HO AHI-TY EFESIANINA

1 Baka amy Paoly, apostolin’i Kristy Jesosy, tamy alalan’ny sitrapo-Ndranahary.

Ho ahi-ty olo masy a Efesosy any, azy tsy mivaliky sady miharo raiky amy Kristy Jesosy rey,

2 Enganè Ndranahary babantsika iny noho Jesosy Kristy Tompo mba hampiseho hasoam-panahy miavaky* aminareo sady hanome fiadana anareo!

3 Loniky lahy mba hoderà Ndranahary baban’i Jesosy Kristy Tompontsika iny! Tsy zay fa ameany fitahia ara-panahy maro amy faritsin’ny lanitsy any tsika, satria tsika miharo raiky amy Kristy. 4 Nifily antsika ie talohan’ny nanorena ani-zao tontolo zao, mba hiharo raiky amy Kristy tsika, ka ho be fitiava noho ho masy noho tsy hisy handra amy Ndranahary eo. 5 Tsy zay fa fa nifiliny mialoha tsika mba hatsangany ho anany amy alalan’i Jesosy Kristy, mifanaraky amy ze raha teateany noho mifanaraky amy sitrapony. 6 Amy zay hidera azy ty olo satria ie be voninahitsy noho nampiseho hasoam-panahy miavaky tamintsika, sady soa fanahy lafa nampiseho an’ny raha zay tamy alalan’ny Anany teany iny. 7 Anany io ro nampiasà mba hanafaha antsika amy alalan’ny vilim-panavota, ka nahazoantsika fanengà hadisoa baka amy liony. Tsy zay fa tena bevata ty hasoam-panahy miavaky aseho-Ndranahary.

8 Maro biby hasoam-panahy miavaky nasehony tamintsika zay, sady nameany fahendrea noho fahihira* iabiaby koa tsika, 9 lafa nambarany antsika sekirè masy mikasiky ty sitrapony iny. Teateany sekirè zay, sady mifanaraky amy raha teany hatao iny, 10 tsy ino zay fa ty hoe hampisy fitantanan-draharaha* lafa tampitsy tanteraky ty fotoa voatondro. Amy zay havory ho amy Kristy ao ty raha iaby, zany hoe ty raha an-danitsy any noho ty raha an-tany etoy. 11 Miharo raiky aminy zahay sady nifilỳ mba ho mpiaraky mandova aminy. Tsy zay fa fa nifilỳ mialoha zahay, mifanaraky amy ty raha teani-azy manatanteraky ty raha iaby iny hatao. Manatanteraky ty raha iaby mifanaraky amy ze teany noho mifanaraky amy ty sitrapony ie. 12 Amy zay zahay hanome voninahitsy noho hidera a-Ndranahary, satria zahay ro voalohany nitamà an’i Kristy. 13 Fe nitamà azy koa nareo lafa baka naharè ty safàn’ny fahamarina, zany hoe ty vaovao soa mikasiky ty fanavota anareo. Lafa nino amy zay nareo, le nasia kasè* tamy fanahy masy nampitamany iny, le Kristy ro nampiasà-Ndranahary hanao an’ny raha zay. 14 Fanahy masy io ro antoky mialoha* fa hahazo an’ny lova iny tsika. Tsy zay fa tea-Ndranahary hafahy amy alalan’ny vilim-panavota ty vahoakiny, mba hiderà noho hanomeza voninahitsy azy.

15 Ka lafa nireko amy zay hoe lasa mino an’i Jesosy Tompo nareo, sady mampiseho fitiava amin’olo masy iabiaby, 16 le tsy mieny misaotsy a-Ndranahary ho anareo aho. Mivavaky ho anareo avao koa aho 17 mba hanome anareo ty fanahiny azy Ndranaharin’i Jesosy Kristy Tompontsika iny, zany hoe azy Baban’ny voninahitsy iny. Amy zay nareo hana fahendrea sady hahazo ty dikani-ze raha asehony, ka hahay soa azy. 18 Nataony mahita ty mason’ny fonareo, mba ho hainareo raha tamany nameany anareo tamy ie nikaiky anareo iny. Amy zay koa ho hainareo hoe be voninahitsy hanana nihajarìny ho lovan’ny olo masy iny, 19 sady farani-ze bevata ty hery ameany antsika mpino. Hita hoe bevata heriny zay lafa ampiasany. 20 Hery io ro namelomany an’i Kristy noho nametrahany azy ta ankavanany eo amy faritsin’ny lanitsy any. 21 Nasondrotsony ie ka nataony anabo mandilatsy ze fanjakà noho fahefà noho hery noho fitondrà noho anara iabiaby, tsy amy zao tontolo zao* eto avao, fa amy azy ho avy iny koa. 22 Nampanekeniny an’i Kristy koa ty raha iaby ka nataony ambany tombony eo. Le nataony lohan’ny raha iaby ie amy fiangona eo, 23 zany hoe amy vatany eo. Feno ty raha iaby mikasiky azy ty fiangona, sady ie ro mameno ty raha iaby.

