HO AHI-TY ROMANINA

1 Baka amy Paoly, mpanompon’i Kristy Jesosy noho nikaihy ho apostoly, sady voatoka hitory ty vaovao soa-Ndranahary, 2 zany hoe vaovao soa nivolaniny mialoha tamy alalan’ny mpaminaniny, amy Soratsy Masy ao iny. 3 Mikasiky an’ny Anany iny, azy baka amy taranakin’i Davida iny vaovao soa zay. 4 Fe vokatsin’ny herin’ny fanahy masy le nivelomy ie ka nambara hoe Anaki-Ndranahary. Tsy ia Anany io fa Jesosy Kristy Tompontsika. 5 Tamy alalany ro nampisehoa hasoam-panahy miavaky* taminay sady nanendrea anay ho apostoly, mba hino ty firenena iaby ka hanoriky ty safàny, ho voninahitsin’ny anarany. 6 Nikaihy baka amy firenena rey koa nareo mba ho an’i Jesosy Kristy.

7 Ho anareo iaby a Roma any, nareo azy tea-Ndranahary noho nikaihy ho olo masy rey,

Enganè azy Ndranahary Babantsika iny noho Jesosy Kristy Tompo mba hampiseho hasoam-panahy miavaky aminareo sady hanome fiadana anareo!

8 Voalohany, le misaotsy an’ny Ndranahariko iny amy anaran’i Jesosy Kristy aho laha ty mikasiky anareo iabiaby ro resahy, satria malaza amy tany toy iaby hoe manam-pinoa nareo. 9 Manompo* a-Ndranahary amy fo iabiaby aho ka mitory ty vaovao soa mikasiky ty Anany. Le Ndranahary ro vavolombeloko fa mivavaky ho anareo avao aho, 10 sady misoloho mba ho avy soa aminareo any, laha sitrapo-Ndranahary. 11 Tsy zay fa ta hahita anareo aho, satria ta hizara fanomeza ara-panahy aminareo. Amy zay nareo hivahatsy soa, 12 na laha avanta le hoe mba ho afaky hifampahery tsika, ka hampahery anareo ty finoako, le ty ahinareo koa hampahery ahy.

13 Fe teako ho hainareo rahalahy hoe fa imaro aho ro ta ho aminareo any, fe voasaka avao zisiky henanizao. Ta ho aminareo any aho mba hahita vokatsy soa lafa mitory any, manahaky amy firenena hafa rey any koa. 14 Tsy zay fa mana trosa amiko ty Grika noho ty tsy Grika,* le ty hendry noho ty tsy hendry. 15 Ka le mazoto hitory ty vaovao soa aminareo mipetraky a Roma any koa aho. 16 Tsy mahamenatsy ahy ty vaovao soa, satria raha io ro ampiasà-Ndranahary hampisehoa ty heriny mba hanavota ani-ze olo iaby mino, zany hoe ty Jiosy tse zay vo ty Grika. 17 Fa aseho mazava soa baka amy raha io fa manao ty rariny Ndranahary. Le hitani-azy manam-pinoa rey raha zay ka vomaiky mitombo ty finoan-drozy, araky ty voasoratsy hoe: “Fe ty olo marina ho velo satria manam-pinoa.”

18 Fa aseho mazava soa baka an-danitsy any ty heloki-Ndranahary amin’olo iaby tsy matahotsy azy noho tsy manao ty marina. Mampiasa tetiky raty rozy mba hisakàna ty olo tsy hahay ty marina. 19 Tsy zay fa fa namea porofo ampy soa rozy mba hahaizan-drozy ani-ze raha tokony ho hay mikasiky a-Ndranahary, satria fa nambara-Ndranahary an-drozy soa raha zay. 20 Ty toetsiny tsy hita maso, zany hoe ty heriny mandrakizay noho ty maha Ndranahary azy, le hita mazava soa liany namorona ani-zao tontolo zao. Tsy zay fa hita amy ty raha nataony toetsiny zay, ka tsy afaky miala rozy. 21 Nahay a-Ndranahary rozy, fe tsy mba nanome voninahitsy azy* na nisaotsy azy, fa lasa tsy mandiniky sasy ka nanjary maìky fon-drozy fa tsy daitsy iny. 22 Ndre nanao ty vatan-drozy ho hendry aza rozy, le nanjary tsy mandiniky.* 23 Ty voninahitsy tokony ho namean-drozy an’ny Ndranahary tsy mety lo iny, le namean-drozy ho an’ny sarin’olo mety lo noho sary voro noho biby mana tomboky efatsy noho biby milaly.

24 Ta hanao ze raha nirin’ny fon-drozy avao rozy, farany nengà-Ndranahary hanaraky fomba maloto, mba ho afa-baraka ty vatan-drozy. 25 Naleon-drozy vandy tozay ty fahamarina mikasiky a-Ndranahary, ka raha niforony koa ro nitompoen-drozy noho nivavahan-drozy, fa tsy Mpamoro iny, azy derà mandrakizay iny. Amena. 26 Raha zay ro nahavy a-Ndranahary hanenga an-drozy hanaram-po amy fanirian’ny nofotsy mampangaroharo, satria tsy ty raha fatao sasy ro nataon’ny ampela amin-drozy ao rey, fa ty raha tsy fatao mihintsy. 27 Manahaky ani-zay koa ty lahilahy, lasa tsy nanao ty raha fatao* amy ampela sasy rozy, satria nanjeky marè ty faniria tamin-drozy samby lahilahy, ka nanao raha faly rozy samby rozy. Le hahazo sazy* maeva an-drozy rozy, vokatsin’ny hadisoan-drozy.

28 Satria rozy nieritseritsy hoe tsy ilà ty mahay* a-Ndranahary, le nengà-Ndranahary hana eritseritsy raty rozy mba hanao raha tsy manjary. 29 Tamy ty raha iaby nataon-drozy, le nanao raha tsy marina rozy, raty fanahy, tsy nimety afa-po,* noho nanao raha raty. Feno faniria raha tsy ahin-drozy koa rozy, mamono olo, tea mifamaly, mamitaky, tea manisy raty olo, mpitsikotsiko,* 30 mpandratiraty olo, mpalay a-Ndranahary, mpivaza olo, mpievotsevotsy, mpirengirengy, mpanao tetiky raty,* tsy mpanoriky safàn’ny ray aman-dreny, 31 tsy mandiniky, tsy manaja fifanaraha, tsy tea fianakavia, noho tsy miferinay olo. 32 Tena hain-drozy soa didi-Ndranahary ara-drariny iny hoe maeva ho maty ze mpanao an’ny raha rezay, fe mbo manao avao rozy sady maneky ani-ze olo mpanao an’ny raha rezay koa.

2 Laha mitsara olo zany iha rahalahy, le tsy mana fialan-tsiny, ndre ia iha ndre ia. Tsy zay fa manambara ty vatanao ho diso iha lafa mitsara olo, satria iha mitsara io le mba mpanao ze raha ataony koa. 2 Fe haintsika fa mitsara araky ty marina Ndranahary sady manohitsy ani-ze olo mpanao ani-zay.

3 Tsy no mieritseritsy iha rahalahy hoe ho afaky hilay ty fitsarà-Ndranahary iha, laha mitsara ani-ze mpanao ani-zay, kanefa iha aza mba manao ani-zay koa? 4 Sa tsy ahoanao hoe farani-ze soa fanahy noho mandefitsy sady manam-pahareta ie? Tsy hainao va fa tea-Ndranahary hibebaky iha kanao soa fanahy aminao ie? 5 Fe maheriloha iha sady tsy mahefa mibebaky ty fonao, ka sahala hoe mamory ty heloki-Ndranahary ho ahinao iha amy andro hampiboahany ty helokiny noho hitsarany araky ty rariny. 6 Le hamaly ty olo kiraidraiky arakaraky ty raha nataon-drozy ie: 7 Fiaina mandrakizay ho ani-ze ta hahazo voninahitsy noho haja noho vata tsy mety lo, ka manao raha soa avao, 8 fa sazy noho heloky ho ani-ze tea aly noho tsy manoriky fahamarina fa manao ty tsy marina avao rey. 9 Hiatriky fijalea noho raha sarotsy biby ze olo iaby manao raha raty, ty Jiosy tse zay vo ty Grika, 10 fa voninahitsy noho haja noho fiadana ho ani-ze olo iaby manao raha soa, ho ahi-ty Jiosy tse zay vo ty Grika. 11 Tsy zay fa tsy mitingy volon’olo* Ndranahary.

12 Ho maty tsy mana lalàna ze olo iaby nanota kanefa tsy nana lalàna, fa hotsaran’ny lalàna ze olo iaby nanota tambanin’ny lalàna eo. 13 Fa tsy ze mijanjy ty lalàna ro olo marina anatreha-Ndranahary eo, fa ty mpanoriky ty lalàna ro hambara hoe olo marina. 14 Manao ze raha takin’ny lalàna ty olo firenena hafa tsy mana lalàna, satria manaraky ho azy ty raha ampanovin’ny lalàna rozy. Ndre tsy mana lalàna aza rozy, le sahala hoe fa misy lalàna am-pon-drozy ao. 15 Rozy mihintsy ro mampiseho hoe voasoratsy am-pon-drozy ao ty lalàna, le ty eritseritsin-drozy koa ro vavolombelon’ny raha zay, ka ty vetsivetsin-drozy avao ro manasara raha an-drozy na miaro an-drozy mihintsy aza. 16 Hiseho raha zay amy andro hitsarà-Ndranahary ty raha ataon’olo ambalimbaliky any, ka amy alalan’i Kristy Jesosy ro hitsarà-Ndranahary, mifanaraky amy ty vaovao soa toriko.

17 Mivola iha hoe Jiosy, le miantehitsy amy lalàna iha sady mirengirengy fa mana a-Ndranahary. 18 Hainao koa ty sitrapony ka ekenao ze raha tena soa, satria ampianary* anao ty Lalàna. 19 Resy lahatsy koa iha hoe mpitariky ty olo jiky iha, hazavà ho ani-ze amy maìky ao, 20 mpananatsy an’ny olo tsy mandiniky rey, mpampianatsy ajà, sady azonao soa ty fototsin’ny fahaiza noho ty fahamarina amy Lalàna ao. 21 Fe zao: Iha mampianatsy olo io, mampianatsy ty vatanao va iha? Iha mitory hoe: “Ka mangalatsy io”, tsy mangalatsy va iha? 22 Iha mivola hoe: “Ka mandranto io”, tsy mandranto va iha? Iha malay sampy io, tsy mangalatsy raha amy tempoly ao va iha? 23 Iha mirengirengy hoe mana lalàna io, tsy mandika ty Lalàna va iha ka manafa-baraka a-Ndranahary? 24 Tsy zay fa “tivativà amin’olo firenena hafa eo ty anara-Ndranahary, vokatsin’ny raha ataonareo”, satria zay ty fa voasoratsy.

