TY TARATASY FAHAROE HO AN’I TIMOTY

1 Baka amy Paoly, apostolin’i Kristy Jesosy tamy alalan’ny sitrapo-Ndranahary, azy nirahy hitory ty fampitamana fiaina amy alalan’i Kristy Jesosy iny.

2 Ho an’i Timoty, anako teako,

Enganè Ndranahary Babantsika iny noho Kristy Jesosy Tompontsika mba hampiseho hasoam-panahy miavaky* aminao, noho hiferinay anao, sady hanome fiadana anao!

3 Misaotsy a-Ndranahary aho, tsy ia zay fa azy anaovako fanompoa masy iny, manahaky ty nataon’ny razambeko, amy eritseritsy malio. Le mahatiaro anao avao aho lafa misoloho amy vavaky marain-tsy hariva. 4 Lafa mahatiaro ty ranomasonao aho le ta hahita anao biby, amy zay aho tena ho falifaly. 5 Tsy zay fa tiaroko ty finoa tsy miatsaravelatsihy anananao. Fa tamy Loisa razanao noho Eonika reninao ao finoa zay, le atokisako fa aminao ao koa.

6 Zay ty antony ampitiaroviko anao hoe anovo miroaroa manahaky afo io fanomeza-Ndranahary iny, azy nirambesinao tamy zaho nametra-tana taminao iny. 7 Fa Ndranahary tsy nanome antsika toe-tsay* mavaka raty, fa toe-tsay feno hery noho fitiava noho fahaiza mandiniky. 8 Ka menatsy mitory mikasiky ty Tompontsika zany, na menatsy amy ty raha mahazo ahy, zaho azy gadra satria manompo azy iny. Fa miareta fijalea amy fitoria ty vaovao soa, ka miantehera amy ty heri-Ndranahary. 9 Nanavotsy noho nikaiky antsika tamy fikaiha masy ie, fe tsy ty raha nataontsika ro nanaovany ani-zay, fa ty raha teany hatao noho ty hasoam-panahiny miavaky. Nampiseho an’ny hasoam-panahy zay tamintsika tamy alalan’i Kristy Jesosy ie, liany fa ela biby. 10 Fe natao mazava soa raha zay henanizao, tamy nisehoan’i Kristy Jesosy Mpanavotsy antsika. Ie ro nandrava ty fahafatesa noho nanambara tamy alalan’ny vaovao soa hoe akory ty hahazoa fiaina noho vata tsy mety lo. 11 Mba hanambara an’ny vaovao soa zay ro nanendrea ahy ho mpitory noho apostoly noho mpampianatsy.

12 Zay koa ty antony iaretako an’ny raha rey, fe tsy menatsy aho, satria haiko Azy inoako iny, le matoky aho fa vitany ty miaro ani-ze raha nankiniko taminy zisiky iavian’ny andro zay. 13 Ka ialà mihintsy ty modelin’ny* safà mahasoa* fa nirenao tamiko, miaraky amy ty finoa noho ty fitiava amy iha miharo raiky amy Kristy Jesosy io. 14 Arovo amy alalan’ny fanahy masy, azy anaintsika ao iny, raha lafovily nankiny taminao zay.

15 Hainao hoe fa niala ahy ty olo iaby amy faritanin’i Azia any, anatini-zay Fygelo noho Hermogena. 16 Fe loniky lahy Tompo hiferinay ty olo trano raiky amy Onesiforosy, satria namelombelo ahy matetiky ie, sady tsy nahamenatsy azy ty seny vy nandrohiza ahy. 17 Ie aza nisahira nila ahy tamy ie ta Roma teto, ka nahita ahy. 18 Enganè Jehovah Tompo hiferinay azy amy andro zay! Sady hainao soa ty fanompoa iaby nataony ta Efesosy any.

