TY TARATASY FAHAROE NISORATIN’I PETERA

1 Baka amy Simona Petera, mpanompo noho apostolin’i Jesosy Kristy.

Ho ani-ze olo fa nahazo finoa be voninahitsy* manahaky ty ahinay, tamy alalan’ny fahamarinan’ny Ndranaharintsika noho Jesosy Kristy Mpanavotsy,

2 Hitombo lahy ty hasoam-panahy miavaky* haseho aminareo noho ty fiadana ho azonareo, satria nareo mahay soa a-Ndranahary noho Jesosy Tompontsika! 3 Fa ty heri-Ndranahary ro nanome antsika* ty raha iaby, zany hoe ty raha iaby manampy antsika hahafoy ty vatantsika ho a-Ndranahary amy ty fiainantsika, satria tsika mahay soa ani-Azy nikaiky antsika tamy alalan’ny voninahitsiny noho ty hasoan-toetsiny iny. 4 Tamy alalan’ny raha reo ro nanomezany antsika* raha nampitamany tena soa sady tena bevata, mba ho amy alalan’ny raha nampitamany zay ro hahavy anareo ho fanahy manahaky a-Ndranahary, satria fa nialanareo ty raha raty fataoni-zao tontolo zao, tsy ino zay fa ty raha raty baka amy fanirian-draty.

5 Dikani-zay zany, anovo ze raha iaby azonareo atao, ka ty finoanareo ampeo hasoan-toetsy, le ty hasoan-toetsinareo ampeo fahaiza, 6 ty fahaizanareo ampeo fifehezam-bata, ty fifehezam-batanareo ampeo fiareta, ty fiaretanareo ampeo fahafoizam-bata ho a-Ndranahary, 7 ty fahafoizam-batanareo ho a-Ndranahary ampeo fitiavan-drahalahy, le ty fitiavanareo ty rahalahy ampeo fitiava ty olo iaby. 8 Fa laha anananareo toetsy reo sady anananareo maro, le tsy hengan’ny raha reo amy zao avao nareo na tsy hahavokatsy, fa hanoriky ty fahaiza soa niazonareo mikasiky an’i Jesosy Kristy Tompontsika.

9 Fa ze tsy mana an’ny toetsy reo, le jiky ka mampipỳ ty masony mba tsy hahita ty mazava,* sady halinony hoe fa nidiovy ho afaky tamy fahotà nataony taloha ie. 10 Vomaiky zany nareo, rahalahy, tokony hazoto hanao ze raha iaby azonareo atao mba ho azo antoky avao hoe voakaiky noho voafily nareo. Tsy ho lavo mihintsy nareo, laha manao an’ny raha reo avao. 11 Laha manao an’ny raha reo nareo, le hengà hilitsy am-boninahitsy* amy Fanjakà mandrakizay iny ao, tsy ino zay fa ty Fanjakàn’i Jesosy Kristy Tompontsika noho Mpanavotsy antsika.

12 Zay ty mahavy ahy ho parè hampitiaro anareo avao an’ny raha rezay, ndre fa hainareo aza sady ndre fa mivahatsy soa amy fahamarina nianaranareo aza nareo. 13 Fe laha mbo amy tranolay* toy ato aho, le hitako hoe mety ty mampitiaro anareo an’ny raha rezay mba hanaitaira anareo, 14 satria haiko hoe tsy ho ela le halà ty tranolaiko, araky ty nambaran’i Jesosy Kristy Tompontsika tamiko. 15 Hanao ze azoko atao avao aho mba hampitiarova anareo an’ny raha rezay, amy zay ho tiaronareo raha rezay lafa lasa aho.

16 Tsy nanaraky tantara tsy marina niforony tamy hihitsihitsy zahay, lafa nanambara taminareo ty hery noho ty fanatrehan’i Jesosy Tompontsika, fa tena nahita ty voninahitsiny. 17 Namea-Ndranahary Babantsika fanajà noho voninahitsy moa ie, lafa nivola taminy an’ny safà* retoa azy be voninahitsy iny hoe: “Anako teako io sady mahafalifaly ahy.” 18 Naharè an’ny safà baka an-danitsy any rezay zahay, tamy zahay niaraky taminy tam-bohitsy masy any.

19 Vomaiky azontsika antoky zany ty safà faminania. Ka soa laha mandiniky an’ny raha io nareo, sahala mandiniky jiro mamirapiratsy amy pilasy maìky, zany hoe am-ponareo ao, zisiky mampazava ty andro noho zisiky iboahan’ny basia miboaky maraindray. 20 Fa alohan’ny raha iaby, le hainareo fa tsy baka amy hevitsin’olombelo ty faminania iaby amy Soratsy Masy ao. 21 Fa tsy baka amy sitrapon’olombelo mihintsy ro nampisy ty faminania, fa safà baka amy Ndranahary ro nivolanin’olo, mifanaraky amy ze nitarihan’ny* fanahy masy an-drozy.