25 Laha manaraky lalàna avao iha vo mahasoa anao ty savatsy. Fe laha mpandika lalàna iha, le lasa tsy misavatsy avao ndre fa nisavary aza. 26 Ka laha manao ze raha takin’ny* Lalàna ty olo tsy misavatsy, tsy fa anisan’ny nisavary avao va ie ndre tsy misavatsy aza? 27 Le hitsara anao ho mpandika lalàna ty olo tsy misavatsy lafa manoriky ty Lalàna, ndre mana lalàna aza iha sady nisavary. 28 Satria tsy ty raha ivelany etoy ro maha Jiosy ty Jiosy, sady ty savatsy koa tsy raha ivelany etoy, na hoe amy nofotsy eo. 29 Fa ze raha am-po ao ro maha Jiosy ty Jiosy, sady ty fony ro nisavary ka ty fanahy ro nanavara azy, fa tsy ty lalàna voasoratsy. Le Ndranahary ro hidera azy fa tsy olo.

3 Ka ino zany ty tombony ananan’ny Jiosy, le ino ty soa azo amy savatsy? 2 Tena maro biby. Ty voalohany marè le hoe ty Jiosy ro nanankina-Ndranahary ty safàny masy. 3 Ka manao akory zany laha misy Jiosy tsy ampy finoa? Midika va zay hoe tsy azo atokisa sasy Ndranahary? 4 Tsy zay mihintsy! Fe enganè ho hita fa marina Ndranahary ndre hita aza hoe mpavandy ty olo iaby, satria voasoratsy hoe: “Mba ho hita fa mana ty marina iha amy ze raha volaninao, le handresy lafa misy mitsara.” 5 Fe laha ty raha raty ataontsika ro mampiseho hoe manao ty rariny Ndranahary, le ino ty hovolanintsika? Hivola va tsika hoe tsy rariny ty raha atao-Ndranahary lafa manasazy antsika?—Raha volaniko zay ty eritseretin’olo.— 6 Tsy zay mihintsy! Laha manao raha tsy rariny Ndranahary, le hataony akory ty hitsara ani-zao tontolo zao?

7 Fe laha ty vandiko ro mampiseho hoe marina Ndranahary ka lasa mahazo voninahitsy ie, le manino aho ro mbo tsarà hoe mpanota avao? 8 Ka tsy aleo va mivola hoe: “Ndao hanao raha raty mba hiavia ty raha soa”? Tsy zay fa asaran’olo mivola an’ny raha zay tsika, ka maeva sazỳ olo rey.

9 Ka mana tombony va zany tsika laha ampitovizy amin’olo hafa? Tsy zay mihintsy! Fa nihazavanintsika taloha teo hoe andevon’ny ota iaby ndre ty Jiosy ndre ty Grika, 10 satria voasoratsy hoe: “Tsy misy olo marina, ndre raiky aza. 11 Tsy misy olo tena mahay mandiniky, sady tsy mba misy olo mila a-Ndranahary. 12 Fa nivio nana amy lalan-diso any ty olo iaby, ka samby tsy misy dikany rozy iaby. Tsy mba misy olo mampiseho hoe soa fanahy, ndre raiky aza.” 13 “Lolo mivoha ty vozon-drozy, le ty lelan-drozy ro amitahan-drozy.” “Misy poizin’ny bibilava ty am-bavan-drozy ao.”* 14 “Feno ozo noho fanabokà ty am-bavan-drozy ao.” 15 “Malisa handatsa-dio ty tombon-drozy.” 16 “Fandripaha noho fandravà ty amy lalan-drozy eny, 17 sady tsy hain-drozy ty lalan’ny fiadana.” 18 “Tsy hitan-drozy ty antony tokony hatahora a-Ndranahary.”

19 Haintsika fa ty raha iaby volanin’ny Lalàna le ho ani-ze olo ambanin’ny Lalàna eo, mba hihily ty vavan’olo iaby, sady haeva hosazì-Ndranahary zao tontolo zao. 20 Ka tsy misy olo* hambara ho marina amy Ndranahary eo zany laha resaky fanoriha lalàna avao,* satria ty lalàna le natao avao mba hahaiza soa ty atao hoe ota.

21 Fe hita henanizao hoe afaky ho lasa olo marina amy Ndranahary eo ty olo, ndre tsy manaraky lalàna aza. Zay koa ty volanin’ny Lalàna noho ty Mpaminany. 22 Tena afaky ho lasa olo marina amy Ndranahary eo ze olo iaby manam-pinoa an’i Jesosy Kristy, satria mitovy ty olo iaby. 23 Tsy zay fa samby fa nanota ty olo iaby ka tsy mahatratsy* ty voninahitsi-Ndranahary. 24 Fanomeza maimaim-poana ty hoe nambara ho olo marina rozy vokatsin’ny hasoam-panahy miavaky aseho-Ndranahary. Le nampiseho an’ny hasoam-panahy miavaky zay Ndranahary lafa nanome ty vilim-panavota naloan’i Kristy Jesosy mba hanafaha an-drozy. 25 Namea-Ndranahary ho fanatitsy fampilongoa* Kristy, mba hilongo aminy ze mampiseho finoa ty liony. Nanao ani-zay Ndranahary mba hampisehoa hoe marina Ie, satria be fandefera Ie ka nanenga ty fahotà taloha any. 26 Nanao ani-zay koa Ndranahary mba hampisehoa hoe marina Ie henanizao. Amy zay ho marina Ie lafa manambara hoe olo marina ze mino an’i Jesosy.

27 Ka misy antony tokony hampirengirengy va? Tsy misy. Ino zany ty lalàna azo irengirengea? Azy lalàna miresaky hoe ty raha atao ro tena vatan-draha iny va? Tsy zay mihintsy, fa azy lalàna mikasiky finoa iny. 28 Tsy zay fa mieritseritsy tsika hoe ze manam-pinoa ro ambara hoe marina, fa tsy ze manao raha mifanaraky amy lalàna. 29 Ndranaharin’ny Jiosy raiky avao va ie? Sa Ndranaharin’olo amy firenena hafa rey koa? Eka, Ndranaharin’olo amy firenena hafa rey koa ie. 30 Raiky avao Ndranahary, ka ze nisavary le hambarany hoe olo marina satria manam-pinoa, le ze tsy nisavary koa mbo hambarany hoe olo marina satria manam-pinoa. 31 Ty finoantsika va zany ro hamafantsika ty lalàna? Tsy zay mihintsy! Vomaiky aza tsika manoha ty lalàna.

4 Ka laha zay ie, ino zany ty hovolanintsika hoe niazon’i Abrahama, azy razambentsika iny? 2 Laha nambara hoe olo marina Abrahama vokatsin’ny raha nataony, le ho nana antony nampirengirengy azy ie. Fe tsy ho afaky nirengirengy tamy Ndranahary eo ie. 3 Fa ino ty volanin’ny Soratsy Masy? “Nampiseho finoa an’i Jehovah, Abrahama ka nekè ho olo marina.”* 4 Ho ani-ze olo miasa, le tsy eritserety* hoe hasoam-panahy miavaky ty karama amea azy, fa raha* tsy maintsy aloa aminy. 5 Fa ho ani-ze olo tsy miasa* fe mino ani-Azy manambara ty raty fanahy hoe olo marina iny, le hekè ho olo marina, satria manam-pinoa.* 6 Nivola koa Davida fa sambatsy ze olo ekè-Ndranahary* ho olo marina, ndre tsy vokatsin’ny raha nataony aza. Hoy ty asany: 7 “Sambatsy ze olo nengà ty hadisoany, sady limbofa* ty fahotany. 8 Sambatsy ze olo tsy hisahin’i Jehovah mihintsy ty fahotany.”

9 Ty olo nisavary avao va zany ro afaky ho sambatsy manahaky ani-zay, sa ty olo tsy nisavary koa? Tsy zay fa hoy ty asantsika hoe: “Nekè* ho olo marina Abrahama satria nanam-pinoa.” 10 Ka nombia ie ro nekè* ho olo marina? Tamy ie fa nisavary va sa tamy ie mbo tsy nisavary? Tsy tamy ie fa nisavary iny, fa tamy ie mbo tsy nisavary. 11 Le nahazo famantara ie, tsy ino zay fa ty savatsy. Io ro antoky* hoe olo marina ie, satria nanam-pinoa ie, tamy ie mbo tsy nisavary. Raha zay ro nahavy azy ho babani-ze olo iaby manam-pinoa ndre tsy nisavary, mba hekè-Ndranahary* ho olo marina rozy. 12 Le raha zay koa ro nahavy azy ho lasa baban’ny taranaky nisavary rey, le tsy hoe babani-ze nisavary avao, fa babani-ze olo manam-pinoa manahaky ty nananany koa. Fa nanam-pinoa Abrahama babantsika ndre mbo tsy nisavary aza.

13 Tsy hoe satria nanoriky lalàna Abrahama na ty taranakiny, le nampitamany hoe handova tontolo raiky, fa satria nekè ho olo marina ie vokatsin’ny finoany. 14 Fa laha ze olo manaraky lalàna ro mpandova, le lasa tsy misy ilà azy ty finoa, sady rava fampitamana iny. 15 Tsy zay fa mahavy ty heloki-Ndranahary ty Lalàna, satria lafa tsy misy lalàna, le tsy misy fandikan-dalàna.

16 Dikani-zay, nahazo an’ny fampitamana iny Abrahama satria nanam-pinoa, le hasoam-panahy miavaky ro nahazoany an’ny raha zay. Le ho azo antoky amy zay fa ho tanteraky amy taranakiny iabiaby fampitamana iny, tsy ho ani-ze manaraky Lalàna avao, fa ho ani-ze mampiseho finoa manahaky an’i Abrahama, azy babantsika iaby iny koa. 17 —Tsy zay fa ho zao ty voasoratsy: “Nitendreko ho baban’ny firenena maro iha.”— Natao tamasoni-azy Ndranahary ninoany iny teo raha zay, zany hoe azy mamelo ty maty iny sady mivola ty raha mbo tsy miseho sahala raha fa miseho iny.* 18 Mbo nitamà avao Abrahama ndre atao raha hoe tsy nisy raha azo tamany sasy aza, ka nino ie fa ho lasa baban’ny firenena maro, araky ty nivolany iny hoe: “Hanahaky ani-reo ty taranakinao.” 19 Ndre tsy nihanalemy aza ty finoany, le hainy fa sahala fa maty ty vatany,—tsy zay fa fa 100 tao teo ho eo Abrahama—sady fa maty* koa ty kibon’i Saraha. 20 Fe fa nampitamà Ndranahary, le nino Abrahama fa tsy nisalasala mihintsy. Le nahazo hery ie vokatsin’ny finoany, ka nanome voninahitsy a-Ndranahary, 21 sady nieky tanteraky fa vita-Ndranahary ty manatanteraky ani-ze raha nampitamaniny. 22 Le “nekè* ho olo marina ie.”

