HO AHI-TY FILIPIANINA

1 Baka amy Paoly noho Timoty, mpanompon’i Kristy Jesosy.

Ho ahi-ty olo masy iaby a Filipy any, azy miharo raiky amy Kristy Jesosy rey, anatini-zay ty mpiandraikitsy noho ty mpikarakara fiangona,

2 Enganè Ndranahary Babantsika iny noho Jesosy Kristy Tompo mba hampiseho hasoam-panahy miavaky* aminareo noho hanome fiadana anareo!

3 Tsy mieny misaotsy an’ny Ndranahariko iny aho saky mahatiaro anareo, 4 lafa zaho misoloho ho anareo iaby. Falifaly avao aho saky misoloho ho anareo, 5 satria nandramby anjara tamy fitoria* ty vaovao soa nareo, liany naharezanareo an’ny raha zay le zisiky henanizao. 6 Tsy zay fa matoky aho hoe hamita an’ny asa soa fa natombokiny taminareo eo iny Ndranahary, zisiky iavian’ny andron’i Kristy Jesosy. 7 Ara-dalàna laha zay ty eritseretiko mikasiky anareo iaby, satria am-poko ato nareo. Nampisehoa-Ndranahary hasoam-panahy miavaky manahaky ahy nareo ka nanampy ahy avao, ndre amy zaho gadra henanizao, ndre tamy zaho niaro ty vaovao soa iny. Nanampy ahy koa nareo lafa zaho niezaky hahazo zo ara-dalàna hitory ty vaovao soa.

8 Ndranahary ro mahita fa tena many anareo iaby aho, sady tena tea anareo manahaky ty itiavan’i Kristy Jesosy anareo. 9 Mangataky amy vavaky avao aho mba hitombo avao ty fitiavanareo, sady ho hainareo soa noho hazava soa aminareo ty sitrapo-Ndranahary. 10 Mivavaky avao koa aho mba ho hainareo ty hanavaky ani-ze tena vatan-draha. Amy zay nareo mba tsy hisy hokinokinoa sady tsy hahavy ty olo sisany hihemotsy zisiky iavian’ny andron’i Kristy. 11 Amy zay koa nareo ho feno ty vokatsin’ny fahamarina namea tamy alalan’i Jesosy Kristy, mba ho voninahitsy noho ho fiderà a-Ndranahary.

12 Teako ho hainareo, rahalahy, fa vomaiky nampandroso ty vaovao soa ty raha mahazo ahy. 13 Le lasa hain’ny mpiamby an’i Kaisara reo noho ty olo hafa iaby fa ty fanorihako an’i Kristy ro mahavy ahy ho gadra. 14 Lasa tsy mavaka amy zay ty ankamaroan’ny rahalahy amy Tompo ao reo lafa nigadra aho. Vomaiky mahasaky mitory ty safà-Ndranahary rozy sady tsy matahotsy mihintsy.

15 Marina fa mitory mikasiky an’i Kristy ty olo sisany satria mialona noho tea aly. Fa ty olo hafa mitory satria soa fo, 16 ka fitiava ro mahavy an-drozy hitory mikasiky an’i Kristy, satria hain-drozy fa voatendry hiaro ty vaovao soa aho. 17 Fa azy mialona rey, ta hialy* avao kanao mitory, fa tsy hoe ta hanao raha soa. Mbo tean-drozy hosahirany koa aho kanefa fa gadra. 18 Fe ino ty vokany? Ndre manao akory ndre manao akory, ndre soavolamanatriky rozy, ndre soa fo lafa mitory, le maharè ty hafatsy mikasiky an’i Kristy avao ty olo, ka mahafalifaly ahy raha zay. Ho falifaly avao koa aho, 19 satria haiko fa ho avotsy aho. Ho avotsy aho satria misoloho ho ahy nareo sady manampy ahy koa ty fanahin’i Jesosy Kristy. 20 Tena matoky aho sady mitamà hoe tsy ho menatsy mihintsy ka hahasaky hivola. Matoky koa aho fa afaky hanome voninahitsy an’i Kristy ty raha ataoko* henanizao, manahaky bakanibakany zay, ndre velo aho ndre maty.