2 Fe nisy mpaminany sandoky tamy vahoaki-Ndranahary eo, le hisy mpampianatsy sandoky koa aminareo eo. Hamoro antokom-pinoa* mikai-doza olo rey sady tsy hataon-drozy hain’olo raha zay. Le tsy haneky an’ny tompo nivily an-drozy iny mihintsy aza rozy, ka ho ripaky malaky amy raha ataon-drozy zay. 2 Mana fandaisam-bata mahamenatsy* koa olo rey, ka maro ro hanahaky an-drozy. Ty raha ataon-drozy ro hahavy ty lalan’ny fahamarina horatiratìn’olo. 3 Tsy mety afa-po koa olo rey ka hanararaotsy anareo amy safà mamitaky. Fe fa tampaky liany fa ela ty sazin-drozy, le tsy tara raha zay, sady tsy maintsy ho avy ty fandripaha an-drozy.

4 Tsy nisalasala mihintsy Ndranahary nanasazy an’ny anjely nanota rey, fa nanoraky an-drozy tamy Tartara* any ka nampigadra an-drozy* amy maìky mangokòky ao mba hatoka hotsarà. 5 Tsy nisalasala koa ie nanasazy an’ny tontolo taloha iny, fe niaro an’i Noa, mpitory ty fahamarina, noho olo fito hafa rey, tamy ie nandefa ranobe tamy tontolo feno olo tsy natahotsy a-Ndranahary iny eo. 6 Le nisazì-Ndranahary ty tanàn’i Sodoma noho Gomora ka nataony nanjary lavenoky. Nataony ohatsy ho ahi-ty olo tsy matahotsy a-Ndranahary raha zay, mba hampisehoa hoe ino ty hahazo an-drozy amy hoavy. 7 Le navotany Lota, azy olo marina iny. Nalahelo biby Lota lafa nahita an’ny mpandika lalàna nana fandaisam-bata mahamenatsy* rey. 8 Nahatiaro nijaly olo marina io sanandro, amy ty fandikan-dalàna nihitany noho nireny tamy ie niaraky nipetraky tamin-drozy. 9 Dikani-zay zany, hain’i Jehovah ty manafaky ty olo mahafoy ty vatany ho Azy mba ho tafaboaky amy raha sarotsy* mahazo azy. Fe hainy koa ty manavaky ty olo tsy marina mba haripaky amy andro fitsarà, 10 sirtò fa azy andesin’ny fanirian’ny nofotsiny rey, ka ta handoto ty olo hafa sady tsy midary* ani-ze mana fahefà.

Mahasakisaky noho be mokon-doha olo rey, ka tsy matahotsy mandratiraty ani-azy mana voninahitsy rey. 11 Ndre ty anjely aza tsy manao safà mandratiraty mba hanasarà raha an-drozy, ndre mahery noho matanjaky mandilatsy an-drozy aza, satria manaja an’i* Jehovah. 12 Fa manahaky biby tsy mandiniky andesin’ny faniriany noho nateraky hosambory sady hovonoa olo rey, ka mandratiraty ty raha tsy hain-drozy. Ho ripaky amy ty raha raty ataon-drozy rozy, 13 ka fijalea ro ho valin’ny asa raty ataon-drozy.

Teatean-drozy ty midada amy fiaina feno fahafinareta, ndre amy andro midỳ mena aza. Manahaky tasy noho handra rozy, sady falifaly mampianatsy raha diso mba hamitaha anareo, lafa miaraky manao fety aminareo. 14 Tsy mieritseritsy laha tsy handranto* rozy sady tsy mahavita miala amy fahotà. Taomin-drozy koa ty olo malemy finoa.* Fa nizary hana faniria tsy mety afa-po ty fon-drozy, sady anaky fa voaozo rozy. 15 Niala tamy lala mahity rozy ka nidiso lala, le nanaraky ty lalan’i Balama anan’i Beora. Tea karama niazo baka amy fanaova raha raty Balama. 16 Fe nanary ie satria tsy nanao raha mahity. Nivola manahaky olo io ampondra tsy mahay mivola iny, ka nisaka ty raha tsy mety nataon’ny mpaminany iny.

17 Loharano ritsy noho zavo andesin-tsioky be rozy, le ty maìky mangokòky ro atoka ho an-drozy. 18 Mipoapoaky ty safàn-drozy kanefa tsy misy dikany ty raha volanin-drozy. Ataon-drozy ze hahavy ty olo hidada amy fanirian’ny nofotsy, le mana fandaisam-bata mahamenatsy* koa rozy. Raha reo ro itaoman-drozy ani-ze olo vo niala betibety tamin’olo manao raha raty. 19 Mampitamà fahafaha ho an’olo reo rozy, kanefa ty vatan-drozy aza andevon’ny fahalotoa, satria andevoni-ze* maharesy azy ze resy. 20 Lafa niala tamy fahalotoani-zao tontolo zao rozy, satria nahay soa an’i Jesosy Kristy Tompo noho Mpanavotsy, kanefa tafilitsy amy raha zay ndraiky ka resy, le raty mandilatsy ty tamy voalohany ty iafaran-drozy. 21 Aleo aza rozy tsy nahay soa ty lalan’ny fahamarina, tozay nahay an’ny raha zay kanefa miala amy didy masy nirambesin-drozy iny. 22 Tanteraky amin-drozy vatany raha volanin’ny ohabolana iny hoe: “Ty alika mimpoly amy ty raha fa naloany, le ty kosòvavy fa nisasa miandro amy fotaky ndraiky.”

