TY TARATASY FAHAROE HO AHI-TY KORINTIANINA

1 Baka amy Paoly noho Timoty rahalahintsika. Paoly io apostolin’i Kristy Jesosy, vokatsin’ny sitrapo-Ndranahary. Ho an’ny fiangona-Ndranahary a Korinto any, anisani-zay ty olo masy iaby amy faritsin’i Akaia iabiaby,

2 Enganè Ndranahary Babantsika iny noho Jesosy Kristy Tompo, mba hampiseho hasoam-panahy miavaky* aminareo sady hanome fiadana anareo!

3 Hoderà lahy Ndranahary Baban’i Jesosy Kristy Tompontsika, Baban’ny fiferinesa noho Ndranaharin’ny fampionona iaby iny! 4 Mampionona* antsika amy raha sarotsy* iaby mahazo antsika ie. Ka lafa mahazo fampionona baka amy Ndranahary zay tsika, le lasa haintsika koa ty mampionona ani-ze olo miatriky raha sarotsy* sankarazany. 5 Tsy zay fa manahaky ty iaretantsika fijalea maro amy fanoriha an’i Jesosy, ro ahazoantsika fampionona maro amy alalan’i Kristy koa. 6 Ka laha miatriky raha sarotsy* zahay, le ho fampionona noho ho fanavota anareo raha zay. Le laha ampionony zahay, le ho fampionona anareo raha zay, le fampionona zay ro hanampy anareo hiaritsy fijalea manahaky ty fijaleanay koa. 7 Matoky anareo tanteraky zahay,* satria hainay fa manahaky ty ijaleanay ro ijaleanareo koa, le manahaky ty hampionòna anay ro hampionòna anareo koa.

8 Tsy zay rahalahy, fa teanay ho hainareo ty raha sarotsy nahazo anay tamy faritanin’i Azia any. Tena mafy ty raha nahazo anay, ka laha ty herinay avao tsy ho nahavita niaritsy. Zahay aza fa tsy nitamà sasy hoe ho velo. 9 Sahala hoe voasazy mba ho maty mihintsy zahay. Niseho raha zay mba hahavy anay tsy hatòky ty vatanay, fa hatòky a-Ndranahary, azy mamelo ty maty iny. 10 Tsy zay fa nanavotsy anay tamy loza fa ho nahafaty anay iny ie, sady mbo hanavotsy anay. Mitamà koa zahay fa mbo hanavotsy anay avao ie. 11 Afaky manampy anay koa nareo lafa misoloho amy vavaky ho anay. Amy zay ho maro ty ho afaky hisaotsy a-Ndranahary ho ahinay, satria zahay nahazo fanampea ho valin’ny vavaky nataon’olo maro.

12 Fa toy ty raha mampirengirengy anay: Malio ty eritseritsinay mivola hoe masy noho mahity amaso-Ndranahary eo ty fandaisam-batanay tamy zao tontolo zao eo, handraky moa ty taminareo eo. Tsy niantehitsy tamy fahendreani-zao tontolo zao* zahay, fa tamy hasoam-panahy miavaky naseho-Ndranahary. 13 Fa ze raha hainareo vakỳ* noho azonareo avao ro soratinay aminareo. Le mitamà aho fa ho hainareo soa* avao raha zay, 14 manahaky ty nahaizan’ny sisany taminareo fa rengirenginareo zahay. Le ho rengirenginay koa nareo amy andron’i Jesosy Tompontsika.

15 Atokisako raha zay ka nieritseritsy ho aminareo any tse aho, amy zay ho falifaly ndraiky nareo.* 16 Tsy zay fa nieritseritsy ho nitsidiky anareo aho tamy zaho ho a Makedonia atoy noho lafa mimpoly baka atoy, amy zay hasesinareo lavidavitsy aho lafa ho a Jodia any. 17 Nisomonga avao va zaho tamy zaho nivola hoe ho aminareo any iny? Sa manao ze teako avao va aho lafa misy raha eritseretiko hatao, le mivola aho hoe: “Eka, eka”, kanefa bakeo ndraiky hoe “Aha”? 18 Fe azo atokisa Ndranahary le manahaky ani-zay koa ty raha nivolaninay taminareo, fa tsy hoe “eka” bakeo “aha.” 19 Tsy zay fa tsy hoe “eka” bakeo “aha” Jesosy Kristy Anaki-Ndranahary, azy nitorinay amy Silvano* noho Timoty taminareo iny. Fa amy Kristy, lafa “eka” le “eka.” 20 Fa ndre firy ndre firy ty raha ampitamani-Ndranahary, le lasa “eka” raha rey amy alalan’ny Anany. Dikani-zay, amy alalany koa ro anaovanay “Amena” amy Ndranahary, mba hanomezanay voninahitsy Azy. 21 Fe Ndranahary ro manome antoky hoe samby ahin’i Kristy ndre zahay ndre nareo, sady Ie ro nanosotsy antsika. 22 Nanisy kasè* antsika koa ie sady nanome antsika an’ny antoky amy raha ho avy iny,* zany hoe ty fanahy am-pontsika ao.

23 Le mikaiky a-Ndranahary aho ho vavolombelo, fa ta hanampy anareo aho kanao mbo tsy niavy ta Korinto any. 24 Tsy tompon’ny finoanareo zahay fa mpiaraky miasa mba hahafalifaly anareo, satria ty finoanareo avao ro itsangananareo.

2 Fa nitapa-kevitsy aho hoe tsy hanao ze hampalahelo anareo lafa mitsidiky anareo ndraiky. 2 Fa laha manao ze hampalahelo anareo aho, le ia koa ro hampifalifaly ahy, laha tsy azy nampalaheloviko iny avao? 3 Nanoratsy an’ny raha zay aho, mba tsy hampalahelo ahy olo tokony hampifalifaly ahy rey lafa zaho avy, satria matoky aho fa ze raha mahafalifaly ahy le mahafalifaly anareo iaby koa. 4 Tsy zay fa tena nijaly noho natahotsy marè aho tam-poko ao lafa nanoratsy taminareo, sady nilatsa-dranomaso. Fe tsy hoe mba hampalahelo anareo, fa mba hahaizanareo hoe tena teako nareo.