2 Nivelomi-Ndranahary koa nareo, ndre nimaty vokatsin’ny hadisoanareo noho ty fahotanareo. 2 Nanahaky ani-zay nareo taloha, satria nanao ty raha fataoni-zao* tontolo zao sady nanaraky an’ny mpanday mikomandy tsioky iny. Tsy ino tsioky io fa ty toe-tsay miparitaky henanizao amy anan’ny tsy fanoriha safà ao. 3 Nana fandaisam-bata manahaky an-drozy tsika iaby taloha, ka nanome fahafaham-po ty fanirian’ny nofotsintsika, satria ze teatean’ny nofotsintsika noho ty eritseritsintsika avao ro nataontsika. Le fa anan’ny heloky manahaky ty olo iaby tsika liany vo nateraky. 4 Fe tena miferinay olo Ndranahary, ka vokatsin’ny fitiava bevata nasehony tamintsika 5 le nivelominy niaraky amy Kristy tsika, ndre nimaty vokatsin’ny hadisoantsika aza. —Hasoam-panahy miavaky ty nanavota anareo.— 6 Niaraky nivelominy noho nameany pilasy amy faritsin’ny lanitsy any koa tsika, satria nataony miharo raiky amy Kristy Jesosy, 7 mba hampisehoa hoe tsy tampitampitsy sady tena bevata ty hasoam-panahiny miavaky, amy tontolo* ho avy iny ao. Hampiseho ani-zay vatany Ie amy fotoa zay, ka hanao raha soa ho antsika* miharo raiky amy Kristy Jesosy.

8 Hasoam-panahy miavaky zay ro nanavota anareo, satria manam-pinoa nareo. Fe fanomeza-Ndranahary raha zay, fa tsy baka amy ezaky nataonareo. 9 Tsy vokatsin’ny ezaky nataonareo mihintsy raha zay, tsy no hisy aminareo lasa hana antony hirengirengea. 10 Tsy zay fa asa tana-Ndranahary tsika sady niforony hanao asa soa, satria tsika miharo raiky amy Kristy Jesosy. Fa niomani-Ndranahary mialoha hoe hataontsika asa zay.

11 Tiarovo zany fa oloni-zao tontolo zao nareo taloha, liany vo nateraky.* Nikaiky anareo hoe “tsy misavatsy” azy kaihy hoe “misavatsy” rey, zany hoe azy nisavary tamy nofotsy eo sady nisavarin’ny tanan’olo rey. 12 Tamy fotoa zay nareo tsy nana an’i Kristy noho tsy nifandramby tamy firenenan’Israely sady tsy nitafilitsy tamy fifanekea mikasiky ty raha nampitamany. Tsy nana raha tamany koa nareo sady tsy nana a-Ndranahary, tamy zao tontolo zao eo. 13 Lavitsy a-Ndranahary nareo taloha, fe fa lasa marìny azy henanizao, satria miharo raiky amy Kristy Jesosy amy alalan’ny liony. 14 Tsy zay fa ie ro nampilongo antsika. Ie ro nampiharo raiky antsika antoko roe rey sady nandrava an’ny rindry nampisaraky antsika iny. 15 Ty nofotsiny ro nandravàny ani-azy nahavy antsika ho mpifahavalo iny, tsy ino zay fa ty Lalàna misy didy maro, mba hiharo raiky aminy tsika antoko roe rey, ka ho lasa olo vaovao raiky avao noho hilongo soa. 16 Teany koa ty hampilongo tanteraky antsika amy Ndranahary amy alalan’ny hazo fijalea.* Le ho lasa vata raiky avao tsika, satria fa niravàny tamy ie nimaty raha nahavy antsika ho mpifahavalo iny. 17 Le niavy ie ka nitory ty vaovao soa mikasiky filongoa taminareo lavitsy a-Ndranahary, noho tamy ze marìny azy. 18 Tsy zay fa amy alalany ro ahafahantsika antoko roe rey mamonjy an’ny Baba an-danitsy any iny, satria fanahy raiky avao ro azontsika iaby.

