà ty vola, ho latsaky baka an-danitsy eny ty basia, le hohozonkozony ty herin’ny lanitsy.* 30 Bakeo hiseho amy lanitsy eny ty famantara ty Anak’olo, le halahelo* ty foko iaby an-tany etoy. Ho hitan-drozy ty Anak’olo ho avy amy rahon’ny lanitsy eny sady hana hery noho ho be voninahitsy. 31 Hotsofy marè ty antsiva. Haniraky ty anjeliny ie amy fotoa zay, ka havorin-drozy ty olo nifiliny baka amy vazan-tany efatsy,* baka amy faravodilanitsy iaby any.
32 “Mangalà fianara baka amy fanohara mikasiky aviavy toy: Laha vo mitiry ty tahony* ka manomboky misy raviny, le hainareo hoe fa marìny ty asara. 33 Ho zay koa fa lafa hitanareo raha iaby reo, le tiarovo hoe fa marìny ie, zany hoe fa am-baravara eo. 34 Ambarako anareo mazava fa tsy ho lany mihintsy taranaky toy, zisiky hisehoan’ny raha iaby reo. 35 Ty lanitsy noho ty tany ho rava, fa ty safàko tsy ho rava mihintsy.
36 “Tsy misy mahay an’ny andro noho lera zay, ndre anjely an-danitsy any rey, ndre Anaky iny, laha tsy Baba avao. 37 Hanahaky tamy andron’i Noa iny avao ty fanatrehan’ny* Anak’olo. 38 Satria tamy fotoa zay, tamy mbo tsy niavy Ranobe iny, le nihina noho nino ty olo, sady nangata-baly noho nalàn’olo valy, zisiky niavian’ny andro niliran’i Noa tamy sambofiara tao. 39 Le tsy nidarean-drozy ty raha niseho zisiky niavian’ny Ranobe iny, ka nifaohiny iaby rozy. Hanahaky ani-zay koa amy fanatrehan’ny Anak’olo. 40 Hisy lahilahy roe am-baibò any, ka ty raiky handesy le ty raiky hengà. 41 Hisy ampela roe hanodiky vato fikoseha vary, ka ty raiky handesy le ty raiky hengà. 42 Miambena avao zany satria tsy hainareo ty andro hiavian’ny Tomponareo.
43 “Tiarovo zao: Laha hain’ny tompon-trano hoe amy fotoa fiambena fahafiry* ty hiavian’ny mpangalatsy, le tsy ho niroro ie sady tsy hengany hovakỳ ty tranony. 44 Miomàna koa zany nareo, satria amy lera tsy eritseretinareo ro hiavian’ny Anak’olo.
45 “Ia vatany moa mpanompo azo atokisa noho mahihitsy* iny, azy nitendren’ny tompony hikarakara ty mpanompo an-tranony ao iny, ka hanome hany an-drozy amy fotoa mety? 46 Sambatsy mpanompo zay laha avy ty tompony ka mahita azy manao ani-zay! 47 Ambarako anareo mazava fa hotendreny hiandraikitsy ty hananany iaby ie.
48 “Fa laha mivola anainy any mpanompo raty fanahy iny hoe: ‘Mba ela koa tompoko zay!’, 49 le manomboky mamango an’ny mpanompo hafa rey ie sady miaraky mihina noho miaraky mino amin’olo mamolava rey, 50 le ho avy amy andro tsy ampoiziny noho amy lera tsy hainy ty tompony, 51 ka hameany sazy farani-ze marè ie, le halefany amy mpiatsaravelatsihy any. Any ie ro hitàny noho hangìtsy.*