23 Fe tsy ho azy raiky avao ty nanorata an’ny safà iny hoe: “Nekè* ho olo marina ie”, 24 fa ho antsika koa. Natao ho antsika koa raha zay, satria mino ani-Azy namelo an’i Jesosy Tompontsika iny tsika. 25 Nengà ho maty vokatsin’ny fahotantsika ie, le nivelomy ndraiky mba hanambarà antsika ho olo marina.

5 Le satria nambara hoe olo marina tsika henanizao vokatsin’ny finoantsika, le mila milongo amy Ndranahary avao tsika,* amy alalan’i Jesosy Kristy Tompontsika. 2 Tamy alalan’i Kristy ro nahavy antsika ho afaky hamonjy a-Ndranahary, noho hampisehoa an’ny hasoam-panahy miavaky zay, sady fa ampisehoa an’ny raha zay tsika henanizao. Le enganè tsika ho falifaly* satria mitamà ty voninahitsi-Ndranahary. 3 Le tsy vitani-zay fa enganè ho falifaly* avao koa tsika lafa miatriky fijalea, satria haintsika fa ty fijalea mahavy fiareta, 4 ty fiareta amy zay mahavy antsika hahazo hatò amy Ndranahary, le ty fahazoa hatò amy Ndranahary mahavy antsika hana raha tamany, 5 le tena azontsika atokisa raha tamanintsika zay, satria fa natao am-pontsika ao ty fitiava-Ndranahary, tamy alalan’ny fanahy masy namea antsika.

6 Fa tamintsika mbo nalemy, le maty ho an’ny raty fanahy Kristy, tamy fotoa voatondro. 7 Asakasaky vo misy maneky ho maty ho an’olo marina, ndre mety hisy parè ho maty ho an’olo soa fanahy avao aza. 8 Fe naseho-Ndranahary hoe teany tsika, satria tamintsika mbo nipanota, le nimaty ho antsika Kristy. 9 Ankoatsini-zay, le fa nambara ho olo marina tsika henanizao vokatsin’ny lion’i Kristy, ka matoky fa havota amy alalany, mba tsy ho tratsin’ny heloki-Ndranahary. 10 Fa tamintsika mbo nifahavalo ro nampilongoa tamy Ndranahary, tamy nahafatesan’ny Anany. Amintsika fa milongo aminy henanizao amy zay, le vomaiky tsika matoky hoe havota satria velo Kristy. 11 Le tsy zay avao fa falifaly koa tsika satria mifandramby amy Ndranahary amy alalan’i Jesosy Kristy Tompontsika, azy nahavy antsika ho afaky hilongo amy Ndranahary henanizao iny.

12 Vokatsin’ny raha nataon’ny lahilahy raiky ro nahavy ty ota hilitsy amy zao tontolo zao eo, le ty ota ro nahavy ty fahafatesa, ka niparitaky tamin’olo iaby ty fahafatesa, satria samby fa nanota rozy iaby... 13 Tsy zay fa tamy mbo tsy nisy Lalàna, le fa tamy zao tontolo zao eo ty fahotà. Fe tsy misy olo asara ho manota lafa tsy misy lalàna. 14 Fe ndre zay, le nanjaka baka amy Adama zisiky amy Mosesy ty fahafatesa. Nanjakan’ny fahafatesa avao koa ndre ty olo tsy nanao fahotà manahaky ty nataon’i Adama, azy misy itovizany amy azy ho avy iny.

15 Fe tsy mitovy ty vokatsin’ny hadisoa noho ty vokatsin’ny fanomeza. Laha ty hadisoan’ny lahilahy raiky ro nahafaty olo maro, le vomaiky nanday raha soa maro ho an’olo maro ty hasoam-panahy miavaky naseho-Ndranahary, noho ty fanomezany maimaim-poana, noho ty hasoam-panahy miavaky nasehon’ny lahilahy raiky, tsy ia zay fa Jesosy Kristy. 16 Le tsy mitovy amy vokatsin’ny fahotan’ny lahilahy raiky ty vokatsin’ny fanomeza maimaim-poana iny. Maeva hosazỳ ty olombelo lafa nitsarà ty lahilahy raiky vokatsin’ny hadisoa nataony, fe fanomeza namea vokatsin’ny hadisoan’olo maro iny ro nahavy ty olombelo hambara ho marina. 17 Ty hadisoan’ny lahilahy raiky, zany hoe vokatsin’ny raha nataony, ro nahavy ty fahafatesa hanjaka. Le vomaiky amy zay ho velo noho hanjaka azy nampisehoa hasoam-panahy miavaky noho namea fanomeza maimaim-poana maro rey, vokatsin’ny raha nataon’olo raiky, zany hoe Jesosy Kristy. Tsy ino fanomeza zay fa ty nanambarà an-drozy hoe olo marina.

18 Hadisoa raiky avao zany ro nahavy ty karazan’olo iaby haeva hosazỳ. Manahaky ani-zay koa fa ty fanamarina nataon’olo raiky ro nahavy ty karazan’olo iaby hambara ho olo marina ka hahazo fiaina. 19 Fa lafa tsy nanoriky safà ty lahilahy raiky, le olo maro ro lasa mpanota. Manahaky ani-zay koa fa lafa nanoriky safà ty olo raiky, le olo maro ro lasa olo marina. 20 Le niavy amy zay ty Lalàna mba hampisehoa fa maro biby ty hadisoa. Fe vomaiky koa bevata ty hasoam-panahy miavaky arakaraky ty hamaroan’ny ota. 21 Ino ty kendrè amy raha zay? Mba hanahaky ty nanjakan’ny ota noho ty fahafatesa ro hanjakan’ny hasoam-panahy miavaky. Amy zay le hambara ho olo marina ty olo, ka hahazo fiaina mandrakizay amy alalan’i Jesosy Kristy Tompontsika.

6 Ka ino zany ty hovolanintsika? Mbo hanota avao va tsika amy zay hihamaro ty hasoam-panahy haseho amintsika? 2 Tsy zay mihintsy! Tsika aza fa maty laha ty ota ro resahy, ka manao akory ty mbo hahavelo antsika anatin’ny ota ao avao? 3 Sa tsy hainareo fa tsika iaby natao batisa tamy Kristy Jesosy ao rey, le natao batisa tamy fahafatesany ao? 4 Niaraky nalevy taminy zany tsika lafa natao batisa tamy fahafatesany ao. Amy zay tsika hana fiaina vaovao, manahaky an’i Kristy lafa nivelomin’ny Baba tamy maty, tamy alalan’ny heriny. 5 Laha lasa miharo raiky amy Kristy tsika lafa maty manahaky azy, le tena hiharo raiky aminy koa tsika lafa velomy manahaky azy, 6 satria haintsika fa niaraky nifantsihy taminy tamy tsato-kazo eo ty toetsintsika taloha. Amy zay tsika tsy hofehezin’ny faniria raty amy vatantsika ao, ka tsy ho mpanompon’ny* ota sasy. 7 Fa ze olo maty le afaky tanteraky* amy ty fahotany.

8 Ankoatsini-zay, laha miaraky maty amy Kristy tsika, le mino fa hiaraky ho velo aminy koa. 9 Tsy zay fa haintsika hoe tsy ho maty sasy Kristy satria fa nivelomy ie henanizao. Tsy manjaka aminy sasy ty fahafatesa. 10 Satria lafa nimaty ie, le nimaty indraiky avao mba hanafaha ty ota. Fa lafa nivelo ie, le velo mba hanao ty sitrapo-Ndranahary. 11 Manahaky ani-zay koa nareo: Eritsereto hoe fa maty nareo laha ty ota ro resahy, fe fa velo nareo mba hanao ty sitrapo-Ndranahary, satria mpanori-dia an’i Kristy Jesosy.

12 Ka engà hanjaka zisiky farany amy vatanareo mety maty ao zany ty ota, mba tsy hanatanterahanareo ty fanirian’ny vatanareo. 13 Le ka amea hofehezin’ny ota sasy ty vatanareo* mba tsy ho fitaovan’ny tsy fahamarina. Fa sahala fa maty ty vatanareo,* fe velo henanizao, ka ameo a-Ndranahary mba ho fitaovan’ny fahamarina. 14 Ka engà hanjaka aminareo ty ota, satria tsy ambanin’ny lalàna nareo fa nampisehoa hasoam-panahy miavaky.

15 Ka manao akory zany? Hanota va tsika satria tsy ambanin’ny lalàna fa nampisehoa hasoam-panahy miavaky? Tsy zay mihintsy! 16 Tsy hainareo va fa laha maneky ho mpanompon’olo raiky nareo ka manoriky ty safàny, le lasa mpanompon’ny olo orihinareo safà iny? Laha mpanompon’ny* ota zany nareo, le ho maty, fa laha mpanompo manoriky ty safà-Ndranahary, le ho lasa olo marina. 17 Fe isaora Ndranahary satria ndre mpanompon’ny ota aza nareo taloha, le lasa norihinareo amy ty fonareo fampianara namea anareo iny. 18 Eka, lasa mpanompon’ny fahamarina nareo, satria nafahy tamy ota. 19 Mampiasa safà azon’olo aho satria malemy vokatsin’ny fahotà nareo. Tsy zay fa nameanareo ho mpanompon’ny fahalotoa noho fandikan-dalàna ty vatanareo* mba handika lalàna, fe henanizao le ameo ho mpanompon’ny fahamarina ty vatanareo* mba ho masy. 20 Satria tamy nareo mpanompon’ny ota, le tsy nifehy anareo ty fahamarina.

21 Ka ino zany ty vokatsy azonareo tamy ze raha nataonareo* tamy fotoa zay? Raha mahamenatsy anareo henanizao raha rezay, satria fahafatesa ty hiafarany. 22 Fe fa nafahy tamy ota nareo henanizao ka lasa mpanompo-Ndranahary. Fahamasina zany ty vokatsin’ny raha ataonareo, le fiaina mandrakizay ty hiafarany. 23 Tsy zay fa fahafatesa ty karama azo baka amy ota, fa fiaina mandrakizay amy alalan’i Kristy Jesosy Tompontsika ty fanomeza amea-Ndranahary.

