TY TARATASY VOALOHANY NISORATIN’I PETERA

1 Baka amy Petera, apostolin’i Jesosy Kristy.

Ho ahi-ty vahiny miparitaky a Ponto, Galatia, Kapadokia, Azia, noho a Bitynia any, tsy ia zay fa ze nifilỳ 2 mifanaraky amy ty fa nihain’ny Ndranahary Babantsika iny, noho nihamasinin’ny fanahy masy, mba hanoriky safà noho mba hosindrasindrahy amy lion’i Jesosy Kristy,

Hitombo lahy ty hasoam-panahy miavaky* haseho aminareo noho ty fiadana ho azonareo!

3 Hoderà lahy Ndranahary Baban’i Jesosy Kristy Tompontsika, satria tena miferinay olo ie ka naterakiny ndraiky tsika, le lasa mana raha tamany velo satria nivelominy ndraiky Jesosy Kristy. 4 Naterakiny ndraiky tsika mba hana lova tsy mety simba noho tsy mety maloto sady maharitsy. Nihajarỳ an-danitsy any ho anareo raha zay, 5 tsy ia zay fa nareo ze arovan’ny heri-Ndranahary satria manam-pinoa. Arovany nareo mba hahazo fanavota, le fa parè hambara mazava soa fanavota zay amy fotoa farany. 6 Vokatsin’ny raha zay le falifaly biby nareo, ndre nalahelo aza lafa tsy maintsy niaritsy raha sarotsy sankarazany tanatin’ny fotoa kelikely. 7 Amy zay handay fiderà noho voninahitsy noho fanajà ho anareo ty finoanareo vita sedra, lafa haseho mazava Jesosy Kristy, satria ty finoa vita sedra, le mbo sarotsy biby mandilatsy ty volamena. Ty volamena moa mety simba ndre fa nisedrà* tamy afo aza. 8 Ndre mbo tsy nihitanareo mihintsy aza Kristy, le tea azy nareo. Sady ndre tsy hitanareo aza ie henanizao, le mino azy nareo sady falifaly noho manitranitra, ka tsy hay ty hivolana ty hafaleanareo, 9 satria tratsinareo ty raha kendren’ny finoanareo, tsy ino zay fa ty hahazo fanavota.

10 Namotopototsy noho nikaroky soa mikasiky an’ny fanavota zay mpaminany rey, azy naminany mikasiky ty hasoam-panahy miavaky voatoka ho anareo rey. 11 Nanontanean-drozy soa avao hoe ino ty raha hiseho, le ombia ro ho tanteraky ty raha nivolanin’ny fanahy masy mikasiky an’i Kristy, satria ty fanahy masy tamin-drozy ao fa nanambara sandrany fa tsy maintsy hijaly Kristy, le hahazo voninahitsy afarani-zay. 12 Naseho mazava tamin-drozy hoe tsy ho ahi-ty vatan-drozy ty fanompoa nataon-drozy, fa ho anareo. Ze raha nisoratin-drozy ro ambara aminareo henanizao. Azy nitory ty vaovao soa taminareo rey ro nanambara an’ny raha zay, lafa nahazo fanahy masy nalefa baka an-danitsy any rozy. Raha rey mihintsy ro tena tean’ny anjely hodinihy laliky.

13 Ka le hatanjaho ty sainareo mba ho parè hiasa, le tokony handiniky soa avao nareo. Tokony hitamà ty hasoam-panahy miavaky haseho aminareo, amy fotoa hampisehoa mazava an’i Jesosy Kristy koa nareo. 14 Anaky manoriky safà nareo, le ka maneky handesin’ny faniria nanananareo taloha sasy, tamy nareo mbo tsy nahay a-Ndranahary. 15 Fa tokony ho masy nareo amy ty fandaisam-batanareo iabiaby, manahaky ani-Azy masy nikaiky anareo iny, 16 satria voasoratsy hoe: “Tsy maintsy masy nareo, satria masy aho.”

17 Mpitsara tsy miangatsy Babantsika iny sady mitsara ty olo kiraidraiky arakaraky ze raha ataon-drozy. Ka laha ie ro kaihinareo, le atorò amy ty raha ataonareo hoe matahotsy azy nareo, amy fotoa maha vahiny anareo. 18 Hainareo moa fa tsy tamy raha mety simba, manahaky volafoty na volamena, ro nanafaha* anareo tamy fiaina tsy mahasoa nilovànareo baka amy razambenareo, 19 fa tamy lio sarotsy mandilatsy ani-zay, tsy ino zay fa ty lion’i Kristy. Sahala lion’ny anak’aondry tsy misy handrany noho tsy misy tasy raha zay. 20 Marina hoe fa nifilỳ* sandrany Kristy, talohan’ny nanorena ani-zao tontolo zao. Fe naseho ie amy fotoa farany henanizao mba hanampea anareo. 21 Ie ro nahavy anareo ho lasa mpino a-Ndranahary, azy namelo azy ndraiky noho nanome voninahitsy azy iny, mba hinoanareo noho hitamananareo a-Ndranahary.

