Ino Iaby ty Raha ho Hitanao Amy Fivoria Kristiana Anovinay?

Maro ty olo ro fa tsy mandeha mivavaky sasy satria tsy mampianatsy raha baka amy Baiboly noho tsy manampy azy tsy ho kivy ty any. Fe manino iha ro mila mamonjy fivoria Kristiana anovy ty Vavolombelo Jehovah? Ino ty raha ho hitanao any?

Falifaly miaraky aminolo soa fanahy noho tea anao. Nalamy soa ty fiangona tamy taonjato voalohany. Nanao fivoria rozy soa hanompoa Ndranahary, hianara Baiboly noho hifanampea, soa tsy ho kivy. (Hebreo 10:24, 25) Mifankatea manahaky olo troky raiky io rozy. Mpirahalahy noho mpianabavy Kristiana iaby rozy ao. (2 Tesalonianina 1:3; 3 Jaona 14) Falifaly avao koa zahay henanizao satria manoriky ty raha nanovin-drozy.

Ty raha soa azo baka amy fanoriha ty raha volany amy Baiboly ao. Niaraky nivory iaby ty lahilahy noho ty ampela voho ty ajà tamy andro ty Baiboly. Ho zay koa ty ataonay henanizao. Misy lahilahy voafily mampianatsy anay hanoriky soa ty raha volany amy Baiboly ao. (Deoteronomia 31:12; Nehemia 8:8) Afaky manome valin-teny noho mihira mikasiky ty raha soa tamaninay zahay lafa ao.—Hebreo 10:23.

Ty fitahia azo lafa mana finoa matanjaky. Nisy fiangona raiky nivolana ty apostoly Paoly hoe: ‘Teako ho hita nareo, ... na laha ty marina le hifanome hery tsy ho kivy tsika, ty finoako hanome hery anareo voho ty finoanareo hanome hery ahy.’ (Romanina 1:11, 12) Lafa mivory tsy tampaky zahay miaraky amy Kristiana namanay reo, le manjary matanjaky ty finoanay. Manjary teanay koa ty manoriky ty raha volany amy Baiboly ao.

Manino iha laha mba miaraky mivory aminay ? Ho rambesinay soa iha lafa avy any. Tsy misy rakitsy ty any.

• Ia ro nanome ohatsy orihinay amy ty fivoria anovinay?

• Ino iaby ty raha soa ho azonay lafa mamonjy fivoria Kristiana?