5 Laha nisy nanao ze hampalahelo olo hafa, le tsy zaho ro nampalaheloviny, fa ty ankamaroanareo mihintsy. Fe tsy ta hivola safà mahery marè aho kanao mivola an’ny raha zay. 6 Ampy ho an’olo iny fananara marè nataon’ny ankamaroanareo zay. 7 Tokony ho parè hanenga ty hadisoany nareo henanizao sady ho soa fanahy lafa manao an’ny raha zay, ka hampionona azy tsy no ho resin’ny alahelo tafahoatsy ie. 8 Le mampirisiky anareo aho mba hanome toky azy hoe teanareo ie. 9 Nanoratsy ho anareo koa aho mba hahitako hoe manoriky safà amy raha iaby nareo sa tsy manoriky. 10 Ze hadisoa engànareo, le engàko koa. Laha ty marina aza, ze hadisoa nengako—laha nisy nengako—le nengako tamason’i Kristy eo mba hanampea anareo, 11 amy zay nareo tsy ho voafitakin’i* Satana, satria haintsika ty tetikiny.*

12 Lafa niavy ta Troasy any aho mba hitory ty vaovao soa mikasiky an’i Kristy, ka nisy varavara nisokafy ho ahy nahafahako nanao ty asan’ny Tompo,* 13 le tsy nilamy ty saiko satria tsy nihitako tany Titosy rahalahiko. Farany nataoko veloma rozy, le nandeha a Makedonia atoy aho.

14 Fe isaora Ndranahary, satria mitariky antsika avao amy filaharan’ny mpandresy eo miaraky amy Kristy! Isaora koa Ie satria ataony manimanitsy* amy alalantsika amy pilasy iabiaby ty hanitsin’ny fahaiza azy! 15 Tsy zay fa amy Ndranahary, le sahala raha manimanitsy soasoa tsika amy ze olo ho avotsy noho amy ze olo haripaky eo, lafa mitory mikasiky an’i Kristy: 16 Amy ze olo haripaky, fofon’ny* fahafatesa mitariky ho amy fahafatesa, le amy ze olo ho avotsy, fofo manitsin’ny fiaina mitariky ho amy fiaina. Ka ia ty mahafeno fepetra ho amy raha rezay? 17 Zahay, satria zahay tsy mamarotsy* ty safà-Ndranahary manahaky ty ataon’olo maro. Fa zahay miresaky mahity anatreha-Ndranahary eo noho miaraky amy Kristy, sahala hoe olo nirahi-Ndranahary.

3 Mila manambara ty vatanay aminareo ndraiky va zahay? Sa va zahay manahaky ty olo sisany, ka hoe mila manome anareo taratasy fanambarà ty mikasiky anay, na mila an’ny raha zay baka aminareo? 2 Nareo ro taratasinay, voasoratsy am-ponay ato sady hain’olo noho vakìn’olo iaby. 3 Tsy zay fa tena hita hoe nareo ro taratasin’i Kristy nisoratinay mpanompo-Ndranahary. Fe tsy nisoraty tamy ankra fa tamy fanahin’ny Ndranahary velo iny, sady tsy nisoraty tamy vato* fa tamy nofotsy, zany hoe tamy fo.

4 Matoky an’ny raha zay anatreha-Ndranahary eo zahay, amy alalan’i Kristy. 5 Tsy mihaboky aloha zahay hoe ty ezaky ataonay ro mahavy anay hahay an’ny asa iny, fa Ndranahary ro mahavy anay hahay an’ny raha zay. 6 Ie ro tena mahavy anay hahay an’ny asa iny ka ho lasa mpanompon’ny fifanekea vaovao, zany hoe tsy mpanompon’ny lalàna voasoratsy, fa mpanompon’ny fanahy. Tsy zay fa mahafaty lalàna voasoratsy iny, fa ty fanahy mahavelo.

7 Namea tamim-boninahitsy lalàna manday fahafatesa noho nisoraty tamy vato eo iny, ka tsy vitan’ny anan’Israely ty nanenty soa ty tarehin’i Mosesy, tratsin’ny voninahitsy nampamirapiratsy ty tarehiny iny, tsy ino zay fa voninahitsy tsy maintsy horavà iny. 8 Ka laha zay ie, tsy vomaiky va tokony hamea amim-boninahitsy marerè ty fanahy? 9 Laha be voninahitsy lalàna manday sazy iny, le vomaiky tokony ho be voninahitsy marerè fanompoa manampy olo ho lasa olo marina iny! 10 Ndre azy natao be voninahitsy taloha iny aza lasa tsy mana voninahitsy sasy, tratsin’ny voninahitsy soa mandilatsy azy iny. 11 Fa laha namea tamim-boninahitsy azy tsy maintsy horavà iny, le vomaiky tokony ho be voninahitsy marerè azy maharitsy iny!

12 Satria tsika mana an’ny raha tamany zay, le tena mahasaky mivola, 13 sady tsy manao manahaky ty nataon’i Mosesy. Nanaro lamba ty tarehiny ie tamy zay, mba tsy ho afaky hahita soa ty hiafaran’ny raha tsy maintsy horavà iny ty anan’Israely. 14 Fe fa tsy daitsy ty sain-drozy. Tsy zay fa mbo tsy nalà avao zisiky henanizao lamba manaro iny lafa vakỳ fifanekea taloha iny, satria amy alalan’i Kristy avao ty angalà an’ny raha io. 15 Laha ty marina, le misy lamba manaro ty fon-drozy zisiky henanizao, saky vakỳ ze raha nisoratin’i Mosesy. 16 Fe lafa misy olo mimpoly amy Jehovah, le alà lamba manaro iny. 17 Fanahy Jehovah, ka amy ze misy ty fanahin’i Jehovah le misy fahafaha. 18 Le nalà ty lamba manaro ty tarehintsika, ka sahala fitaratsy manome taratsin’ny voninahitsin’i Jehovah tsika. Ovà hitovy tarehy aminy zany tsika iaby, ka manome taratsy tsikelikely ty voninahitsiny,* mifanaraky tanteraky amy ty fanovà ataon’i Jehovah, azy Fanahy iny.*

4 Le tsy kivy zahay satria mana an’ny fanompoa zay, vokatsin’ny famindram-po naseho taminay. 2 Fe tsy nekenay ty raha mahamenatsy noho avonivony, ka tsy mamitaky zahay na manao ze hahaboka ty* safà-Ndranahary, fa mampiseho mazava soa ty fahamarina, ka ohatsy soa ho ahin’olo* iaby, amaso-Ndranahary eo. 3 Laha tsy mazava ty vaovao soa ambaranay, sahala hoe misy lamba manaro, le amy ze olo ho ripaky raha zay ro tsy mazava. 4 Nataon’ny ndranaharini-zao tontolo zao* iny jiky ty sain’olo tsy mpino rey, mba tsy hamirapiratsy amin-drozy ty hazavan’ny vaovao soa be voninahitsy iny, zany hoe vaovao soa mikasiky an’i Kristy, azy tarehi-Ndranahary iny. 5 Tsy zay fa tsy mitory mikasiky ty vatanay zahay, fa mitory mikasiky hoe Jesosy Kristy ro Tompo. Ambaranay koa hoe mpanomponareo zahay, satria manori-dia an’i Jesosy. 6 Fa Ndranahary ro nivola hoe: “Tokony hamirapiratsy baka amy maìky ao ty hazavà.” Le nataony mamirapiratsy am-ponay ao amy alalan’ny tarehin’i Kristy ty hazavany, ka lasa mahay a-Ndranahary zahay, sady be voninahitsy fahaiza zay.

