HO AHI-TY GALATIANINA

1 Baka amy Paoly, apostoly tsy nitendren’olo, na nitendrè tamy alalan’olo, fa nitendren’i Jesosy Kristy noho Ndranahary Babantsika, azy namelo azy ndraiky iny, 2 noho baka amy rahalahy iabiaby miaraky amiko rey. Ho ahi-ty fiangona a Galatia any,

3 Enganè Ndranahary Babantsika iny noho Jesosy Kristy Tompo mba hampiseho hasoam-panahy miavaky* aminareo sady hanome fiadana anareo! 4 Nahafoy ty ainy hanafaha ty fahotantsika ie mba hanavotany antsika amy tontolo raty henanizao toy,* satria zay ty sitraponi-azy Ndranahary Babantsika iny. 5 Loniky lahy ho ahi-Ndranahary ty voninahitsy mandrakizay mandrakizay! Amena.

6 Mahatseriky ahy fa nalaky niala* tamy azy nikaiky anareo tamy alalan’ny hasoam-panahy miavaky nasehon’i Kristy iny nareo, ka lasa manaraky vaovao soa hafa. 7 Fe tsy hoe misy vaovao soa hafa, fa misy olo manakoronta anareo sady ta hamadiky an’ny vaovao soa mikasiky an’i Kristy iny. 8 Fe ndre zahay ndre anjely baka an-danitsy any ro mitory vaovao soa aminareo, ankoatsy an’ny vaovao soa fa nitorinay taminareo iny, le enganè ho voaozo! 9 Araky ty fa nivolaninay teo, le mbo ampoliko ndraiky hoe: Ze mitory vaovao soa aminareo ankoatsini-azy fa nekenareo iny, le enganè ho voaozo!

10 Zaho io va mila hatò amin’olo fa tsy amy Ndranahary? Sa zaho ta hampifalifaly olo? Satria laha mbo ty hampifalifaly olo ro ilàko, le tsy mpanompon’i Kristy aho. 11 Tsy zay fa teako ho hainareo rahalahy, fa tsy baka amin’olombelo vaovao soa nitoriko taminareo iny, 12 satria tsy niazoko tamin’olo raha iny sady tsy nampianary ahy, fa nambaran’i Jesosy Kristy ahy.

13 Mazava ho azy fa fa nirenareo ty raha nataoko tamy zaho mbo nanaraky ty Fivavahan’ny Jiosy.* Nanenjiky marè* ty fiangona-Ndranahary aho sady nanao ze haharava azy. 14 Tena nilitsy laliky tamy fanaraha ty Fivavahan’ny Jiosy aho, mandilatsy ty ankamaroan’olo nitovy tao amiko tamy firenenako teo. Tsy zay fa tena nafana fo nanoriky ty fampianara nilovàko baka amy razambeko aho. 15 Fe Ndranahary nahavy ahy hateraky* iny ro nikaiky ahy vokatsin’ny hasoam-panahiny miavaky. Ka lafa nihitany fa mety 16 ty hampiasà ahy hanambara ty mikasiky an’ny Anany iny, zany hoe hitory ty vaovao soa mikasiky azy amin’olo firenena hafa any, le tsy avy le nanontany olo* aho. 17 Tsy niakatsy ta Jerosalema tamy apostoly talohako rey any koa aho, fa nandeha a Arabia any, le bakeo nimpoly ta Damaskosy any.

18 Telo tao tafara atoy aho vo niakatsy ta Jerosalema any mba hitsidiky an’i Kefasy,* le nijano 15 andro taminy any. 19 Fe tsy nahita apostoly hafa mihintsy aho, laha tsy Jakoba rahalahin’ny Tompo avao. 20 Manome toky anareo anatreha-Ndranahary eto zany aho, fa tsy vandy raha soratiko aminareo toy.

21 Nandeha tamy faritsin’ny Syria noho Kilikia any aho tafarani-zay. 22 Fe mbo tsy nahita ahy mivanta fiangona ta Jodia any rey, azy miharo raiky amy Kristy rey. 23 Ho zao avao ty raha ren-drozy matetiky: “Henanizao azy mpanenjiky antsika taloha iny, le fa mitory ty vaovao soa mikasiky an’ny finoa niteany horavà taloha iny!” 24 Le nanome voninahitsy a-Ndranahary rozy lafa nihain-drozy ty raha niainako.