7 Tsy hainareo va rahalahy hoe fehezin’ny Lalàna ty olo laha mbo velo?—Nareo mahay lalàna iresahako io.— 2 Voafehin’ny lalàna hitambatsy amy valiny, ohatsy, ty ampela laha mbo velo ty valiny. Fa laha maty ty valiny, le afaky amy lalànan’ny valiny ie. 3 Ka laha mbo velo zany ty valiny, le hokaihy hoe mpandranto ampela iny laha lasa valin’olo hafa. Fa laha maty ty valiny, le afaky amy lalànan’ny valiny ampela iny, ka tsy mpandranto laha lasa valin’olo hafa.

4 Ho zay koa nareo, rahalahiko: Nafahy tamy Lalàna nareo,* tamy alalan’ny soron’i Kristy, mba ho lasa valin’olo hafa, zany hoe valini-azy nivelomy ndraiky iny, le hamokatsy voa soa ho a-Ndranahary tsika amy zay. 5 Fa tamintsika nanatanteraky ty fanirian’ny nofotsy, le niasa tamy vatantsika* ao ty faniria hanota, mba hitariky antsika hanao raha* mahavy fahafatesa. Ty Lalàna ro nanaitsy an’ny faniria raty zay tamintsika ao. 6 Fe nafahy tsika henanizao, ka tsy mamehy antsika sasy ty Lalàna, satria fa maty tsika laha ty Lalàna ro resahy. Nafahy tsika mba hanompo a-Ndranahary, le maneky hotarihin’ny fanahy tsika henanizao, fa tsy manaraky an’ny lalàna voasoratsy manahaky taloha iny sasy.

7 Ka ino zany ty hovolanintsika? Fahotà va ty Lalàna? Tsy zay mihintsy! Fe tsy ho nahay an’ny ota zao aho laha tsy teo ty Lalàna. Tsy ho nihaiko, ohatsy, ty faniriniria rahan’olo, laha tsy ty Lalàna ro nivola hoe: “Ka maniriniry rahan’olo.” 8 Fe vokatsin’ny didy io, le lasa nahita fomba ty ota mba hampitirina ani-ze karazan’ny faniriniria rahan’olo anaiko ato, satria maty ty ota laha tsy misy ty lalàna. 9 Laha ty marina, le velo tsy nana lalàna aho taloha. Fe lafa niavy ty didy, le velo ndraiky ty ota, fa zaho nimaty. 10 Le ty didy tokony hahazoa fiaina, nanjary nitariky ho amy fahafatesa. 11 Fa vokatsin’ny didy koa, le nahita fomba ty ota ka namitaky ahy noho namono ahy. 12 Fe masy ty Lalàna, le masy ty didy, sady ara-drariny noho soa.

13 Raha soa va zany ro nahafaty ahy? Tsy zay mihintsy! Fa ty ota ro nahafaty ahy. Raha soa ro nampiasan’ny ota hamonoa ahy, mba hampisehoa ty atao hoe ota. Amy zay ty didy vomaiky hampiseho hoe tena raty ty ota. 14 Tsy zay fa haintsika hoe baka amy Ndranahary ty Lalàna. Fa zaho nofotsy, navily ho andevon’ny ota. 15 Fa tsy azoko hoe ino raha ataoko toy, satria tsy ze raha teako ro ataoko, fa ze raha halako. 16 Fe laha manao ze raha tsy teako hatao aho, le midika raha zay hoe ekeko fa soa ty Lalàna. 17 Fe tsy zaho sasy ro manao an’ny raha zay, fa ty ota anaiko ato. 18 Tsy zay fa haiko hoe tsy misy raha soa anaiko ato, zany hoe amy nofotsiko ato. Fa mba maniry hanao raha soa avao aho, fe tsy vitako ty manatanteraky an’ny raha zay. 19 Satria tsy ty raha soa teako hatao ro ataoko, fa ty raha raty tsy teako hatao ro lasa fataoko. 20 Ka laha ze tsy teako hatao ro lasa ataoko, le tsy zaho sasy ro manao an’ny raha zay, fa ty ota anaiko ato.

21 Tsapako anaiko ato lalàna toy: Lafa ta hanao raha soa aho, le anaiko ato avao ty raha raty. 22 Laha ty raha tsapako am-poko ato, le teateako biby ty lalàna-Ndranahary. 23 Fe misy lalàna hafa amy vatako* ao mialy amy lalàna mifehy ty saiko, sady mitariky ahy ho andevon’ny lalànan’ny ota amy vatako* ao. 24 Ferinesako ty aiko! Ia ty mba hanavotsy ahy amy vata mitariky ahy amy fahafatesa any toy? 25 Isaora lahy Ndranahary, fa ie ro hanavotsy ahy amy alalan’i Jesosy Kristy Tompontsika! Mpanompon’ny lalàna-Ndranahary zany aho an-tsaiko ato, fa mpanompon’ny lalànan’ny ota ty nofotsiko.

8 Tsy ambara hoe diso zany ze miaraky amy Kristy Jesosy. 2 Tsy zay fa fa nanafaky anao tamy lalànan’ny ota noho fahafatesa ty lalànan’ny fanahy. Fanahy io ro manome fiaina ho ani-ze miaraky amy Kristy Jesosy. 3 Satria tsy lavorary ty olo,* le zay ro nahavy ty Lalàna halemy, ka nisy raha tsy nivitany. Fe raha tsy nivitany zay ro natao-Ndranahary lafa nirahiny ty Anany, ka nataony nitovy tamy nofotsy mpanota, mba handravà ty ota. Nataony raha zay mba hanambarà hoe diso ty ota amy nofotsy ao. 4 Amy zay tsika ho afaky hanao ze raha soa takin’ny* Lalàna, ka tsy hanatanteraky ty fanirian’ny nofotsy, fa haneky hotarihin’ny fanahy. 5 Tsy zay fa ty olo manatanteraky ty fanirian’ny nofotsy le mampifantoky ty sainy amy raha arakin’ny nofotsy, fa ty olo maneky hotarihin’ny fanahy le mampifantoky ty sainy amy raha arakin’ny fanahy. 6 Ze mampifantoky ty sainy amy raha arakin’ny nofotsy le hiafara amy fahafatesa, fa ze mampifantoky ty sainy amy raha arakin’ny fanahy le hahazo fiaina noho fiadana. 7 Tsy zay fa fahavalo-Ndranahary ze mampifantoky ty sainy amy nofotsy, satria tsy manoriky ty lalàna-Ndranahary ty nofotsy, sady tsy mahavita an’ny raha zay koa. 8 Dikani-zay, tsy mahavita mampifaly a-Ndranahary ty olo manatanteraky ty fanirian’ny nofotsy.

9 Fe tsy manatanteraky ty fanirian’ny nofotsy nareo, fa maneky hiasan’ny fanahy, laha tena anainareo ao ty fanahi-Ndranahary. Fa laha misy olo tsy mana ty fanahin’i Kristy, le tsy ahin’i Kristy olo zay. 10 Fe laha miaraky amy Kristy nareo, ndre maty aza ty vatanareo satria mpanota, le ty fanahy ro hanome fiaina anareo satria olo marina nareo. 11 Laha anainareo ao ty fanahini-azy namelo an’i Jesosy iny, le hamelo ty vatanareo mety maty koa azy namelo an’i Kristy Jesosy iny. Amy alalan’ny fanahiny anainareo ao ty hanaovany ani-zay.

12 Ka zao zany rahalahy, tsy tokony hengantsika hifehy antsika ty fanirian’ny nofotsy, sady tsy tokony hotanterahintsika. 13 Tsy zay fa tsy maintsy ho maty nareo laha manatanteraky ty fanirian’ny nofotsy. Fa laha vonoanareo amy alalan’ny fanahy masy ty fomba ratin’ny nofotsy, le ho velo nareo. 14 Fa ze olo iaby tarihin’ny fanahi-Ndranahary ro tena anaki-Ndranahary. 15 Azy fanahi-Ndranahary miasa anainareo ao iny le tsy mahavy anareo ho lasa andevo na hatahotsy ndraiky, fa mahavy anareo hatsanga ho anaky. Fanahy io ro mahavy antsika ho afaky mikaiky marè hoe: “Aba,* Baba!” 16 Ty fanahi-Ndranahary noho ty saintsika ro miaraky manaporofo hoe anaki-Ndranahary tsika. 17 Ka laha anaky zany tsika, le mpandova koa. Mpandova a-Ndranahary vatany tsika, fe mpiaraky mandova amy Kristy koa. Laha miaraky mijaly aminy tsika, le hamea voninahitsy miaraky aminy koa.

18 Fa amiko le tsy misy dikany ty fijalea iaretantsika amy fotoa henanizao, laha ampitovizy amy voninahitsy fa haseho mazava amy alalantsika iny. 19 Tsy zay fa tena tsy linin’ny zavaboary ty hampisehoa mazava an’ny anaki-Ndranahary rey. 20 Satria nengà hana fiaina tsy misy dikany ty zavaboary, kanefa tsy sitrapony raha zay fa sitraponi-azy nanenga an’ny raha zay hiseho iny. Fe mbo nisy an’ny raha tamany toy hoe: 21 Hafahy koa ty zavaboary ka tsy ho andevon’ny fahasimbà* sasy, fa hahazo an’ny fahafaha miavaky* ananan’ny anaki-Ndranahary rey. 22 Tsy zay fa haintsika hoe mbo miaraky mitoreo noho miaraky mijaly avao ty zavaboary iaby zisiky henanizao. 23 Tsy zay avao fa mitoreo anaintsika ao koa tsika ndre mana an’ny voaloham-bokatsy iny aza, zany hoe ty fanahy. Mandiny marè koa tsika mba hatsanga-Ndranahary ho anany, zany hoe mba hafahiny amy alalan’ny vilim-panavota ty vatantsika. 24 Lafa navota-Ndranahary tsika, le lasa nana an’ny raha tamany zay. Fe laha fa hita ty raha tamany le fa tsy fitamana zay, satria akory moa ty mbo hitamanan’olo ty raha fa hitany? 25 Fa laha raha mbo tsy hitantsika ro tamanintsika, le mandiny marè an’ny raha zay avao tsika sady miaritsy.

26 Manahaky ani-zay koa fa manampy antsika ty fanahy, lafa malemy tsika. Tsy zay fa zao ty problemo: Mila mivavaky tsika kanefa tsy haintsika ty raha tokony hangatahy. Fe ty fanahy mihintsy ro misoloho ho antsika lafa mitoreotoreo am-pontsika ao* tsika. 27 Fe hain’ny mpandiniky fo iny ze raha tean’ny fanahy hovolany, satria mifanaraky amy sitrapo-Ndranahary ty fisolohoany ho an’ny olo masy rey.