22 Fa nanadio ty vatanareo nareo lafa nanoriky ty fahamarina, ka ty vokatsin’ny raha zay, le fitiavan-drahalahy tsy misy fiatsarambelatsihy. Ka le mifankatiava marè amy fo nareo. 23 Fa nateraky ndraiky nareo, tsy baka amy voa* mety lo, fa baka amy tsy mety lo, zany hoe baka amy safàn’ny Ndranahary velo sady maharitsy mandrakizay iny. 24 Fa “ty olombelo* iabiaby le manahaky akata io, sady manahaky folera an-tonda eny ty voninahitsin-drozy iaby. Malazo ty akata, bakeo mihintsa ty folerany, 25 fa ty safàn’i Jehovah maharitsy mandrakizay.” Le safà zay vaovao soa nambara taminareo iny.

2 Alao iaby zany lafa kila raha raty, fitaky, hasoavolamanatriky, fialona, noho fandratiratia iaby. 2 Manahaky ajà vo ateraky io, le anovo ze haniria marè ronono tsy mitampoky,* zany hoe ronono amy safà-Ndranahary ao, mba hitombo nareo ka hahazo fanavota, 3 laha fa nandramananareo* fa soa fanahy Tompo.

4 Manahaky vato velo tsy tean’olo* ie, kanefa nifilì-Ndranahary sady vatan-draha aminy. Lafa mamonjy azy nareo, 5 zany hoe nareo vato velo io koa, le amboary ho trano ara-panahy mba ho mpisoro masy. Amy zay nareo hanome soro ara-panahy ekè-Ndranahary, amy alalan’i Jesosy Kristy. 6 Ho zao moa ty volanin’ny Soratsy Masy: “Mametraky vato nifilỳ a Ziona ao aho, zany hoe vato fehizoro noho vato fototsy sarotsy biby. Tsy ho diso fanantenà* mihintsy ze olo iaby mampiseho finoa an’ny raha io.”

7 Aminareo zany ie ro sarotsy biby, satria nareo mpino. Fa amin’olo tsy mpino, le “ty vato tsy nitean’ny* mpamboatsy trano ro lasa vato fehizoro farany bevata”,* 8 sady nanjary “vato maminga noho vatolampy mampiravoky.” Voafinga rozy satria tsy manoriky ty safà-Ndranahary. Raha zay mihintsy ro fa nivolany hoe hahazo an-drozy. 9 Fa nareo le “vahoaky nifilỳ, mpanjaka sady mpisoro, firenena masy, vahoaky natao-Ndranahary ho lasa hananany manoka, mba hanambara mbaombao ty hasoani-Azy”* nikaiky anareo iny, zany hoe Azy nikaiky anareo hiala baka amy maìky mba ho amy hazavany soasoa ao iny. 10 Taloha moa nareo tsy firenena, fa henanizao nareo firenena-Ndranahary. Tsy niferinesa nareo taloha, fa henanizao nareo fa niferinesa.

11 Rahalahiko teako, vahiny noho olo mandalo avao nareo, ka mampirisiky anareo aho mba tsy hieny hanohitsy ty fanirian’ny nofotsy mialy aminareo. 12 Miezaha avao ho soa fandaisam-bata amy zao tontolo zao eo. Amy zay rozy hahita ty asa soa ataonareo, ndre manasara anareo ho mpanao raha raty aza, ka hanome voninahitsy a-Ndranahary amy andro handinihany mikasiky ty olombelo.

13 Anovo ze raha tean’ny Tompo, ka ekeo ze fahefà iaby natsangan’olombelo: Ndre mpanjaka zay, satria mana pilasy anabo ie, 14 ndre governera, satria nirahin’ny mpanjaka hanasazy ani-ze olo mpanao raha raty rozy, le hidera ani-ze olo manao raha soa. 15 Fa ty sitrapo-Ndranahary le ty hanaovanareo raha soa, mba hampitsìnanareo* ty vavan’olo tsy mandiniky, azy mivola raha tsy hainy rey. 16 Olo afaky nareo, fe ka ampiasà hanaroma raha raty* fahafahanareo zay, fa ampiasao hanompoa a-Ndranahary. 17 Hajao ty karazan’olo iaby, tiavo ty rahalahy* iaby, matahora a-Ndranahary, hajao ty mpanjaka.

