TY TARATASY VOALOHANY HO AN’I TIMOTY

1 Baka amy Paoly, apostolin’i Kristy Jesosy, mifanaraky amy ty didi-Ndranahary Mpanavotsy antsika noho Kristy Jesosy, azy tamanintsika iny.

2 Ho an’i Timoty,* tena anako amy finoa ao,

Enganè Ndranahary Babantsika iny noho Kristy Jesosy Tompontsika mba hampiseho hasoam-panahy miavaky* aminao noho hiferinay anao, sady hanome fiadana anao!

3 Nangataky anao hijano ta Efesosy any aho, taloha kelikelin’ny handehanako a Makedonia atoy. Le mbo mangataky anao hijano any aho henanizao, amy zay iha afaky mandrara ty olo sisany tsy hampianatsy raha hafa, 4 na hijanjy tantara tsy marina, na handiniky tetiraza.* Tsy misy dikany raha reo satria mahavy ty olo hamatovato avao, fa tsy hahazoa ani-ze raha amea-Ndranahary mba hampatanjaky finoa. 5 Ty raha kendren’ny toromariky* zay, le ty hahavy antsika hana fitiava baka amy fo malio noho eritseritsy malio noho finoa tsy miatsaravelatsihy. 6 Niala tamy raha rezay ty olo sisany ka lasa nanao resaky tsy misy dikany. 7 Ta ho mpampianatsy lalàna rozy, kanefa tsy hain-drozy ty dikani-ze raha volanin-drozy na ze raha izizoan-drozy marè.

8 Haintsika hoe soa ty Lalàna, laha orihy mifanaraky amy ty tokony hanoriha azy, 9 satria haintsika fa tsy natao ho ahin’olo marina ty lalàna, fa ho ahin’olo mpandika lalàna noho mpizizo, tsy matahotsy a-Ndranahary noho mpanota, mpivaliky* noho tsy mpanaja raha masy, mpamono baba noho mpamono reny, mpamono olo, 10 mpijangajanga,* lahilahy mandry amy lahilahy,* mpangalatsy olo, mpavandy, mpivaliky amy raha nifantàny,* noho ho ani-ze olo manao raha hafa mifanohitsy amy fampianara mahasoa.* 11 Mifanaraky amy vaovao soa be voninahitsin’ny Ndranahary falifaly* iny fampianara zay. Le nankininy tamiko vaovao soa zay.

12 Misaotsy an’i Kristy Jesosy Tompontsika, azy nanome hery ahy iny aho, satria hitany hoe maeva atokisa aho ka nitendreny hanao fanompoa, 13 ndre mpanivativa a-Ndranahary aza aho taloha, sady mpanenjiky noho mpanambany olo. Niferinesany aho satria ty tsy fahaizako noho ty tsy finoako ro nanaovako an’ny raha rey. 14 Fe nampisehoan’ny Tompontsika hasoam-panahy miavaky maro aho, le nahazo finoa noho fitiava baka amy Kristy Jesosy. 15 Tena azo atokisa sady tena tokony hekè safà toy: Niavy tamy zao tontolo zao eto Kristy Jesosy mba hanavotsy ty mpanota, le zaho ro farani-ze mpanota amin’olo rey. 16 Fe nampisehoa fiferinesa aho mba ho amy alalako, zaho mpanota marè toy, ro hampisehoan’i Kristy Jesosy hoe tena mahaliny raha ie. Zaho ro nataony modely ho ani-ze olo hino azy mba hahazoa fiaina mandrakizay.

17 Loniky lahy ho an’ny Mpanjakan’ny mandrakizay iny, azy tsy mety lo sady tsy hita maso iny, zany hoe Ndranahary toka iny, ty haja noho ty voninahitsy mandrakizay mandrakizay! Amena.

18 Ankiniko aminao toromariky* zay, Timoty anako, mifanaraky amy ty faminania nivolany mikasiky anao, amy zay faminania rey ro handesinao manohy an’ny aly soa iny. 19 Miezaha avao koa hana finoa noho eritseritsy malio. Fa narian’olo sisany eritseritsy malio zay ka manjary manahaky sambo resy io ty finoan-drozy. 20 Anatin’olo rey Hymeneo noho Aleksandra. Fa nameako an’i Satana rozy, amy zay ty sazy azon-drozy ro hampianatsy an-drozy tsy hanivativa a-Ndranahary.