28 Haintsika fa ty raha iaby atao-Ndranahary le ataony miaraky miasa mba hahasoa ani-ze olo tea azy, zany hoe ze olo nifiliny mifanaraky amy ty sitrapony. 29 Fa liany tamy voalohany ie ro nahay ani-ze hofiliny. Le nifiliny mialoha hanahaky an’ny Anany iny rozy, amy zay Anany io ro lasa talanolo amy ty rahalahy maro. 30 Ankoatsini-zay, ze fa nifiliny mialoha ro nikaihiny, le ze nikaihiny ro nambarany hoe marina. Ze nambarany hoe marina amy zay ro nameany voninahitsy.

31 Ka ino zany ty hovolanintsika amy raha rezay? Laha manoha antsika Ndranahary, le ia ty hahavita hanohitsy antsika? 32 Ty Anany aza tsy narovany fa nameany mba hanavota antsika iabiaby. Ankoatsy an’ny Anany io, le tsy hameany antsika koa va ty raha hafa iaby, satria soa fanahy Ie? 33 Ia ty hanasara raha ani-ze olo nifilì-Ndranahary? Fa Ndranahary ro manambara an-drozy hoe marina. 34 Ka ia zany ty hanambara hoe diso rozy? Tsy misy, satria fa nimaty Kristy Jesosy sady fa nivelomy. Mipetraky ankavana-Ndranahary eo ie, sady misoloho ho antsika.

35 Ino ty hampisaraky antsika amy Kristy ka hahavy azy tsy ho tea antsika sasy? Fijalea va, sa raha sarotsy, sa fanenjeha, sa mosary, sa tsy fanana siky, sa loza, sa sabatsy? 36 Araky ty voasoratsy hoe: “Sahala vonoa zahay sanandro satria vahoakinao; manahaky aondry hovonoa io ty fieritsereta anay.” 37 Fe lasa mpandresy tanteraky tsika amy raha iaby rezay, satria manampy antsika azy tea antsika iny. 38 Fa matoky aho hoe ndre fahafatesa, ndre fiaina, ndre anjely, ndre fanjakà, ndre raha henanizao, ndre raha ho avy, ndre hery, 39 ndre ty anabo, ndre ty ambany, ndre zavaboary hafa, le tsy hisy hahavita hampisaraky antsika amy Ndranahary ka hahavy azy tsy ho tea antsika sasy. Asehony amy alalan’i Kristy Jesosy Tompontsika fitiavany zay.

9 Mivola ty marina aho satria mpanori-dia an’i Kristy. Tsy mavandy aho, sady tarihin’ny fanahy masy ty eritseritsiko ka vavolombelo manamarina 2 fa malahelo biby aho sady mijaly marè avao am-poko ato. 3 Fa naleoko aza hoe zaho mihintsy ro tafasaraky amy Kristy ka ho voaozo, laha zay ro hahasoa ty rahalahiko, azy longoko rey, 4 zany hoe ty Israelita. Rozy ro natsanga ho anaky, namea voninahitsy, nanaova fifanekea, namea ty Lalàna noho ty fanompoa masy noho ty fampitamana. 5 Taranakin’ny razambentsika rey rozy, le baka amin-drozy ro niavian’i Kristy. Enganè hoderà mandrakizay Ndranahary, azy ambonin’ny kila raha iaby iny! Amena.

6 Fe tsy hoe tsy nitanteraky ty safà-Ndranahary. Satria tsy ze olo taranakin’Israely ro tena “Israely.” 7 Le tsy hoe anaky iaby rozy satria hoe taranakin’i Abrahama. Fe ho zao ty voasoratsy: “Ho baka amy Isaka azy hokaihy hoe taranakinao iny.” 8 Zany hoe tsy ty taranakin’i Abrahama ro tena anaki-Ndranahary, fa ty anan’ny fampitamana iny ro ekè* hoe taranaky. 9 Satria ho zao fampitamana iny: “Himpoly aminao atoy aho, amy tao ho avy manahaky ani-zao, ka hiteraky anakilahy Saraha.” 10 Fe tsy tamy zay avao Ndranahary ro nampitamà, fa nanao ani-zay koa ie tamy Rebeka niteraky hamba tamy lahilahy raiky zay, tsy ia lahilahy zay fa Isaka razambentsika. 11 Fa tamy mbo tsy nateraky hamba rey sady mbo tsy nanao raha soa na nanao raha raty, le fa nivola sandrany Ndranahary hoe ia ty hofiliny. Tsy zay fa ze teany ro filiny, fa tsy hoe mianky amy ze raha ataon’olo. 12 Le ho zao ty nivolany tamy Rebeka tamy zay: “Ty zokiny hanompo ty zainy”, 13 araky ty voasoratsy hoe: “Jakoba ty teako, fa Esao halako.”

14 Ka ino zany ty hovolanintsika? Tsy rariny va ty raha atao-Ndranahary? Tsy zay mihintsy! 15 Satria nivola tamy Mosesy ie hoe: “Hamindra fo amy ze olo teako hamindrà fo aho, le hiferinay ani-ze olo teako hoferinesa.” 16 Dikani-zay zany, tsy mianky amy ze raha irin’olo noho ty ezaky ataony* raha zay, fa mianky amy Ndranahary, azy mamindra fo iny. 17 Tsy zay fa nivola mikasiky an’i Farao ty Soratsy Masy hoe: “Zao ty tena antony nanengako anao ho velo: Mba hampisehoa ty heriko aminao noho mba hanambarà ty anarako amy tany toy iaby.” 18 Dikani-zay zany, ze olo teany hamindrà fo ro amindrany fo, fa engàny haheriloha ze olo teany haheriloha.

19 Hivola amiko zany iha hoe: “Ka manino ie ro mbo manome tsiny avao? Ia kay ty mahavita manohitsy ty sitrapony?” 20 Fa iha moa ty ia ka hamalivaly a-Ndranahary? Ty raha namboary koa va ro hivola amy azy namboatsy azy iny hoe: “Manino aho nataonao ho zao io?” 21 Sa ty mpamakopako fotaky va tsy mana fahefà amy fotaky iny, ka pakon’ny fotaky raiky avao ro anamboarany kopy hampiasà lafa misy fanasà* noho kopy hampiasà andavanandro?* 22 Ka manao akory laha ta hanantatsy ty helokiny noho hampiseho ty heriny Ndranahary, kanefa nandefitsy sady tena nanam-pahareta tamy kopin’ny heloky* maeva haripaky? 23 Manao akory laha nanao ani-zay ie satria ta hanambara ty voninahitsiny bevata amy kopin’ny famindram-po,* azy niomaniny sandrany mba hamea voninahitsy iny, 24 zany hoe tsika nikaihiny rey, tsy baka amy Jiosy avao, fa baka amy firenena hafa koa? 25 Zay koa ty nivolaniny amy bokin’i Hosea ao hoe: “Ze tsy vahoakiko ro hokaihiko hoe ‘vahoakiko’, le azy tsy teako iny ro hokaihiko hoe ‘teako.’ 26 Le amy pilasy nivolanako tamin-drozy iny hoe: ‘Tsy vahoakiko nareo’, ro hivolanako amin-drozy hoe: ‘Anan’ny Ndranahary velo iny nareo.’”

27 Tsy zay avao fa nikaikaiky ho zao mikasiky ty Israely, Isaia: “Ndre maro manahaky fasy an-driaky any aza ty anan’Israely, le vitsivitsy amin-drozy avao ro ho avotsy. 28 Tsy zay fa hanao ankety ani-ze velo an-tany etoy Jehovah, ka hamita tanteraky an’ny raha zay malaky.”* 29 Fa nivola sandrany koa Isaia hoe: “Laha tsy Jehovah Tompon’ny tafiky ro nanenga taranaky ho antsika, le fa ho nanahaky an’i Sodoma tsika, sady fa ho nanahaky an’i Gomora.”

30 Ka ino zany ty hovolanintsika? Ndre tsy niezaky ho lasa olo marina aza ty olo firenena hafa, le lasa olo marina avao, zany hoe lasa olo marina satria nanam-pinoa. 31 Fa ty Israely, ndre niezaky nanaraky ty lalànan’ny fahamarina aza, le tsy nahavita nanoriky an’ny lalàna zay. 32 Ino ty antony? Satria lafa niezaky ho lasa olo marina rozy, le nieritseritsy hoe ty raha ataon-drozy ro mahavy an-drozy ho olo marina, fa tsy finoa. Voafinga rozy tratsin’ny “vato maminga iny”, 33 araky ty voasoratsy hoe: “Mametraky vato maminga noho vatolampy mampiravoky a Ziona ao aho, kanefa tsy ho diso fanantenà ze olo mino an’ny raha io.”

10 Ty tena irin’ny foko rahalahy, sady isolohoako amy Ndranahary le ty mba hahaavotsy an-drozy. 2 Tsy zay fa mitsanga ho vavolombelo aho hoe mafana fo ho ahi-Ndranahary rozy, fe tsy tena mahay soa azy. 3 Tsy nahay ze marina amaso-Ndranahary eo rozy, fa nanao ty vatan-drozy ho olo marina, arakaraky ze nieritseretin-drozy fa mety avao. Tsy naneky ani-ze marina amaso-Ndranahary eo zany rozy. 4 Fa Kristy ro faran’ny Lalàna, mba hambara ho olo marina ze olo iaby mampiseho finoa.

5 Tsy zay fa nanoratsy ho zao Mosesy mikasiky ty atao hoe olo marina laha hentea ty Lalàna: “Ze olo manoriky an’ny raha rey ro ho velo amy alalan’ny raha rey.” 6 Fe ho zao ty niresahy mikasiky an’ny olo marina vokatsin’ny finoany rey: “Ka mivola anainao any hoe: ‘Ia ty hiakatsy an-danitsy any?’, zany hoe mba hampijotso an’i Kristy, 7 na hoe: ‘Ia ty hijotso amy lavaky mangoakoaky* any?’, zany hoe mba hampiakatsy an’i Kristy baka amy maty any.” 8 Fe ino ty volanin’ny Soratsy Masy? “Anilanao eo ty safà, zany hoe am-bavanao noho am-ponao ao”, tsy ino zay fa “ty safàn’ny” finoa, azy torinay iny. 9 Fa laha mivola an-kavoria eo iha hoe Jesosy ro Tompo, sady mino am-ponao ao hoe Ndranahary fa namelo azy ndraiky, le ho avotsy iha. 10 Tsy zay fa ze mampiseho finoa baka am-po ro ho lasa olo marina, le ze miresaky amin’olo* ty raha inoany ro ho avotsy.