7 Fe mana an’ny hanana zay anaty valany tany* ao zahay, mba ho hita hoe nahazo hery mandilatsy ty ahin’olombelo zahay, zany hoe hery baka amy Ndranahary, fa tsy baka aminay. 8 Voapiritsy amy kila raha iaby zahay, kanefa tsy hoe piritsy marè ka tsy mahafikofoky. Miasa loha zahay, kanefa tsy hoe tsy misy lala hiboaha mihintsy.* 9 Enjehy zahay, kanefa tsy afoy. Atonta zahay, kanefa tsy maty. 10 Tozoro miaritsy raha sarotsy zahay ka atahora ty ainay, manahaky ty nahazo an’i Jesosy. Amy zay ho hita hoe manahaky ty raha niainan’i Jesosy koa ty raha iainanay.* 11 Tsy zay fa velo zahay fe tozoro atahora ho maty satria manori-dia an’i Jesosy. Amy zay ho hita hoe manahaky ty raha niainan’i Jesosy koa ty raha iainanay.* 12 Dikani-zay, miasa aminay ao ty fahafatesa, fa ty fiaina miasa aminareo ao.

13 Le satria zahay mana an’ny finoa* mitovy amy azy voasoratsy iny hoe: “Nino aho, farany nivola”, le mino koa zahay farany mivola, 14 satria hainay fa Azy namelo an’i Jesosy iny le hamelo anay koa mba hiaraky amy Jesosy, sady hampiseho anay anatrehany eo miaraky aminareo. 15 Le nareo ty antony anaova an’ny raha iaby rezay. Amy zay vomaiky hitombo hasoam-panahy miavaky sandra fa maro iny, satria mihamaro ty olo manome fisaora mba hanomeza voninahitsy a-Ndranahary.

16 Ka tsy kivy tsika, fa ndre mihareraky aza tsika ivelany etoy,* le azo antoky fa havaozy sanandro ty anaintsika ao.* 17 Fa ndre tsielatsiela noho maiva aza ty fijalea* iaretantsika, le manday voninahitsy ho antsika raha zay, zany hoe voninahitsy bevata* marè noho mandrakizay. 18 Le mampifantoky ty masontsika amy raha tsy hita tsika, fa tsy amy raha hita, satria mandalo avao ty raha hita fa ty raha tsy hita maharitsy mandrakizay.

5 Fa haintsika fa laha hakopaky* ty tranontsika an-tany eto, zany hoe vatan’olombelo sahala tranolay toy, le hamea-Ndranahary trano tsy namboary tana sady maharitsy mandrakizay an-danitsy any tsika. 2 Tsy zay fa mitoreotoreo vatany tsika amy trano* toy ato, sady maniry marè hahazo an’ny trano* baka an-danitsy any iny.* Hanisiantsika sahala siky raha io, 3 mba tsy ho hita hoe mihalo tsika lafa tena misiky azy. 4 Mitoreotoreo vatany tsika amy tranolay toy ato sady manavesatsy antsika ty fiasan-doha. Fe tsy hoe ta hangalaky an’ny raha toy tsika, fa ta hisiky an’ny raiky iny, amy zay hatelin’ny fiaina azy mety maty iny. 5 Ka Ndranahary ro nanoma antsika tamy raha zay, ie ro nanome antsika ty fanahiny mba ho antoky amy ty raha ho avy.*

6 Be herim-po avao zany tsika sady haintsika fa laha mbo mipetraky amy vatan’olombelo toy ato tsika, le mbo tsy amy Tompo any, 7 satria finoa ro andehanantsika, fa tsy ty raha hitan’ny maso. 8 Fe be herim-po tsika, sady aleontsika tsy amy vatan’olombelo toy ato fa hiaraky mipetraky amy Tompo. 9 Dikani-zay zany, ataontsika raha kendrè ty hahazo hatò aminy, ndre miaraky mipetraky aminy tsika ndre tsy aminy any. 10 Tsy zay fa tsy maintsy hiseho* amy pilasy fitsaràn’i Kristy eo tsika iaby, mba hahazo ty valin’asany arakaraky ty raha nataony ty olo kiraidraiky, ndre soa ndre raty ty raha nataony, tamy ie mbo tamy vatan’olombelo iny ao.

11 Le satria hainay fa tokony hatahotsy an’ny Tompo zahay, le resenay lahatsy avao ty olo mba hino ty raha ampianarinay. Fe mahay soa anay Ndranahary,* sady mitamà aho hoe nanampy anareo hahay soa anay koa ty eritseritsinareo.* 12 Tsy hoe midera ty vatanay aminareo ndraiky zahay, fa mampirisiky anareo zahay mba hirengirengy satria mana anay. Ho vitanareo amy zay ty hamaly ani-ze olo mirengirengy amy ty raha miseho ivelany, fa tsy amy ty raha am-po ao. 13 Fa laha tsy mandiniky zahay le ho ahi-Ndranahary, le laha mandiniky soa zahay le ho ahinareo. 14 Fa ty fitiavan’i Kristy ro miforosè* anay, satria lasa hainay hoe olo raiky ro nimaty ho ahin’olo iaby. Fa nimaty moa rozy iaby, laha ty marina. 15 Le nimaty ho ahin’olo iaby ie, mba tsy ho velo ho ahi-ty vatany sasy ze velo, fa ho ani-azy fa nimaty ho ahin-drozy sady fa nivelomy iny.

16 Ka manomboky henanizao le tsy manenty olo mifanaraky amy ty fahitan’olombelo* sasy zahay. Ndre nanenty an’i Kristy mifanaraky amy ty fahitan’olombelo* aza zahay taloha, le tsy manahaky ani-zay sasy ty fahitanay azy henanizao. 17 Ka laha misy olo miharo raiky amy Kristy, le zavaboary vaovao olo zay. Fa lasa ty raha taloha, le henteo fa reo misy raha vaovao. 18 Fe ty raha iaby le baka amy Ndranahary. Ie ro nampilongo anay taminy tamy alalan’i Kristy, sady nanome anay fanompoa fampilongoa, 19 zany hoe hanambara fa nampiasà-Ndranahary Kristy mba hahavy ani-zao tontolo zao hilongo aminy, ka nataony kisary tsy hita* ty hadisoan-drozy. Le nankininy taminay ty fitoria ty hafatsy mikasiky an’ny fampilongoa iny.

20 Ambasadera solon’i Kristy zany zahay, ka sahala hoe misoloho amy alalanay Ndranahary. Solon’i Kristy zahay ka misoloho hoe: “Mba milongoa amy Ndranahary rolahy nareo!” 21 Azy tsy nanota iny ro nataony fanatitsy vokatsin’ny ota* mba hanavota anay, amy zay ho lasa olo marina amy Ndranahary zahay, amy alalany.