21 Fa zaho laha velo, le velo ho an’i Kristy, fe mahavoa aho laha maty. 22 Kanefa laha mbo nofotsy noho lio aho, le vomaiky hisy vokany ty asako. Fe tsy ambarako ze hofiliko. 23 Sahira aho mandiniky hoe aia ty hotinginiko amy raha roe reo, satria tena ta ho afaky aho soa hiaraky amy Kristy. Tsy zay moa fa tena soa marè raha zay. 24 Fe vomaiky mahasoa anareo laha mbo nofotsy noho lio aho. 25 Azoko antoky raha zay, ka haiko fa mbo ho velo aho sady mbo hiaraky aminareo iaby avao, amy zay nareo handroso noho ho falifaly satria mino. 26 Lafa aminareo eo ndraiky koa aho, le vomaiky ho falifaly nareo satria mpanori-dia an’i Kristy Jesosy.

27 Teako avao laha ataonareo* mifanaraky amy vaovao soa mikasiky an’i Kristy ty fandaisanareo ty fiainanareo. Amy zay ndre avy aho ka hahita anareo, na ndre tsy eo aho, le ho reko hoe mivahatsy soa nareo sady mitovy hevitsy. Ho reko koa hoe mitovy raha kendrè nareo, ka miaraky miezaky mba hino ty vaovao soa avao, 28 sady tsy maneky hampitahorin’ny mpanohitsy anareo rey mihintsy, satria zay ty porofo hoe haripaky rozy, fa nareo ho avotsy. Baka amy Ndranahary raha zay. 29 Tsy zay fa namea tombontsoa hino an’i Kristy nareo, le tsy zay avao fa hijaly ho an’i Kristy koa. 30 Mialy ay manahaky nahazo ahy iny koa nareo, sady renareo hoe mbo mialy ay avao aho zisiky henanizao.

2 Ka laha afaky mampahery zany nareo ze miharo raiky amy Kristy, laha afaky mampionona amy alalan’ny fitiava, noho laha afaky midary noho mampiseho fitiava sady miferinay olo, 2 le anovo ze hahafalifaly ahy marè, ka miezaha hitovy eritseritsy, hifankatea, tsy hisaratsaraky mihintsy,* noho hitovy hevitsy. 3 Ka tea mialy hevitsy na mirengirengy,* fa miezaha hiambany le eritsereto hoe anabo mandilatsy anareo ty olo hafa. 4 Le ka mieritseritsy ze hahasoa ty vatanareo avao, fa ze hahasoa ty olo hafa koa.

5 Miezaha avao hana toe-tsay manahaky nananan’i Kristy Jesosy toy: 6 Ndre fanahy manahaky a-Ndranahary aza ie, le tsy tan’eritseritsiny ao mihintsy ty hoe hiezaky hitovy amy Ndranahary. 7 Nafoiny mihintsy aza ty raha iaby, le nanjary nanahaky mpanompo io ie, ka nilasa olombelo.* 8 Le tsy zay avao, fa lafa nilasa olombelo* ie, le niambany sady nanoriky safà ka naneky ho maty mihintsy aza, zany hoe ho maty tamy hazo fijalea* eo. 9 Zay mihintsy ro nahavy a-Ndranahary hanondrotsy azy ho amy pilasy anabo mandilatsy ty taloha, noho nisoa fanahy taminy ka nanome azy anara anabo mandilatsy ty anara hafa iaby. 10 Amy zay handohaliky amy anaran’i Jesosy ty ongotsy iaby, ndre ty an-danitsy any zay ndre ty an-tany etoy, ndre ty ambany tany any, 11 le haneky iaby ty lela iaby fa Jesosy Kristy ro Tompo mba ho voninahitsin’ny Ndranahary Babantsika iny.

