Ino ty Dikani-hoe Mandehana Tse Milongo amy Rahalahinao?

Eritsereto hoe nipetraky a Galilia any iha tamy androni-Jesosy. Nandeha a Jerosalema any iha mba hankalaza ty Fetini-Trano Rantsankazo. Atsiky mpiara-manompo baka an-tany lavitsy any ty ao. Ta hanao fanatitsy ho ani-Jehovah amy tempoly any iha, ka nandesinao ty aosy raiky, le roso iha nifanao kisitsy mbamy lalakely rey mbeo. Fa feno olo hanao fanatitsy ty amy tempoly ao lafa niavy iha. Ela ty ela ka niavy avao ty toronao. Fe lafa hanome ani-aosinao iny amy mpisoro reo iha, le tiaronao tampoky hoe mana alahelo aminao rahalahinao raiky zay. Ie amin’io tsy hainao ndre amin’olo maro rey ao, ndre an-tanà eo. Fa nambarani-Jesosy ty raha tokony hataonao. (Vakio Matio 5:24.) Ino ty tokony hataonareo amy rahalahinao iny mba hahafahanareo milongo ndraiky? Asio mariky ze valiny marina amy lista ambany etoa retoa.

TOKONY HATAONAO:

• Hiresaky amy rahalahinao iny laha hitanao hoe ara-dalàna laha malahelo ie

• Hiezaky hananatsy ani-rahalahinao iny, satria hitanao hoe diso avao koa ie na sarotiny marè

• Hijanjy soa ty raha resahini-rahalahinao iny. Ndre tsy tena azonao ty raha resahiny, le hiala tsiny aminy baka amy fo iha satria nampalahelo azy

TOKONY HATAONI-RAHALAHINAO INY:

• Hitantara amin’olo hafa amy fiangona eo ty raha nataonao taminy

• Hitrivotrivotsy anao, sady hitanisa ze raha tsy nety nataonao. Tsy hanekineky ie laha tsy mieky iha hoe diso

• Hahatsapa hoe nila niambany noho nana herim-po iha mba hamonjea azy, bakeo hanenga tanteraky ty hadisoanao

Tsy manao fanatitsy biby sasy tsika henanizao. Fe nampianatsy Jesosy fa tsy mahazo hatò amy Ndranahary ty fanompoantsika, laha tsy milongo amy ty rahalahintsika tsika. Manao akory ty nampisehoany ani-zay?