HO AHI-TY HEBREO

1 Taloha biby tany, le niresaky tamy razambentsika tamy alalan’ny mpaminany Ndranahary. Imaro ty nanaovany an’ny raha zay sady niovaova ty nanaovany azy. 2 Fa amy andro farany henanizao, miresaky amintsika amy alalan’ny Anaky ie. Anany io ro nitendreny ho mpandova ty raha iaby, sady tamy alalany ro nanaovany an’ny rafitsy nisy tamy zao tontolo zao eto rey.* 3 Ie ro taratsin’ny voninahitsi-Ndranahary, sady tena soraki-Ndranahary,* le ty safàny manan-kery ro anohanany ty raha iaby. Nanadio antsika ho afaky amy ota ie, bakeo nipetraky ta ankavanan’ny Ndranahary Bevata iny eo, anabo any. 4 Lasa anabo mandilatsy ty anjely zany ie, satria nandova anara soa biby mandilatsy ty ahin-drozy.

5 Ia tamy anjely rey, ohatsy, ro fa nivolana-Ndranahary hoe: “Anako iha; androany aho ro lasa babanao”, noho hoe: “Zaho ho babany, le ie ho anako”? 6 Fe lafa irahiny ho an-tany etoy* ndraiky Talanolony iny, le hoy ty asany: “Le miankohofa aminy eo nareo anjeli-Ndranahary iaby.”

7 Hoy koa ty asany mikasiky ty anjely: “Ataony mahery* ty anjeliny, le ataony lelan’afo ty mpanompony.”* 8 Fe hoy ty asany mikasiky ty Anaky: “Ndranahary ro sezim-panjakànao mandrakizay mandrakizay, sady ty tehin’ny Fanjakànao le tehy mampanjaka ty rariny.* 9 Teanao ty fahamarina, fa halanao ty fandikan-dalàna. Zay ro nahavy a-Ndranahary, azy Ndranaharinao iny, hanosotsy anao menaky mahafalifaly mandilatsy ty an’ny namanao.” 10 Mivola koa ty Safà-Ndranahary hoe: “Tam-boalohany any, le nametraky ty fototsin’ny tany lahy iha, Tompo, sady asan’ny tananao ty lanitsy. 11 Ho rava raha reo, fa iha haharitsy. Le ho momoky manahaky akanjo io raha iaby reo, 12 sady havalonao manahaky siky* io, ka hosoloa manahaky akanjo io. Fa iha tsy miova, sady tsy ho tampitsy mihintsy ty taonao.”

13 Fe ia tamy anjely rey ro fa nivolanany hoe: “Mipetraha ankavanako etoa, zisiky hanaovako ty fahavalonao ho fasianao tomboky”? 14 Tsy fanahy manao fanompoa masy* va rozy iaby, ka irahy hikarakara ani-azy handova fanavota rey?

2 Ka vomaiky zany tsika mila miamby marerè mandilatsy ty bakany zay mba hanoriky ani-ze raha fa nirentsika, amy zay tsika tsy hiala amy finoa mihintsy. 2 Fa laha azo atokisa ty safà nivolanin’ny anjely, sady nisazỳ araky ty rariny ze olo nandika lalàna noho tsy nanoriky safà, 3 le tsy ho voasazy va tsika laha tsy midary an’ny fanavota bevata io? Fa ty Tompontsika ro voalohany nivola an’ny fanavota io. Le ze naharè an’ny raha io le nanamafy tamintsika hoe marina raha io. 4 Fa nanome porofo mikasiky an’ny raha io koa Ndranahary ka nanao famantara noho fahagagà* noho raha miavaky sankarazany, sady nizara fanahy masy, mifanaraky amy ty sitrapony.

5 Fa tsy hoe anjely ro nivolani-Ndranahary mba heken’ny tontolo* ho avy resahinay iny. 6 Fe nisy vavolombelo nivola amy andininy raiky zay hoe: “Mba ino loatsy moa olombelo zao ro tiaronao? Le ino moa anakin’olombelo zao ro karakaranao? 7 Nataonao ambany kelikelin’ny anjely ie, le nisatrofanao fanajà noho voninahitsy, sady nitendrenao hiandraikitsy ty asan’ny tananao. 8 Nampanekeninao azy ty raha iaby, ka nataonao ambany tombony eo.” Lafa nampanekeni-Ndranahary azy ty raha iaby, le tsy nisy nengany tsy haneky azy ndre raha raiky aza. Fe mbo tsy hitantsika tse henanizao hoe maneky azy ty raha iaby, 9 fa ty hitantsika le Jesosy, azy natao ambany kelikelin’ny anjely iny. Hitantsika nisatrofa fanajà noho voninahitsy ie henanizao satria fa nijalijaly talohan’ny nahafaty azy, mba ho maty ho ahi-ty olo iaby ie satria mampiseho hasoam-panahy miavaky* Ndranahary.

10 Mba ho voninahitsi-Ndranahary ro antony mampisy ty raha iaby, le amy alalany ro mampisy an-drozy iaby. Nanday anaky maro mba hamea voninahitsy ie, ka ara-dalàna laha nengany hijaly mba ho lasa lavorary Mpitariky Farany Anabo iny, tsy ia zay fa azy manday fanavota ho an-drozy iny. 11 Fa raiky avao ro niavian-drozy roe, ndre azy manamasy iny zay, ndre azy hamasìny rey. Ka zay mahavy azy tsy menatsy mikaiky an-drozy hoe rahalahy io. 12 Fa hoy ty asany: “Hanambara ty anaranao amy ty rahalahiko aho. Amy fiangona eo aho ro hidera anao amy hira.” 13 Nivola koa ie hoe: “Hatòky azy aho”, noho hoe: “Reto zahay amy ajà namean’i Jehovah ahy rey!”

14 Satria nofotsy noho lio ty ajà, le lasa nofotsy noho lio koa ie, amy zay ty fahafatesany ro handravany ani-azy manan-kery hahavy fahafatesa iny, zany hoe ty Devoly, 15 noho hanafahany ani-ze olo iaby nandevozy tamy andro iaby niainany, satria natahotsy ho maty. 16 Fa laha ty marina, tsy ty anjely ro ampeany, fa ty taranakin’i Abrahama. 17 Ka lasa tsy maintsy nanahaky an’ny “rahalahiny” rey tamy raha iabiaby zany ie, mba ho lasa mpisorobe miferinay noho azo atokisa amy fanompoa a-Ndranahary. Amy zay ie ho afaky hanome soro fampilongoa,* zany hoe soro vokatsin’ny fahotan’olo. 18 Fa nijaly ie lafa niaritsy fitsapà, ka afaky manampy ani-ze olo miaritsy fitsapà.

3 Laha zay ie, rahalahy masy anatini-azy nikaihy* ho an-danitsy any rey, le eritsereto apostoly sady mpisorobe ekentsika iny, tsy ia zay fa Jesosy. 2 Tsy nivaliky tamy Azy* nanendry azy iny ie, manahaky an’i Mosesy lafa nanompo tamy trano-Ndranahary iabiaby tao. 3 Maeva hahazo voninahitsy bevata mandilatsy ty ahin’i Mosesy ie,* satria ty mpamboatsy trano le maeva hohajà marerè mandilatsy an’ny trano namboariny iny. 4 Mazava ho azy fa nisy namboatsy ty trano iaby, fa azy namboatsy ty raha iaby iny le Ndranahary. 5 Sady mpanompo azo atokisa tan-trano-Ndranahary iabiaby ao Mosesy. Nampiseho ty* raha mbo hovolany afara atoy koa ty fanompoany. 6 Fa Kristy ro anaky azo atokisa miandraikitsy ty trano-Ndranahary. Tsika tranony zay, laha miezaky avao tsika mba hahasaky hivola sady hivahatsy amy raha tamany irengirengeantsika iny zisiky amy farany.

