HO AHI-TY KOLOSIANINA

1 Baka amy Paoly, apostolin’i Kristy Jesosy tamy alalan’ny sitrapo-Ndranahary, noho Timoty rahalahintsika.

2 Ho ahi-ty olo masy noho ty rahalahy tsy mivaliky a Kolosia any, azy miharo raiky amy Kristy rey:

Enganè Ndranahary Babantsika iny mba hampiseho hasoam-panahy miavaky* aminareo sady hanome fiadana anareo.

3 Tsy mieny misaotsy an’ny Ndranahary Baban’i Jesosy Kristy Tompontsika iny zahay, lafa mivavaky ho anareo. 4 Tsy zay fa renay ty finoanareo an’i Kristy Jesosy noho ty fitiavanareo ty olo masy iaby, 5 satria mana an’ny raha tamany nihajarỳ ho anareo an-danitsy any iny nareo. Fa naharè mikasiky an’ny raha tamany io nareo taloha, lafa nitorỳ taminareo ty fahamarina, zany hoe vaovao soa 6 niavy taminareo any iny. Le mamoa vaovao soa io sady miparitaky amy zao tontolo zao, manahaky ty aminareo atoy koa nanomboky tamy andro naharezanareo noho nahaizanareo soa an’ny tena hasoam-panahy miavaky aseho-Ndranahary iny. 7 Zay ty nianaranareo tamy Epafra, mpiara-manompo tea antsika noho tsy mivaliky sady mpanompon’i Kristy misolontena anay iny. 8 Ie koa ro nanambara taminay hoe ampean’ny fanahy masy hampiseho fitiava nareo.*

9 Zay koa ro nahavy anay hivavaky noho hangataky ho anareo avao, nanomboky tamy andro naharezanay an’ny raha zay. Nangataky zahay mba ho hainareo soa ty sitrapony, ka hana ty fahendrea iaby nareo sady hahazo ani-ze teany hovolany, satria ampean’ny fanahy masy nareo. 10 Amy zay hanome voninahitsy an’i Jehovah ty fandaisam-batanareo, ka hampifalifaly azy tanteraky nareo. Hamokatsy voa soa koa nareo ka hanao raha soa avao sady vomaiky hahay soa a-Ndranahary. 11 Enganè Ndranahary hampiasa ty heriny be voninahitsy, ka hanatanjaky anareo noho hanome anareo ani-ze hery iaby ilànareo. Amy zay ho vitanareo ty hiaritsy ty raha iaby sady hanam-pahareta noho ho falifaly nareo. 12 Le misaora an’ny Babantsika iny, fa ie ro nanampy anareo haeva hahazo amy lovan’olo masy amy mazava ao iny.

13 Nanavotsy antsika tamy fahefàn’ny maìky ie le namindra antsika tamy fanjakàn’ny Anany teany iny any. 14 Tamy alalan’ny Anany io ro nanafaha noho nanavota antsika, zany hoe nahazoantsika fanengà hadisoa. 15 Ie ro sorakin’ny Ndranahary* tsy hita maso iny, le ie ro talanolo amy raha iaby namboari-Ndranahary, 16 satria ie ro nampiasà-Ndranahary lafa niforony ty raha hafa iaby an-danitsy any noho an-tany etoy, zany hoe ty raha hita noho ty raha tsy hita, ndre sezim-panjakà zay, ndre fitondrà, ndre fanjakà, ndre fahefà. Ie ro nampiasà mba hamorona ty raha hafa iaby sady niforony mba ho azy raha zay. 17 Nisy talohan’ny raha hafa iaby koa ie, le ie ro nampiasà mba hampisy ty raha iaby. 18 Ie ro loha amy vata iny, zany hoe amy fiangona. Ie ro fanomboha sady talanolo amy ty maty. Ie zany ro voalohany amy raha iaby, 19 satria tea-Ndranahary hana ty kila toetsiny iabiaby Kristy. 20 Tamy alalan’i Kristy koa, zany hoe tamy alalan’ny lio nalatsakiny tamy hazo fijalea* eo, ro nampilongoa-Ndranahary ty raha hafa iaby aminy, ndre ty raha an-tany etoy zay ndre ty raha an-danitsy any.