12 Fa nanoriky safà avao nareo rahalahiko noho anabaviko teako. Tsy tamy zaho taminareo eo avao, fa vo handraky moa amy zaho tsy aminareo eo henanizao. Miezaha avao zany mba ho avotsy sady matahora noho mangitikitiha lafa manao an’ny raha zay. 13 Tsy zay fa Ndranahary ro manome hery anareo satria teateany ty manao ani-zay, ka ataony ze hahavy anareo hana faniria noho hery hanaova raha. 14 Ndre ino ndre ino ataonareo, le ka mimenimeny na mialy hevitsy. 15 Amy zay nareo tsy hisy hokinokinoa noho tsy hanan-tsiny, sady ho anaki-Ndranahary tsy misy handra amy taranaky maheriloha noho raty fanahy eo. Mamirapiratsy amy taranaky zay eo nareo, manahaky hazavà amy zao tontolo zao, 16 sady mivahatsy marè amy safàn’ny fiaina. Mana antony mahafalifaly amy andron’i Kristy zany aho, satria haiko fa tsy misera avao ty korsa na ty asa mafy nataoko. 17 Fe falifaly aho sady miaraky falifaly aminareo iaby, ndre atao manahaky divay* atao fanatitsy rey aza, le aily amy soro noho fanompoa masy* ataonareo eo. Ty finoanareo ro mahavy anareo hanao an’ny fanompoa zay. 18 Tokony ho falifaly koa nareo, le miaraha falifaly amiko.

19 Mitamà aho henanizao hoe haniraky an’i Timoty ho aminareo any tsy ho ela, laha sitrapon’i Jesosy Tompo. Amy zay hahazo fampahereza aho lafa maharè vaovao mikasiky anareo. 20 Zaho aloha tsy mahita olo hafa mitovy toetsy aminy afaky hikarakara soa anareo, 21 satria ty olo hafa samby mila ze hahasoa ty vatan-drozy avao, fa tsy ze tean’i Jesosy Kristy. 22 Fe hainareo soa ty lazan’i Timoty. Manahaky ajà miaraky manompo amy babany io ie lafa niaraky nanompo tamiko, mba hampandrosoa ty vaovao soa. 23 Ka ie zany azy tamaniko hirahy iny, laha vo hitako hoe ino ty raha hiseho amiko. 24 Le tena matoky aho fa tsy ho ela le ho avy any koa, laha sitrapon’ny Tompo.

25 Fe hitako hoe mila maniraky an’i Epafrodito aminareo any aho henanizao. Rahalahiko noho mpiaraky miasa amiko ie, sady maramila manahaky ahy. Nirahinareo hanompo ahy noho hikarakara ze raha ilàko ie. 26 Tsy zay fa tena ta hahita anareo ie, sady kivy marè ie any satria fa nirenareo moa hoe narary ie. 27 Narary fa ho nimaty vatany ie, fe niferinesa-Ndranahary, le tsy ie avao fa zaho koa, mba tsy hitohitohy marè ty alaheloko. 28 Halefako any farani-ze malaky zany ie, soa ho falifaly ndraiky nareo lafa mahita azy. Tsy hiasa loha marè koa aho amy zay. 29 Ka le rambeso soa ie, manahaky ty fataonareo lafa mandramby an’ny mpanori-dia an’ny Tompo rey. Tokony ho falifaly biby nareo lafa mandramby azy, le tiavo noho hajao avao ty olo manahaky azy, 30 satria tena nirisiky ie mba hanampea ahy lafa nanao ty asan’i Kristy,* ka fa ho nimaty mihintsy. Nareo moa tsy eto ka tsy afaky manampy ahy.

3 Farany rahalahy, mifalifalea avao satria miharo raiky amy Tompo nareo. Tsy mampanino ahy ty mampimpolimpoly manoratsy aminareo raha mitovy avao, sady mba hiarova anareo ty antony anaovako ani-zay.

2 Miambena soa amy ty amboa,* miambena soa amy ze olo manao raha raty amin’olo, le miambena soa amy ze olo mampirisiky anareo hosavary.* 3 Fa tsika ro tena nisavary, satria manao fanompoa masy amy alalan’ny fanahi-Ndranahary. Kristy Jesosy ro mampirengirengy antsika, sady tsy miantehitsy amy nofotsy tsika. 4 Laha misy olo tena mana antony iantehera amy nofotsy, le zaho zay.