7 Ka hoy ty fanahy masy: “Laha mijanjy ty feony nareo androany, 8 le ka mahery volany* manahaky tamy fotoa nampeloky marè ahy iny, tamy andro nitsapà toetsy ahy tamy dezera* any iny. 9 Tsy zay fa nitsapa toetsy ahy ty razambenareo tamy fotoa zay, ndre fa nihitan-drozy aza ty asa nataoko tanatin’ny 40 tao. 10 Le lasa mampangaroharo ahy taranaky zay, ka nivola aho hoe: ‘Tranonjaka olo reo ka ze raha tean-drozy avao ro ataon-drozy, sady tsy hain-drozy ty lalako.’ 11 Le neloky aho sady nifanta hoe: ‘Tsy hilitsy amy fitofako olo reo.’”

12 Miambena soa nareo, rahalahy, tsy no misy aminareo lasa mana fo raty sady tsy mino, ka hiala amy Ndranahary velo iny. 13 Fa miezaha avao hifampahery sanandro, laha mbo eo koa azy kaihy hoe “Androany” iny, tsy no hisy aminareo hanjary mahery volany satria mahavita mamitaky anareo ty ota. 14 Fa tsy hahazo ani-ze fa niazon’i* Kristy tsika, laha tsy tanjahintsika marè zisiky amy farany toky nananantsika tamy voalohany iny. 15 Fa nivolany moa hoe: “Laha mijanjy ty feony nareo androany, le ka mahery volany* manahaky tamy fotoa nampeloky marè ahy iny.”

16 Ia moa ty naharè ty feo-Ndranahary kanefa mbo nampeloky marè azy avao? Tsy ze olo iaby nandesin’i Mosesy niboaky baka Ejipta any rey va? 17 Ia koa ty nampangaroharo a-Ndranahary tanatin’ny 40 tao? Tsy ze olo nanota va ka nidaiday tamy dezera* any ty fatin-drozy? 18 Le tamin’ia ty nifantàny hoe tsy hilitsy amy fitofany olo reo? Tsy tamin’olo tsy nanoriky safà rey va? 19 Hitantsika zany fa tsy afaky nilitsy rozy satria tsy niampy finoa.

4 Mbo mampitamà Ndranahary hoe afaky militsy amy fitofany tsika. Ka ndao zany tsika hiamby soa,* tsy no hisy aminareo lasa tsy haeva an’ny raha nampitamany zay. 2 Tsika koa moa mba fa nitoria ty vaovao soa manahaky an-drozy avao. Fe tsy nahasoa an-drozy ty raha niren-drozy, satria tsy nana finoa matanjaky manahaky an’ny olo nijanjy rey rozy. 3 Fa tsika mampiseho finoa rey ro tena militsy amy fitofà iny. Fa laha ty mikasiky an-drozy, le fa nivola ie hoe: “Le neloky aho sady nifanta hoe: ‘Tsy hilitsy amy fitofako olo reo’”, ndre fa liany nanorena ani-zao tontolo zao aza ty asany ro fa nivita. 4 Ho zao moa ty nivolaniny mikasiky ty andro fahafito amy andininy raiky zay: “Le nitofa tamy ty asany iabiaby Ndranahary tamy andro fahafito.” 5 Mivola koa ie amy andininy raiky zay hoe: “Tsy hilitsy amy fitofako olo reo.”

6 Mbo azo atao ty militsy amy fitofà zay, le ze nitoria ty vaovao soa tamy voalohany koa tsy nilitsy satria tsy nanoriky safà. 7 Mbo nifily andro raiky zany ie, ka nivola amy salamon’i Davida ao, ela biby tafara atoy, hoe: “Androany.” Fa nivolany taloha teo koa moa hoe: “Laha mijanjy ty feony nareo androany, le ka mahery volany.”* 8 Fa laha tena nandesin’i Josoa tamy pilasy fitofà any rozy, le tsy ho niresaky andro raiky hafa Ndranahary tafarani-zay. 9 Mbo misy sabata fitofà ho ahi-ty vahoaki-Ndranahary zany. 10 Fa ze olo nilitsy tamy fitofà-Ndranahary, le nitofa tamy ty asany koa, manahaky ty natao-Ndranahary.

11 Ka ndao tsika hanao ze raha iaby azontsika atao mba hilira amy fitofà zay, tsy no hisy amintsika ho lasa tsy manoriky safà manahaky an-drozy koa. 12 Fa velo noho manan-kery ty safà-Ndranahary, sady maranitsy mandilatsy ty sabatsy roe lela, le mitsiboky ka mahavita manavaky ani-ze miseho ivelany etoy noho ty am-po any, sady mahavita mampisaraky ty fitohizan-taola noho ty tsoka, ka afaky mahay ty eritseritsin’ny fo noho ty raha teany hatao. 13 Le tsy misy zavaboary tsy hita-Ndranahary, fa ty raha iaby le mihalo sady tsy misy mivony amy azy hanao ankety antsika iny eo.

14 Mana mpisorobe mitanjaky pilasy anabo tsika. Jesosy Anaki-Ndranahary mpisorobe zay, le fa nandeha an-danitsy any ie. Ka ndao horesahintsika amin’olo avao ty raha inoantsika mikasiky azy. 15 Fa ty ahintsika tsy hoe mpisorobe tsy mahay miferinay antsika amy ty handrantsika, fa mpisorobe fa niaritsy fitsapà tamy raha iaby manahaky antsika koa, fe tsy nanota. 16 Ka ndao zany tsika hamonjy ty sezim-panjakàn’ny Ndranahary mampiseho hasoam-panahy miavaky iny, sady hahasaky hivola lafa manao an’ny raha zay. Amy zay tsika hoferinesany noho hampisehoany hasoam-panahy miavaky, mba hanampea antsika amy fotoa mety.

5 Alà baka amin’olo ty mpisorobe, le tendrè hanompo a-Ndranahary mba hahasoa ty olo. Amy zay ie ho afaky hanome fanomeza noho soro vokatsin’ny fahotà. 2 Mahay miferinay ani-ze* olo tsy mahay raha noho manao hadisoa* ie, satria ie koa mba mialy amy ty* handrany. 3 Tsy maintsy manao fanatitsy amy ty fahotà nataony koa zany ie, manahaky ty ataony lafa manao fanatitsy amy ty fahotan’ny vahoaky.

4 Tsy mahazo an’ny voninahitsy zay ty olo, laha ty sitrapony avao. Lafa kaihi-Ndranahary avao ie vo mahazo an’ny raha zay, manahaky ty nikaihany an’i Arona. 5 Le manahaky ani-zay koa Kristy. Tsy ie ro nanome voninahitsy ty vatany mba ho lasa mpisorobe, fa azy nivola taminy iny hoe: “Anako iha; androany aho ro lasa babanao.” 6 Mivola koa ie amy andininy hafa hoe: “Mpisoro mandrakizay iha, manahaky an’i Melkizedeka.”

7 Nangataky noho nisoloho tamy Azy nahay nanavotsy azy tsy ho maty iny Kristy, sady nitoreotoreo noho nitany marè, tamy ie tan-tany etoy.* Le nijanjiny ie satria natahotsy a-Ndranahary. 8 Ka ndre anaky aza ie, le nianatsy nanoriky safà baka amy ty raha niaretany. 9 Lafa baka natao lavorary ie, le ie ro nahavy ani-ze olo iaby manoriky ty safàny mba ho avotsy mandrakizay, 10 satria ie nitendre-Ndranahary ho mpisorobe manahaky an’i Melkizedeka.