2 Lafa ni-14 tao tafara atoy, le niaraky niakatsy tamy Barnabasy ta Jerosalema any ndraiky aho, le nandesiko koa Titosy. 2 Niakatsy tany aho satria nisy raha nambara tamiko. Le nihazavaniko soa tamin-drozy ty vaovao soa toriko amin’olo firenena hafa. Fe tamy rahalahy nihajà marè rey avao ty nanaovako ani-zay, mba ho azo antoky hoe tsy misera ty korsa nataoko tamy fotoa zay, na azy fa nataoko taloha iny. 3 Ka ndre Grika aza Titosy, azy niaraky amiko iny, le tsy niforoseva hosavary. 4 Fe nampisy problemo raha zay, satria nisy rahalahy sandoky nampiliry tamintsika eo fe tsy nihain’olo. Nilitsy eo rozy mba hanentinenty ty amintsika eo,* satria tean-drozy hosakantsakana ty fahafaha ananantsika amy maha mpianatsin’i Kristy Jesosy antsika. Tsy zay fa tean-drozy handevozy tanteraky tsika. 5 Tsy nandefitsy tamin-drozy na naneky an-drozy zahay, ndre tanatin’ny fotoa kelikely* aza, mba ho aminareo eo avao ty fahamarina, zany hoe ty vaovao soa.

6 Fa laha ty mikasiky an’ny rahalahy eritseretin’olo ho ambony rey,—tsy ahoako ndre nanao akory rozy taloha, satria tsy mitingy volon’olo* Ndranahary—le tsy nampianatsy ahy raha vaovao rozy. 7 Fa lafa nihitan-drozy hoe fa nankiny tamiko ty fitoria ty vaovao soa tamin’olo tsy nisavary, manahaky hoe nankiny tamy Petera ty fitoria tamin’olo nisavary, 8 —tsy zay fa azy nanome fahefà an’i Petera ho lasa apostolin’olo nisavary iny ro nanome fahefà ahy ho lasa apostolin’olo firenena hafa koa— 9 sady lafa nihain-drozy hoe nampisehoa hasoam-panahy miavaky aho, le nanome ty tanan-drozy ankavana taminay amy Barnabasy, Jakoba noho Kefasy* noho Jaona. Sahala hoe tohan’ny fiangona rozy. Nanao ani-zay rozy mba hahaiza fa mpiaraky miasa zahay iaby. Amy zay handeha amin’olo firenena hafa any zahay, fa rozy ho amin’olo nisavary any. 10 Nivolanin-drozy avao zahay hoe tiarovo avao ty mahantra. Le zay mihintsy ty tena iezahako atao henanizao.

11 Fe lafa niavy ta Antiokia any Kefasy,* le nivolaniko mivanta ie* satria tena hita hoe tsy mety ty raha nataony.* 12 Tsy zay fa niaraky nihina tamin’olo firenena hafa rey ie tamy olo nirahin’i Jakoba rey mbo tsy niavy. Fe lafa niavy olo rey, le tsy nanao ani-zay sasy ie fa niala tamin-drozy eo satria natahotsy an’ny olo nisavary rey. 13 Lasa nisoavolamanatriky niaraky taminy koa ty Jiosy hafa iaby, ka ndre Barnabasy aza nivoataon-drozy ho soavolamanatriky koa. 14 Fe lafa nihitako hoe tsy nanao raha mifanaraky amy fahamarinan’ny vaovao soa rozy, le nivolaniko tanatrehan’olo iaby eo Kefasy* hoe: “Laha iha Jiosy aza manao manahaky ty olo firenena hafa, fa tsy manahaky ty Jiosy, le manino ro forosevanao hanaraky ty raha fataon’ny Jiosy ty olo firenena hafa?

