Nanadio ty Tempoly Jesosy

Tao 30 tany ho any tamy zay. Maro biby ty olo niavy ta Jerosalema ao fa hankalaza Paska. Nandeha tany koa Jesosy. Nanao fety ty olo sady nanao fanatitsy tamy tempoly ao. Ty ilany fa nanday biby, fa ty ilany ta Jerosalema ao vo nivily.

Lafa nilitsy tamy tempoly tao Jesosy, le nahita olo namarotsy biby. Nataon-drozy filan-drala ty trano fivavaha amy Jehovah. Ino ty nataoni-Jesosy? Namboatsy filatsy tamy taly ie, le niroasiny baka amy tempoly ao aondry noho aomby rey. Natontany koa latabatsini-mpanakalo drala rey, le naparitakiny tamy tany eo dralan-drozy rey. Hoy Jesosy tamy mpamarotsy pizon rey: ‘Andeso miboaky any iaby reo! Ka atao filan-drala ty tranoni-Babako!’

Nitseriky iaby ty olo tamy tempoly tao nahita ty raha nataoni- Jesosy. Tiaroni-mpianatsiny rey faminania mikasiky ty Mesia iny hoe: ‘Hafana fo ho ani-tranoni-Jehovah aho.’

Nanadio ty tempoly ndraiky Jesosy tamy tao 33. Tsy teany laha misy olo tsy manaja ty tranoni-Babany.