21 Lavitsy a-Ndranahary vatany nareo taloha sady fahavalony satria nifantoky tamy fanaova raha raty ty sainareo. 22 Nampilongoa-Ndranahary taminy nareo henanizao lafa nimaty azy nanao soro ty vatany nofotsy iny, amy zay nareo ho masy noho tsy misy handra sady tsy misy hokinokinoa lafa amea aminy eo. 23 Fe mila manam-pinoa avao nareo vo hiseho raha zay, sady mila mivahatsy soa amy fototsy iny eo ka tsy mihozonkozo, na hoe lasa tsy mitamà sasy* an’ny vaovao soa iny. Fa nirenareo sady fa nitorỳ tamy raha iaby namboari-Ndranahary ambany lanitsy etoy vaovao soa io. Le lasa mpanompo mitory an’ny vaovao soa io zaho Paoly.

24 Falifaly aho henanizao satria mijaly mba hahasoa anareo. Miaritsy ty fijalean’i Kristy aho, zany hoe fijalea mbo tsy niaretan’ny vatako, mba hahasoa an’ny vatany iny, tsy ino zay fa ty fiangona. 25 Lasa mpanompon’ny fiangona io aho, mifanaraky amy andraikitsy nankini-Ndranahary tamiko mba hahasoa anareo iny, tsy ino zay fa ty hamita ty fitoria ty safà-Ndranahary, 26 anatini-zay sekirè masy navony fa liany tamy fotoa nisiani-zao tontolo zao* iny noho zisiky amy taranaky taloha any iny. Fe fa nambara tamy olony masy iaby raha iny henanizao. 27 Le tea-Ndranahary hambara an-drozy sekirè masy iny, azy hanana be voninahitsy iny, sady teany hambara amy firenena rey eo koa. Tsy ino sekirè io fa hoe miharo raiky aminareo Kristy, zany hoe mitamà nareo fa hamea voninahitsy miaraky aminy. 28 Ie ro torinay, ka mananatsy ty olo iaby zahay sady mampianatsy ty olo iaby am-pahendrea.* Amy zay mba olo matotsy noho miharo raiky amy Kristy ro hameanay a-Ndranahary. 29 Zay ty tena mahavy ahy hiasa mafy, noho hiezaky marè satria tena miasa anaiko ato heriny iny.

2 Fa teako ho hainareo fa mialy ay aho mba hahasoa anareo noho mba hahasoa ani-ze a Laodikia any sady mba hahasoa ani-ze olo iaby mbo tsy nahita ahy.* 2 Amy zay hahazo fampionona ty fon-drozy le tena hiharo raiky noho hifankatea rozy. Le ho azon-drozy koa ty hanana iaby, zany hoe hazava soa amin-drozy noho ho azon-drozy antoky tanteraky sady ho hain-drozy soa sekirè masi-Ndranahary iny, tsy ia zay fa Kristy. 3 Navony soa aminy ao ty hanana lafovily iaby, zany hoe ty fahendrea noho ty fahaiza. 4 Nivola an’ny raha zay aho mba tsy hisy olo hamitaky anareo amy hevitsy maharesy lahatsy. 5 Fa ndre tsy aminareo any aza aho,* le aminareo any ty saiko, ka falifaly aho mahay hoe milamy soa nareo sady matanjaky soa ty finoanareo an’i Kristy.

6 Manahaky ty fa nanekeanareo an’i Kristy Jesosy Tompo zany, le miezaha koa hiaraky mandeha aminy avao. 7 Mifanaraky amy ty fa nampianary anareo koa, le tokony hivahatsy soa noho ho mafy fototsy aminy eo nareo sady tsy tokony ho voahozonkozo amy finoa, noho ho feno fisaora a-Ndranahary.