11 Maro ty raha azonay volany mikasiky azy, sady sarotsy hazavany raha zay, satria lasa tsy mazoto mijanjy nareo. 12 Fa ndre tokony fa ho mpampianatsy aza nareo henanizao,* le mbo mila olo hampianatsy anareo baka am-boalohany ty raha fototsy nianaranareo baka amy fanambarà masi-Ndranahary, ka lasa mila ronono ndraiky nareo fa tsy ventin-kany. 13 Fa ze olo iaby velo amy ronono avao, le tsy mahay soa ty safàn’ny fahamarina satria mbo ajà. 14 Fa ty ventin-kany le ho ahi-ty olo matotsy, zany hoe ho ahi-ty olo mampiasa soa ty sain-drozy,* ka manazatsy an’ny raha zay mba hahay hanavaky ty soa noho ty raty.

6 Fa nengantsika ty fampianara fototsy mikasiky an’i Kristy. Ka ndao tsika hiezaky handroso malaky mba ho matotsy, fa tsy himpoly amy fampianara fototsy ndraiky,* zany hoe ty fibebaha amy asa tsy misy dikany,* ty finoa a-Ndranahary, 2 ty fampianara mikasiky batisa samby hafa noho ty fametraha tana, ty fameloma ty maty, noho ty fitsarà mandrakizay. 3 Le hataontsika raha zay laha engà-Ndranahary.

4 Fa ze olo fa nahazo hazavà, sady fa nahazo fanomeza tsy vilỳ baka an-danitsy any noho nahazo fanahy masy, 5 sady fa nandramby ty safà soa baka amy Ndranahary noho nahazo ty fitahia handesin’ny* tontolo* ho avy iny, 6 kanefa nihemotsy, le tsy azo ampea sasy mba hibebaky, satria fantsihin-drozy amy tsato-kazo eo ndraiky ty Anaki-Ndranahary, sady afahin-drozy baraka amin’olo maro eo. 7 Lafa avy matetiky ty ora, le mahazo fitahia baka amy Ndranahary ty tany, satria lafa lè ty tany, le mamokatsy raha mitiry ilàn’ny mpamboly. 8 Fa laha mamokatsy fatiky noho akata raty ty tany, le tsy misy ilà azy sasy. Tsy ho ela ie le hozòny, ka amy farany horoa.

9 Fa laha ty mikasiky anareo, rahalahy noho anabavy teanay, ndre mivola manahaky ani-zay aza zahay, le matoky zahay fa mahavoa mandilatsy an-drozy nareo, satria nareo manao raha hahazoa fanavota. 10 Fa Ndranahary tsy manao raha tsy rariny, ka hoe hohalinony ty raha nataonareo noho ty fitiava nasehonareo ho ahi-ty anarany, tamy nareo nikarakara ty olo masy sady mbo mikarakara an-drozy zisiky henanizao. 11 Le teanay nareo kiraidraiky laha mazoto manahaky ani-zay avao. Amy zay nareo hatòky zisiky farany hoe ho tanteraky raha tamaninareo iny. 12 Amy zay koa nareo tsy ho kamo, fa hanahaky ani-azy mandova ty raha nampitamany rey, satria mino noho manam-pahareta rozy.

13 Fa Ndranahary nifanta tamy ty vatany tamy ie nivola ty raha nampitamaniny tamy Abrahama, satria tsy misy anabo mandilatsy azy afaky nifantàny, 14 ka hoy ty asany: “Hotahiko vatany iha ka tena hataoko maro biby.” 15 Le nahazo an’ny raha nampitamany zay Abrahama, lafa natorony hoe nanam-pahareta ie. 16 Mifanta amy ze anabo mandilatsy azy moa ty olo, ka mijano iaby ty alihevitsy lafa baka nifanta rozy, satria fifantà iny ro antoky ara-dalàna ahità hoe marina ty resakin-drozy. 17 Ho zay koa ty natao-Ndranahary lafa ie nanapa-kevitsy fa hatorony mazava soa amy ty mpandova an’ny raha nampitamany iny hoe tsy miova ty raha teany hatao.* Le nanome antoky mikasiky an’ny raha zay* ie ka nifanta. 18 Tsy miova mihintsy raha roe reo* sady tsy hai-Ndranahary avandesa, ka vomaiky raha zay mampirisiky antsika hivahatsy amy raha tamany natao talohantsika eo iny, zany hoe tsika azy mialoky aminy rey. 19 Raha tamany ananantsika zay ro talimbaton’ny* aintsika. Sady azo antoky raha io ro soa fototsy, le militsy ambalikin’ny ridò ao. 20 Ka mba hahasoa antsika le nilitsy tao koa Jesosy, azy mpialoha lala antsika iny. Ie azy lasa mpisorobe mandrakizay manahaky an’i Melkizedeka iny.

7 Mpanjakan’i Salema noho mpisoron’ny Ndranahary Farany Anabo iny Melkizedeka io, sady nitsena an’i Abrahama tamy ie nimpoly lafa baka nandresy mpanjaka maro, ka nitso-drano azy. 2 Le namean’i* Abrahama azy ty ampahafolon’ny raha iaby niazony. Voalohany, midika hoe “Mpanjakan’ny Fahamarina” ty anarany, le mpanjakan’ny Salema koa ie, zany hoe “Mpanjakan’ny Fiadana.” 3 Tsy nana baba noho reny ie, sady tsy nana tetiraza.* Tsy nisy fanombohany ty andro niainany sady tsy nisy fitamperany, fa natao manahaky Anaki-Ndranahary ie, ka ho mpisoro mandrakizay.

4 Le vatany nitanjaky pilasy anabo lahilahy io kanao Abrahama, loham-pianakavia, nanome azy ty ampahafolon’ny raha farani-ze soa niazony baka an’aly any. 5 Marina fa laha ty Lalàna ro hentea, le ze voatingy ho mpisoro amy taranakin’i* Levy ro ampamoria ty ampahafolon-kanana baka amin’olo, zany hoe baka amy rahalahiny rey, ndre taranakin’i Abrahama koa aza rozy. 6 Fa lahilahy tsy taranakin’i Levy io, le nahazo ampahafolon-kanana baka amy Abrahama, ka nitso-drano ani-azy nanaova fampitamana iny. 7 Tsy azo ialia hevitsy fa azy mitso-drano iny ro anabo mandilatsy ani-azy mahazo tsodrano iny. 8 Amy raiky iny, le olombelo mety maty ro mahazo ampahafolon-kanana. Fa amy raiky iny, le azy voaporofo hoe velo iny ro mahazo an’ny raha iny. 9 Azo volany zany hoe ndre Levy, azy mandramby ty ampahafolon-kanana iny aza, le nandoa ty ampahafolon-kanana tamy alalan’i Abrahama koa, 10 satria mbo tsy nateraky* taranakin’i Abrahama io, tamy Melkizedeka nitsena an’ny razambeny iny.

11 Ka laha nahavy ty olo ho lavorary zany ty fisoronan’ny Levita—satria anatin’ny Lalàna namea an’ny vahoaky rey iny raha io—le ino koa ty mbo ilà hanendrea mpisoro hafa volany hoe manahaky an’i Melkizedeka fa tsy manahaky an’i Arona? 12 Kanao ovà ty fisorona, le tsy maintsy ovà koa ty Lalàna. 13 Fa lahilahy resahy eto io, le baka amy foko hafa, sady tsy nisy nanompo tamy alitara eo ty olo baka amy foko io. 14 Mazava hoe baka amy fokon’i Joda ty Tompontsika, kanefa tsy nivola mihintsy Mosesy hoe nisy mpisoro baka amy foko io.