Sady laha misy olo mieritseritsy hoe afaky miantehitsy amy nofotsy, le mbo lakolakoni-zay aho. 5 Fa zaho nisavary tamy andro fahavalo, baka amy firenenan’Israely, baka amy fokon’i Benjamina, Hebreo naterakin’ny Hebreo, sady Fariseo laha ty lalàna ro resahy. 6 Laha resaky hafanam-po, le nanenjiky ty fiangona aho. Laha ze raha volanin’ny lalàna hoe marina koa, le norihiko iaby. 7 Fe rambesiko ho fatiantoky* iaby tombontsoa niazoko taloha rey, mba hahafahako manori-dia an’i Kristy. 8 Ankoatsini-zay, tena rambesiko ho fatiantoky koa ty raha iaby, satria tena vatan-draha ty mahay an’i Kristy Jesosy Tompoko. Ie ro nahavy ahy nahafoy ty kila raha iaby, le nirambesiko sahala fako miavotsy io raha rey, soa hahazo hatò amy Kristy aho, 9 sady ho hita hoe miharo raiky aminy. Fe tsy hoe ty fanorihako Lalàna ro maha olo marina ahy, fa ty finoako an’i Kristy. Ka amy Ndranahary le olo marina aho, satria manam-pinoa. 10 Tsy zay fa teako ty hahay an’i Kristy noho ty herin’ny fameloma azy tamy ie nimaty iny. Teako koa ty ho parè hijaly manahaky azy, ka haneky ho maty manahaky azy. 11 Ta hiezaky marè koa aho, hay ndre mba ho anatini-azy hovelomy alohaloha rey.

12 Mbo tsy nahazo an’ny loka iny aho, sady mbo tsy natao lavorary. Fe mbo miezaky aho, hay ndre ho azoko avao loka iny, satria zay ty antony nifilianan’i* Kristy Jesosy ahy. 13 Rahalahy, zaho aloha tsy mieritseritsy hoe fa nahazo an’ny loka iny. Fe azoko antoky raha raiky toy: Tsy tiaroviko sasy ty raha afara any, fa miezaky marè aho hanatratsy ty raha aloha eo. 14 Miezaky manatratsy an’ny raha kendrè iny aho, zany hoe loka hamea-Ndranahary ani-ze olo kaihiny amy alalan’i Kristy Jesosy iny, tsy ino zay fa ty fiaina an-danitsy any. 15 Tokony hana an’ny toe-tsay zay zany ze matotsy amintsika eo. Le hambara-Ndranahary anareo toe-tsay zay, laha manaly ta hieritseritsy raha hafa nareo, ndre ino zay ndre ino. 16 Fe fa misy fandrosoa nivitantsika, ka ndao tsika hiezaky handroso am-pilamina avao, mifanaraky amy ty fa nahazatsy antsika.

17 Manahafa ahy iaby nareo rahalahy, le diniho soa ze manaraky an’ny modely natoronay anareo iny, 18 satria maro ty olo mitsanga ho fahavalon’ny hazo fijalean’i* Kristy. —Fa niresaky matetiky mikasiky an’ny olo reo aho, le mbo miresaky mikasiky an-drozy avao henanizao, sady latsaky ty ranomasoko. — 19 Fandripaha ro hiafaran-drozy, le ty kibon-drozy ro ndranaharin-drozy. Ty raha tokony hahamenatsy an-drozy koa ro ataon-drozy voninahitsy, le ty raha an-tany etoy ro ifantohan’ny sain-drozy. 20 Fe an-danitsy any ty tanindrazantsika,* le mandiny marè an’ny mpanavotsy bakany iny tsika, tsy ia zay fa Jesosy Kristy Tompo. 21 Ie ro hanova an’ny vatantsika tsy misy dikany toy mba hanahaky* ty vatany be voninahitsy. Ty heriny bevata ro hanaovany an’ny raha zay, zany hoe ty hery ampiasany mba hahavy ty raha iaby ho ambany fahefàny eo.

4 Laha zay ie rahalahiko teako biby noho imaninako, rahalahiko mahafalifaly ahy sady voninahitsiko,* le miezaha hivahatsy soa amy Tompo ao manahaky ani-zay avao.