3 Rahalahiko teako, toy ty taratasy faharoe soratiko aminareo. Manahaky tamy taratasiko voalohany iny, le mampirisiky anareo aho mba handiniky soa, ka ampitiaroviko anareo ze raha fa hainareo, 2 soa ho tiaronareo ty raha fa nivolanin’ny mpaminany masy noho ty didin’ny Tompo sady Mpanavotsy, tamy alalan’ny apostolinareo. 3 Alohan’ny raha iaby, le tiarovo toy: Amy andro farany, le hisy mpikizaky hikizakizaky sady hanao ze tean-drozy avao, 4 ka hivola hoe: “Aia koa fanatrehany eo io? Fampitamana vandivandy avao zao! Nanomboky tamy andro nahafatesan’ny razambentsika* ro tsy niova ty raha iaby, fa mbo mitovy tanteraky amy ze raha nisy liany namorona ani-zao tontolo zao.”

5 Fa ataon-drozy kisary tsy hita hoe fa nisy liany fa ela ty lanitsy, le nisy tany henta koa niboaky baka anaty rano ao sady tanivon’ny rano eo, vokatsin’ny safà nivolani-Ndranahary. 6 Tamy alalan’ny raha reo ro nandravà an’ny tontolo nisy tamy zay iny, lafa nidobo rano ty tany. 7 Fe atoka haripaky amy afo amy alalan’ny safà zay koa ty lanitsy noho ty tany misy henanizao, le hajarỳ zisiky iavian’ny andro hitsarà noho handripaha an’ny olo tsy matahotsy a-Ndranahary rey.

8 Fe ka halino toy rahalahiko teako: Ty andro raiky amy Jehovah le sahala arivo tao, le ty arivo tao sahala andro raiky. 9 Tsy ela araky ty ieritseretan’olo sisany azy Jehovah lafa manatanteraky ty raha ampitamaniny, fa manam-pahareta aminareo ie, satria tsy teany hisy ho ripaky ty olo fa teany hibebaky iaby. 10 Ho avy manahaky mpangalatsy ty andron’i Jehovah. Amy andro zay, le halaky ty fandalovan’ny lanitsy, manahaky feon-draha mirifodrifotsy io. Fa karazan-draha fa may marè rey ho rava, le haseho mazava ty tany noho ty asa aminy eo.

11 Ka laha ho rava manahaky ani-zay raha iaby reo, le diniho hoe olo tokony hanao akory nareo! Tokony hana fandaisam-bata masy noho hahafoy ty vatanareo ho a-Ndranahary nareo, 12 sady handiny noho hahatiaro avao* ty fiavian’ny* andron’i Jehovah. Andro io ro hahavy ty lanitsy haravan’ny afo, noho hahavy ty karazan-draha aminy eo ho tranahin’ny hafanà may marè. 13 Fe mifanaraky amy ty raha nampitamaniny, le hisy lanitsy vaovao noho tany vaovao hanjakan’ny fahamarina, le zay ro linisantsika.

14 Ka satria mandiny an’ny raha zay nareo, rahalahiko teako, le anovo ze raha iaby azonareo atao mba ho hita-Ndranahary hoe tsy misy tasy noho tsy misy handrany sady milongo soa aminy nareo, amy farany. 15 Ankoatsini-zay, le eritsereto sahala fanavota ty faharetan’ny Tompontsika. Nanoratsy taminareo mikasiky ani-zay koa Paoly rahalahy teantsika, mifanaraky amy ty fahendrea namea azy. 16 Niresaky an’ny raha rezay ie tamy taratasy iaby nisoratiny. Fe sarotsy azo ty raha sisany amy raha rey ao, ka ovàn’olo tsy mahay raha* noho tsy mivahatsy soa rey, manahaky ty ataon-drozy amy andininy hafa amy Soratsy Masy ao. Ho ripaky rozy amy raha ataon-drozy zay.

17 Fa hainareo sandrany zany raha zay, rahalahiko teako, le miambena soa tsy no ho voatao hiaraky amin’olo rey nareo, amy ty hevitsy dison’ny mpandika lalàna rey, ka ho lavo nareo fa tsy hivahatsy soa sasy. 18 Fa anovo avao ze hahavy anareo hampisehoa hasoam-panahy miavaky, noho ze hahaizanareo an’i Jesosy Kristy Tompontsika sady Mpanavotsy antsika. Ho azy lahy ty voninahitsy henanizao noho mandrakizay! Amena!