TY TARATASY VOALOHANY HO AHI-TY TESALONIANINA

1 Baka amy Paoly noho Silvano* noho Timoty.

Ho ahi-ty fiangona a Tesalonika any, azy miharo raiky amy Ndranahary Babantsika noho Jesosy Kristy Tompo iny,

Enganè nareo hampisehoa hasoam-panahy miavaky* sady hamea fiadana!

2 Tsy mieny misaotsy a-Ndranahary zahay lafa miresaky mikasiky anareo iaby amy vavaky, 3 satria tiaronay avao anatrehan’ny Ndranahary Babantsika iny eo ty raha ataonareo vokatsin’ny finoanareo, noho ty asa mafy ataonareo am-pitiava, noho ty fiareta anananareo baka amy fitamananareo an’i Jesosy Kristy Tompontsika. 4 Rahalahy, tea-Ndranahary nareo! Hainay hoe nifily anareo ie, 5 satria vaovao soa nitorinay taminareo iny, le tsy hoe resaky avao fa hafatsy bevata koa. Nampean’ny fanahy masy koa zahay, tamy zahay nitory taminareo, sady tena nieky fa marina ty raha nitorinay, le hainareo hoe lasa olo nanao akory zahay taminareo eo mba hahasoa anareo. 6 Lasa nanahaky anay noho nanahaky an’ny Tompo nareo, satria ndre niaritsy fijalea marè aza nareo, le nifalifaly naneky ani-ze raha nitorinay lafa nampean’ny fanahy masy. 7 Le lasa modely ho ahi-ty mpino iaby a Makedonia noho a Akaia any nareo.

8 Laha ty marina, tsy hoe nampiparitaky ty safàn’i Jehovah ta Makedonia noho ta Akaia any avao nareo, fa nalaza mbaombao koa ty finoanareo a-Ndranahary, ka tsy mila mivola ndre ino ndre ino sasy zahay. 9 Mbo tantaranin-drozy avao tsika nifankahita voalohany iny. Tantaranin-drozy koa hoe nitoliky tamy Ndranahary nareo, ka niala tamy sampy mba hanompo an’ny Ndranahary velo sady marina iny, 10 le handiny an’ny Anany baka an-danitsy any iny, azy nivelominy ndraiky iny, tsy ia zay fa Jesosy. Manafaky antsika mba tsy ho tratsin’ny heloki-Ndranahary amy hoavy Anany io.

2 Hainareo soa rahalahy fa tsy misera ty fitsidihanay anareo. 2 Satria ndre nijaly noho nafahy baraka aza zahay ta Filipy any, araky ty fa hainareo, le nampean’ny Ndranaharintsika iny mba hahasaky* hitory ty vaovao soa taminareo, ndre narè aza ty fanohera nahazo anay.* 3 Lafa mampirisiky anareo zahay, le tsy hoe mivola raha diso, na hoe raty say, na ta hamitaky anareo. 4 Fe fa nekè-Ndranahary hoe maeva hankiny aminay ty fitoria ty vaovao soa. Ka lafa mivola zany zahay, le tsy olo ro teanay hampifalifalea, fa Ndranahary, azy mandiniky ty fonay iny.

5 Hainareo fa mbo tsy nandroboroboky anareo mihintsy zahay laha ty marina, na nanao kisary soa fanahy mba hahazoa raha. Ndranahary mahita! 6 Tsy nila voninahitsy baka amin’olo koa zahay, ndre baka aminareo zay ndre baka amin’olo hafa, kanefa afaky nampanday enta mavesatsy anareo tamy resaky drala zahay, amy maha apostolin’i Kristy anay. 7 Mifanohitsy amy zay aza fa nisoa fanahy zahay lafa taminareo eo, manahaky reny mampinono noho mikarakara am-pitiava ty anany* naterany io. 8 Satria tena teanay nareo, le tapa-kevitsy zahay* hoe tsy ty vaovao soa-Ndranahary avao ro hameanay anareo, fa ndre ty ainay koa aza. Tsy zay fa teanay biby nareo.