19 Ka tsy vahiny na firenena hafa sasy zany nareo, fa firenena raiky amin’olo masy rey sady anatin’ny fianakavia-Ndranahary. 20 Fa namboary tanabo fototsy eo koa nareo, tsy ia fototsy io fa ty apostoly noho ty mpaminany, le Kristy Jesosy ro vato fehizoro. 21 Miharo raiky amy Kristy trano iny iabiaby, sady mitambatsy soa iaby ty raha anamboara azy. Le mihamiakatsy trano iny, ka lasa tempoly masy ho an’i Jehovah. 22 Miharo raiky aminy koa nareo, le miaraky amboari-Ndranahary mba ho lasa pilasy hipetrahany amy alalan’ny fanahiny.

3 Ka zaho Paoly, azy gadra satria ahin’i Kristy Jesosy iny sady manampy anareo firenena hafa... 2 Fa nirenareo vatany andraikitsy nankiny tamiko iny, tsy ino zay fa ty hanampy anareo amy zay hahasoa anareo ty hasoam-panahy miavaky aseho-Ndranahary. 3 Tsy zay fa nambara-Ndranahary ahy sekirè masy iny, le fa nisoratiko kelikely taminareo raha zay. 4 Ka lafa mamaky ani-toy nareo, le ho azonareo fa haiko soa sekirè masy mikasiky an’i Kristy iny. 5 Tsy nanambarà an’ny sekirè io ty taranaky taloha tany, fe henanizao raha iny nambara tamy apostoliny masy noho ty mpaminaniny tamy alalan’ny fanahy masy. 6 Toy sekirè io: Lafa niharo raiky amy Kristy Jesosy noho naneky ty vaovao soa ty olo firenena hafa, le tokony hiharo lova aminay noho anisan’ny vata raiky iny avao. Le hahazo an’ny raha nampitamani-Ndranahary anay iny koa rozy. 7 Lasa mpanompo miandraikitsy an’ny raha zay aho, satria nampiseho hasoam-panahy miavaky tamiko Ndranahary, le fanomeza maimaim-poana raha zay. Nasehony tamiko hasoam-panahy zay tamy ie nampiseho ty heriny tamiko.

8 Zaho mbo kelikely mandilatsy ze farany kelikely amin’olo masy iaby toy ro nampisehoany hasoam-panahy miavaky zay. Le zay ro nahavy ahy afaky nitory tamin’olo firenena hafa ty vaovao soa mikasiky ty hananan’i Kristy tsy mety lany, 9 sady nanampy ty olo iaby hahita ze raha atao-Ndranahary mikasiky* an’ny sekirè masy iny. Fa liany fa ela biby sekirè io ro navonini-azy Ndranahary namoro ty kila raha iaby iny. 10 Nanao an’ny raha zay Ndranahary amy zay henanizao ro anambarà ty fahendreany. Miseho amy fomba sankarazany fahendreany zay, amy fanjakà noho manam-pahefà amy faritsin’ny lanitsy any, le amy alalan’ny fiangona ro anambarà an’ny raha zay. 11 Mifanaraky amy ty raha teany hatao bakany bakany zay* mikasiky an’i Kristy, zany hoe Jesosy Tompontsika raha zay. 12 Ie ro mahavy antsika hahasaky mivola, noho hahasaky hamonjy a-Ndranahary tsy misy fisalasalà, satria tsika mino azy.* 13 Ka le misoloho aminareo aho mba tsy hataonareo mahakivy ty fiaretako fijalea amy zaho manampy anareo io, satria voninahitsy ho anareo raha rezay.