15 Jiosy tena Jiosy tsika, fa tsy mpanota baka amin’olo firenena hafa, 16 sady haintsika fa ze olo mino an’i Jesosy Kristy avao ro ambara ho marina, fa tsy ze manoriky lalàna.* Le nino an’i Kristy Jesosy tsika, mba hambara ho marina satria mino an’i Kristy fa tsy hoe manoriky lalàna. Fa tsy misy olo* hambara ho marina laha resaky fanoriha lalàna avao. 17 Fa laha hita hoe mpanota koa tsika, kanefa tsika fa miezaky mba ho azo ambara ho olo marina amy alalan’i Kristy, le midika va zay hoe mpanompon’ny ota Kristy? Tsy zay mihintsy! 18 Fa laha ty raha fa naropako ro atsangako ndraiky, le asehoko amy raha zay fa mpandika lalàna aho. 19 Tsy zay fa nanoriky lalàna aho, ka fa maty laha ty lalàna ro resahy,* amy zay aho mba ho velo ho ahi-Ndranahary. 20 Nifantsihy amy tsato-kazo eo miaraky amy Kristy aho. Tsy zaho sasy ro velo fa Kristy ro velo noho miharo raiky amiko. Fa amy zaho mbo nofotsy noho lio henanizao toy, le miay mifanaraky amy finoako an’ny Anaki-Ndranahary iny aho, tsy ia zay fa azy tea ahy ka nanome ty vatany ho ahy iny. 21 Tsy mandà* ty hasoam-panahy miavaky aseho-Ndranahary aho, satria laha ty lalàna ro anambarà olo hoe marina, le misera avao ty nahafatesan’i Kristy.

3 Tsy mandiniky nareo Galatianina! Ia ty namitaky anareo, kanefa mba fa nihazavany soa taminareo avao hoe nifantsihy tamy tsato-kazo eo Jesosy Kristy? 2 Zao avao ty teako hanontanea anareo:* Nareo nanoriky lalàna va ro nahazoanareo ty fanahy masy, sa nareo nino ze raha renareo? 3 Le tena tsy mandiniky vatany va nareo? Mba fa naneky hotarihin’ny* fanahy avao va nareo tamy voalohany, kanefa lasa manaraky hevitsin’olombelo* ty iafaranareo? 4 Le hisera avao va ty niaretanareo fijalea maro manahaky ani-rey? Matoky aho fa tsy hisera avao raha rey! 5 Ka zao zany: Azy manome fanahy masy anareo sady manao fahagagà aminareo eo iny va manao an’ny raha zay satria nareo manoriky lalàna, sa satria nareo mino ze raha renareo? 6 Diniho koa Abrahama: “Nampiseho finoa an’i Jehovah ie ka nekè* ho olo marina.”

7 Fa hainareo vatany fa ze manam-pinoa* ro anan’i Abrahama. 8 Fa nihitan’ny Soratsy Masy mialoha fa hambara-Ndranahary hoe marina ty olo firenena hafa satria mino. Le nivolanin’ny Soratsy Masy mialoha tamy Abrahama vaovao soa iny hoe: “Hahazo fitahia amy alalanao ty firenena iaby.” 9 Ty olo manam-pinoa* zany le mahazo fitahia manahaky an’i Abrahama, azy nino iny.

10 Voaozo ze olo iaby miantehitsy amy lalàna avao, satria volanin’ny Soratsy Masy hoe: “Voaozo ze lasa tsy manoriky ani-ze raha voasoratsy amy horonam-boky misy Lalàna ao.” 11 Hita mazava koa fa tsy misy olo ambara ho marina anatreha-Ndranahary eo satria hoe manoriky lalàna, fa “ty olo marina ho velo satria manam-pinoa.” 12 Le tsy mitaky finoa ty Lalàna. Fa “ze olo manoriky an’ny raha rey ro ho velo amy alalan’ny raha rey.” 13 Nivily antsika Kristy, ka nanafaky antsika tamy ozon’ny Lalàna lafa naneky ho voaozo hisolo antsika, satria voasoratsy hoe: “Voaozo ze olo mihanto amy tsato-kazo eo.” 14 Amy zay ty fitahia azon’i Abrahama le ho azon’olo firenena hafa koa, amy alalan’i Kristy Jesosy, mba hahazoantsika an’ny fanahy nampitamany iny, satria tsika mino.

