Fianara 9

Toko’e Halio ty Mpanompo-Ndranahare

Nanino tsika ro toko’e halio ami’ty raha iaby? (1)

Ino ty dika’y hoe malio ara-panahy? (2) mana fomba malio? (3) malio ara-tsay? (4) malio ara-bata? (5)

Fivolàna manao akore ro toko’e ho faly antsika? (6)

1. Malio sady masy Jehovah Andranahare. Ilà’e halio kea ty mpivavake ami’e: malio ara-panahy, mana fomba malio, malio ara-tsay, voho malio ara-bata. (1 Petera 1:16) Mila miezake maré tsika mba ho hita-Ndranahare fa malio. Miay ami’ty tontolo raike maloto tsika. Fa an’aintsika ao koa ty faniria hanao raty, ka toko’e hialy ami’zay tsika, fa tsy haneke ho resy.

2. Malio ara-panahy: Laha ta hanompo an’i Jehovah tsika, le ka orìhy sasy fampianara ndra fombafomba’ty fivavàha diso reo. Toko’e hihatake lavitse ty fivavàha diso tsika, ka tsy hiarake amin-droze reny ndra ami’ino ndra ami’ino. (2 Korintianina 6:14-18; Apokalypsy 18:4) Laha vo haintsika ty tò mikasike an’Andranahare, le toko’e hiamby soa tsika mba tsy ho fitahi’ty olo mampianatsy raha vande.—2 Jaona 10, 11.

3. Mana fomba malio: Tea’i Jehovah hana fomba malio avao ty mpivavake ami’e. (1 Petera 2:12) Hita’e iaby ze raha ataontsika, ndre mivòny manao akory aza. (Hebreo 4:13) Toko’e hialantsika lavitse ty fomba maloto, noho ty fomba raty hafa ami’y tontolo toy eto reo.—1 Korintianina 6:9-11.

4. Malio ara-tsay: Laha raha malio ro ampilirintsika an-tsaintsika ao, le hana fomba malio tsika. (Filipianina 4:8) Fe, laha sahìra amin-draha maloto ty saintsika, le hahavita raha raty tsika. (Matio 15:18-20) Toko’e hohalavirintsika ty fisà mangàla havozàha mety handoto ty saintsika. Azontsika fenoa raha malio ty saintsika laha fa mianatsy Baiboly.

5. Malio ara-bata: Solotena-Ndranahare ty Kristiana, ka toko’e halio avao ty vata’e noho ty siki’e. Toko’e hanasa tana tsika laha fa baka niamònto, noho laha fa handeha hihìna ndra hiketriky. Laha tsy mana kaboné iha, le toko’e hatao anaty lavake ty maloto’ao ka haléve. (Deoteronomia 23:13, 14) Mahasalama ty malio ara-bata. Toko’e hilàmy noho halio ty trano’ty Kristiana, ndra ty anati’e ao ndra ty lakòro’e. Toko’e ho ohatse soa an-tanà eo ty tranontsika.

6. Fivolàna malio: Toko’e hivòla raha tò avao ty mpanompo-Ndranahare. Tsy hilitsy ami’y Fanjakà’Andranahare ty mpavande. (Efesianina 4:25; Apokalypsy 21:8) Tsy mitìmbo ty Kristiana. Tsy mijànjy noho tsy mivòla somonga mahamenatse, ndra tantara maloto kea roze. Ka ami’ty fivolàna safà malio zay, le miavake roze am-piasà ane, noho an-dakilasy ane, voho ami’ty olo tanà raike ami’e eo.—Efesianina 4:29, 31; 5:3.

[Sary, pejy 18, 19]

Toko’e halio ami’ty raha iaby ty mpanompo-Ndranahare