6 Miaraky miasa aminy zahay, ka mampirisiky anareo koa mba tsy hoe haneky ty hasoam-panahy miavaky aseho-Ndranahary avao, kanefa hanalino ty raha kendren’ny raha zay.* 2 Fa hoy ty asany: “Tamy fotoa fampisehoa fankasitraha aho ro nijanjy anao, le tamy andro fanavota aho ro nanampy anao.” Henanizao mihintsy ty fotoa fampisehoa fankasitraha! Henanizao ty andro fanavota!

3 Tsy manao raha hamingana olo mihintsy zahay, mba tsy hokinokinoan’olo ty fanompoanay. 4 Fe amy raha iaby le asehonay hoe mpanompo-Ndranahary zahay, satria niaritsy fitsapà maro, niaritsy fijalea noho tsy fanana noho raha sarotsy, 5 nivangoa imaro noho nigadrà, niritaritan’olo, niasa mafy, tsy ampy torimaso matetiky, le nisy fotoa tsy nihina. 6 Malio koa zahay, mahay ty fahamarina mikasiky a-Ndranahary, manam-pahareta, soa fanahy, maneky hotarihin’ny fanahy masy, mampiseho fitiava tsy misy fiatsarambelatsihy, 7 mivola ty marina, miantehitsy amy heri-Ndranahary, mitanjaky an’ny fitaovam-pialian’ny fahamarina rey amy tana ankavia* noho ankavana,* 8 amea voninahitsy noho afahy baraka, le haratiratỳ noho derà. Ataon’olo sahala mpamitaky zahay kanefa mivola ty marina, 9 sahala tsy misy mpahay kanefa hai-Ndranahary, sahala hoe ho maty* kanefa velo avao, sahala voasazy* kanefa tsy vonoa, 10 sahala malahelo kanefa falifaly avao, sahala mahantra kanefa mahapanarivo olo maro, le sahala tsy manan-draha mihintsy kanefa mana ty raha iaby.

11 Nareo Korintianina, miresaky mahity aminareo zahay,* sady sokafinay bevata ty fonay.* 12 Tsy asianay fitamperany ty fitiavanay anareo,* fa ty fitiavanareo anay asianareo fitamperany. 13 Ho valin’ny raha zay zany, le mba vohao bevata koa ty fonareo.* Sahala miresaky amy anako aho miresaky aminareo.

14 Ka maneky hiharo bao* amin’olo tsy mpino. Fa ino ty ifandrambesan’ny fahamarina noho ty fandikan-dalàna? Le ino ty iharoan’ny mazava noho ty maìky? 15 Ino ty ifanarahan’i Kristy noho Beliala?* Ino ty raha iharoan’ny* mpino* amin’olo tsy mpino? 16 Le ino ty ifandrambesan’ny tempoli-Ndranahary noho ty sampy? Tsy zay fa tempolin’ny Ndranahary velo iny tsika, araky ty nivolani-Ndranahary hoe: “Hipetraky amin-drozy eo aho sady ho amin-drozy eo, le ho Ndranaharin-drozy aho, le rozy ho vahoakiko.” 17 “‘Dikani-zay zany, miboaha baka amin-drozy ao nareo, le misaraha amin-drozy’, hoy Jehovah, ‘sady ka mikasikasiky ze raha maloto sasy’”, “‘le handramby anareo aho.’” 18 “‘Le ho babanareo aho, le nareo ho anakilahiko noho anakampelako’, hoy Jehovah, azy Farani-ze Mahery iny.”

7 Le satria nahazo an’ny fampitamana zay lahy tsika longoko, le tokony hanadio ty vatantsika ho afaky amy ze raha iaby mampaloto ty nofotsy noho ty say, ka hiezaky mafy mba ho masy tanteraky sady hatahotsy a-Ndranahary.

2 Asio pilasy ho ahinay ty am-ponareo ao. Tsy nanao raha raty olo zahay, na nahavy olo ho raty toetsy na nanararaotsy olo. 3 Tsy hoe mba hanasazỳ anareo ro ivolanako an’ny raha zay, satria fa nivola aho taloha teo hoe am-ponay ato avao nareo, ndre maty zahay ndre velo. 4 Tena mahity soa ty resaky ataoko aminareo. Le tena mirengirengy aho mana anareo. Nahazo fampionona bevata aho, sady falifaly biby ndre eo aza ty raha sarotsy iaby mahazo anay.

5 Tsy mba nilamindamy mihintsy zahay,* laha ty marina, lafa niavy ta Makedonia eto, fa mbo nampijalỳ tamy raha iaby avao: Nisy aly ivelany eny le nisy tahotsy tanatiny ao. 6 Fe nampionona anay Ndranahary, azy mampionona ani-ze olo kivy iny, lafa nitsidiky anay* Titosy. 7 Tsy hoe nahazo fampionona tamy fitsidihan’i Titosy iny avao zahay, fa tamy fampionona niazony baka aminareo koa. Nitantaraniny taminay hoe ta hahita ahy marè noho malahelo biby nareo, sady tena mila ze hahasoa ahy, ka vomaiky falifaly aho.

8 Tsy maneny aho ndre nampalahelo anareo aza ty taratasy nisoratiko. Ndre naneny aza aho tamy voalohany,—lafa nihitako fa nampalahelo anareo taratasy iny, ndre fotoa kelikely avao aza— 9 le falifaly aho henanizao, satria tsy hoe nahavy anareo halahelo avao raha iny, fa alahelo zay koa ro nahavy anareo hibebaky. Fa lasa nalahelo nifanaraky amy sitrapo-Ndranahary nareo, ka tsy nisy vokany raty taminareo ty raha nivolaninay. 10 Tsy zay fa ty alahelo mifanaraky amy sitrapo-Ndranahary ro mahavy ty olo hibebaky noho ho avotsy, sady tsy mampaneny raha zay. Fa ty alaheloni-zao tontolo zao mahavy fahafatesa. 11 Tena niezaky marè nareo lafa nanjary nalahelo mifanaraky amy sitrapo-Ndranahary, ka nasehonareo hoe malio* nareo, sady neloky tamy raha tsy mety iny, natahotsy, tena ta hiova, nafana fo, le nanity an’ny raha tsy nety iny. Nasehonareo tamy raha iaby fa malio tamy raha iny nareo. 12 Ndre nanoratsy ho anareo aza aho, le tsy ho ani-azy nanao raha raty iny na ho ani-azy nanaova raha raty iny ro nanoratako, fa mba hiseho mazava aminareo eo noho amaso-Ndranahary eo hoe mazoto mijanjy anay nareo. 13 Nampionona anay raha zay.

