Fianara 8

Fiaìnam-pianakavia Tea-Ndranahare

Ino ty toera’ty lahilahy ami’y fianakavia ao? (1)

Manao akore ty toko’e handesa’ty lahilahy ty vali’e? (2)

Ino iaby ty anjara asa’ty lahilahy? (3)

Ino ro anjara asa’ty ampela ami’y fianakavia ao? (4)

Ino ro ilà’Andranahare ami’ty rae amin-drene ndreke ty anake? (5)

Akore ro fihevera’ty Baiboly ty fisitàha noho ty fisaraha-panambalia? (6, 7)

1. Volàni’ty Baiboly, fa ty lahilahy ro loha’ty fianakavia’e. (1 Korintianina 11:3) Toko’e ho raiky avao ty vali’e. Toko’e ho vita soratse ami’y fanjakà roze morovale.—1 Timoty 3:2; Titosy 3:1.

2. Toko’e ho tea ty vali’e manahake ty vatatena’e, ty lahilahy. Toko’e handay ty vali’e manahake nanandesa’i Jesosy ty mpiana’e ie. (Efesianina 5:25, 28, 29) Tsy toko’e hamono ndra hampijale ty vali’e mihitsy ty lahilahy, fa hanome voninahitse noho hanaja azy kea.—Kolosianina 3:19; 1 Petera 3:7.

3. Toko’e hiasa mafy ty raim-pianakavia mba hamelòma ty fianakavia’e. Toko’e hanome hane, siky, noho trano ndreke fanampea ara-panahy ilà’ty fianakavia’e ty lahilahy. (1 Timoty 5:8) Ie ro voaloha’e manampe ty fianakavia’e hianatsy mikasike an’Andranahare noho mikasike ze raha eritsereti-Ndranahare hatao.—Deoteronomia 6:4-9; Efesianina 6:4.

4. Toko’e hanampe soa ty vali’e, ty ampela. (Genesisy 2:18) Azo’e atao ty manampe ty vali’e hampianatse noho hanazatsy soa ty anan-droze. (Ohabolana 1:8) Ilà’i Jehovah ty hikarakarà’ty ampela amim-pitiava ty fianakavia’e. (Ohabolana 31:10, 15, 26, 27; Titosy 2:4, 5) Toko’e hanàja soa ty vali’e ie.—Efesianina 5:22, 23, 33.

5. Ilà’Andranahare ty hanorìha’ty ajà ty rae noho ty rene’e. (Efesianina 6:1-3) Ilà’Andranahare ty hampianara noho hanitia’ty rae amin-drene ty ana’e. Mila manòka fotoa iaràha ami’ty ana’e ty rae amin-drene, sady mila mianatsy Baiboly miarake’ami’e. Manome ze raha ilà’ty anan-droze ara-panahy noho ara-pihetseham-po roze ami’zay. (Deoteronomia 11:18, 19; Ohabolana 22:6, 15) Tsy toko’e hasiaky noho ho meloke maré mihitsy ty rae amin-drene laha fa mamolake ty ana’e.—Kolosianina 3:21.

6. Laha fa misy tsy fifanaràha ami’ty mpivaly, le toko’e hiezake hanorike ze torohevitsy ambara’ty Baiboly roze. Mampirisike maré antsika ty Baiboly mba hampiseho fitiava noho hamela heloke. (Kolosianina 3:12-14) Ty Baiboly le tsy mampirisike ty hisitàha laha fa misy raha mampialy malinidiniky. Fe, mety hifìly hisitaky ty ampela raike, laha fa 1) mizìzo tsy te hamelo ty fianakavia’e ty lahilahy, ndra 2) satà loatse ie io, ka atahòra ho azon-doza ty fahasalamà noho ty ai’y ampela io, ndra 3) fa lisatsy maré ty fanohera’ty lahilahy ka tsy ahafaha’y ampela io hanompo an’i Jehovah.—1 Korintianina 7:12, 13.

7. Tsy toko’e handrànto ty olo manambaly. Manota ami-Ndranahare noho ami’ty vali’e ty olo mandrànto. (Hebreo 13:4) Ty fahatratsàra ty vali’ao mandrànto avao, ro anto’e raike eke’ty Baiboly azo isaràha ami’e ka ahafàha manambaly ndraike. (Matio 19:6-9; Romanina 7:2, 3) Heji’i Jehovah laha misara-panambalia tsy mifototse ami’y Baiboly ty mpivaly, ka manambàly olo hafa ndraike bakeo.—Malakia 2:14-16.

[Sary, pejy 16, 17]

Ilà’Andranahare ty hampianara noho hanitìa’ty rae amin-drene ty ana’e

[Sary, pejy 17]

Ty rae be fitiava le manome fanampea ara-nofo noho ara-panahy ilà’ty fianakavia’e