2 Le anovo avao, anako, ze hahazoanao hery baka amy hasoam-panahy miavaky asehon’i Kristy Jesosy. 2 Ka ze raha nirenao tamiko sady nihamafisin’ny vavolombelo maro, le ampitao amy lahilahy azo atokisa rey, le hahay hampianatsy ty olo hafa koa rozy afarani-zay. 3 Maramila soan’i Kristy Jesosy iha, ka miareta fijalea koa. 4 Tsy misy maramila militsy* amy resaky varotsy* amy fiaina toy, laha teany ty hahazo hatò amy azy nandramby azy ho maramila iny. 5 Ndre azy mandramby anjara amy fisà kirebaky rey koa aza, le tsy mahazo satroboninahitsy laha tsy nanaraky fitsipiky amy fisà iny. 6 Ty mpamboly miasa mafy ro voalohany tokony hahazo amy ty vokatsy. 7 Eritsereto avao ze raha volaniko. Hampean’ny Tompo iha mba hahay* soa ty raha iaby.

8 Tiarovo hoe fa nivelomy Jesosy Kristy sady taranakin’i Davida, mifanaraky amy ty vaovao soa toriko. 9 Ie ro mahavy ahy hiaritsy fijalea noho hogadrà manahaky olo mpanao raha raty io. Fe ndre zay, le tsy voafehy ty safà-Ndranahary. 10 Raha zay ro mahavy ahy mbo miaritsy ty raha iaby ho ahi-ty olo voafily, mba hahazoan-drozy an’ny fanavota niazo baka amy Kristy Jesosy iny koa, noho mba hahazoan-drozy voninahitsy mandrakizay. 11 Tena azo atokisa safà toy: Laha miaraky maty aminy tsika, le hiaraky velo aminy koa, 12 le laha miaritsy avao tsika, le ho mpanjaka hiaraky manday aminy. Fa laha tsy maneky azy tsika, le tsy hekeny koa. 13 Ndre mivaliky aza tsika, ie tsy hivaliky mihintsy, satria tsy toetsiny raha zay.*

14 Ampitiarovo an-drozy avao raha reo, le anaro anatreha-Ndranahary eo rozy mba tsy hialy hevitsy mikasiky ty safà, fa tsy misy dikany mihintsy raha zay satria manimba ani-ze olo mijanjy.* 15 Anovo ze raha iaby azonao atao mba hahafahanao mampiseho amy Ndranahary eo hoe olo mahazo hatò iha, zany hoe mpiasa mahavita azy, ndre amy ino zay ndre amy ino, sady manazava marina soa ty safàn’ny fahamarina. 16 Fa ialao ty resaky tsy misy dikany tsy manaja raha masy, satria vomaiky hahavy ty olo tsy hatahotsy a-Ndranahary raha rezay, 17 sady hiitatsy manahaky bay mandoaky io.* Anatin’ny olo mpanao an’ny raha rezay Hymeneo noho Fileto. 18 Niala tamy fahamarina lahilahy reo, ka nivola hoe fa niseho zao ty fameloma ty maty. Le nanimba ty finoan’olo sisany rozy. 19 Fe ndre zay, le mbo mitsanga avao ty fototsy mahery namboari-Ndranahary, sady misy an’ny kasè* toy: “Hain’i Jehovah ty azy”, noho ty hoe: “Tsy tokony hanao raha raty sasy* ze olo iaby mikaiky ty anaran’i Jehovah.”

20 Tsy fitaova volamena noho volafoty avao ro amy trano bevata raiky ao, fa fitaova hazo noho tany koa. Ty sisany natao hampiasà amy raha maeva hajà, fa ty sisany amy raha tsy maeva hajà. 21 Ka laha misy manalavitsy an’ny raha farany reo, le ho fitaova natao hampiasà amy raha maeva hajà ie, sady hohamasìny ka hahasoa ty tompony, noho ho parè hanao ty asa soa iaby. 22 Ilaiso zany ty faniria mpahazo ty tanora, fa miezaha avao hanao ty marina, hana finoa noho fitiava noho fiadana,* miaraky amy ze mikaiky an’ny Tompo amy fo malio.