18 Tokony haneky ty tompony sady hatahotsy azy mifanaraky amy ty tokony ho ie ty mpanompo, tsy hoe tompo soa fanahy noho tsy manahy rey avao, fa azy miola rey koa. 19 Fa mahazo hatò amy Ndranahary ty olo miaritsy fijalea* noho mijaly amy raha tsy rariny, satria ta hana eritseritsy malio aminy eo. 20 Fa ino moa ty soa azonareo, laha voavango nareo satria nanota ka miaritsy an’ny raha zay? Fa laha miaritsy fijalea nareo satria manao raha soa, le zay ro ahazoa hatò amy Ndranahary.

21 Zay mihintsy laha ty marina ro nikaiha anareo, satria ndre Kristy aza nijaly ho anareo, ka nanome modely ho anareo mba hanorihanareo marìny ty liany. 22 Tsy nanota ie, sady tsy nisy fitaky ty tam-bavany eo. 23 Tsy nanambanimbany* ie lafa nisy nanambanimbany.* Tsy nangorohoro* ie lafa nijaly, fa nankininy tamy Azy mitsara araky ty rariny iny ty fiainany. 24 Ie ro nanday ty fahotantsika tamy vatany ao, tamy tsato-kazo* eo, mba ho maty tsika amy resaky fahotà,* le ho velo mba hanao ty marina. Le ty “feriny ro nahavy anareo ho janga.” 25 Fa manahaky aondry nivio lala hafa nareo, fe nimpoly tamy mpiarakandro noho mpiandraikitsy anareo* iny nareo henanizao.

3 Manahaky ani-zay koa nareo ampela, ekeo ty valinareo. Amy zay laha misy amin-drozy tsy manoriky ty safà masy, le ho voataon’ny fandaisam-batanareo rozy fa tsy ty raha volaninareo, 2 satria ho hitan-drozy ty fandaisam-bata malio anananareo, noho ty fanajà laliky asehonareo. 3 Tsy tokony ho raha ivelany avao ty pozinareo, ohatsy hoe talim-bolo noho volamena fipozea na siky soa. 4 Fa tokony ho toetsy mivony am-po ao iny, zany hoe kalma noho tsy manahy. Tena vatan-draha amaso-Ndranahary eo raha zay. 5 Manahaky ani-zay ty pozy fataon’ny ampela masy taloha rey, azy mitamà a-Ndranahary rey. Naneky ty valin-drozy rozy, 6 manahaky an’i Saraha. Nanoriky ty safàn’i Abrahama ie, ka nikaiky an’i Abrahama hoe tompo. Anan’i Saraha nareo, laha manao raha soa avao sady tsy maneky ho resin’ny tahotsy.

7 Manahaky ani-zay koa nareo lahilahy, miharoa trano amy valinareo avao, le miezaha hahay soa ty raha tsapan-drozy.* Ameo voninahitsy ty ampela, manahaky ty atao amy enta tena mora vaky, mba tsy ho voasaka ty vavaky ataonareo, satria rozy koa mpiaraky mandova aminareo an’ny fanomeza miavaky iny, tsy ino zay fa ty fiaina.

8 Farany, miezaha hitovy hevitsy nareo iabiaby, miaraha malahelo, mifankatiava manahaky mpirahalahy, miferinesa olo, le miambanea. 9 Ka mamaly raty ty raty na manambanimbany lafa misy manambanimbany. Fa fitahia ro volano, satria zay ro nikaiha anareo, mba handovanareo fitahia.

10 “Ze tea fiaina noho ta ho sambatsy, le tsy maintsy miamby soa ty lelany mba tsy hivola raha raty, noho miamby soa ty soniny mba tsy hivola fitaky. 11 Tokony hiala amy raha raty ie, ka hanao raha soa, le hila filongoa ka hanao ze tsy haharava an’ny raha zay. 12 Fa ty mason’i Jehovah manenty ty olo marina, le ty sofiny mijanjy ty fisolohoan-drozy. Fe manohitsy ani-ze olo manao raha raty Jehovah.”*

13 Ia vatany moa ty hanao raha raty anareo laha mafana fo manao raha soa nareo? 14 Fa ndre mijaly amy fanaova ty marina aza nareo, le sambatsy. Fe ka atahora ty raha atahoran-drozy* sady ka miasa loha. 15 Fa manamasìna an’i Kristy ho Tompo am-ponareo ao, ka manaova parè avao nareo hivola ty fiarovam-batanareo, alohani-ze olo manontany ty anton’ny raha tamaninareo eo. Fe tokony ho soa fanahy noho tena hanaja nareo lafa manao an’ny raha zay.