9 Tiaronareo soa rahalahy hoe niasa mafy noho niezaky marè zahay. Niasa avao zahay ndre andro ndre haly, lafa nitory ty vaovao soa-Ndranahary taminareo, mba tsy hampanday enta mavesatsy ndre ia ndre ia aminareo amy resaky drala. 10 Nareo noho Ndranahary ro mahita fa tsy nivaliky zahay, sady nanao raha marina noho tsy nisy kinokinoa lafa niaraky taminareo mpino. 11 Hainareo soa fa tsy nieny nampirisiky noho nampionona noho nanoro hevitsy anareo kiraidraiky zahay, manahaky ty ataon’ny baba amy ty anany. 12 Amy zay ty fiainanareo haeva ty anaran’ny Ndranahary nikaiky anareo ho amy Fanjakàny noho amy voninahitsiny ao iny.

13 Zay koa ro mahavy anay tsy mieny misaotsy a-Ndranahary, satria lafa naharè ty safà-Ndranahary nitorinay nareo, le tsy nirambesinareo ho safàn’olo raha zay, fa araky ty tena ie, zany hoe safà-Ndranahary. Le misy vokany aminareo mpino koa safà-Ndranahary zay. 14 Fa fa nanahaky an’ny fiangona-Ndranahary miharo raiky amy Kristy Jesosy a Jodia any rey nareo, rahalahy, satria nijaly tamy ty raha nataon’olo tanindraza raiky aminareo nareo, manahaky an-drozy mijaly amy ty raha ataon’ny Jiosy io koa. 15 Ndre Jesosy Tompo noho ty mpaminany aza nivonoan’ny Jiosy rey, le nenjehin-drozy koa zahay. Tsy tea-Ndranahary koa ty raha ataon-drozy sady tsy mahasoa olo mihintsy, 16 satria tean-drozy hosakana zahay mba tsy hitory amin’olo firenena hafa hoe ino ty atao mba ho avotsy. Vomaiky mampitombo ty fahotan-drozy rozy amy raha zay. Fe fa ho avy amin-drozy ty heloki-Ndranahary.

17 Fe lafa nisarahy* tsielatsiela taminareo zahay, rahalahy,—ty vatanay fa tsy ty fonay,—le tena niezaky marè mba hifankahita aminareo,* satria tena ta hahita anareo zahay. 18 Zay nahavy anay ta ho aminareo any io, ka niezaky ho any zaho Paoly, tsy indraiky avao, fa indroe mihintsy. Fe nisakanan’i Satana zahay. 19 Fa ino moa ty raha tamaninay, na raha mahafalifaly anay, na satroboninahitsy mampirengirengy anay amy Jesosy Tompontsika eo, amy fanatrehany? Tsy nareo va? 20 Nareo vatany ro voninahitsinay noho hafaleanay.

3 Ka lafa tsy nitantinay sasy ty tsy naharè vaovao mikasiky anareo, le naleonay nijano raiky ta Atena any, 2 fa Timoty ro nirahinay. Rahalahinay ie sady mpanompo-Ndranahary* mitory ty vaovao soa mikasiky an’i Kristy. Nirahinay ie mba hampivahatsy soa anareo noho hampahery anareo, le hana finoa matanjaky nareo. 3 Amy zay tsy hisy ho voahozonkozo nareo ndre eo aza fijalea rey, satria hainareo soa fa tsy maintsy miaritsy an’ny raha rey tsika.* 4 Fa tamy zahay taminareo eo, le matetiky zahay ro fa nivola taminareo sandrany hoe tsy maintsy miaritsy fijalea tsika. Zay vatany ty raha niseho, araky ty fa hainareo. 5 Ka lafa tsy nitantiko sasy, le nirahiko ho aminareo any Timoty mba hahaizako hoe tsy mivaliky va nareo. Tsy no nangala fanahy anareo avao azy Mpangala Fanahy iny, ka hisera avao ty asa mafy nataonay.

6 Fe vo henanizao mihintsy Timoty ro niavy aminay atoy lafa baka aminareo any, ka nivola vaovao soa taminay hoe tsy mivaliky nareo sady be fitiava. Nivola koa ie fa mbo manimany anay avao nareo, ka tena ta hahita anay, manahaky anay tena ta hahita anareo io koa. 7 Zay nahavy anay hahazo fampionona io rahalahy, ndre eo aza ty raha sarotsy* noho ty fijalea iaby iaretanay, satria renay ty mikasiky anareo noho ty tsy fivalihanareo.* 8 Velombelo ndraiky* zahay fa mivahatsy soa amy Tompo ao nareo. 9 Tena mahafalifaly anay alohan’ny Ndranaharintsika iny eo ty raha nataonareo. Ka akory lahy ty hisaoranay a-Ndranahary amy raha nataonareo zay? 10 Vomaiky misoloho marè marain-tsy hariva zahay mba hifankahita aminareo* noho hameno ani-ze tsy ampy amy ty finoanareo.