15 Le vomaiky mazava amintsika raha zay lafa misy mpisoro raiky hafa voatendry, zany hoe mpisoro manahaky an’i Melkizedeka. 16 Fe tsy hoe ty foko niaviany* mifanaraky amy ze takin’ny Lalàna ro mahavy azy ho mpisoro, fa hery manome fiaina tsy mety rava iny. 17 Ho zao moa ty nivolany, mba ho vavolombelo manamarina azy: “Mpisoro mandrakizay iha, manahaky an’i Melkizedeka.”

18 Le niravà didy taloha iny satria kelikely avao ty raha vitany,* sady tsy mandaitsy. 19 Tsy zay fa tsy nahavy ndre ino ndre ino ho lavorary ty Lalàna. Fa raha tamany tena soa amea-Ndranahary iny ro nahavy ani-zay noho nahavy antsika ho afaky hamonjy azy. 20 Tsy ho nitendrè koa mpisoro zay laha tsy nisy fifantà natao, 21 —fe tena nisy olo lasa mpisoro ndre tsy nisy fifantà natao aza, fa raiky toy lasa mpisoro satria nisy an’ny fifantani-azy nivola taminy iny hoe: “Nifanta Jehovah le tsy hiova hevitsy.* Hoy ty asany: ‘Mpisoro mandrakizay iha.’” — 22 Le raha zay ro nahavy an’i Jesosy ho antoky mikasiky an’ny fifanekea soa mandilatsy an’ny taloha iny. 23 Maro koa ty mpisoro tsy maintsy nifandimby, satria ze maty le tsy afaky ho mpisoro sasy. 24 Fe ie mpisoro velo mandrakizay, ka tsy misy mpandimby. 25 Afaky manavotsy tanteraky ani-ze mamonjy a-Ndranahary amy alalany koa zany ie, satria velo avao ie mba hisoloho ho an-drozy.

26 Fa mety soa amintsika ty mpisorobe manahaky ani-zay, zany hoe mpisorobe tsy mivaliky, tsy manan-tsiny, tsy misy loto, tafasaraky amy mpanota sady natao anabo mandilatsy ty lanitsy. 27 Tsy mila manao soro sanandro manahaky nataon’ny mpisorobe rey ie, ka hoe mila manao soro amy ty fahotan’ny vatany tse, bakeo amy ty fahotan’ny vahoaky, satria nanao soro indraiky avao ie lafa nanome ty vatany. 28 Lahilahy mana handra ro tendren’ny Lalàna ho mpisorobe, fa Anaky natao lavorary mandrakizay ro tendren’ny fifantà natao tafaran’ny Lalàna iny.

8 Toy ty hevitsy bevata amy raha resahinay zay: Mpisorobe manahaky ani-zay ro ananantsika, le mipetraky an-kavanan’ny Ndranahary Bevata an-danitsy any iny ie. 2 Mpanompo* amy pilasy masy ao noho amy ty tena tranolay koa ie, le Jehovah ro namboatsy an’ny tranolay io, fa tsy olo. 3 Fa ty mpisorobe iabiaby le tendrè hanao fanomeza noho soro, ka tsy maintsy manao soro koa ie. 4 Tsy ho mpisoro ie laha an-tany etoy, satria fa misy olo manome fanomeza mifanaraky amy Lalàna ty etoy. 5 Manao fanompoa masy olo rey, le taratsy noho talinjon’ny raha an-danitsy any ty fanompoa ataon-drozy. Hita tamy didy namea-Ndranahary an’i Mosesy iny raha zay, tamy ie fa hamboatsy an’ny tranolay iny. Ho zao moa ty didy nameany: “Ambeno soa mba hifanaraky amy modely natoro anao tam-bohitsy atoy iny ty hanaovanao ty raha iaby.” 6 Fe henanizao Jesosy namea fanompoa* tena soa, satria ie koa ro mpanelanela an’ny fifanekea soa mandilatsy ani-azy taloha iny. Fa natao ara-dalàna fifanekea io, vokatsin’ny fampitamana soa mandilatsy ani-azy taloha iny.

7 Laha tsy nisy handrany fifanekea voalohany iny, le tsy ho nilà ty fifanekea faharoe. 8 Fe nahita ty hadisoan’ny vahoaky rey Ndranahary, ka nivola ie hoe: “‘Janjino toy!’, hoy Jehovah. ‘Ho avy ty andro hanaovako fifanekea vaovao amy ty taranakin’Israely noho ty taranakin’i Joda. 9 Fe tsy hanahaky an’ny fifanekea nataoko tamy razamben-drozy iny raha zay, zany hoe fifanekea tamy andro nandaisako an-drozy an-tana niboaky baka Ejipta any iny, satria tsy nanaja an’ny fifanekea nataoko tamin-drozy iny rozy, ka tsy nidareako sasy’, hoy Jehovah.”

10 “‘Fa toy ty fifanekea hataoko amy taranakin’Israely, afaran’ny andro zay’, hoy Jehovah. ‘Hataoko an-tsain-drozy ao ty lalàko, sady hosoratiko am-pon-drozy ao. Ka ho Ndranaharin-drozy aho, le rozy ho vahoakiko.

11 “‘Samby tsy hampianatsy ty olo firenena raiky aminy noho ty rahalahiny sasy rozy hoe: “Anovo ze hahaizanareo an’i Jehovah!” Fa hahay ahy rozy iaby, baka amy ty farany kelikely zisiky amy ty farany be. 12 Fa hoferinesako rozy ndre nanao raha raty aza, sady tsy hotiaroviko sasy ty fahotan-drozy.’”

13 Kanao ie nivola hoe “fifanekea vaovao”, le nataony lany daty raiky taloha iny. Sady fa ho rava raiky fa lany daty noho mihaantitsy iny.

9 Laha fifanekea taloha iny ro resahy, le nisy lalàna mikasiky ty fanompoa masy, noho ty pilasy masy nisy azy tan-tany etoy. 2 Namboary ty efitsy voalohany tamy tranolay ao, ka tamy efitsy io ao ro nisy ty fasia jiro noho ty latabo noho ty mofo aseho.* Le nikaihy hoe Pilasy Masy efitsy io. 3 Fa tambalikin’ny ridò faharoe iny ao ro nisy an’ny efitsy nikaihy hoe Farani-ze Masy iny. 4 Tao ro nisy ty fitaova volamena fanoroa emboky manitsy noho ty Vata misy ty fifanekea. Nipetaha volamena Vata iny iabiaby, le tamy Vata io ao ty siny volamena nisy ty mana, noho tehin’i Arona nitiry iny, noho ty vato pisaky nisy an’ny fifanekea iny. 5 Le tanabony eo ro nisy ty kerobima be voninahitsy, azy nanaloky an’ny limbony fampilongoa* iny. Fe tsy henanizao ty fotoa tokony hiresaha ty pitsopitsony amy raha iaby rezay.

6 Lafa vita manahaky ani-zay ty fanamboara an’ny raha iaby reo, le militsy amy efitsy voalohany amy tranolay iny ao ty mpisoro mba hanao fanompoa masy, sady militsy ao sanandro. 7 Fe ty mpisorobe raiky avao ro militsy amy efitsy faharoe ao, indraiky santao. Le tsy militsy ao ie laha tsy manday lio, zany hoe lio ameany vokatsin’ny fahotà tsy kinahy nataony noho nataon’ny vahoaky rey. 8 Asehon’ny fanahy masy mazava baka amy raha zay zany, fa mbo tsy natoro soa ty lala mandeha amy pilasy masy ao laha mbo teo tranolay voalohany iny. 9 Fanohara ivolana an’ny fotoa henanizao tranolay io. Laha fanohara io ro hentea, le misy fanomeza noho soro amea. Fe tsy mahavy ani-ze manao fanompoa masy hana eritseritsy malio tanteraky raha rey. 10 Raha mikasiky hany noho raha finomy noho fombafomba fisasà* samby hafa avao raha rey. Raha nitakin’ny lalàna mikasiky ty vatan’olombelo raha rey, sady natao nanan-kery zisiky hiavian’ny fotoa voatondro hanitia ty raha iaby.