8 Miambena soa tsy no hisy hamandriky anareo* amy filozofỳ noho ty hevitsy mamitaky tsy misy dikany. Baka amy fampianara nifandovan’olombelo noho toe-tsaini-zao tontolo zao* raha rey, fa tsy baka amy Kristy. 9 Tsy zay fa ananan’i Kristy iaby lafa kila toetsi-Ndranahary. 10 Fa azonareo amy alalany iaby zany ty raha iaby. Ie ro lohan’ny fanjakà noho ty fahefà iaby. 11 Mifandramby amy Kristy nareo ka nisavary, fe tsy nisavarin’ny tanan’olo, lafa nialanareo ty raha raty fataon’ny vata nofotsy. Manahaky ani-zay ty fanavara ty mpianatsin’i Kristy. 12 Tsy zay fa niaraky nalevy taminy nareo tamy batisany, le niaraky nivelomy aminy koa satria mifandramby aminy sady mino ty heri-Ndranahary, azy namelo azy ndraiky iny.

13 Ndre nimaty vokatsin’ny hadisoanareo koa aza nareo sady tsy nisavary, le nivelomi-Ndranahary niaraky tamy Kristy. Soa fanahy Ndranahary, ka nanenga ty hadisoa iaby nivitantsika. 14 Le nifafàny* lalàna nisy didy maro iny, tsy ino zay fa ty lalàna nisoraty mba hanaporofoa hoe tsy mety ty raha nataontsika. Niravàny raha iny lafa nifantsihiny tamy hazo fijalea* eo. 15 Nataony tsy amin-tsiky noho nasehony tamasom-bahoaky eny tamy alalan’ny hazo fijalea* ty fanjakà noho ty manam-pahefà. Niresiny rozy le nandesiny ho babo tamy filaharan’ny mpandresy ao.

16 Ka misy engà hitsara anareo amy ze raha haninareo noho inominareo zany, ndre mikasiky fankalazà fety zay ndre fankalazà pea-bola ndre fitandrema sabata. 17 Alokin’ny raha ho avy raha rey, fa ty tena ie le Kristy. 18 Ka engà hisy hisaka anareo tsy hahazo an’ny loka iny ty olo manao kisary miambany noho mivavaky amy anjely.* Mivahatsy marè* amy ty raha hitan-drozy rozy. Mirengirengy fahatany koa rozy satria mieritseritsy arakin’ny nofotsy, 19 ka tsy mitambatsy amy loha iny, kanefa loha iny ro manome ty raha iaby ilàn’ny vata noho mahavy ty vata iabiaby hitambatsy soa, satria miasa ty fitohizan’ny taola noho ty hozatsy. Le amy alalan’ny loha io Ndranahary ro mampitombo an’ny vata iny iabiaby.

20 Fa niaraky nimaty tamy Kristy nareo sady fa tsy naneky hanaraky ty toe-tsaini-zao tontolo zao* sasy. Le manino zany nareo ro mbo sahala hoe anisani-zao tontolo zao avao, ka mbo manoriky ty didy hoe: 21 “Ka mandramby, ka manandra, noho ka mikasiky?” 22 Didy rey le miresaky mikasiky ty raha iaby ho rava lafa hany noho inomy, sady fampianaran’olombelo avao. 23 Atao raha ho fahendrea didy rey, kanefa tsy manampy ty olo hialy amy ty fanirian’ny nofotsin-drozy, satria rozy avao ro mifily ani-ze raha tean-drozy hatao amy resaky fivavaha, sady manao kisary miambany noho mampijaly ty vatan-drozy rozy.