Fe ankoatsin’ny fampionona niazonay, le vomaiky nifalifaly biby zahay fa nifalifaly Titosy, satria namelombelo azy nareo iaby. 14 Tsy nisy nahamenatsy ahy laha nirengirengy mikasiky anareo taminy aho. Marina ty raha iaby nivolaninay taminareo, sady marina manahaky ani-zay koa ty raha nirengirengeanay tamy Titosy. 15 Vomaiky koa ie tena tea anareo, lafa mahatiaro hoe manoriky safà nareo iaby, sady nandramby soa azy noho tena nanaja azy.* 16 Le falifaly aho fa afaky matoky anareo amy raha iaby.*

8 Rahalahy, teanay hambara anareo ty mikasiky ty hasoam-panahy miavaky naseho-Ndranahary tamy fiangona a Makedonia atoy rey. 2 Niaritsy raha farani-ze sarotsy rozy lafa nijaly, fe vomaiky natariky biby satria falifaly avao ndre tena nahantra aza. 3 Tsy zay fa mifanaraky amy ze zakan-drozy ro nataon-drozy, sady mandilatsy ani-ze zakan-drozy mihintsy aza. Vavolombelo aho fa tena marina raha zay. 4 Rozy mihintsy ro nisoloho marè anay mba hengà* hanao fanomeza amim-pitiava rozy, ka handramby anjara amy fanompoa mba hanampea an’ny olo masy rey. 5 Le tsy ze raha nitamaninay amin-drozy avao ro nataon-drozy, fa rozy mihintsy ro nahafoy ty vatan-drozy ho an’ny Tompo noho ho ahinay, mifanaraky amy sitrapo-Ndranahary. 6 Le nampirisiky an’i Titosy zahay mba hamita ty famoria an’ny fanomeza nameanareo tamim-pitiava zay, satria ie ro fa nanomboky an’ny raha zay taminareo eo. 7 Fe manahaky ty anananareo maro amy raha iaby, ndre amy finoa zay, ndre amy safà, ndre amy fahaiza, ndre amy fahazotoa iaby asehonareo, ndre amy ty fitiavanay anareo, le enganè nareo hahavita be koa amy fanomeza ameanareo amim-pitiava zay!

8 Fe tsy hoe hikomakomandy anareo aho laha mivola an’ny raha zay, fa mba hahitanareo ty fahazotoan’olo hafa noho mba hahità laha tena baka am-po ty fitiavanareo. 9 Tsy zay fa hainareo ty hasoam-panahy miavaky nasehon’i Jesosy Kristy Tompontsika, ka ndre nipanarivo aza ie, le lasa nahantra mba hahasoa anareo, amy zay hahapanarivo anareo ty fahantrany.

10 Le toy ty hevitsiko mikasiky an’ny raha zay: Mahasoa anareo raha zay, satria fa tao raiky lasa zay nareo ro nanomboky namory an’ny fanomeza iny, sady tena naniry marè hanao an’ny raha zay. 11 Vitao zany ze raha fa natombokinareo, mba hanahaky ty nahaparè anareo hanao an’ny raha iny koa ty hahaparè anareo hamita azy soa , mifanaraky amy ze raha anananareo. 12 Fa laha parè hanome ty olo raiky, le ekè-Ndranahary raha zay laha mifanaraky amy ze raha ananan’olo iny, fa tsy hoe ze tsy ananany. 13 Tsy teako laha lasa milamindamy ty olo sisany, kanefa nareo lasa manday enta mavesatsy. 14 Fa teako laha mba misy fitovia aminareo eo, ka hameno ze raha tsy ampy amin-drozy eo ze mandilatsy aminareo any. Amy zay mba hameno ze tsy ampy aminareo eo koa ze mandilatsy amin-drozy any ka hisy fitovia, 15 satria voasoratsy hoe: “Ze nana maro le tsy nana maro marè, le ze nana kelikely le tsy nana kelikely marè.”

16 Ka le isaora Ndranahary fa nataony ze hahavy an’i Titosy hazoto hikarakara* anareo manahaky ty ataonay, 17 satria naneky hanao ze raha nangatahinay ie. Fe ie moa sandra fa mazoto hanampy avao, ka an-tsitrapo ty andehanany aminareo any. 18 Fe irahinay miaraky aminy koa rahalahy hain’olo amy fiangona iaby eo iny. Maro ty olo mahay azy vokatsin’ny raha ataony ho an’ny vaovao soa. 19 Le tsy zay avao fa fa nitendren’ny fiangona rey koa rahalahy io mba hiaraky aminay hizara an’ny fanomeza nameanareo tamim-pitiava iny, mba ho voninahitsin’ny Tompo sady ho porofo hoe parè hanampy zahay. 20 Amy zay tsy hisy olo hanome tsiny anay amy fomba hizaranay an’ny fanomeza maro io. 21 Satria ‘manao ty marina amy raha iaby zahay, tsy amason’i Jehovah eo avao, fa amason’olo eo koa.’

22 Irahinay miaraky amin-drozy koa rahalahinay raiky iny. Fa nitsapa toetsy azy matetiky zahay ka hita hoe mazoto amy raha maro ie, sady vomaiky mazoto ie henanizao satria tena matoky anareo. 23 Fe laha misy raha mampisalasala mikasiky an’i Titosy, le tiarovo fa namako ie sady mpiaraky miasa amiko mba hahasoa anareo. Le laha misy raha mampisalasala mikasiky an’ny rahalahinay rey, le tiarovo fa apostolin’ny fiangona rozy sady manday voninahitsy ho an’i Kristy. 24 Ka le porofò amin-drozy hoe tea an-drozy nareo, sady atorò amy fiangona rey hoe manino nareo ro rengirenginay.

9 Tsy tena ilà ty anoratako aminareo mikasiky an’ny fanompoa ho an’olo masy iny, 2 satria haiko fa parè hanampy nareo. Le mirengirengy amy Makedonianina rey aho hoe fa liany tamy taon-dasa Akaia ro niparè. Le nandrisiky ty ankamaroan-drozy ty hafanam-ponareo. 3 Fe irahiko avao rahalahy rey, mba tsy hisera ty nirengirengeanay mikasiky anareo, sady mba ho parè vatany nareo, mifanaraky amy raha nivolaniko iny. 4 Tsy zay fa tsy no hisy Makedonianina hiaraky amiko ka hahita hoe hondy kay nareo tsy niparè, le ho menatsy zahay—mba tsy hivolana hoe nareo—satria zahay natoky anareo. 5 Le nieritseritsy aho hoe nilà ty nampirisiky an’ny rahalahy rey handeha aminareo any sandrany, ka hanoma an’ny fanomeza maro nampitamaninareo iny. Amy zay ho parè fanomeza iny ka ho hita hoe natariky nareo nanome an’ny raha iny, fa tsy niforoseva.

6 Fe tiarovo toy: Ze matity ka mamafy kelikely le hahazo vokatsy kelikely, fa ze matariky ka mamafy maro le hahazo vokatsy maro. 7 Tokony samby hanao arakaraky ze fanapaha-kevitsiny tam-pony ao ty olo kiraidraiky, ka tsy halahelo* na hoforoseva lafa manao an’ny raha zay, satria ty mpanome amim-pifalea ro tea-Ndranahary.