2 Alohan’ny raha iaby zany, le mampirisiky aho hoe manaova fisolohoa, vavaky, fangataha, noho fisaora ho ahi-ty karazan’olo iaby, 2 anatini-zay ty mpanjaka noho ze olo iaby mana pilasy anabo.* Amy zay tsika hana fiaina milamy avao noho tsy hisy raha manelingely, sady hahafoy tanteraky ty vatantsika ho ahi-Ndranahary noho ho matotsy soa. 3 Soa sady mahazo hatò amy Ndranahary Mpanavotsy antsika eo raha zay. 4 Le sitrapo-Ndranahary ty hanavota ty karazan’olo iaby noho ty hahaizan-drozy soa ty fahamarina. 5 Fa raiky ty Ndranahary, le raiky ty mpanelanela amy Ndranahary noho ty olo, tsy ia zay fa olo raiky kaihy hoe Kristy Jesosy. 6 Nanome ty vatany ho vilim-panavota mifandanja ie, mba hanavota ty olo iaby.* Hotorỳ amy fotoa voatondro hanaova azy raha zay. 7 Ka ty hitory an’ny raha zay ro nanendrea ahy ho mpitory noho ho apostoly,—mivola ty marina aho, fa tsy mavandy—ho mpampianatsy an’ny olo firenena hafa rey mikasiky ty finoa noho ty fahamarina.

8 Teako zany laha mivavaky avao ty lahilahy amy ze pilasy iaby ivorianareo any, ka tana malio* ro hasondrotsin-drozy mana anabo any lafa manao an’ny raha zay, sady tsy ho meloky na hialy hevitsy. 9 Ty ampela koa lafa mipozy, le tokony hanao fisikina mety soa noho maotina, sady handiniky soa,* le tsy hanao taly miavaky marè, na hiravaky volamena na perla na hanao akanjo sarotsy biby. 10 Fa tokony hifanaraky amy ampela mivola ty vatany ho mpivavaky amy Ndranahary ty pozin-drozy, ka ty asa soa ataon-drozy ro pozin-drozy.

11 Tokony hitsỳ* noho haneky soa ty ampela lafa ampianary.* 12 Tsy engàko hampianatsy na hana fahefà amy lahilahy ty ampela, fa tokony hitsỳ,* 13 satria Adama ro namboary voalohany, zay vo Eva. 14 Tsy Adama koa ro nivoafitaky fa ampela iny ro tena nivoafitaky, ka nanjary mpandika lalàna. 15 Fe ho voaaro avao ty ampela lafa manan’anaky, laha miezaky avao mba hana finoa noho fitiava sady ho masy noho hahay handiniky.*

3 Azo atokisa raha raiky toy: Laha misy olo miezaky ho lasa mpiandraikitsy, le maniry hanao asa soa ie. 2 Ka ty mpiandraikitsy zany le tokony ho olo tsy misy hokinokinoa, manambaly raiky avao, mahay mandanjalanja amy ze raha fataony, mandiniky soa,* tea filamina, tea mandramby vahiny, mahay mampianatsy, 3 tsy mamolava, tsy satà,* fa mpandefitsy,* tsy tea aly, tsy tea drala, 4 mahay manday* soa ty olo trano raiky aminy, sady mana anaky manoriky safà noho manaja azy soa 5 —fa laha misy lahilahy tsy mahay manday* ty olo trano raiky aminy, le ho hainy va ty hikarakara ty fiangona-Ndranahary?—, 6 tsy olo vo malimaly amy finoa, tsy no hirengirengy ie ka ho voasazy manahaky ty Devoly. 7 Tokony ho soa laza amin’olo ivelany eny koa ie, mba tsy ho afa-baraka na ho tratsin’ny fandrikin’ny Devoly.

8 Ty mpikarakara fiangona koa le tokony ho matotsy, tsy mamitaky olo amy ty raha volaniny,* tsy mpiboboky divay, tsy tea raha azo baka amy raha tsy marina, 9 le mitanjaky marè an’ny sekirè masy iny, zany hoe ty finoa, sady mana eritseritsy malio.

10 Tokony hohentea tse koa rozy mba ho hita laha maeva an’ny tombontsoa zay.* Bakeo ho lasa mpanompo* rozy satria tsy misy hokinokinoa.

11 Tokony ho matotsy koa ty ampela, tsy ho mpanasara raha olo, hahay handanjalanja amy ze raha fataony, sady ho azo atokisa amy raha iaby.

12 Tokony hanambaly raiky avao ty mpikarakara fiangona, sady hahay handay soa ty anany noho ty olo trano raiky aminy. 13 Fa ze lahilahy manao soa ty fanompoany le lasa soa laza, sady tena mahasaky miresaky mikasiky ty finoany an’i Kristy Jesosy.