16 Miezaha hana eritseritsy malio avao, mba ho afa-baraka ze manohitsy anareo, ndre ino ndre ino raha volanin-drozy, satria soa fandaisam-bata nareo amy maha mpanori-dia an’i Kristy anareo. 17 Fa mbo soa ty hoe mijaly amy fanaova raha soa, laha sitrapo-Ndranahary ty hanenga an’ny raha zay hiseho, tany ty hoe mijaly amy fanaova raha raty. 18 Fa Kristy aza nimaty indraiky avao vokatsin’ny fahotà, zany hoe olo marina ho solon’olo tsy marina, mba handaisany anareo ho amy Ndranahary. Nofotsy ie lafa nivonoa, fa fanahy lafa nivelomy. 19 Tamy zay ie ro nandeha nitory tamy fanahy tamy prizon ao rey, 20 azy tsy nanoriky safà taloha any rey, lafa Ndranahary naharitsy nandiny tamy andron’i Noa, tanatin’ny fotoa nanamboara an’ny sambofiara iny. Olo kelikely avao, zany hoe olo valo ro nandesin’ny sambo iny tanabo rano eny, ka niavotsy ty ain-drozy.

21 Misy mifanandrify amy raha zay koa henanizao, tsy ino zay fa ty batisa—fe tsy fangalà ty fahalotoan’ny nofotsy, fa fangataha eritseritsy malio amy Ndranahary. —Manavotsy anareo ty batisa, satria nareo mino hoe nivelomy ndraiky Jesosy Kristy. 22 Ankavana-Ndranahary eo ie, satria nana an-danitsy any, le nampanekeny azy ty anjely noho ze mana fahefà noho ze mana hery.

4 Nijaly tamy nofotsy ao Kristy, ka anovo koa ze hanananareo toe-tsay manahaky ty nananany.* Fa niala amy fahotà moa ty olo nijaly tamy nofotsy ao, 2 amy zay ie tsy ho velo mba hanatanteraky ty raha irin’olombelo sasy, fa ho velo mba hanao ty sitrapo-Ndranahary, amy andro sisa hiainany amy nofotsy ao. 3 Ampy zay ty fotoa nanaovanareo ty sitraponi-zao tontolo zao, tamy nareo nana fandaisam-bata mahamenatsy,* nidada tamy fanirian’ny nofotsy, nino divay lisatsy marè, nanao fety tsy voafehy,* nifanao kirebaky tamy finoma divay, noho nanao fanompoa sampy mampangaroharo.* 4 Tseriky rozy satria tsy lomay miaraky amin-drozy sasy nareo, zany hoe tsy midada amy raha raty miaraky amin-drozy sasy, le manambanimbany anareo rozy. 5 Fe mbo hanao ankety an’ny olo rey azy parè hitsara ty velo noho ty maty iny. 6 Laha ty marina, le nitoria ty vaovao soa koa ty maty,* amy zay ndre tsarà amy nofotsy mifanaraky amy ty hevitsin’olombelo aza rozy, le mba ho velo amy fanahy mifanaraky amy ty hevitsi-Ndranahary.

7 Fe fa marìny ty faran’ny raha iaby. Dikani-zay, mandiniha soa noho miambena soa,* le ka atao ambanin-draha ty vavaky. 8 Mandilatsy ty raha iaby, le mifankatiava marè, satria manaro fahotà maro biby ty fitiava. 9 Sambia nareo miezaky ho tea mandramby vahiny,* le ka mimenimeny lafa manao an’ny raha zay. 10 Samby nahazo fanomeza nareo kiraidraiky, le ampiasao mba hifanompoa raha zay, satria nareo mpanompo soa manampy ty olo hafa mba hahazo raha soa baka amy ty hasoam-panahy miavaky aseho-Ndranahary amy raha sankarazany. 11 Laha misy olo mivola, le tokony ho sahala hoe mivola hafatsy baka amy Ndranahary ie. Laha misy olo manompo, le tokony hanompo ie sady hiantehitsy amy ty hery amea-Ndranahary. Amy zay hamea voninahitsy amy raha iaby Ndranahary, amy alalan’i Jesosy Kristy. Ho azy mandrakizay mandrakizay lahy ty voninahitsy noho ty hery! Amena.