15 Rahalahy, fanohara fa mahazatsy olo ro ampiasako: Laha vo manan-kery ty fifanekea, ndre olo raiky avao aza ro nampanan-kery azy, le tsy misy mandrava na manampy an’ny raha zay. 16 Abrahama noho ty taranakiny ro nivolana an’ny fampitamana iny. Fe tsy nivolany hoe “le ho an’ny taranakinao rey”, zany hoe ho an’olo maro, fa nivolany hoe “le ho an’ny taranakinao”, zany hoe ho an’olo raiky, tsy ia zay fa Kristy. 17 Zao koa ty volaniko: Tsy hoe nandrava an’ny fifanekea natao-Ndranahary taloha iny, Lalàna nameany 430 tao tafara atoy iny, ka hoe rava koa fampitamana iny. 18 Laha ty fanoriha lalàna ro ahazoa lova, le tsy baka amy fampitamana sasy ro ahazoa an’ny raha iny. Fe soa fanahy Ndranahary ka nameany an’i Abrahama tamy alalan’ny fampitamana lova iny.

19 Ka ino zany ty nilà Lalàna? Natao fanampiny raha io mba ho hita soa ty fandikan-dalàna, zisiky iavian’ny taranaky nanaova an’ny fampitamana iny. Le nampità tamy alalan’ny anjely ty Lalàna, ka namea tan-tanan’ny mpanelanela raiky. 20 Tsy ilà ty mpanelanela laha olo raiky avao ro voakasiky. Fe Ndranahary raiky avao ro nanao an’ny fampitamana iny. 21 Mifanohitsy amy fampitamana-Ndranahary va zany ty Lalàna? Tsy zay mihintsy! Fa laha nisy lalàna nahavita nanome fiaina, le fa nanjary olo marina ty olo vokatsin’ny lalàna. 22 Fe nasehon’ny Soratsy Masy hoe fehezin’ny ota ty raha iaby. Amy zay fampitamana baka amy finoa an’i Jesosy Kristy iny le hamea ani-ze mampiseho finoa.

23 Fe talohan’ny niavian’ny finoa, le niteza* antsika ty Lalàna ka nana fahefà tamintsika. Le nandiny an’ny finoa fa haseho mazava iny tsika. 24 Lasa mpiteza* antsika zany ty Lalàna ka nitariky antsika ho amy Kristy, mba ho azo ambara hoe marina tsika satria mino. 25 Fe fa avy ty finoa henanizao, ka tsy mana fahefà amintsika sasy ty mpiteza.*

26 Anaki-Ndranahary iaby nareo laha ty marina satria mino an’i Kristy Jesosy. 27 Tsy zay fa nanahaky* an’i Kristy iaby nareo natao batisa tamy Kristy ao rey. 28 Tsy misy sasy ty hoe Jiosy na Grika, na andevo na olo afaky, na lahilahy na ampela. Fa olo raiky avao nareo iaby sady miharo raiky amy Kristy Jesosy. 29 Laha ahin’i Kristy koa nareo, le taranakin’i Abrahama vatany, sady handova ani-ze raha nampitamany azy.

4 Ho zao ty volaniko: Laha mbo ajà ty mpandova, le tsy misy maha samby hafa azy amy mpanompo, ndre ie aza ro tompon’ny raha iabiaby. 2 Fe mbo mana fahefà aminy ty mpikarakara azy noho ty mpanompo miandraikitsy ty an-trano ao, zisiky iavian’ny andro fa nifilin’ny babany. 3 Le manahaky ani-zay koa tsika: Tamy tsika mbo niajà, le nandevozin’ny raha fataoni-zao tontolo zao noho ty toe-tsainy.* 4 Fa lafa nitampitsy* fotoa iny, le nirahi-Ndranahary ty Anany, zany hoe azy naterakin’ampela sady tambanin’ny lalàna eo iny, 5 mba hivily ani-ze olo ambanin’ny lalàna eo ka hanafaky an-drozy, amy zay tsika ho azo atsanga ho anaky.