14 Soratiko aminao avao raha reo, ndre mitamà aza aho fa ho aminao any tsy ho ela. 15 Amy zay laha ohatsy ka tara aho, le mba fa hainao ze tokony hataonao amy fianakavia-Ndranahary ao, zany hoe amy fiangonan’ny Ndranahary velo iny. Tombon-trano noho toha ho an’ny fahamarina fiangona zay. 16 Le tena bevata ty sekirè masy mikasiky ty fahafoizam-bata ho a-Ndranahary: ‘Nofotsy Jesosy lafa naseho, fa fanahy ie lafa nambara ho marina. Niseho tamy anjely ie, nitorỳ tamin’olo firenena hafa teo, ninoan’olo tamy zao tontolo zao etoy, sady nirambesy tam-boninahitsy tan-danitsy any.’

4 Fe mivola mazava soa ty fanahy masy hoe hiala amy finoa ty olo sisany lafa afara any, satria mijanjy safà mamitaky baka amy fanahy* noho mijanjy fampianaran’ny demonia. 2 Hiala koa rozy tratsin’ny vandy volanin’olo soavolamanatriky rey, tsy ia zay fa azy mana eritseritsy sahala tinombokin’ny vy may rey. 3 Raràn-drozy tsy hanambaly ty olo, le mampiboaky didy rozy hoe tsy azo hany ty hany sisany. Kanefa niforoni-Ndranahary mba hohany raha rey, ka ho afaky hisaotsy Azy amy raha zay ty olo manam-pinoa noho mahay soa ty fahamarina. 4 Tsy zay fa soa iaby ty raha niforoni-Ndranahary, sady tsy tokony handà tsy hihina hany sisany tsika, laha mankasitraky lafa mandramby an’ny raha zay, 5 satria ty safà-Ndranahary noho ty vavaky ro manamasy an’ny raha rey.

6 Laha manome an’ny torohevitsy zay an’ny rahalahy reo iha, le ho mpanompo soan’i Kristy Jesosy, zany hoe ho mpanompo velo amy safàn’ny finoa, noho amy safàn’ny fampianara soa, azy fa orihinao marìny iny. 7 Fe ka mijanjy tantara tsy marina, zany hoe ty tantara tsy manaja raha masy, manahaky tantara fataon’ny njarahy antitsy rey. Fa anovo avao ze hahavy anao ho zatsy hana fahafoizam-bata ho a-Ndranahary. 8 Tsy zay fa mahasoa kelikely avao ty fampiasà vata,* fa ty fahafoizam-bata ho a-Ndranahary ro mahasoa amy raha iaby. Ahazoa fitahia amy fiaina henanizao noho amy fiaina ho avy iny raha zay, araky ty fa nampitamany. 9 Tena azo atokisa sady tokony hekè tanteraky safà zay. 10 Zay mahavy antsika miasa mafy noho miezaky marè io, satria mitamà an’ny Ndranahary velo iny tsika. Mpanavotsy ty karazan’olo iaby ie, sirtò azy tsy mivaliky rey.

11 Resaho noho ampianaro an-drozy avao didy rezay. 12 Ka engà hisy olo hanambanimbany anao satria hoe tanora iha. Fa miezaha ho modely ho ahi-ty olo tsy mivaliky, ndre amy safà zay ndre amy fandaisam-bata, ndre amy fitiava noho finoa noho fahadiova.* 13 Zisiky iaviako, le miezaha marè avao hahay hamaky teny an-kavoria noho handrisiky* ty olo hafa sady hampianatsy. 14 Ka atao ambanin-draha ze raha namea anao tamy alalan’ny faminania, zany hoe ze raha namea anao lafa nametra-tana taminao ty anti-panahy* iaby. 15 Eritsereto* soa raha rezay, sady ifantoho soa, mba ho hitan’olo iaby ty fandrosoanao. 16 Ambeno soa avao ty vatanao noho ze raha ampianarinao. Anovo avao raha rezay, fa laha manao ani-zay iha, le hanavotsy ty vatanao noho ze olo mijanjy anao.

5 Ka kinokinoa marè ty nahoda,* fa volano moramora manahaky baba io. Le ty pamaraky volano moramora manahaky rahalahy io, 2 ty njarahy* manahaky reny, le ty somonjara manahaky anabavy, amy eritseritsy malio tanteraky.