11 Fe fa lasa mpisorobe Kristy, ka mandramby fitahia baka amy raha zay tsika. Lafa lasa mpisorobe ie, le nilitsy tamy tranolay tena bevata noho tena lavorary sady tsy namboary tana, zany hoe tsy anatin’ny raha an-tany etoy. 12 Indraiky avao ie ro nilitsy tamy pilasy masy tao, fe tsy lion’aosilahy noho lion’aombilahy maota ro nandesiny, fa ty liony, le baka aminy ro nahazoantsika fanafaha* mandrakizay. 13 Fa laha ty lion’aosilahy noho ty lion’aombilahy noho ty lavenokin’aombivavy maota nasindrasindraky tamy ze olo naloto aza manamasy noho manadio ty nofotsy, 14 handraky moa ty lion’i Kristy! Nameany ho soro tsy misy handra ho a-Ndranahary ty vatany tamy alalan’ny fanahy masy mandrakizay. Ty liony koa ro manadio ty eritseritsintsika, ka tsy manao asa tsy misy dikany* sasy tsika. Amy zay tsika ho afaky hanao fanompoa masy ho an’ny Ndranahary velo iny.

15 Zay mahavy azy ho mpanelanela amy fifanekea vaovao io. Amy zay hahazo an’ny fampitamana mikasiky lova mandrakizay iny ty olo nikaihy. Nimaty moa Kristy ka ty vilim-panavota ro nanafahany an-drozy, satria rozy nandika lalàna tambanin’ny fifanekea taloha iny. 16 Tsy zay fa lafa misy fifanekea atao, le tokony ho maty olo nanao fifanekea iny. 17 Fa ty fahafatesa ro mampanan-kery ty fifanekea, satria tsy manan-kery mihintsy raha zay laha mbo velo olo nanao fifanekea iny. 18 Dikani-zay, ndre fifanekea taloha iny aza tsy natao nanan-kery* laha tsy nisy lio nalatsaky. 19 Fa lafa nivolanin’i Mosesy tamin’olo iabiaby ty didy kiraidraiky tamy Lalàna ao, le nalany ty lion’aombilahy maota, noho ty lion’aosilahy noho ty rano, bakeo nasindrasindrany tamy boky* teo noho tamy vahoaky iabiaby, ka volon’aondry mena malangy noho hysopa ro nanindrasindrahany an’ny raha zay. 20 Nivola ie tamy zay hoe: “Toy ty lion’ny fifanekea natao-Ndranahary taminareo, zany hoe fifanekea nivolaniny taminareo mba hohajanareo iny.” 21 Nisindrasindrahany lio koa ty tranolay noho ty fitaova iaby fanaova fanompoa masy.* 22 Fa presky ty raha iaby ro diovy amy lio, araky ty Lalàna. Le laha tsy misy lio alatsaky le tsy misy fanengà hadisoa.

23 Ka tsy maintsy nidiovy manahaky ani-zay koa zany ty taratsin’ny raha an-danitsy any. Fe mila soro tena soa mandilatsy ani-zay ty raha an-danitsy any. 24 Fa Kristy tsy nilitsy tamy pilasy masy namboary tana, zany hoe pilasy masy manahaky an’ny tena ie iny, fa nilitsy tan-danitsy any mihintsy, amy zay hiseho aloha-Ndranahary* eo ho antsika ie henanizao. 25 Tsy hoe nanao an’ny raha zay ie mba hanao soro ty vatany imaro, tsy manahaky ty mpisorobe militsy santao amy pilasy masy ao, sady manday lio kanefa tsy liony. 26 Satria laha zay ty niseho, le tsy maintsy ho nijaly matetiky ie nanomboky tamy nanorena ani-zao tontolo zao. Fe fa niseho indraiky avao ie tanatin’ny fotoa itamperani-zao tontolo zao,* mba hanafaky tanteraky ty ota amy alalan’ny soro nataony iny. 27 Maty indraiky avao ty olo, le hotsarà afarani-zay, 28 le manahaky ani-zay koa fa namea indraiky avao Kristy mba handay ty fahotan’olo maro. Ka lafa miseho fanindroeny ie, le tsy hoe hanafaky fahotà,* fa hiseho amy ze olo mandiny azy marè mba hanavotsy an-drozy.

10 Talinjon’ny raha soa ho avy avao ty Lalàna, fa tsy azy tena ie iny. Ka tsy mahavy ani-ze mamonjy a-Ndranahary ho lavorary mihintsy zany ty Lalàna,* ndre eo aza ty soro mitovy amea avao santao. 2 Laha nahavita ani-zay soro rey, le tsy ho nilà sasy ty nanao soro, satria tsy ho nieritseritsy ty vatany ho mpanota sasy ze manao fanompoa masy, fa fa nidiovy indraiky avao. 3 Soro rey aza vomaiky mahavy ty olo hahatiaro avao santao hoe mpanota rozy, 4 satria tsy mahavita mangalaky ty ota ty lion’aombilahy noho ty lion’aosilahy.

5 Ka lafa niavy tamy zao tontolo zao eto Kristy, le nivola hoe: “‘Tsy teanao ty soro noho ty fanatitsy, fa nanoma vata ho ahy iha. 6 Tsy nekenao koa ty fanatitsy oroa tanteraky noho ty fanatitsy ho an’ny ota.’ 7 Le hoy ty asako: ‘Toy lahy aho Ndranahary, avy hanao ty sitraponao!—Voasoratsy amy horonam-boky* ao ty mikasiky ahy.—’” 8 Le nivola tse ie hoe: “Tsy teanao sady tsy nekenao ty soro noho ty fanatitsy, noho ty fanatitsy oroa tanteraky noho ty fanatitsy ho an’ny ota.”—Namea mifanaraky amy Lalàna soro rey.— 9 Bakeo ie nivola hoe: “Toy lahy aho, avy hanao ty sitraponao.” Alàny raiky voalohany iny, mba hametraha an’ny raiky faharoe iny. 10 ‘Sitrapony’ zay ro nahavy antsika nihamasìny tamy alalan’i Jesosy Kristy, lafa nanome ty vatany indraiky avao ie.

11 Samby namonjy ty pilasiny koa ty mpisoro sanandro, mba hanao fanompoa masy* noho hanao soro mitovy imaro. Fe tsy mahavita mangalaky tanteraky ty ota mihintsy soro rey. 12 Fa ie nanao soro raiky ho an’ny ota, zany hoe soro indraiky avao, le bakeo ie nipetraky ta ankavana-Ndranahary eo. 13 Nanomboky tamy zay, le nandiny ie zisiky hanaova ty fahavalony ho fasiany tomboky. 14 Nataony lavorary mandrakizay ze olo nihamasìny, ka fanatitsy raiky natao soro ty nanaovany an’ny raha zay. 15 Vavolombelo manamarina an’ny raha zay amintsika koa ty fanahy masy, satria fa nivola fanahy io hoe: 16 “‘Toy ty fifanekea hataoko amin-drozy, afaran’ny andro zay’, hoy Jehovah: ‘Hataoko am-pon-drozy ao ty lalàko, sady hosoratiko an-tsain-drozy ao.’” 17 Nivola koa ty fanahy masy hoe: “Le tsy hotiaroviko sasy ty fahotan-drozy noho ty fandikan-dalàna nataon-drozy.” 18 Ka lafa nengà fahotà reo, le tsy ilà sasy ty fanatitsy ho an’ny ota.