14 Ka zay ty antony mahavy ahy mandohaliky amy Baba eo, 15 satria ie ro nampisy ty fianakavia iaby an-danitsy any noho an-tany etoy ka nahazoan-drozy anara. 16 Mivavaky aho mba hampiasa ty hery baka amy fanahiny Ndranahary, amy zay hatanjaky ty fonareo noho ty sainareo,* satria tena panarivo voninahitsy ie. 17 Mivavaky koa aho mba ho am-ponareo ao avao Kristy, miaraky amy ty fitiavanareo, satria nareo mino azy. Le enganè nareo hivahatsy soa noho hamahatsy marè amy fototsy eo! 18 Amy zay ho azonareo soa miaraky amy ty olo masy iaby ty fahamarina, zany hoe ty sakany noho ty halavany noho ty haabony noho ty halalikiny. 19 Ho hainareo koa ty fitiavan’i Kristy, amy zay ho feno ty toetsy iaby baka amy Ndranahary nareo. Mbo mandilatsy ty fahaiza, fitiava an’i Kristy zay.

20 Afaky manao mandilatsy ani-ze raha iaby angatahintsika na eritseretintsika Ndranahary, mbo mandilatsy lavitsy ani-zay aza, amy alalan’ny heriny miasa anaintsika ao iny. Ho azy lahy ty voninahitsy, 21 eka, ho azy lahy voninahitsy amy alalan’ny fiangona noho amy alalan’i Kristy Jesosy iny, zisiky amy taranaky iaby mandrakizay mandrakizay! Amena.

4 Ka le misoloho aminareo aho, zaho azy gadra satria manori-dia an’ny Tompo iny, mba ho soa fandaisam-bata nareo ka haeva an’ny raha nikaiha anareo iny, 2 zany hoe hiambany noho ho soa fanahy avao, hanam-pahareta, hifandefitsy satria manam-pitiava, 3 le hiezaky marè mba hiharo raiky avao sady hilongo, satria fa naharon’ny fanahy masy nareo. 4 Raiky ty vata, le raiky ty fanahy masy, manahaky ty nikaiha anareo ho amy raha tamany raiky avao. 5 Raiky ty Tompo, raiky ty finoa, le raiky ty batisa. 6 Raiky Ndranahary iny sady Baban’olo iaby. Mana fahefà amin-drozy iaby ie, le mampiasa an-drozy iaby koa, sady miasa anain-drozy iaby ao.

7 Nampisehoa hasoam-panahy miavaky tsika kiraidraiky, arakaraky ze namean’i Kristy, sady maimaim-poana fanomeza zay. 8 Tsy zay fa voasoratsy hoe: “Nanday olo maro ho babo ie lafa niakatsy tanabo any, ka lahilahy ro nataony fanomeza.” 9 Fa ino ty dikan’ny hoe ‘niakatsy ie’? Midika raha zay hoe nijotso tamy faritsy ambany etoy koa ie, zany hoe tan-tany etoy. 10 Azy nijotso iny avao ro niakatsy lavitsy any, anabon’ny lanitsy iaby any, mba hahavy ty raha iaby ho tanteraky.*

11 Ty sisany nitendreny ho apostoly, ty sisany ho mpaminany, ty sisany ho mpitory ty vaovao soa, le ty sisany ho mpiarakandro noho mpampianatsy, 12 amy zay rozy ho afaky hanenty ty olo masy, hanao fanompoa, sady hanatanjaky* ty vatan’i Kristy. 13 Hanao an’ny raha rezay rozy zisiky hahavy antsika iaby hana raha inoa mitovy,* noho hana fahaiza* mitovy mikasiky ty Anaki-Ndranahary. Amy zay tsika ho lasa olobe,* zany hoe ho lasa tena matotsy manahaky an’i Kristy.* 14 Ka tsy tokony ho ajà sasy zany tsika, ka hatoratorakin’ny lozoky noho havemben’ny tsiokin’ny karaza fampianara iaby mbeny, zany hoe ho voataon’ny olo mamitaky noho mahihitsihitsy. 15 Fa tsika mivola ty marina, le engao ty fitiava ro handrisiky antsika hitombo amy lafiny iabiaby, ka hanahaky an’i Kristy, azy lohan’ny vata iny tsika. 16 Ie ro mahavy ty vata iaby hitambatsy soa noho hiaraky miasa satria mifanampy ty fitohizan’ny taola iabiaby mba hanome ze raha ilà. Lafa miasa soa ty rantsambata kiraidraiky, le mitombo ty vata ka mihamatanjaky satria eo ty fitiava.