8 Hai-Ndranahary koa ty mampiseho hasoam-panahy miavaky maro aminareo, mba ho ampy avao ty raha anananareo amy raha iaby. Amy zay hanananareo maro ze raha ilà mba hanaova ty asa soa iaby, 9 —satria voasoratsy hoe: “Mizara fanomeza maro* ie; manome ho ahi-ty mahantra ie. Maharitsy mandrakizay ty fahamarinany.” 10 Le Azy manome voa maro ho an’ny mpamboly noho manome mofo maro mba hohany iny, ro hanome noho hampitombo ty voa hafafinareo sady hampitombo ty vokatsin’ny fahamarinanareo.— 11 Atao manan-kanana amy raha iaby nareo, mba hatariky amy fomba sankarazany, ka hisaotsy a-Ndranahary ty olo amy fanomezanareo handesinay ho ahin-drozy rey. 12 Tsy zay fa tsy natao hanomeza ze raha ilàn’olo masy rey avao fanompoa ho ahi-ty maro toy, fa natao koa mba ho maro ty olo hisaotsy a-Ndranahary. 13 Fanompoa zay ro manaporofo hoe olo manao akory nareo. Le hanome voninahitsy a-Ndranahary rozy, satria maneky ty vaovao soa mikasiky an’i Kristy nareo, manahaky ty ambaranareo an-kavoria, sady matariky amin-drozy noho amin’olo iaby. 14 Hisoloho ho anareo rozy, le hasehon-drozy hoe tea anareo rozy satria nampisehoa-Ndranahary hasoam-panahy farani-ze miavaky.

15 Isaora Ndranahary tamy fanomeza maimaim-poana baka aminy, satria soa marè fanomezany zay ka tsy hay ty hivolana azy!

10 Zaho Paoly, le misoloho aminareo amy alalan’ny fandefera* noho hasoam-panahin’i Kristy, ndre misy mivola aza hoe malemy aho lafa mifanatriky aminareo, fa mahasaky mivola anareo lafa tsy eo. 2 Mitamà aho fa lafa avy aminareo any, le tsy voatery hahasaky handramby fanapaha-kevitsy henja amin’olo mieritseritsy anay hoe manaraky hevitsin’olombelo rey. 3 Fa ndre manahaky ty olo iaby avao aza zahay, le tsy mialy manahaky ty fataon’olo.* 4 Tsy zay fa tsy arakin’ny nofotsy* ty fitaovam-pialianay, fa fitaovam-pialia mahery ty namea-Ndranahary anay mba handravà raha fa mafy fototsy.* 5 Aravanay ty hevitsy noho ty raha abo iaby misaka ty olo tsy hahay a-Ndranahary, le horesenay ty hevitsy iaby mba hanoriky ty safàn’i Kristy. 6 Parè koa zahay hanasazy ani-ze tsy manoriky safà, laha vo hita hoe manoriky safà tanteraky nareo.

7 Mitsara ivelany avao nareo. Laha misy olo matoky ty vatany hoe ahin’i Kristy, le tokony hovetsevetseny ndraiky hoe: Ahin’i Kristy manahaky azy koa zahay. 8 Fa ndre hirengirengy marè aza aho, satria namean’ny Tompo fahefà mba hampahery* anareo fa tsy hanakivy* anareo, le tsy tokony hisy raha hahamenatsy ahy. 9 Tsy zay fa tsy teako laha sahala hoe mampitahotsy anareo aho amy taratasiko ao. 10 Satria misy mivola hoe: “Mavesatsy noho mahery ty taratasy soratiny, kanefa olo tsy mahavoa raha ie lafa manatriky eo sady tsy misy dikany ty raha volaniny.” 11 Tokony ho hain’olo zay fa ze raha volaninay amy taratasinay ao lafa zahay tsy eo rey, ro ataonay koa lafa eo zahay. 12 Tsy zay fa tsy sakinay ty mampitovy na mampitaha ty vatanay amy ty olo mandrengy vata. Tsy mandiniky olo rey satria ze raha eritseretin-drozy fa mety avao ro itsaran-drozy ty vatan-drozy, sady mampitaha ty vatan-drozy amin-drozy samby rozy avao rozy.

13 Fe tsy hirengirengy ivelan’ny faritsy nanendrea anay any zahay, fa anatin’ny faritsin’ny faritany namea-Ndranahary anay* ao avao, le nataony niavy zisiky aminareo atoy faritany zay. 14 Laha ty marina, tsy mila mandeha ivelan’ny faritany nanendrea anay any zahay, satria laha zay ie, le sahala hoe tsy anisan’ny faritaninay nareo, kanefa zahay ro voalohany niavy zisiky aminareo any mba hitory ty vaovao soa mikasiky an’i Kristy. 15 Tsy mirengirengy ivelan’ny faritsy nanendrea anay any zahay, zany hoe tsy mirengirengy amy asa mafy nataon’olo hafa. Fa mitamà zahay hoe lafa mitombo ty finoanareo, le hitombo ty asa ataonay amy faritaninay ao. Amy zay afaky hiasa marerè zahay, 16 ka hitory ty vaovao soa amy tany hafa ankoatsy anareo, mba tsy hampirengirengy anay ty raha fa nataon’olo hafa amy faritaniny any. 17 “Fa ze mirengirengy, le Jehovah ro tokony hampirengirengy azy.” 18 Satria tsy ze mandrengy ty vatany ro mahazo hatò, fa ze rengen’i Jehovah.

11 Iriko laha mba mandefitsy amiko nareo amy hadalà kelikely ataoko. Fa mandefitsy amiko avao moa nareo laha ty marina! 2 Tsy zay fa mamarahy anareo aho, manahaky Ndranahary mamarahy anareo io,* satria zaho mihintsy ro nanome anareo ho valin’ny lahilahy raiky. Teako hamea ho virjiny malio ho an’i Kristy nareo. 3 Fe matahotsy aho tsy no ho voafitaky manahaky an’i Eva nareo, azy niazon’ny bibilava tamim-pitaky iny, ka ho simba ty sainareo le tsy hana an’ny fahamarina noho fahadiova maeva an’i Kristy iny sasy nareo. 4 Fa laha misy olo mitory Jesosy hafa ankoatsini-azy fa nitorinay iny, na misy mampirisiky anareo hana toe-tsay hafa ankoatsini-ze fa nanananareo, na misy mitory vaovao soa hafa ankoatsini-ze fa nekenareo, le tsy mampanino anareo ty mandefitsy amy olo zay. 5 Fa amiko le tsy misy mihintsy raha ahità hoe ambany aho laha ampitovizy amy apostolinareo soa marè rey. 6 Fe ndre tsy mahay mandaha-teny aza aho, le tena ananako ty fahaiza. Fa natoronay anareo soa raha zay tamy lafiny iaby noho tamy raha iaby.