23 Ialao koa ty alihevitsy fahatany noho tsy misy dikany, satria hainao fa mampialy raha rezay. 24 Tsy zay fa tsy tokony hialy ty mpanompon’ny Tompo, fa hahay handanjalanja* amin’olo iaby, hahay hampianatsy, hahatanjaky ty ainy lafa misy olo manao raha raty azy, 25 le ho soa fanahy lafa mampianatsy ani-ze tsy mora maneky. Vasa Ndranahary hanenga an-drozy hibebaky,* ka hahay soa ty fahamarina rozy. 26 Le ho hain-drozy hoe tsy mety ty raha nataon-drozy, ka ho afaky amy fandrikin’ny Devoly rozy, zany hoe amy fandrikini-azy nanao sambo-belo an-drozy mba hanao ty raha teany hatao iny.

3 Fe soa ho hainao toy: Amy andro farany, le hisy fotoa sarotsy tsy mora tohery. 2 Fa ty olo ho tea tena, ho tea drala, ho be zesta, hievotsevotsy, ho mpanivativa, tsy hanoriky ty safàn’ny babany noho reniny, tsy hahay hisaotsy, ho mora mivaliky, 3 tsy ho tea longo, tsy ho azo ifanaraha, ho mpanasarasara raha olo, tsy hahatanjaky ty ainy, hasiaky marè, tsy ho tea raha soa, 4 ho mpamadiky, ho be mokon-doha, hirengirengy, ho be sitrapo fa tsy ho tea a-Ndranahary, 5 atao raha mpivavaky be ty fahità azy kanefa tsy misy heriny amy fiainany ty maha mpivavaky azy. Ialao ty olo manahaky ani-rey. 6 Misy amin’olo rey mamitapitaky mba hilira an-tranon’olo any, le alàn-drozy ho babo ty ampela mora veriverè, azy be fahotà noho fehezin’ny faniria maro samby hafa rey. 7 Tsy mieny mianatsy ampela reo, kanefa tsy mety mahay soa ty fahamarina mihintsy.

8 Manohitsy ty fahamarina avao olo rey, manahaky ty nanoheran’i Jana noho Jambra an’i Mosesy. Olo tena raty say rozy, sady tsy mahazo hatò amy Ndranahary satria manohitsy ty finoa. 9 Fe tsy ho lasa lavitsy rozy, satria tsy hisy hivony amin’olo iaby ty hagegean-drozy, manahaky ty hagegean-drozy* roe lahy avao. 10 Fa iha, fa norihinao marìny ty fampianarako, ty fiainako sanandro, ty raha kendreko, ty finoako, ty fahalinisako raha, ty fitiavako, ty fiaretako, 11 le hainao koa ty fanenjeha noho ty fijalea nahazo ahy ta Antiokia noho ta Ikonioma noho ta Lystra any. Niaritsy an’ny fanenjeha rezay aho, le nanafaky ahy tamy raha iaby rezay Tompo. 12 Laha ty marina, le henjehy koa ze olo iaby ta hampiseho amy fiainany hoe mahafoy ty vatany ho a-Ndranahary sady miharo raiky amy Kristy Jesosy. 13 Fa vomaiky hiharaty hiharaty avao ty olo raty noho ty mpisandoky, ka sady mamitaky rozy ro voafitaky.

14 Fa iha, oriho avao ty raha nianaranao noho nandresea lahatsy anao ka lasa inoanao, satria hainao hoe ia ty nampianatsy anao an’ny raha rey, 15 sady mbo niajà kelikely iha le fa nahay ty Soratsy Masy. Mahahendry anao raha zay ka hahavy anao ho avotsy, satria iha mino an’i Kristy Jesosy. 16 Ty Soratsy Masy iabiaby le baka amy herin’ny fanahy masi-Ndranahary, sady mahasoa mba hampianara, hananara, hanitia ani-ze raha tsy mety, hitezà* mifanaraky amy fahamarina,* 17 mba hahavy ty olo-Ndranahary ho tena mahay noho ho ampy fitaova soa hanaova ze kila asa soa iaby.

