Tantara 28

Ty Fomba Nanavòta An’i Mosesy

HENTEO moa anak’ajà kelikele tomàny noho mitanjake tanan’ampela io. Mosesy io. Hainao va hoe ia ampela soa eo io? Anak’ampela’ty mpanjakan’i Ejipta io, anak’ampelan’i Farao.

Navònin-drenine tanaty telo vola ajà io, satria tsy teane hovonò’ty Ejipsiana. Fe nihaine fa mety ho tratsy Mosesy, ka io ty raha nataone mba hanavòtane aze.

Nangalake panié ie, ka namboarine soa, ami’zay tsy hilìran-drano. Nampilìrine tao Mosesy, bakeo nengàne tan-tsisy Ranon’i Neily teo panié nisy aze iny. Nivòla tamin’i Miriama, anabavin’i Mosesy, renin-droze iny, mba hitsanga marinirinike teny ami’zay hahita ty raha hiseho.

Tsy ela tafarani’zay, le nijòbo tamy Ranon’i Neily tao anak’ampelan’i Farao iny mba hiandro. Nahita panié tanaty zozoro tao ie. Nikaike ty raike tamy mpanompovavine reny ie, ka nanao hoe: ‘Ndahàna alao ho ahy panié roy.’ Laha fa nosokafine panié iny, le nahita anak’ajà kelikele soasoa tao ie! Nitàny Mosesy ka niferenesa anak’ampelan’i Mpanjaka io. Tsy teane ty hamonòa aze.

Bakeo, niavy Miriama, hita amy sary eo io. Nanontanian’i Miriama anak’ampelan’i Farao io hoe: ‘Handeha hikaike ampela israelita hikarakara ajà io ho anao va aho?’

‘Eka, mandehàna’, hoy anak’ampelan’i mpanjaka iny.

Nandeha tamy renine ane malaky Miriama mba hivòla aze. Ka laha fa niavy tamy anak’ampelan’i mpanjaka teo renin’i Mosesy iny, le hoy ty asa anak’ampelan’i mpanjaka iny hoe: ‘Rambeso ajà toy, ka tezào soa, fa ho karamàko iha.’

Afake nikarakara ty anane avao renin’i Mosesy iny. Ka laha fa nihabe Mosesy, le nandesine tamy anak’ampelan’i Farao tane. Natsanga anan’i Farao io ho anane Mosesy. Zay ty antone nahavy an’i Mosesy ho be tan-tranon’i Farao tao io.

Eksodosy 2:1-10.