7 Falifaly aho nitory maimaim-poana ty vaovao soa-Ndranahary taminareo. Le nanota va aho laha niambany manahaky ani-zay mba hisondrotanareo? 8 Sahala hoe nandrava ty raha ananan’ny fiangona hafa aho, lafa nandramby fanampea* mba hanompoako anareo. 9 Fe lafa taminareo eo aho, ndre tsy nanan-draha aza, le tsy lasa enta mavesatsy ho an’olo mihintsy, satria nanome ze raha nilàko rahalahy baka a Makedonia eto rey, sady maro ty namean-drozy. Niezaky marè aho mba tsy ho enta mavesatsy ho anareo tamy raha iabiaby sady mbo hiezaky hanao ani-zay avao aho. 10 Laha mbo amiko ato ty fahamarinan’i Kristy, le mbo hirengirengy mikasiky an’ny raha zay avao aho amy faritsin’i Akaia rey any. 11 Fa ino ty antony? Satria tsy teako va nareo? Hai-Ndranahary fa tea anareo aho.

12 Fe ty raha ataoko henanizao le mbo hataoko avao, amy zay tsy hahafivola ze olo mila antony hanaporofoa hoe mitovy aminay rozy ka le mirengirengy amy ty raha vitan-drozy.* 13 Tsy zay fa apostoly sandoky olo rey, mpiasa mamitaky, le manao kisary apostolin’i Kristy. 14 Le tsy mahatseriky raha zay, satria ndre Satana aza manao kisary anjelin’ny mazava avao. 15 Ka tsy mahatseriky zany laha manao kisary mpanompon’ny fahamarina avao koa ty mpanompony. Fe arakaraky ze raha ataon-drozy ro hiafaran-drozy.

16 Ampoliko ndraiky hoe: Tsy tokony hisy olo hieritseritsy ahy ho gegy. Fe ndre mieritseritsy ahy ho gegy aza nareo le rambeso avao aho ndre gegy, amy zay mba ho afaky hirengirengy kelikely koa aho. 17 Tsy manaraky ty modelin’ny Tompo aho laha mivola an’ny raha volaniko zao, fa mivola manahaky olo gegy matoky marè ty vatany sady mirengirengy rey. 18 Le satria maro ty olo mirengirengy amy raha amy tontolo toy, le mba hirengirengy koa aho. 19 Falifaly nareo mandefitsy amy olo gegy, satria nareo tena “mandiniky.” 20 Mandefitsy vatany nareo amy ze olo manandevo anareo, na mandany ty hanananareo, na mandrava ty raha iaby anananareo, na manao ty vatany ho anabo mandilatsy anareo, na mamango ty tarehinareo.

21 Manafa-baraka anay raha volaniko zay, satria sahala hoe malemy zahay.

Fe ze raha sakin’olo atao—mivola manahaky olo gegy io aho—le mba sakiko koa. 22 Hebreo va rozy? Zaho koa raiky. Israelita va rozy? Zaho koa raiky. Taranakin’i Abrahama va rozy? Zaho koa ho zay. 23 Mpanompon’i Kristy va rozy? Mamaly manahaky olo gegy io aho. Mpanompon’i Kristy aho sady miavaky mandilatsy an-drozy aza. Maro ty asa nataoko, natao amy prizon matetiky aho, fa tsy hay isahy ty vango nahazo ahy, le imaro aho ro fa ho nimaty. 24 Indimy aho ro nivangoan’ny Jiosy in-40 latsaky raiky saky vangoa, 25 intelo aho ro nivangoa tamy hazo, indraiky nitoraha vato, intelo vaky sambo, le andro raiky noho haly raiky aho ro nitavela tan-driaky eny. 26 Nandeha lavitsy matetiky aho, fa ho niazon-draha tamy vavarano, fa ho niazon-draha tamy malaso, fa ho niazon-draha tamy olo firenena raiky amiko, fa ho niazon-draha tamy olo firenena hafa, fa ho niazon-draha tan-tanà ao, fa ho niazon-draha tamy dezera* any, fa ho niazon-draha tan-driaky eny, le fa ho niazon-draha tamy rahalahy sandoky rey eo. 27 Niasa mafy noho niezaky marè aho, tsy niazon-droro matetiky, nimosarè noho nimaran-drano, tsy nihina matetiky, nanintsy sady tsy nana siky.*

28 Ankoatsin’ny raha ivelany reo, le misy raha manavesatsy ahy koa sanandro: Miasa loha mikasiky ty fiangona iabiaby aho. 29 Ia ty malemy ka tsy malemy aho? Ia ty voafinga ka tsy meloky aho?

30 Laha tsy maintsy hirengirengy aho, le amy ze raha ahità ahy hoe malemy ro hirengirengeako. 31 Tsy mavandy aho, le mahay an’ny raha zay Ndranahary Baban’i Jesosy Tompo, Azy tokony hoderà mandrakizay iny. 32 Ta Damaskosy any, le nanome baiko hiambena an’ny tanà iny ty governera nitendren’i Areta Mpanjaka mba hanambora ahy. 33 Fe najotso tamy sobiky baka amy lafonety tamy lakoron’ny tanà iny eny aho, le niafaky nilay.

12 Tsy maintsy mirengirengy aho. Hiresaky an’ny fahità mahatseriky baka amy Tompo noho raha naseho tamiko rey ndraiky aho henanizao, ndre tsy misy tombony azo baka amy raha zay aza. 2 Mahay olo raiky miharo raiky amy Kristy aho. Nandesy amy lanitsy fahatelo any olo io, 14 tao lasa zay.—Tsy haiko ndre tamy vatan’olombelo ao ndre tsy tamy vatan’olombelo ao, fa Ndranahary ro mahay azy.— 3 Haiko olo nandesy tamy paradisa any zay.—Tsy haiko ndre tamy vatan’olombelo ao ndre tsy tamy vatan’olombelo ao, fa Ndranahary ro mahay azy.— 4 Nandesy tamy paradisa any ie, ka naharè resaky tsy tokony hovolany amin’olo sady tsy azon’olo volany. 5 Hirengirengy mikasiky an’ny olo zay aho, fa tsy hirengirengy mikasiky ty vatako, laha tsy hoe ty handrako avao vasa ro hirengirengeako. 6 Fa ndre ta hirengirengy aza aho, le tsy ho gegy fa hivola ty marina. Fe tsy hanao ani-zay aho, mba tsy hisy hieritseritsy hoe nahavita mandilatsy ani-ze fa nihitany nataoko aho, na nahavita mandilatsy ani-ze nireny nivolaniko, 7 satria hoe miavaky biby ty raha naseho tamiko.