17 Ka zao ty volaniko sady ampirisihiko anareo anatrehan’ny Tompo eo: Ka manao manahaky ani-zao tontolo zao sasy, fa tsy misy dikany* ty raha eritseretin-drozy. 18 Maìky ty sain-drozy sady tsy hahazo an’ny fiaina ampitamani-Ndranahary antsika iny rozy, satria tsy mahay a-Ndranahary rozy sady tsy daitsy* ty fon-drozy. 19 Fa tsy mahay menatsy sasy rozy, ka midada amy fandaisam-bata mahamenatsy* noho manao ze karaza fahalotoa iabiaby, sady tsy mety afa-po fa mbo ta hanao avao.

20 Fe nianaranareo fa tsy manahaky ani-zay Kristy, 21 laha naharè azy vatany nareo, tamy nareo nampianary mifanaraky amy fahamarina nampianarin’i Jesosy. 22 Nampianary nareo hoe tokony harianareo ty toetsinareo taloha, zany hoe ty toetsy mifanaraky amy fandaisam-batanareo taloha sady miharaty avao tratsin’ny fanirian-draty mamitaky. 23 Tokony hanavao ty toe-tsainareo* avao koa nareo, 24 le tokony hisiky ty toetsy vaovao niforony mifanaraky amy sitrapo-Ndranahary, sady mifanaraky amy ze atao hoe tena marina noho tsy mivaliky.

25 Ka laha fa narianareo zany ty vandy, le samby tokony hivola ty marina amy ty namanareo nareo kiraidraiky, satria rantsambata mifampianky tsika. 26 Mihelofa fe ka manota. Ka engà ho tratsin’ny masoandro milentiky ty helokinareo, 27 le ka amea hiriky* ty Devoly. 28 Ty mpangalatsy tsy tokony hangalatsy sasy, fa tokony hiasa mafy ka hampiasa ty tanany hanaova asa soa, amy zay ie hanan-draha hozarà amy ze olo sahira. 29 Ka engà hisy safà raty hiboaky amy vavanareo, fa ze safà soa mba hampahereza avao, lafa ilà raha zay, mba hizarà raha mahasoa ani-ze olo mijanjy. 30 Ka manao ze hampalahelo ty fanahy masi-Ndranahary koa, satria nasia kasè* tamy fanahy io nareo mba hafahy amy alalan’ny vilim-panavota lafa avy andro fanafaha iny.

31 Alao aminareo iaby lafa atao lolompo, heloky, siaky tafahoatsy, korakoraky, safà maharary, noho ty toetsy iaby mampalahelo ty olo hafa. 32 Fa miezaha ho soa fanahy amy namanareo kiraidraiky, ka hiferinay noho hifanenga hadisoa tanteraky, manahaky ty nanengà-Ndranahary tanteraky ty hadisoanareo, tamy alalan’i Kristy.

5 Tahafo zany Ndranahary, satria anany teany nareo. 2 Le miezaha avao hampiseho fitiava, manahaky ty nitiavan’i Kristy antsika* noho ty nanomezany ty vatany mba hatao fanatitsy noho soro ho antsika,* ho lasa raha manimanitsy soasoa ho a-Ndranahary.

3 Ka engà hotonony aminareo eo mihintsy ty resaky mikasiky fijangajangà* noho lafa kila fahalotoa na faniria tsy mety afa-po, fa tsy mety amin’olo masy raha zay. 4 Ka engà hotonony aminareo eo koa ty fandaisam-bata mahamenatsy na resaky tsy misy dikany na somonga maloto,* satria samby tsy maeva raha reo. Fa aleo misaotsy a-Ndranahary. 5 Tsy zay fa hainareo sady azonareo soa, fa samby tsy mana lova amy Fanjakàn’i Kristy noho Ndranahary ao, ndre ty mpijangajanga* zay, ndre ty olo manaraky fahazara maloto, ndre ty olo tsy mety afa-po, zany hoe mpanompo sampy.