6 Le satria anaky nareo, le natao-Ndranahary am-pontsika ao ty fanahin’ny Anany, le fanahy io ro mikaikaiky hoe: “Aba,* Baba!” 7 Tsy mpanompo sasy zany iha fa anaky, ka laha anaky le natao-Ndranahary ho mpandova koa.

8 Fe tamy nareo tsy nahay a-Ndranahary le nandevozin’ny ndranahary tsy tena ie rey nareo. 9 Fe fa mahay a-Ndranahary nareo henanizao, na laha ty tena marina le hoe fa hainy nareo. Ka manino nareo ro mimpoly amy raha tsy misy heriny fataoni-zao tontolo zao noho tsy misy ilà azy, sady ta handevozin’ny raha zay ndraiky? 10 Aminareo le misy andro noho vola noho fotoa noho tao tena miavaky, le raha rey ro ankalazanareo. 11 Matahotsy aho tsy no hisera avao ty nanampeako anareo.

12 Misoloho aminareo aho rahalahy, mba miovà manahaky ahy, satria fa nanahaky anareo avao aho taloha. Tsy nanao raha raty tamiko nareo. 13 Fe hainareo fa zaho narary iny ro nahavy ahy ho afaky nitory ty vaovao soa taminareo tamy voalohany iny. 14 Ndre nanahira anareo aza tsy fahasalamako iny, le tsy hoe tsy nidaridareanareo aho na nampangaroharo anareo,* fa nirambesinareo manahaky anjeli-Ndranahary noho manahaky an’i Kristy Jesosy. 15 Fe aia hafaleanareo zay henanikio? Tsy zay fa mitsanga ho vavolombelo aho fa laha niazonareo natao, ndre ty masonareo aza ho napotanareo le ho nameanareo ahy. 16 Le hanjary fahavalonareo va aho satria mivola ty marina aminareo? 17 Miezaky marè rozy mitao anareo, fe tsy hoe mba hahasoa anareo, fa tean-drozy hosarahy amiko nareo, le amy zay manaraky an-drozy. 18 Fe soa avao laha misy olo miezaky marè mitao anareo, laha ty hahasoa anareo ty antony anaovany an’ny raha zay, sady tsy hoe lafa zaho aminareo eo avao vo manao an’ny raha zay ie. 19 Anako teako, sahala hoe marary tsongoen-jaza hiteraky anareo ndraiky aho, le hanahaky ani-zay avao zisiky hanananareo ty toetsin’i Kristy.* 20 Teako laha mba miaraky aminareo aho henanizao, sady mba soa fanahy lafa miresaky aminareo, satria mampiasa loha ahy nareo.

21 Nao tse, nareo ta ho ambanin’ny lalàna io, tsy hainareo va ty raha volanin’ny Lalàna? 22 Voasoratsy ao, ohatsy, hoe nana anakilahy roe Abrahama: Ty raiky tamy mpanompovavy,* le ty raiky tamy ampela afaky. 23 Fe nateraky manahaky ty ajà iaby,* azy raiky naterakin’ny mpanompovavy iny, fa nateraky baka amy fampitamana, azy raiky naterakin’ny ampela afaky iny. 24 Misy dikany an’ohatsy raha zay, satria fifanekea roe rozy roe vavy. Natao tamy Vohitsy Sinay teo ty raiky, le miteraky anaky hatao andevo. Hagara fifanekea io. 25 Tsy ia Hagara io fa Sinay, vohitsy a Arabia any. Jerosalema henanizao iny Hagara io, satria andevo ie noho ty anany. 26 Fa Jerosalema anabo any iny, le ampela afaky. Ie ro renintsika.

27 Tsy zay fa voasoratsy hoe: “Mifalifalea iha ampela kanda tsy teraky io! Manaova korakorakim-pifalea iha ampela tsy narary tsongoen-jaza io! Tsy zay fa maro ty anan’ny ampela nengam-baly, tany ty anan’ny ampela manambaly.” 28 Rahalahy, anan’ny fampitamana manahaky an’i Isaka nareo. 29 Fe nanenjiky an’ny raiky naterakin’ny fanahy iny, azy raiky nateraky manahaky ty ajà iaby* iny tamy fotoa zay, le mbo ho zay koa henanizao. 30 Fe ino ty volanin’ny Soratsy Masy? “Roaso any mpanompovavy iny noho ty anany! Fa tsy hiharo lova amy anan’ny ampela afaky iny mihintsy ty anan’ny mpanompovavy iny.” 31 Dikani-zay rahalahy, tsy anan’ny mpanompovavy iny tsika, fa anan’ny ampela afaky iny.