11 Satria ho zao ty volanin’ny Soratsy Masy: “Tsy hisy ho diso fanantenà ze olo mino azy.” 12 Fa tsy misy maha samby hafa ty Jiosy noho ty Grika. Raiky avao azy Tompo ambonin-drozy iaby iny, sady manome raha maro ho ani-ze* olo iaby mikaiky azy. 13 Fa “ze olo iaby mikaiky ty anaran’i Jehovah ro ho avotsy.” 14 Fe hataon-drozy akory ty hikaiky ty anarany laha ie aza tsy inoan-drozy? Le hataon-drozy akory ty hino ani-ze olo mbo tsy niren-drozy? Le hataon-drozy akory ty haharè laha tsy misy olo mitory amin-drozy? 15 Le hataon-drozy akory ty hitory laha tsy nirahy rozy? Satria voasoratsy hoe: “Soasoa ty tomboni-azy mitory ty vaovao soa rey!”

16 Fe ndre zay, le tsy rozy iaby ro naneky ty vaovao soa. Satria nivola Isaia hoe: “Jehovah, ia ty mba nino ty raha nireny taminay?”* 17 Ty finoa zany le baka amy ty raha re, le ty raha re amy zay baka amy safà mikasiky an’i Kristy. 18 Fe hoy ty asako: Tsy no tsy naharè rozy? Laha ty marina, le “fa niboaky amy tany toy iaby ty safàn-drozy, sady fa niavy zisiky amy faran’ny tany misy olo any ty hafatsy nandesin-drozy.” 19 Fe hoy ty asako: Tsy no tsy nahay ty Israely? Voalohany, nivola Mosesy hoe: “Hataoko ze hahavy anareo hialona ani-ze olo tsy firenena, le hataoko ze hampeloky marè anareo amy ty firenena gegigegy.” 20 Fe tena nahasaky Isaia nivola hoe: “Nihitani-ze olo tsy nila ahy aho, sady nanjary nihaini-ze olo tsy nikaiky ahy.” 21 Fe ho zao ty nivolaniny mikasiky ty Israely: “Namelatsy ty tanako tamy vahoaky tsy manoriky safà noho maheriloha aho tanatin’ny andro raiky.”

11 Le hoy ty asako: Nialà-Ndranahary* va ty vahoakiny? Tsy zay mihintsy! Satria zaho koa mba Israelita, taranakin’i Abrahama, sady baka amy fokon’i Benjamina. 2 Tsy nialà-Ndranahary zao ty vahoakiny, azy nifiliny voalohany rey. Tsy hainareo va ty raha nivolanin’ny Soratsy Masy mikasiky an’i Elia, lafa nitoreo tamy Ndranahary mikasiky ty Israelita ie? 3 Hoy ty asany: “Jehovah, nivonoan-drozy ty mpaminaninao, naropakin-drozy ty alitaranao, le zaho raiky sisa tavela, kanefa mbo ta hamono ahy koa rozy henanizao.” 4 Fe ino ty nivolani-Ndranahary taminy? “Misy olo 7 000 tsy nandohaliky tamy Bala nengako ho ahy.” 5 Manahaky ani-zay koa fa mbo misy olo sisa tavela avao henanizao, le nifilỳ rozy satria nampisehoa hasoam-panahy miavaky. 6 Midika zany raha zay hoe ty hasoam-panahiny miavaky ro nifilianany an-drozy, fa tsy hoe ty raha nataon-drozy. Laha tsy zay, le tsy hasoam-panahy miavaky sasy hasoam-panahy iny.

7 Ka manao akory amy zay? Tsy azon’ny Israely ze raha tena nilàn-drozy, fa azy nifilỳ rey ro nahazo an’ny raha zay. Ty ilany lasa tsy nidary, 8 satria voasoratsy hoe: “Fa natao-Ndranahary niazon-droro marè rozy zisiky henanizao, le nameany maso tsy mahita noho sofy tsy maharè.” 9 Nivola koa Davida hoe: “Enganè ty latabon-drozy mba hanjary fandriky noho vato maminga noho fanasazia ho an-drozy. 10 Enganè ho jiky ty mason-drozy ka tsy hahita, le anovo vokoky avao ty lambosin-drozy.”

11 Le hoy ty asako: Tsy no voafinga rozy ka tsy hiongaky sasy? Tsy zay mihintsy! Fe ty hadisoa nataon-drozy ro nahavy ty olo firenena hafa ho avotsy, le lasa nialona rozy. 12 Ka laha midika ho fitahia ho ani-zao tontolo zao zany ty hadisoan-drozy sady fitahia ho an’olo firenena hafa ty hoe nihena ty isakin-drozy, le tsy vomaiky hihamaro va ty fitahia lafa feno ty isakin-drozy?

13 Miresaky aminareo firenena hafa reo aho henanizao. Le satria apostoly ho an’ny firenena hafa aho, le ameako voninahitsy* ty fanompoako, 14 tsy no mba hampialona ty firenenako* raha zay, ka ho afaky hanavotsy ty sisany amin-drozy aho. 15 Naria-Ndranahary rozy, ka lasa afaky milongo amy Ndranahary zao tontolo zao. Laha rambesi-Ndranahary ndraiky zany rozy, tsy midika va zay hoe fa nimaty rozy fe nivelo ndraiky? 16 Ankoatsini-zay, laha masy ty pakilany amy koba atao voaloham-bokatsy, le masy koa koba iabiaby iny. Le laha masy ty vahatsin’ny hazo, le masy koa ty sampany.

17 Fe zao: Nitampahy ty sampany sisany, le iha ro lasa natao grefy tamy sampany sisa tavela eo, ndre olivanala aza iha, ka nanjary nahazo tamy ranon’ny vahatsin’ny oliva iny koa. Laha zay ie, 18 le ka mirengirengy amy* sampany fa nitampaky rey. Laha mirengirengy amin-drozy* iha, le tiarovo fa tsy iha ro manday ty vahatsiny, fa ty vahatsiny ro manday anao. 19 Le hivola iha hoe: “Nisy sampany nitampahy mba ho azo natao grefy teo aho.” 20 Marina zay! Tsy nino rozy ka zay nanampaha an-drozy io, fa iha mino le zay mahavy anao afaky mitsanga io. Ka mirengirengy zany, fa mitandrema avao. 21 Fa laha ty tena sampany aza tsy nengà-Ndranahary hijano eo, le tsy hengany hijano eo koa iha. 22 Hita zany fa soa fanahy Ndranahary sady masiaky. Masiaky ie amy sampany tampaky rey, fe soa fanahy aminao laha mbo miezaky iha mba haeva hampisehoany hasoam-panahy. Laha tsy zay, le hotampahy koa iha. 23 Le atao grefy koa rozy laha lasa mino, satria hai-Ndranahary ty manao grefy an-drozy ndraiky. 24 Nitampahy tamy olivanala iha ka natao grefy tamy oliva nambolè iny, ndre tsy fatao aza raha zay. Ka laha iha aza natao manahaky ani-zay, handraky va azy tena sampany rey! Azony atao grefy amy oliva nisy azy taloha iny ndraiky rozy.

25 Tsy zay rahalahy fa teako ho hainareo sekirè masy toy, mba tsy hieritseritsy ty vatanareo ho hendry nareo: Tsy nidary ty Israelita sisany, laha tsy fa nifeno ty isakin’olo firenena hafa nampiliry, 26 le zay ty fomba hanavota ty Israely iabiaby, satria voasoratsy hoe: “Hiboaky baka a Ziona ao ty mpanavotsy,* ka hampiala an’i Jakoba amy raha raty fataony. 27 Le hanao fifanekea amin-drozy aho, lafa engàko ty fahotan-drozy.” 28 Marina fa fahavalo-Ndranahary rozy satria tsy naneky ty vaovao soa, le nahasoa anareo raha zay. Fe nifiliny ho namany ty sisany amin-drozy, satria nisy an’ny fampitamana nataony tamy razamben-drozy iny. 29 Tsy zay fa tsy hanenena-Ndranahary ty fanomeza noho ty fikaiha nataony. 30 Tsy nanoriky ty safà-Ndranahary nareo taloha, fe nampisehoa fiferinesa henanizao satria tsy nanoriky safà rozy. 31 Le manahaky ani-zay koa fa tsy nanoriky safà rozy henanizao, ka ampisehoa fiferinesa nareo, mba hampisehoa fiferinesa koa rozy. 32 Tsy zay fa natao-Ndranahary manahaky gadra io rozy iaby satria tsy nanoriky safà, amy zay ie hampiseho fiferinesa amin-drozy iabiaby.

33 Tsy mety tampitsy ty hanana-Ndranahary noho ty fahendreany noho ty fahaizany! Tena tsy takatsin’ny say ty didim-pitsarany sady tsy mety hay ty raha ataony!* 34 “Ia moa ty lasa nahay ty raha an-tsain’i Jehovah ao, le ia ty lasa mpanoro hevitsy azy?” 35 Na “ia ty nanome azy raha aloha, ka tsy maintsy ho valiany koa bakeo?” 36 Satria baka aminy ty raha iaby, le ie ro nampisy an’ny raha rey sady ho azy iaby raha rey. Enganè ho azy ty voninahitsy mandrakizay! Amena.

12 Laha zay ie rahalahy, satria Ndranahary miferinay olo, le misoloho aminareo aho, mba hameanareo ho soro velo noho masy noho ekè-Ndranahary ty vatanareo. Manao fanompoa masy nareo laha manao ani-zay, sady mampiasa soa ty sainareo. 2 Le ka maneky hopakopakoani-zao tontolo zao* sasy, fa miovà le havaozo ty sainareo mba hahaizanareo soa ty sitrapo-Ndranahary. Soa noho tena mety sady lavorary sitrapo-Ndranahary* zay.

3 Satria nampisehoa hasoam-panahy miavaky aho, le toy ty raha volaniko aminareo kiraidraiky: Ka mieritseritsy ty vatanareo mandilatsy ty tokony hieritsereta azy. Fa atorò hoe olo mandiniky soa nareo, araky ty finoa namea-Ndranahary anareo* kiraidraiky. 4 Tsy zay fa misy rantsambata maro ty vatantsika, fe tsy mitovy ty asan-drozy iaby. 5 Manahaky ani-zay koa fa vata raiky mitambatsy amy Kristy tsika ndre maro biby aza, sady rantsambata mifampianky* tsika kiraidraiky. 6 Mana fahaiza* samby hafa tsika, arakaraky ty hasoam-panahy miavaky naseho tamintsika. Laha fahaiza maminany raha zay, le tokony haminany arakaraky ty finoa ananantsika tsika. 7 Fa laha fanompoa ty namea antsika, le tokony hanompo avao tsika. Ze mampianatsy, le tokony hampianatsy avao. 8 Ze mampahery,* le tokony hampahery.* Ze mizara,* le tokony hatariky. Ze mitariky,* le tokony hazoto hanao an’ny raha zay. Ze mampiseho fiferinesa, le tokony hanao an’ny raha zay amim-pifalea.