11 Enganè Ndranahary Babantsika iny noho Jesosy Tompontsika hanampy anay ho avy aminareo any! 12 Le enganè Tompo hampitombo marè ty fitiavanareo, ka vomaiky nareo hifankatea sady ho tea ty olo iaby manahaky ty itiavanay anareo avao! 13 Amy zay hataony matanjaky noho masy noho tsy misy kinokinoa amy Ndranahary Babantsika iny eo ty fonareo, lafa avy ty fanatrehan’i Jesosy Tompontsika, miaraky amy ty olony masy iabiaby.

4 Farany, rahalahy, fa nahazo toromariky taminay nareo hoe akory ty tokony hataonareo mba hahafalifaly a-Ndranahary ty fiainanareo, le fa zay ty ataonareo henanizao. Ka le mangataky noho misoloho aminareo amy anaran’i Jesosy Tompo zahay hoe tohizo avao raha zay, sady mbo anovo mandilatsy ani-zay aza. 2 Fa hainareo moa ty toromariky* nameanay anareo baka amy Jesosy Tompo.

3 Satria ho zao ty sitrapo-Ndranahary: Tokony ho masy nareo sady tokony ho faly anareo ty fijangajangà.* 4 Tokony hahay hitanjaky ty ainareo nareo kiraidraiky mba ho masy noho hisy hajany avao ty vatanareo,* 5 fa tsy hanao manahaky olo firenena hafa tsy mahay a-Ndranahary rey. Midada amy fanirian’ny nofotsy tsy voafehy olo rey, sady tsy mety afa-po mihintsy. 6 Tsy tokony hisy aminareo hanao raha tafahoatsy, ka hanararaotsy ty rahalahiny amy raha zay, satria manasazy ani-ze olo manao an’ny raha iaby rezay Jehovah, araky ty fa nivolaninay taminareo taloha teo noho nampitandreminay marerè anareo. 7 Fa tsy nikaiky antsika hanaraky fomba maloto Ndranahary, fa nikaiky antsika mba ho masy. 8 Ka ze tsy midary an’ny raha zay zany, le tsy olo ro tsy dareany fa Ndranahary, azy manome anareo ty fanahiny masy iny.

9 Fa laha resaky fitiavan-drahalahy ro resahy, le tsy mila manoratsy aminareo zahay, satria fa ampianari-Ndranahary hifankatea nareo. 10 Laha ty marina, fa manao an’ny raha zay amy rahalahy iaby a Makedonia* any nareo. Fe ampirisihinay avao nareo, rahalahy, mba hanao an’ny raha zay marerè. 11 Anovo raha kendrè ty ho tea filamina noho tsy hilitsilitsy amy fiainan’olo sady hiasa amy ty tananareo, mifanaraky amy ty fa natoronay anareo. 12 Amy zay ho hitan’olo ivelany eny hoe mahay manday soa ty fiainanareo nareo sady tsy misy raha mampijaly anareo.

13 Teanay ho hainareo* koa, rahalahy, ty mikasiky an’ny olo fa nimaty* rey, amy zay nareo tsy halahelo manahaky ty olo tsy mana raha tamany. 14 Fa laha mino tsika hoe nimaty Jesosy sady fa nivelo ndraiky, le mino koa tsika fa hovelomi-Ndranahary ze mpanori-dia an’i Jesosy fa nimaty mba hiaraky aminy. 15 Satria ho zao ty volaninay aminareo araky ty raha nivolanin’i Jehovah: Tsika iaby ze velo ka mbo ho eo amy fanatrehan’ny Tompo le tsy hovelomy alohani-ze olo fa nimaty, 16 fa ty Tompo mihintsy ro hijotso baka an-danitsy any, ka hikomandy marè amy feon’arkanjely noho amy feon’antsiva-Ndranahary. Le ze maty amy Kristy ao ro hovelomy voalohany. 17 Afarani-zay, tsika iaby ze velo ka mbo ho eo ro hampiakary miaraky amin-drozy anaty rahona ao, mba hifankahita amy Tompo amy lanitsy eny. Le hiaraky amy Tompo avao tsika. 18 Miezaha avao zany hifampionona, ka safà reo ro ampiasao.