3 Karakarao* ty ampela maty valy, azy tena sahira* rey. 4 Fa laha misy ampela maty valy manan’anaky na zafy, le olo reo tse ro tokony hianatsy hampiseho fahafoizam-bata ho a-Ndranahary ka hikarakara ty fianakaviany, le hamaly babea an’ny babany noho reniny noho ty razany. Mahafalifaly a-Ndranahary raha zay. 5 Ze ampela tena sahira sady tsy manan-draha mihintsy, le mitamà a-Ndranahary ka misoloho noho mivavaky avao, ndre andro zay ndre haly. 6 Fa ze ampela maty valy midada amy fanirian’ny nofotsy, le fa maty ndre mbo velo aza. 7 Resaho amin-drozy avao zany toromariky* reo, mba tsy hikinokinoa an-drozy. 8 Ka laha misy tsy manome ze raha ilàn’olo tokony ho adidiny, sirtò fa ty olo trano raiky aminy, le fa nandà ty finoa ie ka raty mandilatsy ty olo tsy mino.

9 Tokony hampiliry amy listan’ny ampela maty valy ao ze nimaty valy, laha 60 tao na mandilatsy ani-zay ie, nanambaly raiky avao, 10 malaza ho nanao asa soa, ohatsy hoe niteza soa ty anany, tea nandramby vahiny, nanasa ty tombon’olo masy, nanampy olo nijaly, sady nazoto tamy ty asa soa iaby.

11 Fe ka ampiliry amy lista io ty ampela maty valy mbo tanora, satria ta hanambaly ampela rey lafa manakantsaka ty fifandrambesan-drozy amy Kristy ty fanirian-drozy hanao firaisa. 12 Le hosazỳ rozy satria tsy nitanterahin-drozy ty raha nampitamanin-drozy tamy voalohany.* 13 Lasa zatsy tsy manao raha mihintsy rozy, ka mitety tranon’olo. Tsy hoe tsy manao raha avao rozy, fa mpitsikotsiko noho militsilitsy amy fiainan’olo koa, ka miresaky raha tsy tokony horesahin-drozy. 14 Teako hanambaly zany ty ampela maty valy mbo tanora, ka hiteraky noho handay tokantrano, amy zay tsy hahita hiriky hikinokinoa antsika ty mpanohitsy. 15 Fa nisy ampela maty valy nivio lala laha ty marina, ka lasa nanoriky an’i Satana. 16 Laha misy ampela mpino mana longo maty valy, le ie ro hanampy an-drozy mba tsy ho enta mavesatsy ho an’ny fiangona rozy. Amy zay ho afaky hanampy an’ny ampela maty valy tena sahira rey* ty fiangona.

17 Tokony* hahazo fanajà in-droe mandilatsy ty tokony ho azony ty anti-panahy mahay mitariky, sirtò azy miezaky marè miresaky ty safà-Ndranahary noho mampianatsy rey. 18 Tsy zay fa mivola ty Soratsy Masy hoe: “Ka fehezy ty vavan’aomby miasa* am-baibò eny”, noho ty hoe: “Maeva hahazo ty karamany ty mpiasa.” 19 Ka ekè ze raha asaran’olo ty anti-panahy, laha tsy misy porofo baka amy vavolombelo roe na telo. 20 Anaro an-kavoria eo ty olo zatsy manota, amy zay hiamby soa* ty olo sisany. 21 Mampirisiky anao marè anatreha-Ndranahary noho Kristy Jesosy noho ty anjely voafily eo aho, mba hanaraky an’ny toromariky reo sady tsy hitsaratsara fahatany na hiangatsy mihintsy lafa manao an’ny raha zay.

22 Ka malisa hametra-tana ndre amin’ia zay ndre amin’ia.* Le ka miharo afera amin’olo amy ze fahotà ataon-drozy. Miezaha avao halio fandaisam-bata.

23 Ka mino rano sasy* fa minoma divay kelikely, amy vavoninao io noho amy iha tsy salama matetiky io.

24 Hain’olo iaby ty fahotan’olo sisany, ka avy le tsarà ie. Fa ty ahin’olo hafa, afara any vo tena hita. 25 Hain’olo iaby koa ty asa soa, le ndre azy tsy misy mahay rey aza, tsy ho azo avony avao.

6 Tokony hieritseritsy avao ze mpanompo manday bao* hoe maeva hahazo fanajà feno ty tompon-drozy, mba tsy hisy olo tsy hanisy dikany ty anara-Ndranahary noho ty fampianarany mihintsy. 2 Le laha mpino ty tompon-drozy, le tsy tokony hambanimbanìn-drozy, satria rahalahin-drozy avao. Vomaiky aza rozy tokony ho parè hanompo, satria olo finoa raiky amin-drozy sady rahalahy tean-drozy avao ro mahazo raha soa amy fanompoa soa ataon-drozy.

