Fianara 6

Ino moa ty Fanjakà’Andranahare?

Aia ro misy ty Fanjakà’Andranahare? (1)

Ia ro Mpanjaka’e? (2)

Misy olo hafa koa va miarake manjaka ami’y Mpanjaka io? Laha misy, firy? (3)

Ino ro porofo fa miay ami’ty andro fara’e tsika henany zao? (4)

Ino ty hatao’ty Fanjakà’Andranahare ho ahi’ty olombelo ami’y hoave? (5-7)

1. Tami’i Jesosy tan-tany etoy, le nampianatsy ty mpiana’e hivavake mba hiavia’ty Fanjakà’Andranahare. Ty fanjakà le fitondrà tarihi’ty mpanjaka raike. Fitondrà miavake ty Fanjakà’Andranahare. An-danitse ane ro misy aze io, ka handay tany toy. Hohamasìni’e kea ty anara-Ndranahare. Hampanao ty sitrapò-Ndranahare an-tany etoy, manahake ty fa anaòva aze an-danitse ane Fanjakà io.—Matio 6:9, 10.

2. Nampitamà Andranahare, fa ho Mpanjaka’y Fanjakà io Jesosy. (Lioka 1:30-33) Tami’i Jesosy tan-tany etoy, le fa hay fa ho Mpanjaka soa fanahy, tea raha mahity, noho tsy manan-tsiny. Tsy avy le natao Mpanjaka’ty Fanjakà’Andranahare ie laha fa nimpoly an-danitse ane. (Hebreo 10:12, 13) Tami’y 1914, vo namea’i Jehovah an’i Jesosy ty fahefà nampitamàni’e aze. Nanomboke tami’zay, le nanjaka an-danitse ane Jesosy, aze Mpanjaka nofilì’i Jehovah iny.—Daniela 7:13, 14.

3. Nisy lahilahy ndreke ampela tsy nivalike kea, nofilì’i Jehovah mba handeha an-danitse ane. Baka an-tany etoy rozy reo. Hiarake hanjaka ami’i Jesosy, ka ho mpanjaka, ho mpitsara noho mpisòro ho ahi’ty olombelo. (Lioka 22:28-30; Apokalypsy 5:9, 10) Nokaìhi’i Jesosy hoe “aondry vitsy” aze hiarake hanjaka ami’e reo. Misy 144 000 ty isan-droze.—Lioka 12:32; Apokalypsy 14:1-3.

4. Laha vo ni-Mpanjaka Jesosy, le noroahi’e baka an-danitse ane ho an-tany etoy Satana noho anjeli’e raty fanahy reny. Zay ro mahave ty fiaìna an-tany etoy ho raty biby, nanomboky tami’y 1914 io. (Apokalypsy 12:9, 12) Ty sasa’e ami’y “famantara” fa, fa mpanjaka Jesosy henany zao le retoa iaby: aly, keré, arete mandripake ain’olo maro, fitomboa’ty fandikà lalàna. Reo koa ro amantara fa kelikele tavela le ho tampitsy tontolo raty toy.—Matio 24:3, 7, 8, 12; Lioka 21:10, 11; 2 Timoty 3:1-5.

5. Tsy ho ela Jesosy le hitsara ty olo, ka hanavake an-droze manahake fanavàha aondry ami’ty aosy. Ze olo tsy mivalike ami’e fa manorike ty safà’e ro atao hoe “aondry.” Hahazo fiaìna mandrakizay an-tany etoy roze. Fa ty “aosy” le aze mandà ty Fanjakà’Andranahare reny. (Matio 25:31-34, 46) Tsy ho ela le haripa’i Jesosy iaby ze aosy. (2 Tesalonianina 1:6-9) Laha tea’ao ty ho ‘aondri’i Jesosy’, le toko’e hojanjìni’ao soa hafatse mikasike Fanjakà iny. Toko’e hampifanarahi’ao ami’ty fiaìna’ao kea ze raha ianara’ao.—Matio 24:14.

6. Voazarazara ho firenena maro ty tany henany zao, ka samby mana ty fanjakà’e roze iaby. Matetike firenena reo ro mialy. Fe, ty Fanjakà’Andranahare le hisolo ty fanjakàn’olombelo iaby. Ie’io avao ro fanjakà handay ty tany iabiaby ami’y hoave. (Daniela 2:44) Tsy hisy sasy ty aly noho ty heloke bevava voho ty hasatà raty, ami’y fotoa zay. Hiay anati’y filamìna noho firaisan-tsay ty olo iaby.—Mika 4:3, 4.

7. Ho lavorare ty olombelo tsy mivalike, hanjary paradisa ty tany iabiaby, anati’y Fanjakà Arivo Tao’i Jesosy io. Ami’y fara’y arivo tao, le ho vita’i Jesosy iaby ty raha nampanaòvi-Ndranahare aze. Hampoli’i Jesosy amin-dRà’e Fanjakà io ami’y fotoa zay. (1 Korintianina 15:24) Manino laha volàny ami’ty longo noho ty nama’ao ty raha soa hatao’ty Fanjakà’Andranahare?

[Sary, pejy 13]

Tsy hisy fanabokà ndre fanavakavàha sasy, laha fa Jesosy ro Mpanjaka