Fanontaneani-mpamaky

Ia Jiosy mpiamby tempoly rey, le ino ty asan-drozy?

Nampanaovy raha hafa ze tsy mpisoro tamy taranakini-Levy, ka anatini-zay ty asa manahaky maramila io. Ty sefoni-mpiamby tempoly ro mikomandy an-drozy. Zao ty nambarani-Jiosy raiky mpanoratsy kaihy hoe Philon, mikasiky ani-maramila reo: “Nampitsangany mbamy varavara rey ty sisany [amy Levita rey] mba hiamby amy filira eo. Ty ilany natao anatini-[faritsini-tempoly] alohani-pilasy masy eo, mba hanaka ani-ze olo tsy nahazo alala handialia mbeo, ndre asany azy zay ndre tsy asany azy. Ty sisany mifandimby manao toro mihodidy [ani-tempoly iny], mba hiamby ndre andro ndre haly.”

Afaky maniraky ani-maramila reo ty Fitsarà Anabo Jiosy. Rozy avao ro maramila jiosy nengani-Romanina reo nanday fitaovam-pialia.

Nivola ty manam-pahaiza raiky kaihy hoe Joachim Jeremias fa “laha mpiamby tamy Tempoly tao rey ro niavy teo mba hanambotsy ani-Jesosy, le vomaiky mazava ty dikani-safàny tamy fotoa nanambora azy iny hoe nampianatsy tamy Tempoly tao avao ie sanandro fe tsy nisambory (Mat. 26:55).” Nieritseritsy koa ie fa mbo mpiamby amy tempoly ao reo avao ro nirahy hanambotsy ani-Jesosy talohani-zay. (Jaona 7:32, 45, 46) Tafara tatoy, le nahazo iraky maramila reo miaraky amy ty sefon-drozy mba handay ani-mpianatsini-Jesosy rey alohani-Fitsarà Anabo Jiosy eo. (Asa. 4:1-3; 5:17-27) Mety mbo rozy avao koa ro teo lafa nitaritarihy ambalikini-tempoly any Paoly.—Asa. 21:27-30.