19 Vokatsin’ny lion’i Jesosy iny zany, rahalahy, le sakintsika ty* hilitsy amy lala mandeha amy pilasy masy iny ao. 20 Nisokafiny* ho antsika lala zay, tamy ie nandalo tamy ridò iny eo, tsy ino ridò io fa ty nofotsiny. 21 Mana mpisorobe miandraikitsy ty raha an-trano-Ndranahary ao koa tsika. Laha zay ie, 22 le ndao tsika hamonjy a-Ndranahary amy fo malio sady hatòky tanteraky lafa manao an’ny raha zay, satria ty fontsika fa nidiovy* ho afaky amy eritseritsy maloto, le ty vatantsika fa nisasà tamy rano malio. 23 Le ndao hambarantsika amin’olo iaby avao ty raha tamanintsika, ka tsy hisalasala tsika, satria tsy mivaliky amy ty safàny azy nampitamà iny. 24 Ndao koa tsika hifampidary* mba hifandrisiky amy fitiava noho amy asa soa, 25 ka tsy hahafoy ty fiarahantsika mivory, manahaky ty olo sisany fa zatsy tsy mivory, fa hifampahery, sirtò fa hitanareo hoe mihamarìny andro iny.

26 Fa laha kinahintsika azy ty manota, kanefa tsika fa mahay soa ty fahamarina, le tsy misy soro ho an’ny ota sasy. 27 Le fa mandiny sazy avao tsika sady matahotsy, le mandiny heloky mirehitsy manahaky afo io, azy handrava ty mpanohitsy iny. 28 Ze tsy nidary ty Lalànan’i Mosesy, le nivonoa tsy an-kitsitsy, lafa nisy vavolombelo roe na telo. 29 Ka laha ty hevitsinareo zany, tsy vomaiky harerè va ty sazy maeva ani-ze manitsaky ty Anaki-Ndranahary, noho mieritseritsy hoe tsy misy dikany loatsy ty lion’ny fifanekea nanamasìna azy, sady tsy mampisy dikany ty fanahin’ny Ndranahary mampiseho hasoam-panahy miavaky iny? 30 Haintsika azy nivola ho zao iny hoe: “Ahy ty famalea, le zaho ro hamaly”, noho ty hoe: “Hitsara ty vahoakiny Jehovah.” 31 Mampatahotsy ho azon’ny tanan’ny Ndranahary velo iny zay.

32 Fe tiarovo avao ty andro taloha, tamy nareo namea hazavà iny. Nialy ay noho niaritsy fijalea nareo tamy zay. 33 Kindraiky nareo niratiratỳ noho nampijalỳ tamin’olo maro eny,* le kindraiky niaraky nijaly tamin’olo* natao manahaky ani-zay rey koa. 34 Niferinesanareo ze olo nigadra, sady mbo falifaly avao nareo ndre niravà aza ty hanananareo, satria hainareo fa mana lova tena soa noho maharitsy nareo.

35 Le tokony hahasaky hivola avao zany nareo, satria hahazoa valisoa bevata raha zay. 36 Fa mila miaritsy nareo mba ho tanteraky aminareo raha nampitamany iny, lafa vitanareo ty sitrapo-Ndranahary. 37 Fa “fa tena kely sisa” le “ho avy azy ho avy iny, sady tsy ho ela.” 38 “Fe ty olo marina ho velo satria manam-pinoa”, fa “laha mihemotsy ie, le tsy hahazo hatò amiko.” 39 Ka tsy anisani-ze mihemotsy ho ripaky tsika, fa anisani-ze manam-pinoa mba ho avotsy ty aintsika.

11 Ty finoa le fatokisa tanteraky hoe hiseho ty raha tamany, sady porofo* manamarina ty raha tena misy kanefa tsy hita maso. 2 Fa ty finoa ro nahavy ty olo taloha* nampisehoa-Ndranahary hoe mahazo hatò aminy.

3 Finoa ro ahaizantsika hoe ty safà-Ndranahary ro nandamìna ani-zao tontolo zao,* ka baka amy raha tsy hita maso ro nampisy ty raha hita maso.

4 Finoa ro nahavy an’i Abela hanao soro ho a-Ndranahary, zany hoe soro misy viliny mandilatsy ty ahin’i Kaina. Finoany zay ro nahazoany porofo hoe olo marina ie, satria nahazo hatò tamy Ndranahary* ty fanomeza nataony. Ka ndre fa nimaty aza ie, le mbo mivola avao satria manam-pinoa.

5 Finoa ro nahavy an’i Enoka hafindra pilasy, mba tsy hahita fahafatesa, le tsy nihita mihintsy ty pilasy nisy azy satria nafindra-Ndranahary. Fa talohan’ny namindrà azy, le nahita porofo ie hoe nahazo hatò tamy Ndranahary. 6 Le ze tsy manam-pinoa, tsy afaky mampifalifaly a-Ndranahary, satria ze mamonjy azy le tsy maintsy mino hoe misy ie sady mpanome raha soa ani-ze tena mila azy.

7 Finoa ro nahavy an’i Noa hatahotsy a-Ndranahary noho hamboatsy sambofiara mba hanavota ty fianakaviany. Talohani-zay ie fa nivolani-Ndranahary mba hiamby soa mikasiky ty raha mbo tsy hitany. Finoa koa ro nahavy azy nampiseho hoe maeva hosazỳ zao tontolo zao, ka lasa mpandova ty fahamarina ie satria nanam-pinoa.

8 Finoa ro nahavy an’i Abrahama hanoriky safà lafa nikaihy. Nanoriky safà ie ka nandeha amy pilasy hamea azy mba ho lovany any. Le nandeha ie, ndre tsy hainy aza hoe ho aia. 9 Finoa ro nahavy azy hivahiny tamy tany nampitamany iny any, ka sahala hoe tan-tanin’olo any ie. Nipetraky an-tranolay ie, niaraky tamy Isaka noho Jakoba, mpiaraky mandova aminy an’ny fampitamana iny. 10 Nandiny an’ny tanà tena soa fototsy iny avao ie, le Ndranahary ro mpamoro noho mpananga an’ny tanà io.

11 Finoa koa ro nahavy an’i Saraha ho bevoka,* ndre fa lisatsin’ny tao ahafaha miteraky aza ie, satria nino ie hoe tsy mivaliky amy ty safàny* azy nampitamà iny. 12 Dikani-zay, baka amy lahilahy raiky sahala fa maty ro niboahan’olo maro biby manahaky basia an-danitsy eny rey, sady tsy voaisaky manahaky fasy amoron-driaky eny rey ty isakin-drozy.

13 Nanam-pinoa zisiky nahafaty an-drozy rozy iaby, ndre tsy nihitan-drozy aza ty fahatanterahan’ny raha nampitamany rey. Fa nijilon-drozy baka lavitsy raha zay ka fa tsy nilinin-drozy, le nivola tamin’olo rozy hoe vahiny noho olo mandalo avao rozy amy tany iny eo. 14 Fa ze olo mivola manahaky ani-zay, le mampiseho mazava soa hoe miezaky mafy hila pilasy hisy azy. 15 Fe laha nieritseritsy ty pilasy nialan-drozy avao rozy, le ho nahita hevitsy himpoliana. 16 Fe pilasy tena soa ro irin-drozy ho azo, tsy ino zay fa pilasy an-danitsy any iny. Ka tsy mahamenatsy a-Ndranahary zany ty kaihy hoe Ndranaharin-drozy, satria ie fa nanoma tanà ho an-drozy.

17 Finoa ro nahavy an’i Abrahama ho sahala hoe fa nanao soro an’i Isaka mihintsy, lafa nitsapà ty finoany.—Parè hanao soro ty anakilahiny toka, lahilahy falifaly nahazo an’ny fampitamana iny.—Parè hanao an’ny raha zay ie, 18 ndre fa nivolana aza hoe: “Ho baka amy Isaka azy hokaihy hoe taranakinao iny.” 19 Nanao ani-zay ie, satria hainy fa vita-Ndranahary ndre ty mamelo an’i Isaka ndraiky aza. Le nampoly taminy ndraiky anany io ndre sahala fa nimaty aza, ka lasa misy hevitsiny an’ohatsy raha zay.