3 Fe laha niaraky nivelomy tamy Kristy nareo, le ilao avao ty raha anabo any, amy ze ipetrahan’i Kristy any, ankavana-Ndranahary eo. 2 Afantoho amy raha anabo any avao ty sainareo, fa tsy amy raha an-tany etoy. 3 Tsy zay fa fa nimaty nareo, le ty fiainanareo koa fa nankiny tamy Kristy, azy miharo raiky amy Ndranahary iny. 4 Le lafa aseho Kristy, azy fiainantsika iny, le haseho koa nareo ka hahazo voninahitsy miaraky aminy.

5 Vonò zany ty faniria raty amy rantsambatanareo* ao, zany hoe ty fijangajangà,* fahalotoa, fanirian’ny nofotsy tsy voafehy, faniria hanao raha raty, noho faniria tsy mety afa-po, tsy ino zay fa ty fanompoa sampy. 6 Ho meloky amy ty olo manao an’ny raha reo Ndranahary. 7 Fa mpanao an’ny raha reo koa nareo taloha sady fa niay tanatin’ny raha reo.* 8 Fe henanizao, afaho hiala aminareo iaby raha retoa: Siaky tafahoatsy, heloky, faharatia, safà maharary, noho ze resaky tiva volanin’ny vavanareo. 9 Ka mifampavandivandy nareo. Afaho ty toetsinareo taloha,* le ialao koa ze raha fataonareo mifandramby amy zay. 10 Le anisio ty toetsy vaovao, azy havaozy tsikelikely hifanaraky amy toetsini-azy* namoro azy iny, arakaraky ty ahaizanareo soa ty fahamarina. 11 Amy zay le tsy misy sasy ty hoe Grika na Jiosy, na misavatsy na tsy misavatsy, na olo firenena hafa, na Skytianina,* na andevo, na olo afaky. Fa Kristy ro raha iaby sady amin’olo iabiaby ao.

12 Nifilì-Ndranahary nareo, le masy sady tena teany. Ka le misikìna fitiava laliky noho fiferinesa, hasoam-panahy, fiambanea, fahalemeam-panahy noho fahareta. 13 Mahaiza avao mifandefitsy noho mifanenga hadisoa tanteraky, ndre misy mana antony itoreova mikasiky ty olo sisany aza. Nanenga tanteraky ty hadisoanareo Jehovah, ka mba manaova manahaky ani-zay koa nareo. 14 Fe mbo mandilatsy an’ny raha iaby rezay, le misikìna fitiava, satria sahala taly tena soa mampifamehy antsika raha io.

15 Engao hanjaka am-ponareo ao* ty fiadanan’i Kristy, satria nikaihi-Ndranahary nareo mba hahazo an’ny fiadana zay ka ho lasa vata raiky. Atorò koa hoe mahay mankasitraky nareo. 16 Enganè hameno tanteraky ty fonareo ty safàn’i Kristy, ka ho hendry vatany nareo. Miezaha avao hifampianatsy noho hifampahery,* ka manaova salamo noho fiderà a-Ndranahary, noho hira masy mba ho fisaora azy.* Le mihirà amy fo* ho an’i Jehovah. 17 Ndre ino ndre ino raha volaninareo na ataonareo, le anovo amy anaran’i Jesosy Tompo iaby raha rezay, ka misaora an’ny Ndranahary Babantsika iny amy alalany.

18 Nareo ampela, manekea ty valinareo, satria zay ro mety amy Tompo ao. 19 Nareo lahilahy, tiavo avao ty valinareo sady ka meloky marè* amin-drozy. 20 Nareo anaky, oriho ty safàn’ny ray aman-dreninareo amy kila raha iaby, satria zay ro mampifalifaly an’ny Tompo. 21 Nareo baba, ka manao ze mampeloky ty ananareo, mba tsy ho kivy rozy. 22 Nareo mpanompo, oriho ty safàn’ny tomponareo* amy kila raha iaby. Tsy hoe lafa manara-maso anareo avao rozy vo tokony hanao ani-zay nareo, sahala hoe ta hampifalifaly olo avao,* fa oriho amy fo raha zay, satria matahotsy an’i Jehovah nareo. 23 Ze raha iaby ataonareo le anovo amy fo iaby, sahala hoe ho an’i Jehovah fa tsy ho an’olo, 24 satria hainareo hoe baka amy Jehovah ro hahazoanareo an’ny lova iny, ho valin’ny raha soa nataonareo. Le manompoa an’ny Tomponareo iny, zany hoe Kristy. 25 Ze manao raha raty le azo antoky hoe hahazo ty valin’ny raha raty nataony, satria tsy mitingy volon’olo* Ndranahary.