Ka mieny mampianatsy noho mampirisiky ty olo hafa hanao an’ny raha rezay. 3 Laha misy olo mampianatsy raha hafa, ka tsy maneky ty fampianara mahasoa* baka amy Jesosy Kristy Tompontsika, na tsy maneky ty fampianara mampirisiky antsika hahafoy ty vatantsika ho a-Ndranahary, 4 le mirengirengy olo zay, sady tsy misy raha hainy. Tsy mieritseritsy laha tsy handresy lahatsy noho hialy hevitsy* mikasiky ty safà ie. Raha reo ro mahavy ty olo hialona, hifamaly, hanasarasara raha olo,* tsy hifampatoky, 5 noho hialy avao amy raha tsy misy dikany manahaky ty ataon’olo raty say noho niala tamy fahamarina, tsy ia zay fa azy olo mieritseritsy rey hoe natao hahazoa raha avao ty fahafoizam-bata ho a-Ndranahary. 6 Mahazo raha maro vatany ty olo laha mahafoy ty vatany ho a-Ndranahary sady miezaky ho afa-po amy ze raha ananany. 7 Fa tsika tsy nanday raha tamy zao tontolo zao eto mihintsy, sady tsy hahafanday raha mihintsy lafa miala eto. 8 Ka lafa mana hany noho siky* tsika, le tokony ho afa-po amy raha rezay.

9 Fa ze tapa-kevitsy ho lasa panarivo, le tafilatsaky amy fakam-panahy noho amy fandriky, sady resin’ny faniria maro tsy misy dikany noho manimba, azy mandentiky ty olo ho amy fandripaha noho ho amy loza ao rey. 10 Tsy zay fa ty hatea drala ro raiky amy fototsin’ny karazan-draha raty iaby. Le namono fo tamy filan-drala ty olo sisany satria tea drala, ka voatariky niala tamy finoa, noho nitsiboky ty vatany iabiaby tamy raha maro maharary.

11 Fa iha, lahilahi-Ndranahary, ilaiso raha rezay. Le miezaha avao hanao ty marina,* hana fahafoizam-bata ho a-Ndranahary, hana finoa noho fitiava noho fiareta, le ho soa fanahy. 12 Tohizo avao aly soa iarova ty finoa iny. Ivaharo marè ty fiaina mandrakizay, satria ty hahazo an’ny raha zay ro nikaiha anao noho nanomezanao fanazavà tena soa tamy vavolombelo maro eo.

13 Toy ty didy ameako anao anatreha-Ndranahary, azy mahavy ty raha iaby ho velo iny, noho anatrehan’i Kristy Jesosy, azy vavolombelo nanazava soa ty raha ninoany tamy Pontio Pilato eo iny: 14 Oriho ty didy, le anovo tsy misy tasy noho tsy misy hokinokinoa ty fanorihanao an’ny raha zay, zisiky iavian’ny fotoa hisehoan’i Jesosy Kristy Tompontsika, 15 azy Tompom-pahefà falifaly sady raiky avao iny, azy hiseho amy fotoa voatondro iny. Ie ro Mpanjakan’ny mpanjaka noho Tompon’ny tompo, 16 ie raiky avao ro tsy mety maty. Mipetraky amy hazavà tsy hay vonjè ie, sady tsy misy olo mahita azy na mahavita manenty azy. Ho azy lahy ty voninahitsy noho ty hery mandrakizay! Amena.

17 Anaro* ty panarivo amy zao tontolo zao eto* mba tsy hirengirengy,* na hatòky ty hanana tsy azo antoky, fa hitamà a-Ndranahary, azy manome raha maro biby amy raha iaby mahafalifaly antsika iny. 18 Volano rozy mba hanao raha soa, hanan-kanana amy asa soa, ho tea manome,* ho parè hizara, 19 ka hana hanana soa hajary ho ahi-ty vatan-drozy, zany hoe fototsy soa amy ty hoavin-drozy. Amy zay rozy hivahatsy marè amy ty tena fiaina.

20 Timoty, arovo ze raha nankiny taminao, ka ialao ty resaky tsy misy dikany tsy manaja raha masy, noho ty hevitsy mifanohitsy baka amy ze kaihy hoe “fahaiza” kanefa tsy ie. 21 Nampizelazela fahaiza manahaky ani-zay ty olo sisany, ka nivoatariky niala tamy finoa.

Enganè nareo hampisehoa hasoam-panahy miavaky!