2 Mampirisiky an’i Eodia aho, le mampirisiky an’i Syntyke koa mba hitovy hevitsy lafa manompo an’ny Tompo. 3 Mangataky anao koa aho, amy maha mpiaraky miasa marìny* antsika, mba hanampy an-drozy roe vavy avao. Tsy zay fa niezaky* marè nitory ty vaovao soa niaraky tamiko rozy, niaraky amy Klementa noho ty mpiaraky miasa amiko hafa, le samby amy bokin’ny fiaina ao iaby ty anaran-drozy.

4 Mifalifalea avao amy fanompoa an’ny Tompo. Ampoliko ndraiky, mifalifalea! 5 Anovo hain’olo iaby hoe mahay mandanjalanja* nareo. Marìny ty Tompo. 6 Ka miasa loha mihintsy, ndre amy ino zay ndre amy ino, fa amy raha iaby le ambarao a-Ndranahary ty fangatahanareo, amy alalan’ny vavaky noho fisolohoa noho fisaora. 7 Le ty fiadana-Ndranahary, azy mandilatsy lavitsy ani-ze raha iaby hain’olombelo iny, ro hiamby ty fonareo noho ty sainareo* amy alalan’i Kristy Jesosy.

8 Farany rahalahy, ndre ino ndre ino marina, ndre ino ndre ino vatan-draha, ndre ino ndre ino mety,* ndre ino ndre ino malio, ndre ino ndre ino soasoa,* ndre ino ndre ino soa laza, ndre ino ndre ino maeva hajà, ndre ino ndre ino maeva horengè,* le zay avao ro eritsereto.* 9 Anovo avao ze raha nianaranareo noho ze raha nekenareo noho nirenareo sady nihitanareo tamiko, le enganè hitahy anareo Ndranaharin’ny fiadana iny.

10 Amy maha mpanompon’ny Tompo ahy, le falifaly biby aho satria lasa mieritseritsy ze hahasoa ahy ndraiky nareo henanizao. Fa nieritseritsy hanampy ahy avao nareo liany fa ela, fe tsy niafaky nanao ani-zay. 11 Tsy hoe sahira aho kanao mivola ani-zay, satria fa nianatsy ho afa-po amy ze raha misy eo aho. 12 Haiko hoe manao akory tsy mana zao, fe haiko koa hoe manao akory mana raha maro zao. Nianatsy ho afa-po* avao aho ndre vintsy ndre mosarè, ndre mana raha maro ndre tsy mana mihintsy, ndre ino ndre ino raha miseho amy fiainako. 13 Tsy zay fa mana ty hery hiatreha ty kila raha iaby aho amy alalani-azy manome hery ahy iny.

14 Fe ndre zay, le soa ty nataonareo satria nanampy ahy nareo lafa nisahira aho. 15 Hainareo Filipianina koa hoe lafa niala ta Makedonia any aho, tamy nareo vo naharè mikasiky vaovao soa iny, le tsy mba nisy fiangona nanampy ahy na naneky hampeako laha tsy nareo avao. 16 Fa tamy zaho mbo ta Tesalonika any, le nandefa raha ho ahy nareo mba hahazoako ze raha nilàko, tsy indraiky avao fa indroe mihintsy. 17 Tsy hoe ta hahazo fanomeza aho, fa teako laha manao raha soa avao nareo mba hitombo ty hanananareo.* 18 Fe ananako iaby ze raha ilàko, le mbo mandilatsy aza. Tsy misy raha ijaleako mihintsy henanizao, satria niazoko raha nampandesinareo an’i Epafrodito rey. Manahaky raha manimanitsy noho soro tea-Ndranahary raha rey sady tena mahafalifaly azy. 19 Ka azy Ndranahariko panarivo voninahitsy iny ro hanome anareo ze raha iaby ilànareo amy alalan’i Kristy Jesosy. 20 Enganè ho ahi-Ndranahary Babantsika iny ty voninahitsy mandrakizay mandrakizay! Amena.

21 Mampamangy amin’olo masy miharo raiky amy Kristy Jesosy rey iabiaby. Mampamangy anareo zao rahalahy amiko eto reto. 22 Mampamangy zao hoy ty olo masy iabiaby, sirtò hoasani-azy amy lapan’i* Kaisara ao reo.

23 Enganè Jesosy Kristy hampiseho hasoam-panahy miavaky aminareo satria mana toe-tsay soa nareo.