Mba tsy hahavy ahy hanondrotsy marè ty vatako, le nasia fatiky amy nofotsy ao aho, zany hoe anjelin’i Satana, mba hamango* ahy avao, tsy no hanondrotsy marè ty vatako aho. 8 Intelo aho ro nisoloho tamy Tompo mba hangalany an’ny raha zay amiko. 9 Fe nivola tamiko ie hoe: “Ampy anao ty hasoam-panahy miavaky asehoko aminao, satria lavorary ty asan’ny heriko aminao eo lafa malemy iha.” Vomaiky zany aho falifaly sady hirengirengy amy ty handrako, mba handimboky ahy avao manahaky tranolay io ty herin’i Kristy. 10 Le mahafalifaly ahy ty hoe malemy, misy manambanimbany, tsy manan-draha, misy manenjiky noho miatriky raha sarotsy satria manori-dia an’i Kristy. Tsy zay fa lafa malemy aho, le amy zay aho ro mahery.

11 Niforosevanareo aho, le nanjary tsy nandiniky soa, satria tokony ho nivola raha soa mikasiky ahy nareo. Tsy zay fa tsy misy mihintsy raha ahità hoe ambany aho laha ampitovizy amy apostolinareo soa marè rey, ndre tsy misy dikany aza aho. 12 Tena fa naseho anareo ty porofo hoe apostoly aho: Tena niaritsy aho, sady nanao famantara noho fahagagà* noho raha miavaky. 13 Mieritseritsy va nareo hoe matiantoky laha ampitovizy amy fiangona hafa, satria tsy lasa enta mavesatsy ho anareo aho? Mba engaonareo aho amy hadisoa zay.

14 Fanintelony aho henanizao ro parè ho aminareo any, sady tsy ho lasa enta mavesatsy aho, satria tsy ty hanananareo ro ilàko, fa nareo. Fa tsy ty anaky ro tokony hamory raha ho ahi-ty ray aman-dreniny, fa ty ray aman-dreny ro tokony hamory raha ho ahi-ty anany. 15 Laha ty amiko, le tena ho falifaly aho hanome ze raha iaby ananako, noho hanao soro tanteraky ty fiainako ho anareo. Laha tena tea anareo manahaky ani-zay aho, le tokony ho kelikely mandilatsy ani-zay va ty fitiavanareo ahy? 16 Fe ndre zay, le tsy nampanday enta mavesatsy anareo aho. Fe mivola nareo hoe “mahihitsihitsy” aho sady “tamim-pitaky” ro nahazoako anareo. 17 Zaho va le nanararaotsy anareo tamy zaho naniraky olo taminareo any? 18 Nampirisiky an’i Titosy ho aminareo any aho, le nirahiko hiaraky taminy rahalahy iny. Nanararaotsy anareo va Titosy? Tsy nanao ani-zay mihintsy ie. Tsy hitanareo va fa nitovy hevitsy zahay? Tsy nitovy koa va ty fomba fiasanay?

19 Nieritseritsy va nareo bakany zay hoe miaro ty vatanay aminareo eo zahay? Mivola ty marina anatreha-Ndranahary eo zahay, satria mpanori-dia an’i Kristy. Fe zao ie rahalahy noho anabavy teanay, natao mba hampahereza anareo ty raha iaby ataonay. 20 Tsy zay fa matahotsy aho lafa avy aminareo any tsy no tsy hifanaraky amy ze raha iriko ty raha ataonareo, le tsy hifanaraky amy ze raha irinareo ty raha ataoko. Matahotsy aho tsy no misy aly aminareo eo, na fialona, heloky tsy tanjaky, fifamalea, fandratiratia, tsikotsiko,* firengirengea, na koronta. 21 Vasa lafa avy ndraiky aho, le hengan’ny Ndranahariko iny ho afa-baraka aminareo eo. Le tsy maintsy halahelo aho, vokatsin’ny raha nataon’olo maro nanota taloha teo rey, kanefa tsy nibebaky tamy ty raha fataon-drozy olo rey, zany hoe tamy ty fahalotoan-drozy, noho ty fijangajangan-drozy,* noho ty fandaisam-batan-drozy mahamenatsy.*

13 Fanintelony aho henanizao ro ho aminareo any. “Safàn’ny* vavolombelo roe na telo ro ilà vo azo antoky ty raha iaby.” 2 Ndre tsy aminareo any aza aho henanizao, le anovo sahala hoe avy any fanindroeny. Le fa sandra mampitandrina ani-azy nanota taloha teo rey noho ty olo hafa iaby aho, satria tsy hitsiriry an-drozy aho lafa avy any ndraiky. 3 Tsy zay fa mila porofo nareo hoe mivola amy alalako vatany va Kristy. Tsy malemy ie lafa manao raha aminareo eo, fa mampiseho ty heriny aminareo eo. 4 Nivonoa tamy tsato-kazo eo vatany Kristy tamy ie nalemy, kanefa velo ie henanizao vokatsin’ny heri-Ndranahary. Marina koa hoe malemy manahaky azy zahay, kanefa ho velo hiaraky aminy zahay vokatsin’ny heri-Ndranahary miasa aminareo.

5 Miezaha handiniky ty vatanareo avao, mba hahità laha amy finoa ao nareo na tsy ao, le diniho soa* avao hoe manao akory ty vatanareo. Sa tsy ekenareo fa miharo raiky aminareo Jesosy Kristy? Tokony hekenareo raha zay, laha tsy hoe tsy mahazo hatò vasa nareo. 6 Tena mitamà aho fa hekenareo hoe olo mahazo hatò zahay.

7 Mivavaky amy Ndranahary zahay mba tsy hanao raha raty nareo. Tsy hoe ta hahazo hatò amin’olo zahay amy raha zay, fa teanay hanao raha soa nareo, ndre sahala hoe tsy mahazo hatò aza zahay. 8 Tsy zay fa tsy mahavita raha hanohera ty fahamarina mihintsy zahay, fa ty raha hampandrosoa ty fahamarina avao ro vitanay. 9 Laha malemy zahay, fa nareo mahery, le tena mahafalifaly anay raha zay. Mivavaky koa zahay mba hahitinareo ze raha tokony hahity. 10 Zay ty antony anoratako an’ny raha reo aminareo, tany mbo tsy aminareo any aho. Amy zay lafa eo aho, le tsy voatery hasiaky lafa mampiasa ty fahefà namean’ny Tompo ahy, ka hampahery* fa tsy hanasazy.*

11 Farany rahalahy, miezaha ho falifaly avao, hanity ze raha tokony hahity, handramby fampionona, hitovy hevitsy, le hilongo soa. Loniky lahy hitahy anareo Ndranaharin’ny fitiava noho fiadana* iny! 12 Mifampiarahabà amy oroky masy. 13 Mampamangy anareo zao hoe ty olo masy iabiaby.

14 Enganè hampisehoan’i Jesosy Kristy Tompo hasoam-panahy miavaky nareo, sady hampisehoa-Ndranahary ty fitiavany, le enganè nareo samby hahazo fitahia amy fanahy masy!