5 Fa nafahin’i Kristy tsika mba hana an’ny fahafaha zay. Le mivahara soa, sady ka maneky hasia bao fanandevoza ndraiky.

2 Mivola aminareo zaho Paoly, hoe laha savary nareo, le tsy hahasoa anareo mihintsy Kristy. 3 Resahiko ndraiky amy ze olo iaby hosavary hoe: Tsy maintsy manoriky ty Lalàna iabiaby ie. 4 Nareo ze manoriky lalàna mba hambara ho olo marina le tafasaraky amy Kristy, ka tsy ampisehoa-Ndranahary hasoam-panahy miavaky sasy. 5 Fa zahay, ty fanahiny ro mahavy anay handiny marè noho hitamà hoe hambara ho olo marina, satria manam-pinoa. 6 Fa ho ani-ze miharo raiky amy Kristy Jesosy, le tsy ty hoe savary na tsy savary ro vatan-draha, fa ty hoe mino sady mampiseho fitiava.

7 Fa nandeha soa tamy lalan’ny fahamarina nareo.* Ka ia ty nisaka anareo tsy hanoriky ty fahamarina sasy? 8 Tsy azy mikaiky anareo iny ro nandresy lahatsy anareo hanao ho zay. 9 Levira kelikely avao le fa mampitombo ty koba iabiaby. 10 Matoky aho fa hitovy hevitsy amiko amy raha zay, nareo miharo raiky amy Tompo rey. Fe azy manakoronta anareo iny, ndre ia ie ndre ia, le hahazo ty sazy maeva azy. 11 Fa laha ty amiko rahalahy, laha mbo mitory mikasiky savatsy aho, le manino aho ro mbo enjehy avao? Tsy zay fa laha zay ro toriko, le fa tsy tokony haminga olo sasy ty hazo fijalea.* 12 Enganè azy ta hampivaliky anareo rey mihintsy ro hovosiry!*

13 Rahalahy, fa nikaihy ho lasa olo afaky nareo. Fe ka ampiasà hanomeza fahafaham-po ty fanirian’ny nofotsy fahafaha zay, fa aleo ty fitiava ro hahavy anareo hifanompo. 14 Fa ty Lalàna iabiaby le tanteraky* amy didy raiky ho zao iny hoe: “Tiavo ty namanao manahaky itiavanao ty vatanao.” 15 Fe laha mbo mifamango noho mialy avao nareo, le mitandrema fa mety hifandripaky.

16 Fe mivola aho hoe: Miezaha avao haneky hotarihin’ny fanahy, le tsy hanatanteraky ty fanirian’ny nofotsy mihintsy nareo. 17 Tsy zay fa ty nofotsy noho ty faniriany manohitsy ty fanahy, fa ty fanahy manohitsy ty nofotsy. Le mifanohitsy raha roe reo, amy zay nareo tsy ho afaky hanao ze raha teanareo hatao. 18 Laha tarihin’ny fanahy koa nareo, le tsy ambanin’ny lalàna.

19 Hita mazava soa ty asan’ny nofotsy, tsy ino zay fa fijangajangà,* fahalotoa, fandaisam-bata mahamenatsy,* 20 fanompoa sampy, fisà aoly,* falaina, aly, fialona, fipoahan’ny heloky, fifamalea, fisaratsaraha, fanangana antokom-pinoa,* 21 faniriniria rahan’olo, fimamoa, fety tsy voafehy,* noho ty raha hafa manahaky ani-reo. Mampitandrina anareo sandrany aho, manahaky ty fa nampitandremako anareo, fa tsy handova ty Fanjakà-Ndranahary ze mpanao an’ny raha reo.