4 Toy ty raha ampirisihiko anao marè anatreha-Ndranahary noho Kristy Jesosy, azy hitsara ty velo noho ty maty lafa miseho noho manjaka amy Fanjakàny ao iny: 2 Torio ty safà-Ndranahary, le ka mangataky andro lafa manao an’ny raha zay* ndre amy mora ndre amy sarotsy; mananara, volano marerè ze manao raha tsy mety, ampirisiho ty olo hafa, le miezaha mba tena hahaliny raha sady hahay hampianatsy lafa manao an’ny raha zay. 3 Tsy zay fa ho avy ty fotoa tsy hahazakan’olo ty fampianara mahasoa* ka hilan-drozy mpampianatsy mifanaraky amy ze tean-drozy, mba haharezan-drozy ze raha teatean-drozy ho re avao.* 4 Tsy hijanjy ty fahamarina sasy rozy, fa hijanjy tantara tsy marina. 5 Fa iha, tokony handiniky soa avao iha amy raha iaby, miareta fijalea, anovo ty asan’ny mpitory* ty vaovao soa, le anovo soa ty fanompoanao.

6 Fa fa aily manahaky divay* atao fanatitsy aho, sady fa marìny ty fotoa hanafaha ahy. 7 Fa nialy ty aly soa aho, fa nahavita an’ny korsa iny zisiky amy farany aho, nanaraky ty finoa avao aho. 8 Manomboky henanizao, le hajarỳ ho ahy ty satroboninahitsin’ny fahamarina. Ty Tompo, azy mpitsara manao ty rariny iny, ro hanome ahy an’ny raha io amy andro zay, mba ho valin’ny raha soa nataoko, le tsy ho ahy avao fa ho ani-ze olo iaby maniry marè ty hisehoany koa.

9 Anovo ze raha iaby azonao atao mba hiavia amiko atoy malaky. 10 Tsy zay fa, fa niala ahy Demasy satria tea ani-zao tontolo zao,* ka nandeha a Tesalonika any. Kreska nandeha a Galatia any, le Titosy nandeha a Dalmatia any. 11 Lioka avao ro amiko etoa. Taomo hiaraky aminao Marka fa ilàko amy fanompoa ie. 12 Fa Tykiko nirahiko ho a Efesosy any. 13 Lafa mandeha atoy iha, le andeso siky* nengako tamy Karpo a Troasy any iny. Andeso koa horonam-boky rey, sirtò horonam-boky vita amy angozy rey.

14 Maro ty raha raty nataon’i Aleksandra mpanefy saba tamiko. Jehovah ro hamaly azy mifanaraky amy ze raha nataony. 15 Iha koa mba miambena soa avao aminy, satria tena nanohitsy marè ani-ze raha nivolaninay ie.

16 Tsy mba nisy olo niavy nanoha ahy, tamy zaho nivola ty fiarovako ty vatako voalohany iny, fa niala ahy iaby rozy iaby. Enganè tsy hosazỳ amy raha zay rozy! 17 Fe nitsanga tanilako eo Tompo ka nampahery ahy, mba ho vita soa amy alalako ty asa fitoria, sady mba haharè an’ny hafatsy toriko iny ty firenena iaby. Le navotany tsy ho azon’ny vavan’ny liona aho. 18 Hanafaky ahy amy ty asa raty iaby Tompo, le hanavotsy ahy noho handay ahy amy Fanjakàny an-danitsy any. Ho azy lahy ty voninahitsy mandrakizay mandrakizay! Amena.

19 Mampamangy amy Priska noho Akoila, noho amy olo trano raiky amy Onesiforosy any.

20 Nijano a Korinto any Erasto, fa Trofimo nengako a Mileto any satria narary. 21 Anovo ze raha iaby azonao atao mba hiavia atoy alohan’ny asotry.

Mampamangy anao zao hoe Eobolo, Poda, Lino, Klaodia noho ty rahalahy iaby.

22 Loniky lahy Tompo hitahy ty toe-tsay soa anananao! Enganè nareo hampisehoany hasoam-panahy miavaky!