20 Finoa koa ro nahavy an’i Isaka hitso-drano an’i Jakoba noho Esao mikasiky ty raha mbo ho avy.

21 Finoa ro nahavy an’i Jakoba hitso-drano an’ny anakilahin’i Josefa roe rey, tamy ie fa ho maty, le niondriky* ie sady nianky tamy lohan’ny tehiny iny.

22 Finoa ro nahavy an’i Josefa hiresaky, tamy ie fa ho maty, hoe hafahy ty anan’Israely, ka namepetsy* mikasiky ty taolany* ie.

23 Finoa ro nahavy ty ray aman-drenin’i Mosesy hamony azy tanatin’ny telo vola, tafaran’ny nahaterahany, satria nihitan-drozy hoe mamimamy ajà iny, le tsy natahotsy ty didin’ny mpanjaka rozy. 24 Finoa ro nahavy an’i Mosesy tsy naneky hatao hoe anan’ny anakampelan’i Farao, lafa nihabe ie. 25 Naleony nampijalỳ niaraky tamy vahoaki-Ndranahary, tozay ho falifaly tsielatsiela tamy fahotà. 26 Nieritseritsy moa ie hoe mbo vatan-draha mandilatsy ty hananan’i Ejipta ty fanambanimbanea niaretan’ny Voahosotsy iny, satria fa tsy lininy ty hahazo an’ny valisoa iny. 27 Finoa fa tsy favakà ty helokin’ny mpanjaka, ro nahavy azy hiala ta Ejipta any, satria tsy azo nihozonkozony mihintsy ie, sahala hoe nahita ani-azy tsy hita iny. 28 Finoa ro nahavy azy hankalaza Paska noho hañosotsy lio tamy tolàm-baravara eo, mba tsy hamono* ty talanolo tamy Israelita eo ty mpandripaky.

29 Finoa ro nahavitan-drozy niampita tamy Riaky Mena, sahala hoe nandeha tamy tany maiky. Fe lafa nanohatsy nandeha mbeo Ejipsianina rey le naepokin’ny rano iny.

30 Finoa ro nampiravoky an’ny lakoron’i Jeriko iny lafa niodikodiha tanatin’ny fito andro. 31 Finoa ro nahavy an’i Rahaba makorely tsy niaraky maty amin’olo tsy nanoriky safà rey, satria nirambesiny soa mpitsikilo rey.

32 Ka ino koa ty mbo hovolaniko? Fa tsy ho ampy ty fotoa laha horesahiko eto iaby ty mikasiky an’i Gideona, Baraka, Samsona, Jefta, Davida, Samoela, noho ty mpaminany hafa. 33 Nanam-pinoa rozy, ka nandresy fanjakà, nampanjaka ty fahamarina, nahazo fampitamana, nampihily ty vavan’ny liona, 34 namono afo miroaroa, afaky nilay mba tsy ho azon’ny sabatsy, nalemy kanefa lasa nahery, lasa nahery tan’aly any, le nampilay maramila nanafiky. 35 Ty ampela sisany nandramby ty longony nivelomy ndraiky. Fa ty olo hafa nampijalijalỳ satria tsy naneky hafaha tamy alalan’ny vilim-panavota, mba hahavy an-drozy hahazo fameloma ty maty tena soa. 36 Ty olo hafa koa niaritsy fitsapà ka nikizakizahy noho nifilapilary, le tsy vitani-zay fa nirohiza seny noho nigadrà koa rozy. 37 Nitorahy vato rozy, nitsapà ty finoan-drozy, nililia hizara roe, nivonoa tamy sabatsy, niriorio nisiky angozin’aondry noho angozin’aosy, sady tsy nana raha mihintsy, niaritsy raha sarotsy noho nampijalỳ. 38 Le tsy maeva an-drozy zao tontolo zao. Niriorio tamy dezera* any rozy, tam-bohitsy eny, tanaty lakato any, noho tanaty lavaky ambany tany any.

39 Fe tsy nahita ty fahatanterahan’ny raha nampitamany iny rozy iaby, ndre nahita porofo aza hoe nahazo hatò satria nanam-pinoa. 40 Tsy zay fa Ndranahary fa nieritseritsy hanome antsika raha soa marè, mba tsy hatao lavorary rozy laha tsy eo tsika.

12 Ka satria misy an’ny vavolombelo maro biby manahaky rahona reo manodidy antsika, le ndao koa tsika hanafaky ani-ze raha iaby manavesatsy antsika noho ty ota mora manakantsaka antsika, le ndao tsika hanohy an’ny korsa ampanaovy antsika iny ka haharitsy amy raha zay. 2 Sady lomay tsika ro manenty soa an’ny Mpitariky Farany Anabo sady Mpandavorary ty finoantsika iny, tsy ia zay fa Jesosy. Fa nahavy azy niaritsy hazo fijalea* fifalea natao talohany eo iny, ka tsy nampanino azy ty ho afa-baraka, le nipetraky ta ankavanan’ny sezim-panjakà-Ndranahary teo ie. 3 Ka mba diniho soa azy niaritsy safà fanabokà iny, zany hoe safà nivolanin’ny mpanota nanimba ty vatan-drozy rey, amy zay nareo tsy ho vozaky na ho kivy.

4 Mialy ay amy ota zay nareo, fe mbo tsy avy zisiky amy fandatsaha ty lionareo raha zay. 5 Sady fa halinonareo tanteraky fisolohoa natao aminareo manahaky ty ataon’ny baba amy ty anany iny hoe: “Ka ambanimbanỳ, anako, ty anatsy baka amy Jehovah, le ka kivy laha anariny iha. 6 Fa ze tean’i Jehovah ro anariny. Sazìny* ze rambesiny sahala anaky.”

7 Mila miaritsy nareo, fa anisan’ny fananara* anareo raha zay, satria mandramby anareo sahala anaky Ndranahary. Fa ia moa ty anaky tsy anarin’ny babany? 8 Laha tsy anary manahaky ani-zay nareo iaby, le anaky amonto fa tsy tena anaky. 9 Ankoatsini-zay, nananatsy antsika ty babantsika niteraky antsika,* le nihajantsika. Ka handraky va Baba mitariky ty fiainantsika amy alalan’ny fanahy masy iny, tsy tokony haneky azy va tsika amy zay ho velo? 10 Nananatsy antsika tsielatsiela avao rozy, mifanaraky amy ze hitan-drozy fa mety, fa Ie manao an’ny raha zay mba hahasoa antsika, amy zay ho masy manahaky azy koa tsika. 11 Marina fa atao raha tsy mahafalifaly eo no ho eo ty fananara fa maharary.* Fe bakeo misy vokany soa fananara zay, tsy ino zay fa fiadana noho fahamarina ho ani-ze nampiofany tamy alalan’ny raha zay.