22 Fa ty vokatsin’ny fanahy le fitiava, fifalea, fiadana,* fahareta,* hasoam-panahy, hasoan-toetsy, finoa, 23 fahalemeam-panahy, noho fifehezam-bata. Tsy misy lalàna manohitsy an’ny raha reo. 24 Le ho zao ty nataoni-ze mpianatsin’i Kristy Jesosy: Nifantsihin-drozy tamy hazo fijalea eo ty nofotsy, niaraky tamy ty faniria tsy voafehiny noho ty faniria ratiny.

25 Laha engàntsika hiasa amintsika ty fanahy masy, le tokony hataontsika mifanaraky amy fitarihan’ny fanahy ty fandaisantsika ty fiainantsika. 26 Tsy tokony hirengirengy tsika fa mahavy antsika hifanao kirebaky noho hifampialona raha zay.

6 Rahalahy, laha misy olo manao raha tsy mety kanefa tsy hainy raha zay, le nareo ze matotsy* ro tokony hiezaky hanity azy sady ho soa fanahy lafa manao an’ny raha zay. Fe mitandrema avao tsy no ho voatariky hanao raha tsy mety koa iha. 2 Miezaha avao hifanampy lafa misy raha sarotsy manavesatsy, fa manatanteraky ty lalànan’i Kristy nareo lafa manao ani-zay. 3 Fa laha misy mieritseritsy ty vatany ho anabo kanefa ie tsy zay mihintsy, le mamita-bata ie. 4 Fa tokony samby handiniky ze raha ataony ty olo kiraidraiky, amy zay ty raha ataony ro hahafalifaly azy. Fa tsy tokony hampitovy ty vatany amin’olo hafa ie. 5 Tsy zay fa samby handay ty entany* ty olo kiraidraiky.

6 Ze ampianary* ty safà-Ndranahary koa, le tokony hifampizara ty raha soa iaby amy azy mampianatsy* azy iny.

7 Ka maneky ho voafitaky nareo: Ndranahary tsy azo vazavazà,* fa ze afafin’olo avao ro ho azony. 8 Satria ze mamafy ho an’ny nofotsiny le hahazo fahasimbà baka amy fanirian-dratin’ny nofotsiny, fa ze mamafy ho an’ny fanahy le hahazo fiaina mandrakizay baka amy fanahy. 9 Ka vozaky manao raha soa mihintsy zany, satria hahazo ty vokatsin’ny raha zay tsika amy fotoa mety, laha tsy vozaky.* 10 Ka laha mbo afaky manao raha soa* avao tsika, le tokony hanao raha soa amin’olo iaby, sirtò amin’olo finoa raiky amintsika.

11 Mba henteo moa ty habevatan’ny soratsy nisoratin’ny tanako ho ahinareo!

12 Olo ta hiseho hoe soa ivelany etoy* rey ro miezaky miforosè anareo hosavary. Tsy zay fa tsy tean-drozy laha mahavy an-drozy henjehy ty hazo fijalean’i* Kristy, le zay avao ty antony anaovan-drozy an’ny raha zay. 13 Fa ndre ty olo nisavary aza tsy mitandrina ty Lalàna, fe tean-drozy hosavary avao nareo amy zay rozy afaky mirengirengy mikasiky anareo.* 14 Enganè tsy hirengirengy mihintsy aho, laha tsy hoe mikasiky ty hazo fijalean’i* Jesosy Kristy Tompontsika avao vasa! Amiko, le tamy alalany ro namonoa ani-zao tontolo zao,* fa amy zao tontolo zao, le tamy alalany ro namonoa ahy. 15 Fa tsy ty hoe nisavary na tsy nisavary ro vatan-draha, fa ty hoe zavaboary vaovao. 16 Enganè hahazo fiadana noho fiferinesa ze olo iaby manaraky soa an’ny fitsipiky zay, zany hoe ty Israeli-Ndranahary!

17 Manomboky henanizao le tsy tokony hisy olo hanahira ahy sasy, satria fa manday mariky amy vatako eo aho manamarina hoe mpanompon’i Jesosy.

18 Enganè nareo rahalahy, hampisehoan’i Jesosy Kristy Tompontsika hasoam-panahy miavaky satria nareo mana toe-tsay soa! Amena.