9 Ka asia fiatsarambelatsihy ty fitiavanareo. Bokao ty raha raty, le mivahara amy ty raha soa. 10 Mifankatiava manahaky ty mpirahalahy, sady anovo ze hahavy anareo tsy hifankafoy mihintsy. Mifanomeza voninahitsy, le tokony ho voalohany nareo amy fanomeza voninahitsy ty olo hafa.* 11 Mazotoa miasa* fa ka kamokamo*. Tokony harehitsin’ny fanahy nareo. Manompoa an’i Jehovah. 12 Mifalifalea amy raha tamany. Miareta fijalea. Mahareta amy vavaky. 13 Mba anomezo amy ze raha anananareo ty olo masy, arakaraky ty raha ilàn-drozy. Miezaha ho tea mandramby vahiny. 14 Miezaha avao hirary soa ho ani-ze manenjiky anareo. Miezaha hirary soa fa ka manozo. 15 Miaraha falifaly amy ze olo falifaly, le miaraha tomany amy ze olo tomany. 16 Anovo manahaky ty vatanareo avao ty olo hafa. Ka mirengirengy, fa miezaha hiambany.* Ka mieritseritsy ty vatanareo ho hendry.

17 Ka mamaly raty ty raty, ndre amin’ia ndre amin’ia. Mba diniho hoe ino ty raha eritseretin’olo iaby hoe soa.* 18 Laha mbo azo atao ka mbo mianky aminareo koa, le milongoa amin’olo iaby. 19 Ka mamaly faty lahy longo, fa engao Ndranahary ro hampiseho ty helokiny. Satria voasoratsy hoe: “‘Ahy ty famalea, le zaho ro hamaly’, hoy Jehovah.” 20 Fa “laha mosarè ty fahavalonao, le ameo hany, laha marandrano ie, le ameo raha hinominy. Fa hamorivory vainafo anabo lohany eo* iha laha manao an’ny raha zay.” 21 Ka maneky ho resin’ny raha raty, fa reseo amy raha soa avao ty raha raty.

13 Samby tokony haneky ty manam-pahefà ty olo iaby, satria baka amy Ndranahary ty fahefà iabiaby. Tsy zay fa Ndranahary ro nanenga an’ny manam-pahefà rey ho amy pilasin-drozy kiraidraiky eo. 2 Ka ze manohitsy fahefà, le manohitsy ty raha nalami-Ndranahary. Le hotsarà ze manohitsy an’ny raha nalami-Ndranahary zay, ka ty raha nataony avao ro mahavy azy hotsarà. 3 Satria tsy atahorani-ze olo manao raha soa ty mpitondra, fa atahorani-ze olo manao raha raty. Teanao va laha tsy matahotsy an’ny manam-pahefà rey iha? Manaova raha soa avao zany, le hankasitraky anao rozy. 4 Tsy zay fa mpanompo-Ndranahary rozy le manao raha mba hahasoa anao. Fe laha manao raha raty iha le matahora, fa misy antony kanao rozy manday sabatsy. Mpanompo-Ndranahary rozy, sady namea fahefà hanasazy ani-ze olo manao raha raty.*

5 Tena misy antony tsy maintsy anekeanareo fahefà zany, tsy hoe resaky sazy* zay avao, fa eo koa ty eritseritsinareo. 6 Zay koa ty antony mahavy anareo handoa hetra, satria mpanompo-Ndranahary miasa ho an’ny vahoaky rozy, sady fa zay avao ty asan-drozy. 7 Ka le aloavo amin-drozy iaby ze tokony haloa amin-drozy: Ty hetra ho ani-ze mitaky hetra, ty haba ho ani-ze mitaky haba, ty tahotsy ho ani-ze tokony hatahora, le ty haja ho ani-ze tokony hohajà.

8 Ka engà hisy trosan’olo mihintsy aminareo any, laha tsy ty fifankatiavanareo avao. Fa ze tea ty namany le manatanteraky ty lalàna. 9 Satria ty lalàna hoe: “Ka mandranto, ka mamono olo, ka mangalatsy, ka maniriniry rahan’olo” noho ty didy hafa iaby, le fa nifintiny amy didy ho zao iny hoe: “Tiavo ty namanao manahaky itiavanao ty vatanao.” 10 Tsy manao raha raty amy ty namany ze olo mana fitiava. Ka ze tea olo zany ro manatanteraky ty lalàna.

11 Anovo raha nivolaniko taminareo zay, satria fa hainareo ty fotoa misy antsika henanizao. Fa henanizao ty lera tokony hifohazanareo amy torimaso. Tsy zay fa fa marìny ty fanavota antsika henanizao laha ohary tamy tsika vo lasa mpino iny. 12 Fa ho lasa ty haly, le fa ho maray ty andro. Ka ndao tsika hiala amy ty* raha raty fataon’olo amy maìky ao, le hampiasa* ty fitaovam-pialian’ny mazava. 13 Le tokony ho soa ty fandaisantsika ty vatantsika manahaky amy andro mazava rey, ka tsy hanao fety tsy voafehy,* tsy ho mamo, tsy hijangajanga, tsy hanahaky ty fandaisam-batan’olo tsy misy henatsy,* tsy hifamaly amin’olo, le tsy hialona. 14 Fa sikino ty toetsin’i Jesosy Kristy Tompo, le ka manao tetiky hanomeza fahafaham-po ty fanirian’ny nofotsy.

14 Rambeso soa ze malemy finoa, sady ka tsaratsarà ie laha tsy mitovy hevitsy aminao.* 2 Ty raiky mana finoa matanjaky le mihina kila raha iaby, fa azy raiky malemy iny tsy mihina laha tsy legimy avao. 3 Tsy tokony hanambanimbany ani-ze tsy mihina ty olo mihina, le tsy tokony hitsaratsara ani-ze mihina ty olo tsy mihina, satria fa nirambesi-Ndranahary soa ie. 4 Fa iha moa ty ia ka hitsaratsara ty mpiasan’olo hafa? Ty mpampiasa azy avao ro afaky mitsara laha mety na tsy mety ty raha ataony.* Hahazo hatò* amy Jehovah ie, satria ampeany.

5 Ty raiky mieritseritsy hoe miavaky amy andro hafa ty andro raiky, fa ty raiky mieritseritsy hoe mitovy iaby ty andro. Aleo ty olo kiraidraiky samby ho resy lahatsy amy ze fanapaha-kevitsiny. 6 Ze mitandrina andro raiky le mitandrina an’ny raha zay ho voninahitsin’i Jehovah. Ze mihina le mihina ho voninahitsin’i Jehovah, satria misaotsy a-Ndranahary ie. Ze tsy mihina le ho voninahitsin’i Jehovah koa ty tsy ihinanany, kanefa misaotsy a-Ndranahary koa ie. 7 Tsy misy amintsika velo ho ahi-ty vatany avao, sady tsy misy maty ho ahi-ty vatany avao koa. 8 Fa laha velo tsika, le velo ho an’i Jehovah, le laha maty tsika, le maty ho an’i Jehovah. Ka ndre velo tsika ndre maty, le an’i Jehovah. 9 Satria nimaty Kristy le bakeo nivelo ndraiky mba ho Tompon’ny maty noho ty velo.

10 Fa manino iha ro mitsaratsara ty rahalahinao? Le manino koa iha ro manambanimbany ty rahalahinao? Tsy zay fa samby mbo hotsarà amy Ndranahary eo* tsika iaby. 11 Satria voasoratsy hoe: “‘Laha mbo velo koa aho’, hoy Jehovah, ‘le tsy maintsy handohaliky amiko eo ty olo* iaby, sady* haneky ahy ho Ndranahary amin’olo maro eo.’” 12 Dikani-zay zany, samby hatao-Ndranahary ankety* tsika kiraidraiky.

13 Tsy tokony hifampitsaratsara sasy zany tsika, fa tokony ho tapa-kevitsy hoe tsy hametraky vato maminga na raha hafa manakantsaka alohan’ny rahalahy eo. 14 Mpanori-dia an’i Jesosy Tompo aho, le haiko sady maharesy lahatsy ahy hoe tsy misy raha lasa maloto ho azy zao. Fa lafa eritseretin’olo raiky hoe maloto ty raha raiky, zay vo maloto aminy raha iny. 15 Fa laha ty hany haninao ro mampeloky ty rahalahinao, le tsy misy fitiava sasy ty raha ataonao. Ka simbànao amy ty hany haninao ty finoany,* satria fa nimaty hanavotsy azy Kristy. 16 Ka engà hisy hanaraty ty raha soa ataonareo zany. 17 Fa ty Fanjakà-Ndranahary le tsy midika hoe fihinana na finoma, fa midika hoe fahamarina noho filongoa noho fifalifalea amy alalan’ny fanahy masy. 18 Fa ze manompo an’i Kristy sady mana an’ny toetsy reo ro ekè-Ndranahary sady eken’olo.

19 Ka ndao zany tsika hiezaky hampisy filongoa noho hifampahery. 20 Ka ravà amy resaky hany sasy ty asa-Ndranahary. Marina fa malio ty raha iaby, fe tsy mety* ty raha ataon’olo raiky, laha mihina ie kanefa maminga olo hafa raha zay. 21 Aleo iha tsy mihina hena na mino divay na manao raha hafa mety hahavy ty rahalahinao ho voafinga. 22 Ze raha inoanao, le tanjaho ho ahinao noho Ndranahary avao. Sambatsy ze olo tsy manome tsiny ty vatany amy ty raha ataony. 23 Fa laha misalasala ie kanefa mihina, le fa nambara sahady hoe diso, satria tsy amy finoa ty anaovany an’ny raha zay. Tsy zay fa fahotà ze raha iaby tsy atao amy finoa.

15 Fe tsika matanjaky le tokony hiaritsy ty handrani-ze tsy matanjaky, fa tsy hampifalifaly ty vatantsika. 2 Tokony samby hampifalifaly ty namantsika tsika, mba hahasoa azy noho hampahery azy. 3 Tsy zay fa ndre Kristy aza tsy nampifalifaly ty vatany,* satria voasoratsy hoe: “Mahazo ahy ty fanambanimbanea ataon’olo manambany anao rey.” 4 Fa ze raha iaby nisoraty taloha, le nisoraty mba hampianara antsika. Amy zay tsika hana raha tamany, satria manampy antsika hiaritsy sady manome fampahereza antsika ty Soratsy Masy. 5 Enganè azy Ndranahary manampy anareo hiaritsy noho mampahery anareo iny, mba hanome anareo toe-tsay mitovy amy ty ahin’i Kristy Jesosy! 6 Hitovy hevitsy nareo amy zay, ka hitovy resaky* mba hanome voninahitsy an’ny Ndranahary Baban’i Jesosy Kristy Tompontsika iny.