5 Laha resaky andro noho fotoa, rahalahy, le tsy misy raha tokony hosoratinay aminareo, 2 satria hainareo soa hoe ho avy manahaky mpangalatsy amy haly io ty andron’i Jehovah. 3 Lafa mivola rozy hoe: “Fiadana noho filamina!”, le ho tratsin’ny fandripaha tampoky rozy, manahaky ampela marary tampoky lafa tsongoen-jaza rey. Le tsy ho afaky hilay mihintsy rozy. 4 Fe tsy amy maìky ao nareo, rahalahy, ka hoe ho tampoky aminareo andro zay, manahaky mpangalatsy tsy nieritseritsy ho tratsy andro rey. 5 Fa anan’ny mazava noho anan’ny andro nareo iaby. Tsy anan’ny haly tsika, sady tsy anan’ny maìky.

6 Ka ndao tsika tsy hiroro manahaky ty olo hafa, fa hiamby avao sady handiniky soa avao. 7 Amy haly moa ty fotoa iroroani-ze miroro, le amy haly koa ty olo mamolava ro manao mamo. 8 Fe anan’ny andro tsika, ka tokony handiniky soa avao, le ndao hataontsika fiarovan-tratra ty finoa noho ty fitiava, le hataontsika fiarovan-doha ty fitamana fanavota, 9 satria tsy nifilì-Ndranahary ho tratsin’ny helokiny tsika, fa mba havota amy alalan’i Jesosy Kristy Tompontsika. 10 Nimaty ho antsika ie, mba ho velo miaraky aminy tsika ndre mifoha ndre miroro.* 11 Ka le miezaha avao hifampahery* noho hifanampy, manahaky ty fa ataonareo henanizao.

12 Le zao ty angatahinay aminareo, rahalahy: Mba hajao azy miasa mafy aminareo eo rey, azy mitariky anareo amy asan’ny Tompo sady mananatsy anareo rey. 13 Angatahinay koa nareo mba tena ho soa fanahy amin’olo rey sady ho tea an-drozy satria miasa mafy rozy. Milongoa soa nareo.* 14 Mampirisiky anareo koa zahay, rahalahy, mba hampitandrina* ani-ze olo tsy mety anary, hampahery ty olo kivy, hanoha ani-ze malemy noho hanam-pahareta amin’olo iaby. 15 Miambena soa tsy no misy mamaly raty amy ty raty, fa miezaha avao hifanao raha soa noho hanao raha soa amin’olo iaby.

16 Mifalifalea avao. 17 Ka mieny mivavaky. 18 Mahaiza misaotsy amy raha iaby, fa zay ty sitrapo-Ndranahary ho anareo mpanori-dia an’i Kristy Jesosy. 19 Ka vonoa ty afon’ny fanahy.* 20 Le ka atao ambanin-draha ty faminania. 21 Anovo azo antoky hoe marina soa ty raha iaby, le ka miala amy ze raha soa mihintsy. 22 Falio iaby ze raha raty iabiaby.

23 Enganè Ndranaharin’ny fiadana iny mihintsy ro hanamasy tanteraky anareo. Rahalahy, enganè samby tsy hisy handra amy raha iaby toe-tsay noho fiaina noho vata iharoanareo iny, sady tsy hisy hokinokinoa mihintsy lafa avy ty fanatrehan’i Jesosy Kristy Tompontsika. 24 Tsy mivaliky amy ty safàny azy mikaiky anareo iny, ka tena hanao an’ny raha iaby rezay ie.

25 Rahalahy, mivavaha avao ho anay.

26 Arahabao amy oroky masy ty rahalahy iaby.

27 Misoloho aminareo amy anaran’ny Tompo aho mba hovakỳ amy rahalahy iaby taratasy toy.

28 Enganè Jesosy Kristy Tompontsika hampiseho hasoam-panahy miavaky aminareo.