4 Nareo tompo, manaova ty rariny noho raha mahity amy mpanomponareo, satria hainareo fa ndre nareo koa mba mana Tompo an-danitsy any.

2 Mahareta amy vavaky. Ka halino mihintsy ty mivavaky noho misaotsy.* 3 Mivavaha koa ho anay, amy zay hanokatsy varavara ho anay Ndranahary, mba hahafahanay hitory ty safàny noho hivola ty sekirè masy mikasiky an’i Kristy, satria zay ro mahavy ahy horohiza seny. 4 Amy zay koa ho afaky hanazava soa an’ny sekirè zay aho, mifanaraky amy ze tokony hataoko.

5 Mampisehoa fahendrea avao lafa mifandramby amin’olo ivelany eny. Le ampiasao soa ty fotoanareo.* 6 Anovo soasoa noho mamy sira avao ty raha volaninareo, mba ho hainareo ze tokony havalinareo ty olo kiraidraiky.

7 Hovolanin’i Tykiko, rahalahiko teako, aminareo iaby ty vaovao mikasiky ahy. Mpanompo azo atokisa noho mpiaraky manompo amiko amy Tompo ao ie. 8 Irahiko ho aminareo any ie, amy zay ho hainareo hoe manao akory zahay, le ie koa ho afaky hampionona ty fonareo. 9 Miaraky aminy koa Onesimosy, rahalahy azo atokisa sady teako, azy baka aminareo any iny. Hovolanin-drozy aminareo iaby ty raha miseho atoy.

10 Mampamangy anareo zao Aristarko mpiaraky migadra amiko, noho Marka. Anan’olo troky raiky Marka noho Barnabasy—Marka azy nivolany taminareo iny hoe rambeso soa lafa avy aminareo any.— 11 Mampamangy anareo zao koa Jesosy, azy kaihy hoe Josto iny. Nisavary koa rozy iaby reo, sady rozy avao ro mpiaraky miasa amiko mba hampandroso ty Fanjakà-Ndranahary. Rozy koa ro tena nanampy noho nampahery* ahy. 12 Mampamangy anareo zao Epafra, azy baka aminareo any iny, sady mpanompon’i Kristy Jesosy. Miezaky marè avao ie mivavaky ho anareo, amy zay nareo ho matotsy* avao, sady hatòky tanteraky ty sitrapo-Ndranahary iabiaby. 13 Zaho ro vavolombelo fa tena miezaky vatany ie mba hahasoa anareo, noho mba hahasoa ani-ze a Laodikia noho Hierapolia any.

14 Mampamangy anareo zao Lioka dokotera sady rahalahiko teako, noho Demasy. 15 Mampamangy amy rahalahy a Laodikia any rey, le mampamangy koa amy Nymfa any noho ty fiangona mivory an-tranony ao. 16 Ka lafa baka nivakỳ aminareo eo taratasy toy, le alefaso amy fiangona a Laodikia any mba hovakỳ any koa. Le mba vakio koa azy baka a Laodikia any iny. 17 Mba volano koa Arkipo hoe: “Anovo soa avao hoe fanompoa nekenao amy maha mpanori-dia an’ny Tompo anao iny, amy zay ho vitanao soa raha zay.”

18 Toy ty veloma nisoratin’ny tanako, zaho Paoly. Tiarovo avao fa rohiza seny aho. Enganè nareo hampisehoa an’ny hasoam-panahy miavaky iny.