7 Nandramby anareo soa Kristy, le mba rambeso soa* koa ty olo hafa. Lafa mifanao ani-zay nareo, le hahazo voninahitsy Ndranahary. 8 Le ambarako anareo fa lasa mpanomponi-ze olo nisavary Kristy mba hampisehoa hoe mivola ty marina Ndranahary, sady mba hanaporofoa hoe azo atokisa fampitamana nataony tamy razamben-drozy iny. 9 Amy zay koa hanome voninahitsy a-Ndranahary ty olo firenena hafa satria miferinay olo ie. Tsy zay fa voasoratsy hoe: “Raha zay ro mahavy ahy haneky anao amin’olo eo noho amy firenena rey eo, sady hanao hira fiderà ho ahi-ty anaranao.” 10 Nivola ndraiky ie hoe: “Mifalifalea miaraky amy vahoaki-Ndranahary nareo firenena hafa reo!” 11 Le nivola ndraiky ie hoe: “Nareo firenena iabiaby, derao Jehovah, sady enganè hidera azy ty vahoaky iaby!” 12 Nivola koa Isaia hoe: “Hisy vahatsin’i Jese hitsanga ka handay firenena, le ie ro hotamanin’ny firenena rey.” 13 Enganè azy Ndranahary manome raha tamany iny mba hameno fifalea noho fiadana ty fonareo, satria matoky azy nareo! Vomaiky ho azo antoky* amy zay ty raha tamaninareo satria eo ty herin’ny fanahy masy.

14 Rahalahiko, tena matoky aho henanizao hoe parè hanao raha soa nareo sady mahay raha maro biby. Tena matoky koa aho fa afaky mifananatsy* nareo. 15 Fe manoratsy aminareo mivanta kokoa mikasiky ty raha sisany aho, mba hampitiarova anareo ndraiky, satria nampiseho hasoam-panahy miavaky tamiko Ndranahary, 16 ka nifily ahy ho mpanompon’i Kristy Jesosy* mba hitory ty vaovao soa-Ndranahary amin’olo firenena hafa. Manao an’ny asa masy zay aho, mba ho lasa fanatitsy mahazo hatò ty olo firenena hafa, sady hohamasìny amy alalan’ny fanahy masy.

17 Falifaly zany aho satria mpianatsin’i Kristy Jesosy sady manao ty asa-Ndranahary. 18 Tsy hiresaky raha hafa aho, laha tsy ze raha nataon’i Kristy tamy alalako, mba hahavy ty olo firenena hafa hanoriky ty safàn’i Kristy, vokatsin’ny raha nivolaniko noho nataoko, 19 noho vokatsin’ny herin’ny famantara noho ty fahagagà* noho ty herin’ny fanahi-Ndranahary. Le nivitako soa ty nitory ty vaovao soa mikasiky an’i Kristy, nanomboky ta Jerosalema zisiky ta Ilyrikiona any. 20 Le niezaky marè aho lafa nanao an’ny raha zay mba tsy hitory ty vaovao soa amy ze pilasy fa nanambarà ty anaran’i Kristy. Amy zay aho tsy hamboatsy raha anabon’ny fototsy nataon’olo hafa. 21 Fe voasoratsy hoe: “Ze mbo tsy nanambarà ty mikasiky azy ro hahita azy, le ze mbo tsy naharè ro hahay.”

22 Zay koa ty nahavy ahy ho voasaka imaro, ka tsy niavy taminareo any. 23 Fe fa tsy mana faritany mbo tsy nitoria sasy aho henanizao amy faritsy reo any. Fa tanatin’ny tao maromaro* koa aho ro tena ta ho aminareo any. 24 Ka lafa ho a Espaina any aho, le mitamà hahita anareo noho hasesinareo lavidavitsy, lafa baka miaraky aminareo kelikely. 25 Fe fa ho a Jerosalema any aho henanizao mba hanompo ty olo masy. 26 Tsy zay fa nitean’ny rahalahy a Makedonia noho a Akaia atoy rey ty nanome ty hananan-drozy, mba hanampea ani-ze mahantra amin’olo masy a Jerosalema any rey. 27 Marina fa nitean-drozy ty nanao an’ny raha zay, fe trosa tena tokony haloan-drozy amin’olo rey koa raha zay. Satria laha nahazo tamy hanana ara-panahin’olo masy rey ty olo firenena hafa, le adidin-drozy koa ty mikarakara* an’ny olo rey, ka manome ze raha ilàn-drozy andavanandro. 28 Le lafa baka manatitsy an’ny fanomeza zay aho ka azoko antoky hoe voarambin’ny olo masy rey raha iny, le ho a Espaina any aho, ka amy zay aho ro handalo kelikely aminareo any. 29 Haiko koa fa lafa avy aminareo any aho, le handay fitahia maro ho anareo baka amy Kristy.

30 Rahalahy, satria tsika mino an’i Jesosy Kristy Tompontsika sady mifankatea vokatsin’ny heri-Ndranahary, le mampirisiky anareo aho mba hiezaky mafy hivavaky ho ahy amy Ndranahary, manahaky ty fa ataoko. 31 Amy zay aho mba ho avotsy amin’olo tsy mpino a Jodia any rey, sady mba hahazo hatò amin’olo masy a Jerosalema any fanompoa ataoko ho an-drozy iny. 32 Le ho falifaly aho lafa avy aminareo any ka samby ho velombelo tsika iaby, laha sitrapo-Ndranahary. 33 Enganè hanoha anareo azy Ndranahary manome fiadana iny! Amena.

16 Ambarako anareo ty mikasiky an’i* Foiby anabavintsika. Mpanompo amy fiangona a Kenkrea any ie. 2 Rambesonareo soa ie manahaky ty fandrambesa maeva ty olo masy, satria finoa raiky amy Tompo ao nareo. Mba ampeo koa ie amy ze raha ilàny, satria mpiaro olo maro ie, sady mpiaro ahy koa.

3 Mampamangy amy Priska noho Akoila any, azy mpiaraky miasa amiko amy asan’i Kristy Jesosy rey. 4 Tsy zay fa nirisiky* rozy morovaly mba hanavota ahy. Tsy zaho avao ro misaotsy an-drozy, fa ty fiangona iaby amy firenena hafa any koa. 5 Mampamangy koa amy fiangona mivory an-tranon-drozy ao iny. Mampamangy amy Epaineto mamiko, azy voaloham-bokatsy ta Azia any ho an’i Kristy iny. 6 Mampamangy amy Maria any, azy niasa mafy ho anareo iny. 7 Mampamangy amy Androniko noho Jonia, longoko sady niaraky nigadra tamiko. Hain’ny apostoly rey soa rozy sady fa niaraky tamy Kristy talohako.

8 Mampamangy amy Ampliato any, azy mamiko amy Tompo ao iny. 9 Mampamangy amy Orbano, mpiaraky miasa amintsika amy asan’i Kristy iny, noho Staky mamiko. 10 Mampamangy amy Apela any, azy mahazo hatò amy Kristy iny. Mampamangy amy olo trano raiky amy Aristobolo rey any. 11 Mampamangy amy Herodiona longoko any. Mampamangy amy olo trano raiky amy Narsisy rey any, azy amy Tompo ao rey. 12 Mampamangy amy Tryfena noho Tryfosa any, rozy azy ampela miasa mafy amy Tompo ao rey. Mampamangy amy Persy anabavy teantsika iny any, satria niasa mafy tamy Tompo ao ie. 13 Mampamangy amy Rofosy any, azy nifilin’ny Tompo iny, mampamangy koa amy reniny sady reniko iny any. 14 Mampamangy amy Asynkrito, Flegona, Hermesy, Patroba, Herma, noho amy rahalahy miaraky amin-drozy rey any. 15 Mampamangy amy Filologo noho Jolia, Nerea noho ty anabaviny, noho Olympa, noho amy olo masy iaby miaraky amin-drozy rey any. 16 Mifampiarahabà amy oroky masy. Manao mampamangy anareo ty fiangonan’i Kristy iabiaby.

17 Mampirisiky anareo aho rahalahy, mba hanara-maso ani-ze mampisy fisaratsaraha noho mahavy ty olo hafa hiala amy finoa, satria mifanohitsy amy fampianara fa nirenareo raha ataon-drozy zay, ka ialao lavitsy rozy. 18 Tsy zay fa tsy mpanompon’i Kristy Tompontsika ty olo manahaky ani-rey, fa mpanompon’ny kibon-drozy* avao. Malemilemy ty resaky ataon-drozy sady mandroboky mba hamitaha ani-ze olo tsy manahy.* 19 Fa hain’olo iaby hoe manoriky safà nareo, ka falifaly aminareo aho. Fe teako laha mahihitsy amy raha soa nareo, kanefa gegy amy raha raty. 20 Tsy ho ela koa Ndranahary manome fiadana iny, le hanorotoro an’i Satana ambany tombonareo eo. Enganè Jesosy Tompontsika hampiseho hasoam-panahy miavaky aminareo!

21 Mampamangy anareo zao hoe Timoty mpiaraky miasa amiko, noho Losio noho Jasona noho Sosipatro, samby longoko rozy iaby.

22 Zaho Tertio, azy nanao an-tsoratsy an’ny taratasy toy iny, le manao mampamangy anareo amy Tompo ao.

23 Mampamangy anareo zao hoe Gaio, azy fivantanako noho fivantanan’ny fiangona iabiaby iny. Mampamangy anareo zao hoe Erasto, azy mpanajary ty dralan’ny* tanà iny, noho Koarto rahalahiny. 24 ——

25 Hita amy vaovao soa toriko noho ty hafatsy mikasiky an’i Jesosy Kristy fa afaky manampy anareo ho mafy fototsy Ndranahary. Vaovao soa zay le mifanaraky amy sekirè masy fa navony liany fa efa biby iny, kanefa fa naseho mazava ie henanizao. 26 Fa naseho* sekirè io henanizao, sady fa nambara tamy firenena iaby, tamy alalan’ny faminania amy Soratsy Masy ao. Mifanaraky amy didin’ny Ndranahary mandrakizay iny raha zay, satria teany hino noho hanoriky ty safàny ty olo. 27 Hamea an’ny Ndranahary farani-ze hendry iny lahy ty voninahitsy mandrakizay amy alalan’i Jesosy Kristy! Amena.