Manino Zahay ro Mamonjy Fivoriambe?

Manino olo amy sary eo reo ro falifaly? Mamonjy ty raiky amy fivoriambe ataonay rozy. Nanao fivoriambe telo san-tao ty mpanompo Ndranahary tamy andro taloha. Manao manahaky zay koa zahay henanizao. (Deoteronomia 16:16) Manao fivoriambe telo zahay anaty ty tao raiky: Fivoriambe faritsy raiky andro in-droe santao, fivoriambe vondrom-paritsy telo andro. Ino ty raha soa ho azo lafa mamonjy fivoriambe?

Mahavy anay hifankatea soa. Nifalifaly ty Israelita lafa nanompo Jehovah ‘miaraky amy vahoaky tafavory raiky.’ Falifaly manahaky zay koa zahay lafa tafavory raiky amy fivoriambe any. (Salamo 26:12; 111:1) Afaky mifankahita amy ty Kristiana namanay baka amy fiangona na tany hafa any zahay. Lafa midy ty andro, le miaraky mihina amy fivoriambe ao koa zahay. Samby falifaly iaby zahay amy fotoa io. (Asan’ny Apostoly 2:42) Hitanay ao fa mifankatea vatany ty ‘rahalahy iaby amy finoa’ amy tany toy.—1 Petera 2:17.

Mahavy anay hana finoa matanjaky. Falifaly ty Israelita satria ‘azon-drozy soa ty safà’ nampianary an-drozy baka amy safà Ndranahary ao. (Nehemia 8:8, 12) Falifaly koa zahay lafa amy fivoriambe any satria mahazo fianara soa baka amy Baiboly ao. Mifototsy amy Baiboly iaby ty fandahara atao any. Ianaranay baka amy lahateny, lahateny mitohitohy noho fampisehoa hoe manao akory ty hanaova ty raha tea Ndranahary. Misy Kristiana namanay koa mitantara ty raha sarotsy nahazo azy, fe nahavita tsy nivaliky tamy Ndranahary. Manome hery anay ty maharè tantara reny. Misy tantara hentea natao mitovy amy ty raha niseho amy Baiboly ao amy fivoriambe vondrom-paritsy any. Misy fianara azonay orihy amy tantara io. Misy fanaova batisa ze olo nanoka ty vatany ho ahy Ndranahary amy fivoriambe any.

• Manino ro mahafalifaly ty famonjea fivoriambe?

• Ino iaby ty raha soa ho azonao lafa mamonjy fivoriambe?