6 Ka engà hisy hamitaky anareo amy safà tsy misy dikany, satria raha reo ro mahavy a-Ndranahary ho meloky amy anan’ny tsy fanoriha safà. 7 Ka manao manahaky an-drozy* zany. 8 Tsy zay fa tamy maìky ao nareo taloha, fe fa amy mazava ao henanizao, satria miharo raiky amy Tompo. Atorò amy fiainanareo avao hoe anan’ny mazava nareo. 9 Tsy zay fa ty vokatsin’ny mazava le ze raha iaby kaihy hoe hasoan-toetsy noho fanaova raha marina noho fahamarina. 10 Anovo hay soa avao ze tean’ny Tompo, 11 le ka atao sasy ty raha tsy misy dikany fataon’olo amy maìky ao, fa atorò hoe raty raha rey. 12 Fa mahamenatsy ndre ty mivola ty raha mivonivony ataon’olo rey aza. 13 Asehon’ny hazavà ty raha iaby azela,* satria lasa mazava ty raha iaby aseho. 14 Ka ho zao zany ty nivolany: “Mifohaza iha miroro io, sady mitsangàna baka amy fahafatesa ao, le hanazava anao Kristy.”

15 Ka le miambena soa avao amy ty raha ataonareo, mba ho hita hoe hendry nareo fa tsy gegy, 16 ka ampiasao soa ty fotoanareo,* satria raty andro iainantsika zao. 17 Ka misary gegy sasy zany, fa anovo avao ze hahaizanao hoe ino ty sitrapon’i Jehovah. 18 Le ka manao mamon-divay satria mahavy anareo hanao hadalà* raha zay. Fa tokony ho feno fanahy masy avao nareo. 19 Lafa mifampiresaky koa nareo,* le mifampahereza amy salamo noho fiderà a-Ndranahary noho hira masy, sady mihirà amy fo ho an’i Jehovah, miaraky amy moziky. 20 Ankoatsini-zay, le ka mieny misaotsy an’ny Ndranahary Babantsika iny amy ty raha iaby, sady anovo amy anaran’i Jesosy Kristy Tompontsika raha zay.

21 Sambia maneky ty namanareo iaby nareo, satria nareo matahotsy an’i Kristy. 22 Nareo ampela, manekea ty valinareo, manahaky ty anekea an’ny Tompo, 23 satria ty lahilahy ro lohan’ny valiny, manahaky an’i Kristy lohan’ny fiangona io, sady ie ro mpanavotsy an’ny vata* io. 24 Manahaky ty anekean’ny fiangona an’i Kristy ro tokony hanekean’ny ampela ty valiny amy raha iaby. 25 Nareo lahilahy, tiavo avao ty valinareo, manahaky ty nitiavan’i Kristy ty fiangona noho ty nanomezany ty vatany hanavota azy, 26 mba hanamasinany azy, ka hanadiovany azy amy rano fiandroa, zany hoe ty safà. 27 Amy zay ty fiangona ho tena soa aminy eo, ka tsy hisy tasy na mihoronkoro na raha manahaky ani-zay, fa ho masy noho tsy misy handra.

28 Manahaky ani-zay koa fa tokony ho tea ty valiny ty lahilahy, manahaky ty itiavany ty vatany. Ze tea ty valiny le tea ty vatany. 29 Tsy zay fa tsy misy olo malay ty vatany,* fa mamelo noho mikarakara azy ty ataony, manahaky ty ataon’i Kristy amy fiangona, 30 satria anisan’ny vatany tsika. 31 “Hiala amy babany noho reniny zany ty lahilahy ka hitambatsy* amy valiny, le ho nofotsy raiky avao rozy roe.” 32 Bevata sekirè masy zay. Miresaky mikasiky an’i Kristy noho ty fiangona aho. 33 Fe ndre zay, le tsy maintsy tea ty valiny manahaky itiavany ty vatany ty lahilahy kiraidraiky, fa ty ampela amy zay koa tokony tena hanaja ty valiny.

6 Nareo anaky, oriho ty safàn’ny ray aman-dreninareo, mifanaraky amy sitrapon’ny Tompo,* fa zay ro mety. 2 “Hajao ty babanao noho ty reninao.” Zay ty didy voalohany misy an’ny fampitamana toy: 3 “Amy zay hilamy soa ty fiainanao* sady ho lava velo an-tany etoy iha.” 4 Le nareo baba, ka manao ze mampeloky ty ananareo, fa tezao mifanaraky amy ty anatsy amean’i Jehovah noho ze raha atorony* avao rozy.

