Nimaty ta Golgota ao Jesosy

Nalay ani-Jesosy sefoni-mpisoro rey ka nandesin-drozy tamy governora any ie. Hoy Pilato: ‘Ino ty raha raty nataoni-lahilahy toy?’ Le hoy rozy: ‘Mihaboky ho mpanjaka ie!’ Nanontaneani-Pilato amy zay Jesosy hoe: ‘Mpanjakani-Jiosy zany iha?’ Namaly Jesosy hoe: ‘Tsy baka amy zao tontolo zao ty Fanjakàko.’

Heroda ty mpanjakani-Galilia tamy zay. Nalefani-Pilato taminy any amy zay Jesosy, vasa ie hahita antony hamonoa azy. Fe ndre Heroda koa aza tsy nahita, ka nampoliny amy Pilato any Jesosy. Hoy Pilato tamy vahoaky rey: ‘Ndre zaho, ndre Heroda le samby tsy nahita hoe ino ty antony hamonoa ani-lahilahy toy. Aleo habototsiko ie.’ Nizizo vahoaky rey hoe: ‘Ka abototsy zao ie fa vonò! Vonò ie!’ Nifilarini- maramila rey amy zay Jesosy, nandoran-drozy, le nivangoan-drozy. Nampisatrohin-drozy fatiky ie sady nikizakizahin-drozy hoe: ‘Akory lahy iha Mpanjakani-Jiosy!’ Nivola tamy vahoaky rey ndraiky Pilato hoe: ‘Tsy hitako mihintsy ty antony hamonoa ani-lahilahy io.’ Fe vomaiky rozy nitabataba hoe: ‘Afantsiho amy hazo fijalea ie!’ Farany ie nampamonoani-Pilato.

Nandesin-drozy ta Golgota any amy zay Jesosy, le nifantsihin-drozy tamy hazo, bakeo natsangan-drozy hazo iny. Nivavaky Jesosy hoe: ‘Engao lahy Baba ty hadisoan-drozy, fa tsy hain-drozy raha ataon- drozy io.’ Nikizakizaky ani-Jesosy olo rey hoe: ‘Mijotsoa bakeny iha laha Anaki-Ndranahary vatany. Afaho ty vatanao.’

Nisy malaso rezay nahanto tanilani-Jesosy teo. Nivola raiky iny hoe: ‘Mba tiarovo aho lafa avy amy Fanjakànao any iha.’ Nampitamà azy Jesosy hoe: ‘Ao fa hiaraky amiko amy Paradisa any iha.’ Mbo atoandro ty andro, fe naìky tanatini-telo lera. Nitsanga marìniriny mbeny ty mpianatsy sisany, le teny koa Maria renini-Jesosy. Nivola tamy Jaona Jesosy hoe: ‘Karakarao Maria, le anovo sahala reninao mihintsy.’

Nivola Jesosy tamy farany hoe: “Vita!” Niondriky ie, le nimaty amy zay. Nisy horohoron-tany marè biby tamy zay. Nizara roe ridò matevy nampisaraky Masy noho Masy Marè tamy tempoly ao iny. Nisy sefoni-maramila raiky amy zay nivola hoe: ‘Anaki-Ndranahary vatany io.’