12 Rahalahiko teako, ka atao mahatseriky ty raha sarotsy marè* iainanareo, sahala hoe raha hafahafa ro mahazo anareo. 13 Fa mifalifalea avao arakaraky ty ijaleanareo manahaky an’i Kristy, amy zay ho falifaly noho hanitranitra nareo amy fotoa hampisehoa mazava ty voninahitsiny. 14 Sambatsy nareo laha ty anaran’i Kristy ro andratiratian’olo anareo,* satria nareo mana ty fanahin’ny voninahitsy, tsy ino zay fa ty fanahi-Ndranahary.

15 Fe tsy tokony hisy aminareo hijaly satria mpamono olo, na mpangalatsy, na mpanao raha raty, na mpilitsilitsy amy fiainan’olo. 16 Fa laha misy mijaly satria Kristiana, le tsy tokony ho menatsy ie, fa hanome voninahitsy a-Ndranahary avao lafa manday an’ny anara zay. 17 Fa henanizao ty fotoa nifilỳ hanombohan’ny fitsarà amy fianakavia-Ndranahary eo. Ka laha manomboky amintsika eo raha zay, hanao akory ty hiafaran’olo tsy manoriky ty vaovao soa-Ndranahary rey? 18 “Laha ty olo marina aza sarotsy ty hahaavotsy an-drozy, ka hanao akory ty olo tsy matahotsy a-Ndranahary noho ty mpanota?” 19 Ze mijaly amy fanaova ty sitrapo-Ndranahary zany, le tokony hiantehitsy amy azy Mpamoro azo atokisa iny avao, sady tsy hieny hanao raha soa.

5 Ka satria zaho anti-panahy, noho vavolombelo nahita ty fijalean’i Kristy sady anatini-ze hahazo voninahitsy fa haseho mazava iny, le mangataky* an’ny anti-panahy* aminareo eo reo aho hoe: 2 Karakarao soa ty aondri-Ndranahary nankiny taminareo, le anovo ty asan’ny mpiandraikitsy.* Fe tsy tokony ho forosè ty hanaova an’ny raha zay, fa an-tsitrapo anatreha-Ndranahary eo, tsy baka amy fitiava raha azo baka amy raha tsy marina, fa baka amy fahazotoa, 3 sady tsy hanerisery ty lova-Ndranahary nareo, fa ho modely ho ahi-ty aondry. 4 Le hahazo satroboninahitsy tsy mety malazo nareo lafa aseho sefon’ny mpiarakandro iny.

5 Nareo tanora koa, ekeo ty olobe.* Fa nareo iabiaby lafa mifandramby le misikìna fiambanea, satria manohitsy ty olo mirengirengy Ndranahary, fa mampiseho hasoam-panahy miavaky amy ty olo miambany.

6 Ka le miambanea ambanin’ny tana maheri-Ndranahary eo, mba hanondrotany anareo amy fotoa nifiliny, 7 le apetraho aminy iaby ze raha mampiasa loha anareo, satria midary* anareo ie. 8 Tokony handiniky soa avao nareo sady hiamby soa, satria ty Devoly fahavalonareo mandehandeha manahaky liona mieronero io, mila olo hakapaky. 9 Fe tohero ie le manàna finoa matanjaky, satria hainareo fa ampijalỳ manahaky ani-zay koa ty rahalahinareo* amy tany toy iaby. 10 Fe lafa baka nijaly tsielatsiela nareo, le hamita ty fampiofana anareo Ndranaharin’ny hasoam-panahy miavaky iaby iny, azy nikaiky anareo ho amy voninahitsiny mandrakizay iny, satria nareo miharo raiky amy Kristy. Hanampy anareo hivahatsy soa ie, sady hanatanjaky anareo, le hataony soa fototsy nareo. 11 Ho azy mandrakizay lahy ty hery! Amena.

12 Nanoratsy safà kelikely ho anareo aho, tamy alalan’i Silvano,* azy rahalahy hitako hoe azo atokisa iny. Nanoratsy aho mba hampahereza anareo noho hanomeza toky anareo hoe tena ie hasoam-panahy miavaky aseho-Ndranahary aminareo iny. Ka miala amy hasoam-panahy zay mihintsy. 13 Mampamangy anareo zao azy a Babylona eto iny, azy nifilỳ manahaky anareo iny. Mampamangy anareo zao koa Marka anako. 14 Mifampiarahabà amy oroky fampisehoa fitiava.

Hahazo fiadana lahy nareo iaby ze miharo raiky amy Kristy!