12 Hatanjaho zany ty tana miraviravy noho ty ongotsy malemy. 13 Anovo mahity avao koa ty lala homban’ny tombonareo, mba tsy hifandipatsy ty taolani-ze malemy tomboky, fa mba ho janga. 14 Anovo ze hilongoanareo amin’olo iaby, le miezaha ho masy avao,* satria tsy hahita an’ny Tompo ze tsy masy. 15 Miambena soa iaby nareo, tsy no tsy hampisehoa-Ndranahary ty hasoam-panahiny miavaky. Amy zay tsy hisy vahatsy feno poizy hiboaky aminareo eo, ka hampisy raha manahira sady hahavoapoizy* olo maro. 16 Miambena soa koa tsy no hisy mpijangajanga* aminareo eo, na olo tsy manaja raha masy manahaky an’i Esao. Nahafoy ty zony amy maha talanolo azy ie, ka natakalony hany indraiky mihina avao raha zay. 17 Hainareo fa tsy nekè ie tafara atoy, lafa ta ho nahazo an’ny tsodrano iny. Ka ndre niezaky marè nampiova hevitsy an’ny babany aza ie sady nitany, le tsy nisy vokany raha zay.*

18 Fa nareo tsy namonjy vohitsy azo tsapà tana sady nirehitsy, na rahona maniboky, na namonjy amy maìky mangokòky, na tsioky be, 19 na feon’antsiva nitsofy marè, na feo nivola tamy vahoaky. Lafa naharè an’ny feo zay ty vahoaky, le nisoloho mba tsy hisy raha hovolany amin-drozy sasy, 20 satria tsy zakan-drozy didy ho zao iny hoe: “Ndre biby aza ro mikasiky an’ny vohitsy iny, le tsy maintsy hotorahy vato.” 21 Nampatahotsy marè koa ty raha niseho tamy fotoa zay, ka hoy Mosesy: “Matahotsy noho mangitikitiky aho!” 22 Fa Vohitsy Ziona noho tanàn’ny Ndranahary velo iny ro vonjenareo, zany hoe Jerosalema an-danitsy any, noho anjely an’alinaliny 23 miaraky mivory, noho ty fiangonan’ny talanolo voasoratsy an-danitsy any, noho Ndranahary, azy Mpitsara ty olo iaby iny, noho ty olo marina manaraky ty fitarihan’ny fanahy masy ka fa natao lavorary, 24 noho Jesosy, azy mpanelanela amy fifanekea vaovao iny, noho ty lio nasindraky. Mivola soa mandilatsy ty lion’i Abela lio zay.

25 Miambena soa nareo tsy no tsy mahefa mijanjy* ani-azy mivola iny. Ze tsy nahefa nijanjy ani-azy nivola ty fampitandrema-Ndranahary tan-tany eto iny aza tsy afaky niala, ka handraky moa tsika laha tsy manoriky ty safàni-azy mivola baka an-danitsy any iny! 26 Nampihozonkozo ty tany ty feony tamy fotoa zay, fa henanizao ie nampitamà hoe: “Mbo hahozonkozoko ndraiky ty tany, fe tsy ty tany avao fa ty lanitsy koa.” 27 Safà hoe “ndraiky” iny le midika hoe halà ze raha hozonkozony, zany hoe ty raha fa natao, amy zay ho eo avao ty raha tsy hozonkozony. 28 Hahazo Fanjakà tsy azo hozonkozony tsika, ka ndao tsika hiezaky avao mba hampisehoa hasoam-panahy miavaky, satria hasoam-panahy miavaky zay ro ahafahantsika manao fanompoa masy azony ekè, sady matahotsy noho manaja azy avao tsika amy zay. 29 Fa afo mandrava Ndranaharintsika iny.

13 Mifankatiava avao manahaky mpirahalahy io. 2 Ka halino ty mandramby vahiny,* fa zay ro nahavy ty olo sisany hampandroso anjely ndre tsy nihain-drozy aza. 3 Tiarovo azy gadra rey,* sahala hoe gadra miaraky amin-drozy nareo. Tiarovo koa azy ampijalỳ rey, satria olombelo* avao koa nareo. 4 Tokony hanan-kaja amin’olo iaby ty fanambalea, le ka engà haloto ty fandrean’ny mpivaly, satria hosazì-Ndranahary ty mpijangajanga* noho ty mpandranto. 5 Atorò amy ty fiainanareo hoe tsy tea drala nareo, le miezaha ho afa-po amy ze fa eo. Fa hoy ty asany: “Tsy hanenga anao mihintsy aho sady tsy hahafoy anao mihintsy.” 6 Le tena hahasaky tsika amy zay, ka hivola hoe: “Jehovah ro mpanampy ahy, le tsy hatahotsy aho. Ka ino ty azon’olo atao amiko?”

7 Tiarovo azy mitariky* aminareo eo rey, tsy ia zay fa azy nivola ty safà-Ndranahary taminareo rey. Lafa mandiniky ty raha soa azo baka amy ty fandaisam-batan-drozy nareo, le tahafo ty finoan-drozy.

8 Tsy miova Jesosy Kristy, nomaly noho androany noho mandrakizay.

9 Ka maneky ho voatarikin’ny fampianara sankarazany noho fampianara hafahafa nareo. Fa aleo ty hasoam-panahy miavaky aseho-Ndranahary ro hampatanjaky ty fonareo, fa tsy ty lalàna mikasiky ty hany, satria tsy misy raha soa ho azoni-ze olo mieritseritsy hoe ty hany ro tena vatan-draha.

10 Mana alitara tsika, le tsy mana fahefà hihina eo ze manao fanompoa masy amy tranolay ao. 11 Fa lafa nandesin’ny mpisorobe tamy pilasy masy ao ty lion’ny biby mba hatao fanatitsy ho an’ny ota, le oroa ivelan’ny toby any fatin’ny biby iny. 12 Dikani-zay, nijaly ivelan’ny vavahadin’ny tanà any koa Jesosy, mba hohamasìny amy alalan’ny liony ty vahoaky. 13 Ka ndao zany tsika handeha ivelan’ny toby any mba ho aminy any, ka handay ty fanambanimbanea nandesiny, 14 satria tsy mana tanà maharitsy eto tsika, fa azy ho avy iny ro tena ilàntsika. 15 Le manaova soro fiderà ho a-Ndranahary avao amy alalan’i Jesosy, zany hoe vokatsin’ny sony, ka resaho amin’olo hafa ty mikasiky ty anarany. 16 Ankoatsini-zay, le ka halino ty manao raha soa noho mizara ty raha anananareo amin’olo hafa, fa tena mahafalifaly a-Ndranahary ty soro manahaky ani-zay.

17 Ekeo noho oriho ty safàni-azy mitariky* aminareo eo rey, satria mikarakara* anareo avao rozy, manahaky olo mbo hatao ankety io. Amy zay ho falifaly rozy lafa manao an’ny raha zay fa tsy hitseky, satria tsy hahasoa anareo laha mitseky rozy.

18 Mivavaha avao ho anay. Matoky moa zahay hoe malio* ty eritseritsinay, satria ta hanao ty marina amy raha iaby zahay. 19 Fa ty tena ampirisihiko anareo le hoe mivavaha mba ho tafimpoly malakilaky aminareo any aho.

20 Nafahin’ny Ndranaharin’ny fiadana iny baka amy maty any mpiaraky aondry bevata iny, zany hoe Jesosy Tompontsika, azy nanday ty lion’ny fifanekea mandrakizay iny. Loniky lahy Ndranaharin’ny fiadana iny 21 hanome anareo ty raha iaby mba hanaovanareo ty sitrapony! Jesosy Kristy ro ampiasany mba hahavy antsika hanao ze raha teany. Ho ahi-Ndranahary lahy ty voninahitsy mandrakizay mandrakizay! Amena.

22 Le mampirisiky anareo aho, rahalahy, mba haharitsy hijanjy an’ny safà mampahery zay, satria boribory avao taratasy nisoratiko ho anareo toy. 23 Teako ho hainareo hoe fa nabototsy Timoty rahalahintsika. Ka laha malaky avao ty fiaviany atoy, le hiaraky ho aminareo any zahay.

24 Mampamangy amy ze olo iaby mitariky* aminareo eo, noho amy ty olo masy iabiaby. Mampamangy anareo zao hoe rozy an’Italia atoy.

25 Loniky lahy hampisehoa hasoam-panahy miavaky nareo iabiaby!