5 Nareo mpanompo, oriho amy fo ty safàn’ny tomponareo* ka hajao noho avakao rozy, manahaky ty ataonareo amy Kristy. 6 Tsy hoe lafa misy manara-maso avao nareo vo tokony hanao ani-zay, sahala hoe ta hampifalifaly olo avao,* fa satria nareo mpanompon’i Kristy sady manao ty sitrapo-Ndranahary amy fo iaby. 7 Manompoa amy fo,* sahala hoe ho an’i Jehovah, fa tsy ho an’olo, 8 satria hainareo fa hamaly soa ani-ze raha soa ataon’olo kiraidraiky Jehovah, ndre andevo olo zay, ndre olo afaky. 9 Le nareo tompo, anovo manahaky ani-zay avao koa ty mpanomponareo le ka horohoroa rozy, satria hainareo fa an-danitsy any Tompon-drozy noho Tomponareo iny, sady tsy mitingy volon’olo* ie.

10 Farany, anovo avao ze hahazoa hery baka amy Tompo satria tena mahery ie. 11 Anisio iaby ze fialia amea-Ndranahary anareo, mba hivahatsy soa nareo ka ho vitanareo ty hanohitsy ty tetiky ratin’ny Devoly. 12 Tsy zay fa tsika tsy mialy* amy nofotsy noho lio, fa amy fanjakà noho manam-pahefà noho mpanjakan’ny tontolo anaty maìky toy, noho amy fanahy raty amy faritsin’ny lanitsy eny. 13 Ka le rambeso iaby zany ze fialia amea-Ndranahary, mba ho vitanareo ty hanohitsy ani-ze fanafiha anareo amy andro anjakan’ny raha raty. Le hivahatsy soa nareo lafa vitanareo raha iaby rezay.

14 Mivahara soa zany, ka le anovo sentira am-banianareo eo ty fahamarina, sady anovo fiarovan-tratra ty fanaova ty marina.* 15 Le anovo kiraro* amy tombonareo ty fanaova parè hitory ty vaovao soan’ny filongoa.* 16 Ankoatsin’ny raha iaby reo, le rambeso ty ampinga bevata, tsy ino zay fa ty finoa, fa io ro hahavitanareo hamono ty bala kititsy* mirehitsy iaby alefani-azy raty iny. 17 Anisio koa ty fiarovan-doha, zany hoe ty fanavota, le rambeso ty sabatsin’ny fanahy, zany hoe ty safà-Ndranahary. 18 Le mivavaha avao ndre amy fotoa manao akory ndre amy fotoa manao akory, sady oriho ty fitarihan’ny fanahy, ka manaova vavaky noho fisolohoa sankarazany. Miambena avao zany sady ka mieny misoloho ho an’ny olo masy iaby. 19 Mivavaha koa ho ahy mba hatoro ahy ze raha tokony hovolaniko lafa mivola aho. Amy zay aho hahasaky hivola lafa manambara an’ny sekirè masy mikasiky ty vaovao soa iny. 20 Fa vaovao soa zay ro mahavy ahy ho ambasadera mirohy seny. Mivavaha koa ho ahy mba ho sakiko ty hiresaky mikasiky ani-zay, mifanaraky amy ze raha tokony hovolaniko.

21 Hanambara anareo ty raha iaby Tykiko, rahalahy teako sady mpanompo azo atokisa amy Tompo ao, amy zay ho hainareo koa ty mikasiky ahy noho ze raha ataoko. 22 Zao ty tena antony anirahako azy aminareo any: Mba ho hainareo hoe manao akory zahay, le ie koa ho afaky hampionona ty fonareo.

23 Enganè Ndranahary Babantsika iny noho Jesosy Kristy Tompo hanome fiadana an’ny rahalahy rey noho hampiseho fitiava amin-drozy sady hanome finoa an-drozy! 24 Enganè hampisehoa hasoam-panahy miavaky ze olo iaby tena tea an’i Jesosy Kristy Tompontsika!